PFUNZIRO 6

Kubveranisa Mavesi na Nkhani Munkufotokozayo

Juwau 10:33-36

BZOMWE MUNGACITE: Lekani kumbandowerenga mavesi, mucisiya tenepoyo. Koma tsimikizirani kuti abveseri wanuwo ankuwona kubverana kwa vesi lomwe mwawerengalo na nfundo yomwe munkuifotokozayo.

MOMWE MUNGACITIRE:

Tsindikani mafala yakufunika. Mukamala kuwerenga vesi, tsindikani mafala yomwe yankubveraniratu na nfundo ikulu munkuilewayo. Mungacite bzimwebzi mwakubwerezera pomwe mafalayo, ayai mwa kucita mbvunzo omwe ungathandize abveseri wanu kuzindikira mafala yomwe yankubverana na nfundo ikuluyo.

Mukaphatisa basa mafala yakusiyana kuti mubwerezere nfundo yakulewedwa m’vesiro, tsimikizirani kuti abveseri wanuwo ankukwanisa kuwona kubverana kwa mafala ya m’Bibliyayo na nfundo munkubvekesayo.
Tsindikani nfundo yomwe mun’funa kuti abveseri wanu aikumbukire. Penu munilewa thangwe lomwe muniwerengera vesi, fotokozani momwe mafala ya m’vesiro yankubveranira na thangwe lomwe mwalewalo.

Pomwe munkufotokoza vesi, Bibliya lanu mumbalisiye lidafungula. Bzimwebzi bzimbathandiza abveseri wanu kubveranisa mafala ya vesiro na bzomwe mwamala kuwerengabzo.
Latizani mwakusaya kunesa momwe munkuphatisira basa vesiro. Tcenkhani kufotokoza mbali za m’vesiro zomwe zinkubverana lini na nkhani yomwe munkucezayo. Pambuyo pa kuzindikira bzomwe abveseri wanu ambadziwa kale bza nkhaniyo, ndowonani kuti ni nfundo ziponi zomwe mun’funika kuzifotokoza kuti abveseri wanuwo azibvesese mwakusaya kunesa.