Mareferentsiya ya Kabukhu ka Mitsonkhano ka Moyo Wathu na Utumiki
1-7 MARÇO
CUMA CA M’FALA LA MULUNGU | MIREWENGO 7–8
“Bzomwe Tingapfunze na Tsasa la Ajirayeri”
it-1 tsa. 497 ndi. 3
Gwere
Wale omwe akhali anyakunyang’anira mu Jirayeri, akhambacita bzinthu pa kuimikira mtundu wentse. (Eza 10:14) Tenepo ‘atsogoleri wa madzinza’ adakapereka ntsembe pambuyo pa kumangidwa kwa tendi la mkonkhano. (Mirew 7:1-11) Ndipombo omwe adalumbira mwakuphatisa basa selo kuti aniteweza ‘mpangano wakukhulupirika’ mu ntsiku za Nehemiya akhali antsembe, Alevi, na ‘akulu-akulu wa mbumba.’ (Neh 9:38–10:27) Mkati mwa ulendo bomwe Ajirayeri adacita mu dambo, ‘pakhana atsogoleri wa mbumbayo, na omwe akhambaimikira pa mitsonkhano, amuna wakubvekera,’ ndipo 250 mwa iwo adakhala ku mbali ya Kora, Datani, Abiramu na Oni pakuphindukira Mozeji na Aroni. (Mirew 16:1-3) Mwakubverana na malango yakucokera kwa Mulungu, Mozeji adasankhula amuna wakukwana 70 omwe akhali akulu wa mbumbayo, kuti ambamuthandize kusamalira nkhani zinango zomwe angadakwanisa lini kuzisamalira yekha. (Mirew 11:16, 17, 24, 25) Pa Mwambo 4:15 pambalewa bza ‘akulu-akulu wa mbumba,’ ndipo bzikuwoneka kuti omwe akhambaimikira mbumbayo akhali akulu-akulu wa mtunduyo, misolo ya mabanja, ayeruzi na atsogoleri.—Mirew 1:4, 16; Djos 23:2; 24:1.
it-2 tsa. 796 ndi. 1
Rubeni
Mu tsasa la Ajirayeri, dzinza la Rubeni likhali ku mbali ibodzi-bodzi na madzinza ya Simiyoni na Gadi. Iwo akhali kummwera (Sul) kwa tendi la mkonkhano. Pa kufuluka, madzinza matatu yomwe yakhambatsogoleredwa na dzinza la Rubeniya, yakhambatewera madzinza matatu yomwe ni Djuda, Isakari na Zebulani. (Mirew 2:10-16; 10:14-20) Pa kupereka ntsembe pa ntsiku ya kufungulira tendi la mkonkhano, madzinzaya yadateweranambo mwa njira ibodzi-bodziyi.—Mirew 7:1, 2, 10-47.
Cuma Cauzimu
it-1 tsa. 835
Mwana Wakuyamba Kubadwa
Pakuti wana wakuyamba kubadwa wa Ajirayeri ndiwo angadadzakhala misolo ya mabanja, iwo akhaimikira mtundu wentse. Ndipo Yahova adalewa kuti mtundu wentse wa Jirayeri ni ‘mwana wakuyamba kubadwa,’ thangwe ni mtundu omwe adayamba kuusankhula mwakucita mpangano na Abalahamu. (Kuf 4:22) Pakuti akhadawapulumusa, Yahova adalewa kuti wana wakuyamba kubadwa wentse wa Ajirayeri na wa bzifuwo apambulidwe kuti akhale wace. (Kuf 13:2) Tenepo, wana wakuyamba kubadwawa, akhadaperekedwa kwa Mulungu.
8-14 MARÇO
CUMA CA M’FALA LA MULUNGU | MIREWENGO 9-10
“Momwe Yahova Ambatsogolerera Wanthu Wace”
it-1 tsa. 398 ndi. 3
Tsasa
Kucosa tsasa likulu la Ajirayeri pa mbuto inango kuti liyende pa mbuto inango, (mbuto pafupifupi 40 zomwe adamanga matsasa zimbafotozedwa na Mozeji pa Mirewengo 33) kukhalatizambo kalinganizidwe kakudabwisa. Pomwe mtambo ukhaima padzaulu pa tendi la mkonkhano, tsasalo likhapitiriza kukhala mbuto ibodzi. Pomwe mtamboyo ukhacoka, tsasalo likhacokambo. ‘Yahova akalewa kuti aime, iwo akhaima, ndipo Yahova akalewa kuti aguduke, iwo akhaguduka.’ (Mirew 9:15-23) Bzimbututu bziwiri bzakukonzedwa na prata mwakucita kukhoma na martelo ayai nyundo bzikhambaphatisidwa basa pakudziwisa wanthuwo bzomwe Yahova alewa. (Mirew 10:2, 5, 6) Kalizidwe kakupambulika kakhacitisa kuti wanthuwo afuluse tsasa. Bzimwebzi, bzidacitkika kakuyamba ‘mu gole laciwiri [gole la 1512 pomwe Jezu akhanati kubwera], mwezi waciwiri pa ntsiku ya 20 ya mweziyo.’ Pomwe Thungwa la Mpangano lidanyamulidwa, gulu lakuyamba la madzinza matatu, lomwe likhatsogoleredwa na dzinza la Djuda, ndipo likhateweredwa na madzinza ya Isakari na Zebulani lidaguduka. Patsogolo pace, adatewerambo Ajerisoni na Amerari omwe akhadanyamula bzinthu bza m’tendi la mkonkhano, bzomwe akhadauzidwa kuti ambanyamule. Ndipo patsogolo pace lidatewera pomwe gulu la madzinza matatu lomwe likhatsogoleredwa na dzinza la Rubeni ndipo likhateweredwa na madzinza ya Simiyoni na Gadi. Pambuyo pa amwewa, padabwerambo Akowati omwe akhadanyamula bzinthu bzakumangira tendi la mkonkhano. Padaabwera pomwe gulu lacitatu la madzinza matatu lomwe likhatsogoleredwa na dzinza la Efraimu, ndipo likhateweredwa na madzinza ya Manase na Benjamini. Ndipo m’mbuyo mukhana gulu lomwe likhatsogoleredwa na dzinza la Dani ndipo likhateweredwa na madzinza ya Aseri na Nafitali. Thangwe ra bzimwebzi, madzinza yamphanvu na yomwe yakhana wanthu azinji, yakhakhala m’mbuyo na kutsogolo.—Mirew 10:11-28.
Cuma Cauzimu
it-1 tsa. 199 ndi. 3
Mitsonkhano
Kufunika kwa Kumbatsonkhana. Kufunika kwa kutsonkhana kuti tigumane phindu na bzomwe Yahova ambapfuzisa kumbabvekesedwa bwino na makonzedwe ya Paskwa yomwe ikhambacitika gole liri-lentse. Mwamuna ali-wentse wakucena omwe akhali lini pa ulendo, akasaya kugumanika pa Paskwa akhafunika kuphedwa. (Mirew 9:9-14) Pomwe Mambo Ezekiya adacemera wanthu wa ku Djuda na wa ku Jirayeri kuti adzacite Paskwa, adawauza kuti: ‘Imwe wana wa Jirayeri bwererani kwa Yahova . . . Tsapano lekani kuumisa mitima yanu ninga momwe yadacitira makolo yanu yakale. Bverani Yahova ndipo bwerani ku nyumba yace yakupambulika, yomwe iye aicenesa mpaka kale-kale, ndipo tumikirani Yahova Mulungu wanu kuti ukali bwace bwakugaka bucoke kwa imwepo. . . . Yahova Mulungu ngwakudeka mtima na wakulekerera ndipo an’dzakusiyani lini mukabwerera kwa iye.’ (2Nkha 30:6-9) Kuleka kugumanika utowa kukhalatiza kusiya Mulungu. Ndipo, napo kuti Akristau ambacita lini Paskwa, Paulo adawalimbisa kuti aleke kusiya kumbatsonkhana na wanthu wa Mulungu. Iye adati: ‘Ndipo bwerani timbakumbukirane kuti tilimbisane pa lufoyi na pa mabasa yabwino. Tireke kusiya kutsonkhana kwathu pabodzi ninga momwe winango ambacitira, koma timbalimbisane maka-maka pomwe tinkuwona kuti ntsikuyo inkufika.’—Waheb 10:24, 25; onani CONGREGAÇÃO.
15-21 MARÇO
CUMA CA M’FALA LA MULUNGU | MIREWENGO 11-12
“Thangwe Ranyi Tin’funika Kutcenkha Kung’ung’udzika?”
it-2 tsa. 719 ndi. 4
Kunesana
Kung’ung’udzika. Kung’ung’udzika kumbatepesa ndipo kumbagobola m’mabondo. Pomwe padapita nthawe yakucepa kucokera pomwe Ajirayeri adacoka ku Edjipito, iwo adayamba kudandaulira Yahova, acimbalewa kuipa utsogoleri bomwe iye adabukhazikisa mwakuphatisa basa atumiki wace omwe ni Mozeji na Aroni. (Kuf 16:2, 7) Kung’ung’udzika kwawoko, kudadzagobola mabondo Mozeji mpaka iye adafika pa kukumbira kuti afe. (Mirew 11:13-15) Kung’ung’udzika kungabwerese ngozi ikulu kwa nyakung’ung’udzikayo ndipo kungamuphese. Yahova akhawona bzomwe wanthu akhambalewa pakung’ung’udzikira Mozeji kuti ni kuphindukira utsogoleri bwace caibo. (Mirew 14:26-30) Azinji adaluza moyo thangwe ra bzinthu bzakuipa bzomwe adalewa.
Cuma Cauzimu
it-2 tsa. 309
Mana
Momwe Yakhaliri. Mana yakhali ‘macena ninga mbeu ya coentro’ ndipo kawonekedwe kace kakhali ninga bdélio, comwe ni cinthu cakungwerewera ninga mwala wakufunika kwene-kwene. Goso lace likhali ‘ninga mabulaxa yakuikha uci’ ayai ‘bolo lakutapira kwene-kwene’ lakuikhidwa mafuta ya azeite. Pambuyo pa kupeya pa thumba ayai kudera m’banda, manayo yakhambaphikidwa ayai kukonzedwa mabolo yaciwotcedwa.—Kuf 16:23, 31; Mirew 11:7, 8.
22-28 MARÇO
CUMA CA M’FALA LA MULUNGU | MIREWENGO 13-14
“Momwe Cikhulupiro Cimbatithandizira Kukhala Wakukhwimika”
Cuma Cauzimu
it-1 tsa. 740
Dziko Lomwe Mulungu Adapasa Ajirayeri
DZIKO lomwe Yahova adapasa Ajirayeri likhali dziko labwino kwene-kwene. Pomwe Mozeji adatumiza azondi kuti akawone dziko lomwe Mulungu angadawapasa na kutenga bzinango mwa bzinthu bza m’dzikolo, iwo adabwerera na nkhuyu, bzisapo bzakucemeredwa romãs, na mthawi ukulu wa uva omwe ukhadanyamulidwa na amuna awiri pa muti! Napo kuti iwo adabwerera na mantha thangwe ra kusaya cikhulupiro, adalewa kuti: Dzikolo limbayereradi ‘mkaka na uci.’—Mirew 13:23, 27.
29 MARÇO–4 ABRIL
CUMA CA M’FALA LA MULUNGU | MIREWENGO 15-16
“Mphole kuti Muleke Kubzikuza na Kubzithemba”
Cuma Cauzimu
w98 1/9 tsa. 20 ndi. 1-2
Ikhani pa Mbuto Yakutoma Bzinthu Bzakufunika Kwene-Kwene
Yahova akhawona kuti nkhaniyo njikulu kwene-kwene. Tenepo Bibliya limbati ‘Yahova adauza Mozeji kuti: “Munthuyo an’funika kuphedwa.”’ (Mirewengo 15:35) Thangwe ranyi Yahova adakalipa na bzomwe munthu ule adacita?
Wanthuwo akhana ntsiku zitanthatu kuti atcole nkhuni na kucita bzinthu bzinango bzakufunikira pa moyo ninga kukonzekera cakudya, bzakubvala na kukonza mbuto yakukhala. Ntsiku yacinomwe akhafunika kuiphatisa basa kuti apfunze fala la Yahova. Napo bzikhali lini bzakuletsedwa kutcola nkhuni, bzikhabvumizidwa lini kucita bzimwebzi pa ntsiku yomwe ikhadasankhulidwa kuti ambanamate Yahova. Napo kuti Akristau ali lini pantsi pa Cakutonga ca Mozeji, cakucitikaci cikutipfunzisa kufunika kwa kuikha pa mbuto yakutoma bzinthu bzakufunika. Kodi n’tenepo lini?—Wafiripo 1:10.
5-11 ABRIL
CUMA CA M’FALA LA MULUNGU | MIREWENGO 17-19
12-18 ABRIL
CUMA CA M’FALA LA MULUNGU | MIREWENGO 20-21
“Pitirizani Kukhala Wakufatsa Mukacitiridwa Bzakuipa”
Khalani Wakufatsa Kuti Mukondwese Yahova
Tikakhala wakufatsa tin’dzatcenkha kucita bzinthu bzakuphonyeka. Kumbukirani bzomwe bzidacitika na Mozeji. Iye adamala magole mazinji akucita bzinthu mwa kufatsa ndipo Yahova akhakomedwa naye. Koma kuphampha kwa magole 40 yomwe Ajirayeri akhadadzungaira m’dambo, Mozeji adatazira kukhala wakufatsa. Pa nthaweyi pakhadandopita nsiku zakucepa pomwe mpfumakazi yace yomwe idamupulumusa ku Edjipito ikhadafa, ndipo idapendesedwa ku Kadesi. Tenepo, Ajirayeri adayamba pomwe kudandaula kuti akusamaliridwa lini bwino. Tsono pa nthaweyi iwo ‘akhanesana na Mozeji’ thangwe ra kusaya madzi. Wanthuwo adacita bzimwebzi napo kuti adawona bzinthu bzakudabwisa bzomwe Yahova akhadawacitira na utsogoleri bomwe Mozeji adacita kwa magole mazinji. Iwo adadandaula sikuti kokha thangwe ra kusaya madzi, koma adadandaulirambo Mozeji, mwa kumupasa mulandu wakuti ndiye omwe adawacitisa kukhala na nyota.—Mirewengo 20:1-5, 9-11.
Khalani Wakufatsa Kuti Mukondwese Yahova
Thangwe ra bzimwebzi, Mozeji adakalipa kwene-kwene ndipo adasiya kukhala wakufatsa. Bzimwebzi bzidamucitisa kuti atazire kucita bzomwe Yahova akhadamuuza bzakuti akalewelewe na tsendwa, m’mbuto mwace, iye adakalipira wanthuwo ndipo adawauza kuti iye ndiye angadawacosera madziyo. Pambuyo pace, iye adamenya tsendwalo kawiri kense ndipo yadacoka madzi mazinji. Tenepo, kubzikuza na ukali bzidacitisa Mozeji kucita pikado ikulu. (Psalymo 106:32, 33) Ndipo thangwe ra kusaya kukhala wakufatsa mu kanthawe kakucepa, Mozeji alibe kubvumizidwa kupita m’Dziko Lakupiciridwa.—Mirewengo 20:12.
Ifepano timbapfunza bzinthu bzizinji na ciratizoci. Cakuyamba, tin’funika kucita nyongo kuti tipitirize kukhala wakufatsa. Tsono tikaleka kukhala wakufatsa, tin’dzayamba kubzikuza ndipo tin’dzafika pakulewa na kucita bzinthu bzakusaya kuthemera. Caciwiri, msunamo ungatitazise kukhala wakufatsa, tenepo tin’funika kulatiza khalidweri napo tikagumana na mabvuto.
19-25 ABRIL
CUMA CA M’FALA LA MULUNGU | MIREWENGO 22-24
“Yahova Adacitisa Kuti Temberero Likhale Cisimbo”
it-2 tsa. 291
Psiru
Upsiru Bwakutsutsana na Yahova. Mpolofeta Balamu akhafuna kutemberera Ajirayeri kuti atambire kobiri kwa mambo wa Amoabe wakucemeredwa Balaki ndipo kumweku kukhali kusaya nzeru. Koma Yahova alibe kubvuma ndipo adamutazisa kucita bzomwe akhafunabzo. Pakulewa bza Balamu, mpostolo Pedru adanemba kuti ‘cirombo cakusaya kulewalewa comwe cimbatakula mitolo, cidalewalewa ninga munthu cicitazisa mpolofetayo kucita bzaupsiru.’ Pakufuna kulewa bza upsiru bwa mpolofetayo, mpostoloyu adaphatisa basa fala lacigirego lakuti pa·ra·phro·niʹa, lomwe limbafuna kulewa bza ‘munthu omwe nzeru zace ziri lini bwino.’—2Pe 2:15, 16; Mirew 22:26-31.
26 ABRIL–2 MAIO
CUMA CA M’FALA LA MULUNGU | MIREWENGO 25-26
“Kodi Bzicito bza Munthu M’bobzi Bzingabwerese Phindu kwa Winango?”
‘Thawani Unzazi!’
AKHOMBWE ambayenda kukamedza ku mbuto komwe kuna mtundu wa ntsomba zomwe ambafuna. Iwo ambasankhula nyambzo yabwino ndipo ambaiikha ku medzo aciithusa m’madzi. Iwo ambadikhirira mwakupirira ndipo ntsomba ikaluma nyambzoyo, iwo ambapfuwa medzo, aciphata ntsombayo.
Mu njira ibodzi-bodziyi, wanthu angamedzedwembo. Mwa ciratizo, pomwe Ajirayeri akhadasala pang’ono kupita mu Dziko Lakupiciridwa, iwo adamanga matsasa m’Cigwa ca Moabe. Tsono mambo wa ku Moabeko adauza mwamuna m’bodzi wakucemeredwa Balamu kuti angadamupasa kobiri zizinji penu angadakwanisa kutemberera Ajirayeri. Tsono pomwe Balamu adatazira kuwatembererako, iye adakumbuka njira inango yomwe ingadacitisa Ajirayeriwo kubzitemberera wokha. Iye adaphatisa basa atsikana wa ku Moabe ninga nyambzo. Iye adatumiza atsikanawo ku matsasa ya Ajirayeriwo kuti akapumpse amuna wacijirayeri.—Mirewengo 22:1-7; 31:15, 16; Cibvumbulutso 2:14.
‘Thawani Unzazi!’
Thangwe ranyi Ajirayeri azinji adabvuma kupumpsika na makonzedwa ya Balamuya? Ni thangwe rakuti iwo akhandokumbukira bza iwo okha basi ndipo akhadayebweratu bzentse bzomwe Yahova akhadawacitira. Iwo akhana mathangwe mazinji yakukhalira wakukhulupirika kwa Mulungu. Iye adawatsudzula mu ukapolo ku Edjipito, adawasamalira mu dambo ndipo tsapano akhali pa msuwo caipo kuti apite mu Dziko Lakupiciridwa. (Wahebereu 3:12) Napo na bzentse bzomwe Mulungu akhadawacitirabzi, iwo adapumpsika basi acicita upombo. Mpostolo Paulo adalewa kuti: ‘Ndipo tirekembo kucita unzazi, ninga momwe winango adacitira bza unzazibzo, acifa.’—1 Wakolinto 10:8.
Cuma Cauzimu
it-1 tsa. 359 ndi. 1-2
Malire
Tsono, bzikuwoneka kuti pomwe akhagawa mbuto kwa madzinza yale, akhacita bzimwebzi mwakuphatisa basa njira ziwiri: kucita mayere na kukula kwa dzinza liri-lentse. Pinango-pentse mayere yakhandolatiza mbuto yomwe dzinza liri-lentse lingadatambira, bzimwebzi bzikhacitisa kuti iwo adziwe komwe dzinza liri lentse lingadakakhala, penu kumpoto ayai kummwera, kumabvadzuwa ayai kumadokero, mphepete mwa nyanza ayai m’cigawo ca mapiri. Bzomwe akhawona pambuyo pa kucita mayere, bzikhacokera kwa Yahova; bzimwebzi bzikhacitisa kuti aleke kucitirana njiru na kunesana. (Mwam 16:33) Mwa njira imweyi, Mulungu akhatsogolera kuti bzomwe bzikhacitika na dzinza liri-lentse, bzikhale bzakubverana na polofesiya yomwe Djakobo adailewa, pomwe akhadasala pang’ono kufa pa cinembo ca Ciyambo 49:1-33.
Pambuyo pa mayereyo kulatiza mbuto yomwe dzinza liri-lentse lin’khala, bzikhafunika kulewa kuti dzikolo lin’khala likulu tani mwakuphatisa basa njira yaciwiri, yomwe ni kuwona kuwanda kwa wanthu wa m’dzinzalo. ‘Mun’funika kukagawanisa dzikolo kwa mabanja yanu mwakuphatisa basa mayere. Kwa dzinza lomwe lina wanthu azinji, imwepo mun’funika kuthumizira utaka bwawo ndipo kwa dzinza lomwe lina wanthu pang’ono mun’funika kucepesa utaka bwawo. Utaka bwa ali-wentse bunikhala komwe mayere yati yalatize.’ (Mirew 33:54) Mbuto yomwe dzinza likhapasidwa kuti likhale mwakucita mayere, ikhapitiriza kukhala ibodzi-bodzi, koma bzikhakwanisika kuicepesa ayai kuikuza. Tenepo, pomwe adawona kuti mbuto ya dzinza la Djuda ikhali ikulu kwene-kwene, adaigwata acipereka mbali inangoyo kwa dzinza la Simiyoni.—Djos 19:9.