Mareferentsiya ya Kabukhu ka Mitsonkhano ka Moyo Wathu na Utumiki
© 2023 Watch Tower Bible and Tract Society of Pennsylvania
4-10 SETEMBRO
CUMA CA M’FALA LA MULUNGU | ESTERI 1-2
“Citani Nyongo Yakuti Mukhale Wakubzicepesa Ninga Esteri”
Mungapitirize Kukhala Wakubzicepswa Napo Munkugumana na Mayezo
11 Nthawe zinango wanthu angambatitumbize ayai kutipasa ulemu bwakunyanyira. Bzimwebzi bzingayeze cikhulupiro cathu. Esteri akhapasidwa ulemu bukulu kwene-kwene. Iye akhali m’bodzi mwa akazi wakudeka mu Utongi bwa Perisiya. Esteri pabodzi na atsikana winango adamala gole libodzi akudekesedwa kuti adzasankhulidwe na mambo. Patsogolo pace mambo adasankhula Esteri kuti akhale mkazi wace. Kodi Esteri adayamba kubzikuza thangwe ra bzimwebzi? Ne. Esteri alibe kubziwona ninga wakufunika kwene-kwene kuposa anzacewo. Iye adapitiriza kukhala wakubzicepswa, wakudeka mtima na wa ulemu. — Est 2:9, 12, 15, 17.
ia tsa. 130 ndi. 15
Adakhala Wakukhwimika Kuti Akhotcerere Wanthu wa Mulungu
15 Pomwe nthawe idakwana yakuti Esteri akawonekere kwa mambo, iye adapasidwa mwayi wakuti alewe ciri-centse comwe akhafuna, pinango kuti athimizire kubzidekesa kwace. Mwakubzicepesa, iye alibe kulewa ciri-centse pa kuthimizira bzomwe Hegai adalewa. (Est 2:15) Iye adadziwa kuti kudeka ndiko lini kungadacitisa kuti mamboyo amusankhule. Iye akhadziwa kuti cakufunika kwene-kwene ni kukhala wakubzicepesa. Tsono kodi bzimwebzi bzidathandizadi?
Mungapitirize Kukhala Wakubzicepswa Napo Munkugumana na Mayezo
12 Penu ndife wakubzicepswa, tin’dzabvala na kucita bzinthu bzakulatiza kuti timbalemekeza winango, ninga momwe timbabzilemekezera tekha. M’mbuto mwa kubzitumbiza ayai kubziwonesera kuna wanthu, tin’funika kuyeza kukhala ‘na mzimu wakuderekha na wakupfatsa.’ (Werengani 1 Pedru 3:3, 4; Jer 9:23, 24) Mafala yathu na bzakucita bzathu bzin’dzalatiza kuti ndife wakubzicepswa ayai ne. Mwa ciratizo, tingacitise winango kuwona ninga kuti ndife wakupambulika thangwe ra bzinthu bzomwe timbacita, bzomwe timbadziwa ayai na wanthu omwe timbawadziwa. Ayai tingacitise kuti wanthu awone ninga kuti tacita tekha cinthu cinango cakufunika kwene-kwene, pomwe cinthuco tacita kuthandizidwa na winango. Koma kumbukirani bza Jezu. Angadakhala kuti akhana cakulinga cakufuna kubziwonesera, iye angadadabwisa wanthu thangwe ra nzeru zomwe akhanazo. M’mbuto mwace, bzomwe Jezu kawiri-kawiri akhafotokoza bzikhacokera m’Fala la Mulungu. Iye akhafuna lini kuti wanthu amupase mbiri. Iye nthawe zense akhafuna kuti mbiri yense iyende kwa Yahova. — Ju 8:28.
Cuma Cauzimu
Kodi Mukhadziwa?
Anyakufukulawo adagumana cinthu cibodzi comwe Aperisi akhambanemba mafala. Pa cinthu cimweci, iwo adawona kuti pakhadanembedwa dzina lakuti Marduka (mu Cinyungwe Mordekai). Iye akhaphata basa la kunyang’anira. Ndipo pinango pentse iye akhanyang’anira cuma ca mambo ku Susani. Arthur Ungnad, omwe ni mdziwi wa nkhani zakale ku Médio Oriente, adalewa kuti pa nthawe imweyire, cinthu comwe cidagumanidwaci “ndico cokha comwe cikhaguma dzina la Mordekai kupambula Bibliya.”
Kuyambira nthawe yomwe Ungnad adalewa mafala yamweya, adziwi adasandulizira mafala yomwe yakhadanembedwa pa bzinthu bzadongo bza Aperisi. Bzinango mwa bzinthu bzimwebzi bzidagumanidwa mu mzinda wa Persepolis, ndipo bzikhali pafupi na mpanda wa mzindayo. Imweyi ikhali mbuto yomwe akhakoyera cuma. Bzikuwoneka kuti mafalayo yadanembedwa mu utongi bwa Xerxe Wakuyamba. Mafalayo yadanembedwa mu cirewedwe ca Cielamu, ndipo yana madzina mazinji yomwe yambagumanikambo mu bukhu la Esteri.
Bzinthu bzizinji bzadongo bzomwe bzidafukulidwa mu mzinda wa Persepolis bzimbaguma dzina la Marduka, omwe akhali m’nembi mu nyumba ya mambo ku Susani mu utongi bwa Xerxe Wakuyamba. Cinthu cibodzi ca dongo comwe adagumana cimbalewa kuti Marduka akhali nyakusandulizira. Bzimwebzi bzikubverana na bzomwe Bibliya limbalewa pa nkhani ya Mordekai. Iro limbalewa kuti iye akhali m’bodzi mwa atumiki wa mambo omwe akhatumikira mu nyumba ya Mambo Asuwero (omwe ni Xerxe Wakuyamba). Pinango Mordekai akhalalewa bzirewedwe bziwiri. Iye akhambakhala pa msuwo wa nyumba ya mambo ku Susani. (Est 2:19, 21; 3:3) Msuwoyo ukhali ukulu kwene-kwene ndipo atumiki wa mambo akhambacitira mabasa yawo pa msuwo umweyu.
Pana kundendemerana kukulu pakati pa Marduka omwe ambafotokozedwa mu bzinthu bzadongo bzomwe bzidafukulidwa na Mordekai omwe ambafotokozedwa m’Bibliya. Tikulewa tenepo thangwe rakuti iwo adakhala na moyo mu nthawe ibodzi-bodzi, adakhala mbuto ibodzi-bodzi ndipo akhaphata basa libodzi-bodzi. Kundendemera kwentseneku kukulatiza kuti pinango Mordekai omwe ambafotokozedwa mu bzinthu bzakale-kale ni m’bodzi-bodzi na omwe ambafotokozedwa mu bukhu la Esteri.
11-17 SETEMBRO
CUMA CA M’FALA LA MULUNGU | ESTERI 3-5
“Thandizani Winango Kuti Acite Bzizinji pa Kutumikira Yahova”
it-2 tsa. 412 ndi. 3
Mordekai
Adalamba Kugodamira Hamani. Pomwe Hamani adaikhidwa kukhala nduna ya mambo na Asuwero, Asuweroyo adatonga kuti wanthu wentse pa msuwo wa mambo ambagodamire Hamaniyo. Mordekai adalamba kucita bzimwebzi thangwe rakuti akhali Mdjuda. (Est 3:1-4) Bzomwe Mordekai adacitabzi bzikulatiza kuti iye akhazindikira kuti kukhala wakubzipereka kwa Yahova cikhali cinthu cikufunika kwene-kwene. Iye akhadziwa kuti kugodamira munthu omwe ana udindo kukhali lini kwakuphonyeka. Ajirayeri akhambacita bzimwebzi. Tsono iye adazindikira kuti kugodamira Hamani kungadakhala kwakuphonyeka. (2Sa 14:4; 18:28; 1Am 1:16) Pakhana mathangwe yakubveka yakuti Mordekai alambe kugodamira Hamani. Bzikuwoneka kuti Hamani akhali m’Amaleki, ndipo Yahova adalewa kuti Ajirayeri angadacita nkhondo na Amaleki “na mbadwa zawo.” (Eki 17:16) Kwa Mordekai kulamba kugodamira Hamani kukhalatiza kuti akhafuna kukhala wakukhulupirika kwa Mulungu.
it-2 tsa. 412 ndi. 5
Mordekai
Adaphatisidwa Basa Kuti Apulumuse Ajirayeri. Pomwe lamulo lakuti Adjuda wentse aphedwe lidaperekedwa, Mordekai adalatiza cikhulupiro mwa kuuza Esteri kuti akhadasankhulidwa kuti akhale mkazi wa mambo kuti adzapulumuse Adjuda. Iye adakumbusa Esteri udindo bomwe akhanabo ndipo adamuuza kuti akadandaulire mambo na kumukumbira thandizo. Napo kuti kucita bzimwebzi kungadaikha moyo wace pa ngozi, iye adabvuma kucita bzimwebzo. — Est 4:7–5:2.
ia tsa. 133 ndi. 22-23
Adakhala Wakukhwimika Kuti Akhotcerere Wanthu wa Mulungu
22 Pinango Esteri adabva mantha pomwe adabva mafalayo. Pamwepa cikhulupiro cace cidayezedwa. Bzomwe Esteri adatawira kwa Mordekai bzidalatiza kuti iye akhana mantha kwene-kwene. Iye adakumbusa Mordekai bza lamulo lakuletsa munthu kukawonekera kwa mambo pomwe iye alibe kucemeredwa. Munthu akasaya kubvera lamulo limweri akhaphedwa. Munthuyo akhaphedwa lini mambo akamulata na mpsimbo yace ya oro. Ndipo iye akhakumbukira bzomwe bzidacitikira Vasiti pomwe iye adalamba kukawonekera kwa mambo. Napo kuti Esteri akhali mkazi wa mambo, mamboyo pinango angadamucitira lini ntsisi. Esteri adauza Mordekai kuti kukhadapita ntsiku 30 anati wacemeredwa na mambo. Bzimwebzi bzidacitisa Esteri kuyamba kupenukira penu mamboyo, omwe akhadiza lini kukalipa, akhapitiriza kumufuna. — Est 4:9-11.
23 Mordekai adatawira Esteri na mafala ya mphanvu kuti alimbise cikhulupiro cace. Adamutsimikizira kuti akaleka kucita ciri-centse, cipulumuso ca Adjuda cingadacokera kwinango. Tsono kodi Esteri angadapulumuka bzingadakhala kuti lamulo lakuti Adjuda aphedwe layamba kuphata basa? Bzikulatiziratu padeca kuti Mordekai akhakhulupira kwene-kwene Yahova ndipo akhadziwa kuti Yahovayo angadalekerera lini kuti wanthu wace wentse aphedwe ayai kulekerera kuti bzomwe akhadalewa bzireke kukwanisika. (Djs 23:14) Mordekai adabvunza Esteri kuti: “Mbani akudziwa? Pinango iwepo wakhala mkazi wa Mambo kuti uthandize pa nthawe imweyi.” (Est 4:12-14) Mordekai akhakhulupira Yahova Mulungu na mtima wace wentse. Kodi ifepano timbacitambo bzibodzi-bodzibzi? — Mim 3:5, 6.
Cuma Cauzimu
kr tsa. 160 ndi. 14
Kukhotcerera Ufulu bwa Kunamata Mulungu Mwakutsudzuka
14 Ninga Esteri na Mordekai, wanthu wa Yahova ntsiku zino ambakhotcerera ufulu bwawo bwa kunamata ninga momwe iye ambafunira. (Est 4:13-16) Kodi imwepo mungathandizirembo kukhotcerera ufulu bumwebu? Inde. Mungambapempherere mwakubwereza-bwereza abale na mpfumakazi zathu omwe akuzunzika thangwe ra malamulo ya m’dziko lawo. Mipembo ninga imweyi ingathandize kwene-kwene abale na mpfumakazi omwe akuzunzidwa. (Werengani Tiyago 5:16.) Tsono kodi Yahova ambatawira mipembo imweyi? Mirandu yomwe taganyali ikulatiza kuti Yahova ambatawira mipembo imweyi. — Ahe 13:18, 19.
18-24 SETEMBRO
CUMA CA M’FALA LA MULUNGU | ESTERI 6-8
“Phindu Lomwe Tingakhale Nalo Tikambalewalewa Bwino”
ia tsa. 140 ndi. 15-16
Adacita Bzinthu Mwanzeru, Mwakukhwimika na Mwakubzipereka
15 Pakuti Esteri adadikhirira kuti auze mambo mkumbiro wace, bzidacitisa Hamani kuti acite bzinthu bzomwe bzidamubweresera mabvuto. Yahova ndiye omwe adacitisa kuti mambo atazire kugona. (Mim 21:1) Ndipopa mafala ya Mulungu yambatilimbikisa kuti tin’funika ‘kumbadikhirira.’ (Werengani Mika 7:7.) Tikambadikhira kuti Mulungu atithandize pa mabvuto yathu, iye an’dzanyang’ana njira yabwino yakumalisira mabvuto yathuyo kuposa momwe ifepano tingadayamalisira tekha.
Adalalewa Mwakukhwimika
16 Esteri adawona kuti bzikhali lini bwino kuti mamboyo andodikhirire ne kumuuza cinthu. Ndipopa pa festa yaciwiri, iye adawona kuti bzikhali bwino kumuuza bzentse. Tsono, iye angadamuuza tani? Bzomwe bzidacitika mpsakuti mamboyo adamuuza kuti afotokoze mkumbiro wace. (Est 7:2) Esteri adawona kuti ikhadakwana “nthawe yakuti alewe.”
ia tsa. 140 ndi. 17
Adacita Bzinthu Mwanzeru, Mwakukhwimika na Mwakubzipereka
17 Pinango Esteri adapemba kwa Mulungu wace pomwe akhanati kuuza mambo mafala aya: “Penu mungandidekere mtima mambo, ndipo penu mungakomedwe nabzo, ndikukumbira kuti mupulumuse moyo wangu nakuti muleke kupha wanthu wa mtundu wangu.” (Est 7:3) Mafalaya yakulatiza kuti iye akhalemekeza bzomwe mamboyo angatonge mwakubverana na bzomwe wawona kuti mpsabwino. Bzomwe Esteri adacitabzi bzikulatiza kuti akhali wakusiyana na Vasiti, omwe akhali mkazi wa mambo wakale-kale. Vasiti adacitisa manyazi utowa mambo. (Est 1:10-12) Ndipo cinango n’cakuti Esteri alibe kunyoza Mamboyo thangwe ra kukhulupira bzinthu bzakunama bzomwe Hamani adalewa. Koma adakumbira mamboyo kuti amukhotcerere kuti aleke kuphedwa.
ia tsa. 141 ndi. 18-19
Adacita Bzinthu Mwanzeru, Mwakukhwimika na Mwakubzipereka
18 Mkumbiro umweyu udadabwisa kwene-kwene mamboyo ndipo iye adawona kuti bzikhafunika kuti acite cinthu. Palibe mwamuna omwe angalekerere kuti mkazi wace aphedwe. Esteri adapitiriza kulewa kuti: “Ine na wanthu wa mtundu wangu tagulisidwa kuti tipfudzidwe na kuphedwa. Bzingadakhala kuti tagulisidwa kuti tikhale akapolo wacimuna na akapolo wacikazi ningadanyamala. Lekani kubvuma kuti bzimwebzi bzicitike thangwe bzin’citisa kuti bzinthu bzizinji bza mambo bzidzongeke.” (Est 7:4) Onani kuti Esteri adafotokoza bwino bzomwe bzikhafuna kucitikabzo, ndipo adalewambo kuti bzingadakhala kuti iwo adagulisidwa kuti andokhale akapolo basi, iye angadadandaula lini. Pakuti kupha mtundu wentse kungadacitisa kuti bzinthu bza mambo bzidzongeke, iye adawona kuti bzikhali lini bwino kundonyamala nabzo.
19 Bzomwe Esteri adacita bzikutipfunzisa momwe tin’funika kumbafotokozera nzeru zathu mu njira yabwino. Penu mukufuna kufotokoza bvuto linango kwa munthu omwe mumbamufuna ayai kwa munthu omwe ana udindo, kulalewa mwakuderekha, mwaulemu na kufotokoza bvutolo mwakubveka bwino, bzingakuthandizeni kwene-kwene. — Mim 16:21, 23.
Cuma Cauzimu
w06 1/3 tsa. 11 ndi. 1
Nfundo Zikulu-zikulu za m’Bukhu la Esteri
7:4 — Kodi kuphedwa kwa Adjuda kungadacitisa tani kuti bzinthu bza mambo bzidzongeke? Pomwe Esteri adafotokoza mwanzeru kuti iye angadadandaula lini bzingadakhala kuti Adjuda agulisidwa kuti akhale akapolo, iye adatsindika nfundo yakuti kuphedwa kwa Adjudawo kungadacitisa kuti bzinthu bza mambo bzidzongeke. Kobiri za prata zakukwana 10 000 zomwe Hamani adalewa kuti angadapereka zikhalibe phindu pa cuma ca mambo pakundendemezera na cuma comwe angadakhala naco bzingadakhala kuti Adjuda agulisidwa kuti akhale akapolo. Bzomwe Hamani akhadakonza bzingadacitika, mkazi wa mambo angadaphedwa.
25 SETEMBRO–1 OUTUBRO
CUMA CA M’FALA LA MULUNGU | ESTERI 9-10
“Iye Adaphatisa Basa Udindo Bwace Kuti Athandize Wanthu Wace”
it-2 tsa. 412 ndi. 8
Mordekai
Mordekai adapasidwa mpando omwe Hamani akhanawo ninga nduna ya mambo ndipo adapasidwa mphete yakudindira ya mambo yomwe ikhamupasa mphanvu ya kuikha bzidindo madokumento ya boma. Esteri adapasa Mordekai nyumba ya Hamani, yomwe mambo akhadapasa Esteriyo. Pakuti mambo adabvumiza Adjuda kuti abzikhotcerere, Mordekai adaphatisa basa lamulo limweri kuti adziwise Adjuda wentse kuti akhafunika kubzikhotcerera. Pomwe Adjuda adabva bzimwebzi, iwo adakomedwa kwene-kwene thangwe adawona kuti pakhana mwayi wakuti apulumuke. Wanthu azinji adakhala ku mbali ya Adjuda, ndipo pomwe idafika ntsiku ya 13 ya mwezi wa Adari, yomwe ikhali ntsiku yakuti malamuloyo yayambe kuphata basa, Adjuda akhadakonzeka. Wanthu azinji adathandiza Adjuda thangwe ra udindo bomwe Mordekai akhanabo. Ku Susani, nkhondoyo idafika mpaka ntsiku yaciwiri yace. Anyamadulanthaka wakupitirira 75 000 wa Adjuda adaphedwa, kuphatanidzambo wana 10 wa Hamani. (Est 8:1–9:18) Mwakubvumizidwa na Esteri, Mordekai adayambisa phwando la pa gole lomwe likhafunika kumbacitika pa ntsiku ya 14 na 15 ya mwezi wa Adari, mu “ntsiku za Purimu” kuti akondwe, adyere pabodzi, apasane mphaso na kupasambo bzinthu wanthu wakusauka. Adjuda adabvuma kucita phwando limweri ndipo adapereka lamulo lakuti mbadwa zawo na wanthu omwe adakhala ku mbali yawo acitembo bzimwebzi. Ninga munthu waciwiri mu umambobo, Mordekai akhalemekezedwa na Adjuda, omwe akhali wakubzipereka kwa Yahova, ndipo iye adapitiriza kuphata basa kuti athandize Adjudawo. — Est 9:19-22, 27-32; 10:2, 3.
it-2 tsa. 760 ndi. 5
Purimu
Cakulinga. Napo kuti wanthu ambalewa kuti Phwando la Purimu lomwe limbacitidwa na Adjuda ntsiku zino limbakhala ninga kuti ni mwambo lini wa cipembedzo thangwe rakuti wanthu omwe ambalicitawo ambacita bzinthu mwakupitirira malire, bzimwebzi ndibzo lini bzomwe bzikhacitika pa nthawe yomwe phwandoli lidakhazikisidwa. Pakuti Esteri na Mordekai akhali atumiki wa Mulungu wacadidi Yahova, iwo adakhazikisa phwandoli kuti atumbizise Yahovayo. Cipulumuso ca Adjuda pa nthawe imweyi cidacokera kwa Yahova thangwe rakuti Mordekai akhali wakukhulupirika ndipo akhanamata Yahova yekha basi. Hamani akhali m’Amaleki ndipo Yahova adatemberera mtundu umweyu ndipo adalewa kuti mtunduyo upfudzidwe. Mordekai akhalemekeza bzomwe Yahova adalewabzo, ndipopa adalamba kugodamira Hamani. (Est 3:2, 5; Eki 17:14-16) Ndipo mafala yomwe Mordekai adauza Esteri (Est 4:14) yakulatiza kuti iye akhakhulupira mphanvu ya Mulungu kuti Adjuda apulumusidwe, ndipo kubzimana kudya komwe Esteri adacita pomwe akhanati kuyenda kukacita mkumbiro kwa mambo na kukumbira mambo kuti akadye, bzikulatiza kuti akhathemba Mulungu kuti amuthandize. — Est 4:16.
cl tsa. 101-102 ndi. 12-13
“Tewezerani Mulungu” Pomwe Mukuphatisa Basa Udindo Bwanu
12 Yahova adaikha amuna kuti ambatsogolere mu gwere lacikristau. (Ahe 13:17) Amuna amwewa ambaphatisa basa udindo bomwe Mulungu adawapasa kuti athandize wanthu wa Mulungu kukhala na moyo wabwino. Kodi udindo bwawobo bumbawapasa ufulu bwakuti ambatonge abale wawo wacikristau? Ne ndibzo lini! Akulu an’funika kumbawona udindo bomwe anabo mwakuthemera na mwakubzicepesa. (1Pe 5:2, 3) Bibliya limbauza anyakunyang’anira kuti: “Muuse gwere la Mulungu lomwe iye adaligula na mulopa wa Mwana wace caiye.” (Mab 20:28) Limweri ni thangwe likulu kwene-kwene lomwe lin’funika kuwacitisa kuti ambacite bzinthu mwakudeka mtima na munthu ali-wentse m’gwere.
13 Kuti tibvesese tingayezezere tenepa. Xamwali wanu wa pamtima akukumbirani kuti mumukoyere cinthu cakufunika kwene-kwene. Imwepo mukudziwa kuti xamwali wanuyo adagula cinthuco mwakuumira kwene-kwene. Kodi mungaciphate lini cinthuco na manja mawiri kuti cireke kudzongeka? Mpsibodzi-bodzimbo, akulu adapasidwa cinthu cakufunika kwene-kwene na Mulungu: gwere, lomwe wanthu wace ambandendemezeredwa na mabira. (Ju 21:16, 17) Yahova ambayafuna kwene-kwene mabira yace mwakuti adapagali pereso yakuumira na mulopa wa Mwana wace, Jezu Kristu. Palibe pereso yakuumira kwene-kwene kuposa imweyi yomwe Yahova angadapagaliri mabira yace. Akulu omwe mbakubzicepesa ambakumbukira bzimwebzi ndipo ambacita bzinthu na mabirayo mwakuthemera.
Cuma Cauzimu
w06 1/3 tsa. 11 ndi. 4
Nfundo Zikulu-zikulu za m’Bukhu la Esteri
9:10, 15, 16 — Napo kuti lamulo likhabvumiza kupamba, thangwe ranyi Adjuda alibe kucita bzimwebzo? Bzomwe iwo adacitabzo bzidalatiza kuti cakulinga cawo cikhali kukhotcerera mtundu wawo sikuti kufuna kudala.
2-8 OUTUBRO
CUMA CA M’FALA LA MULUNGU | DJOBI 1-3
“Pitirizani Kulatiza Kuti Mumbafuna Yahova”
Khalani Wakukhulupirika na Wakubvera Ninga Nowe, Danyeri na Djobi
16 Kodi ni mabvuto yaponi yomwe Djobi adagumana nayo? Djobi adagumana na mabvuto mazinji pa moyo wace. Pakuyamba, iye akhali ‘wakulemekezeka kwene-kwene pakati pa wanthu wense’ omwe akhakhala m’dziko lace. (Djb 1:3) Iye akhali wakudala kwene-kwene, ndipo wanthu azinji akhamudziwa bwino. (Djb 29:7-16) Tsono, Djobi alibe kukumbuka kuti iye akhali wakufunika kwene-kwene kuposa winango mwakuti angadafunikira lini thandizo la Mulungu. Ndipopa Yahova adamucemera kuti ‘mtumiki wangu’ ndipo adalewambo kuti Djobi akhali ‘munthu wakusaya mathangwe, wakulungama, ndipo ambagopa Mulungu na kutcenkha kucita cakuipa.’ — Djb 1:8.
17 Mwadzidzidzi, bzinthu bzidacinja pa moyo wa Djobi. Iye adaluza bzinthu bzace bzense ndipo adasunama kwene-kwene, mwakuti akhandofuna kufa. Lero-lino, ifepano timbadziwa kuti ni Sathani omwe adacitisa kuti Djobi abonere. Iye adalewa kuti Djobi akhatumikira Mulungu thangwe ra bzinthu bzomwe akhanabzo. (Werengani Djobi 1:9, 10.) Yahova adasunama kwene-kwene na gunkha la Sathaniro. Kodi n’ciyani comwe Yahova adacita kuti alatize kuti Sathani ni nyamagunkha? Iye adapasa mpata Djobi kuti alatize kukhulupirika kwace kwa Mulungu, acilatizambo kuti ambatumikira Mulunguyo thangwe ra lufoyi.
Pitirizani Kukhala Wakukhulupirika!
10 Nsiku zino, Sathani ankuphatisambo basa njira zibodzi-bodzizi kwa ifepano. Kodi timbatokonyedwa tani na bzomwe Sathani adabvunza Djobi? Timbatokonyedwa mwa njira yakuti Sathaniyo adalewa kuti, ifepano timbafuna lini Yahova na mtima wense, tikagumana na mabvuto tin’dzasiya kumutumikira, ndipo kukhulupirika kwathu n’kwa cinyengo! (Djb 2:4, 5; Apo 12:10) Kodi imwepo mumbabzibva tani na bzimwebzi? Mpsakusunamisa, ndibzo lini? Tsono dziwani kuti, Yahova ambakukhulupirani ndipo ambakupasani mipata mizinji ya momwe mungalatizire kukhulupirika kwanu. Yahova ambalekerera kuti Sathani ayeze cikhulupiro canu. Iye ana citsimikizo cense cakuti imwepo mungapitirize kukhala wakukhulupirika ndipo an’dzakuthandizani kulatiza kuti Sathani ngwakunama. Ndipo iye wapicira kuti an’dzakuthandizani kuti mucite bzimwebzi. (Ahe 13:6) Ni mwayi ukulu kwene-kwene kudziwa kuti Mtongi wa cirengedwe cense ambatikhulupira! Kodi imwepo munkukwanisa kuwona thangwe race kukhulupirika n’kwakufunika? Kukhulupirika kumbatithandiza kulamba magunkha ya Sathani, kukhotcerera dzina labwino la Baba wathu na kuthandizira utongi bwace. Kodi tingacite tani kuti tipitirize kukhala wakukhulupirika?
Cuma Cauzimu
Bzomwe Tingapfunze na Mafala Yakumalizira ya Jezu
9 Kodi Jezu adalewa ciyani? Pomwe Jezu akhadasala pang’ono kufa, iye adakuwa kuti: ‘Mulungu wangu, Mulungu wangu, thangwe ranyi mwandisiya ndekha ine?’ (Mat 27:46) Bibliya limbafotokoza lini thangwe lomwe Jezu adalewera mafalaya. Tsono mafala yamweya yangatipfunzise bzinthu bzizinji. Mwa ciratizo, pomwe iye adalewa mafala yamweya akhakwanirisa polofesiya yomwe imbagumanika pa Salimo 22:1. Kuthimizira bzimwebzi mafalaya yakulatiza padeca kuti Yahova, alibe ‘kuikha tsose m’mphepete mwa’ Mwana wace. (Djb 1:10) Jezu adabvesesa kuti pai wace adabvuma kuti iye ayezedwe kwene-kwene na anyamadulanthaka wace mpaka infa. Palibe munthu omwe adagumana kale na mayezo ninga yamweya. Kuthimizira bzimwebzi, mafala ya Jezu yambalatiza kuti iye akhali munthu wakusaya kuphonya ndipo akhathemera lini kuphedwa.
9-15 OUTUBRO
CUMA CA M’FALA LA MULUNGU | DJOBI 4-5
“Cenjerani na Nkhani Zakunama”
it-1 tsa. 793 ndi. 15
Elifazi
2. M’bodzi mwa axamwali atatu wa Djobi. (Djb 2:11) Pakuti akhali wa ku Temani, bzikuwoneka kuti iye akhali mbadwa ya Elifazi, mwana wakuyamba wa Esau. Iye na adzinza wace akhabzikuza thangwe rakuti akhana nzeru kwene-kwene. (Jer 49:7) Pa axamwali atatu omwe akhafuna “kutsangalaza” Djobi, Elifazi adawoneka ninga kuti ndiye akhadziwa bzinthu kwene-kwene kuposa anzace wale, ndipo bzikuwoneka ninga kuti iye ndiye akhali mkulu na anzacewo. Pa ulendo butatu bomwe iwo adalalewa, iye ndiye akhakhala wakuyamba. Ndipo bzomwe iye adalewa mpsizinji kuposa bza anzacewo.
w05 15/9 tsa. 26 ndi. 2
Tcenkhani Nzeru Zakuipa!
Pomwe adakumbukira masomphenya yakudabwisa yomwe adawona pa nthawe inango, Elifazi adalewa kuti: “Mzimu udapita patsogolo pangu ndipo tsisi langu na thupi langu bzidayamba kufamba-famba.” (Djb 4:15, 16) Kodi ni mzimu uponi umweyu? Mafala yomwe iye adalewa pambuyo pakulewa bzimwebzi yakulatiziratu kuti mzimuyo ukhacokera lini kwa Mulungu. (Djb 4:17, 18) Mzimu umweyu ukhali dimonyo. Ndipopa Yahova adamutsimula pabodzi na anzace awiri wale kuti akhalewa bzinthu bzakunama. (Djb 42:7) Elifazi adasokonezedwa nzeru na madimonyo. Bzomwe iye adalewa bzidalatiza kuti nzeru zace zikhacokera lini kwa Mulungu.
w10 15/2 tsa. 19 ndi. 5-6
Lekani Kulekerera Kuti Sathani Akunamizeni
Sathani adaphatisa basa Elifazi, omwe akhali m’bodzi mwa wanthu omwe adayenda kukawona Djobi, kuti akalewe mafala yakunama yakuti wanthu angakwanise lini kupirira mayezo ya Sathani. Iye adalewa kuti wanthu ambakhala ‘m’nyumba za mataka,’ ndipo adauza Djobi kuti ‘aliserse zawo ziri m’mataka. Iwo ambapeyedwa ninga maburbuleta. Kucokera macibese kufika maulo ambapeyeka, iwo ambawoneka lini pomwe ndipo palibe munthu omwe ambadziwa bzimwebzo.’ — Djb 4:19, 20.
Bzinembo bzinango bzimbayezezera wanthu na “bzombo bza dongo,” bzomwe bzimbadiza lini kupsweka. (2Ak 4:7) N’cadidi kuti pikado yomwe tidatambira kucokera kwa abereki wanthu wakuyambirira imbaticitisa kuti tikhale wakuwofoka. (Aro 5:12) Mwakuti tekha tingakwanise lini kumukunda Sathani. Tsono pakuti ndife Akristau, Yahova ambatithandiza. Napo kuti ndife wanthu wakuperewera, ndife wakufunika kwene-kwene kwa Yahova. (Zai 43:4) Ndipo Yahova ambapereka mzimu wace wakucena kwa wale omwe ambamukumbira. (Lu 11:13) Mzimu ungatipase “mphanvu yakuposa yacibadwa,” yomwe ingatithandize kulimbana na mabvuto yali-yentse yomwe Sathani angatibweresere. (2Ak 4:7; Afi 4:13) Tikambacita nyongo yakulimbana na Dyabu, ‘ticilimbisambo cikhulupiro’ cathu, Mulungu angatipase mphanvu kuti tikhale wakulimba. (1Pe 5:8-10) Na tenepo tin’funika lini kumugopa Sathani Dyabu.
mrt tsa. 32 ndi. 13-17
Cenjerani na Nkhani Zakunama
● Mbakumbukirani komwe nkhaniyo yacokera na bzomwe ikulewa
Bzomwe Bibliya limbalewa: “Onesesani bzinthu bzentse.” — 1At 5:21.
Mukanati kukhulupira nkhani iri-yentse ayai kuitumizira mwanzanu, napo kuti ni nkhani yomwe azinji akuidziwa ayai yomwe yawonesedwa m’majornale, tsimikizirani penu njacadidi. Kodi mungacite tani bzimwebzi?
Mbakumbukirani penu nkhaniyo yacokera kwa munthu ayai ku mbuto yomwe njakuthembeka. Wanthu omwe ambamwaza nkhani angacinje nkhanizo thangwe ra bzomwe iwo akukumbuka pa nkhani ya ndale ayai bzinthu bzinango. Mbandendemezerani nkhani yomwe yalewedwa na anyakumwaza nkhani winango na momwe anyakumwaza nkhani anzawo ailewera nkhani ibodzi-bodziyo. Nthawe zinango mwakusaya kudziwa, anzanu angakutumizireni mensaje zomwe zikufotokoza nkhani zakunama. Ndipopa lekani kumbakhulupira nkhani iri-yentse, khulupirani pokha-pokha mukakhala mukudziwa komwe nkhaniyo yacokera.
Mutsimikizirembo penu bzomwe nkhaniyo ikulewa mpsacadidi. Mumbawone madata na nfundo zomwe zikulatiza kuti nkhaniyo njacadidi. Mbakhalani tceru bzikakhala kuti nkhani yomwe njakunesa ikufotokozedwa mu njira yakusaya kunesa ayai yanembedwa mu njira yakudekeza kwene-kwene.
Cuma Cauzimu
w03 15/5 tsa. 22 ndi. 5-6
Pitirizani Kukhala Wakusaya Kutekenyeka Kuti Mudzatambire Moyo Wakusaya Kumala
Kucita mbali ya gulu la pa dziko lentse la atumiki wa Yahova kungaticitise kukhala wakulimba na wakusaya kutekenyeka. Ni mwayi ukulu kucita mbali ya abale wa pa dziko lentse omwe ambafunana kwene-kwene! (1Pe 2:17) Ifepano tingacitise kuti abale wathu akhale wakulimba na wakusaya kutekenyeka.
Onani bzomwe munthu wakulungama Djobi adacita. Napo kuti xamwali wace Elifazi, omwe akhayezera kumutsangalaza adalewa mafala yakuipa, iye adazindikira kuti Djobi akhathandiza wanthu. Iye adati: “Munthu akafuna kugwa, mafala yako yakhamumusa; ndipo mabondo yakusaya mphanvu ukhayalimbisa.” (Djb 4:4) Kodi ifepano timbacitambo tani bzimwebzi? Mtumiki wa Yahova ali-wentse ana udindo bwa kuthandiza abale na mpfumakazi m’gwere kuti apirire pa kutumikira Yahova. Pomwe tikucita bzinthu na iwo, tingacite bwino kucita bzinthu mwakubverana na mafala aya: “Limbisani manja yakutepa, ndipo citisani kuti mabondo yomwe yakutetemera yalimbe.” (Zai 35:3) Bzingakhale bwino kukhala na cakulinga cakulimbikisa m’bale m’bodzi ayai awiri mukagumana nawo. (Ahe 10:24, 25) Mafala yakucokera mu mtima yakuwatenda thangwe ra nyongo yomwe akucita kuti apitirize kukondwesa Yahova yangawapase mphanvu kuti apitirize kukhala wakulimba na wakusaya kutekenyeka mpaka kudzatambira moyo wakusaya kumala.
16-22 OUTUBRO
CUMA CA M’FALA LA MULUNGU | DJOBI 6-7
“Bzomwe Mungacite Mukawona Kuti Bzikukunesani Kupirira Mabvuto Yanu”
w06 15/3 tsa. 14 ndi. 10
Nfundo Zikulu-zikulu za m’Bukhu la Djobi
7:1; 14:14 — Kodi mafala yakuti “nkhondo” ayai “basa lakungingimizidwa” yambathandauza ciyani? Djobi akhabonera kwene-kwene mwakuti moyo wace akhauwona ninga basa lakungingimizidwa. (Djb 10:17) Pakuti munthu ambayenda lini ku Thenje mwakucita kufuna, kucokera pa nthawe yomwe wafa mpaka pa nthawe yomwe an’dzalamusidwa, Djobi adandendemezera bzimwebzi na basa lakucita kungingimizidwa.
‘Yahova . . . Ambapulumusa Wale Omwe Atepa’
NTHAWE ZINANGO, tingakumbuke kuti moyo ngufupi ndipo ‘[wandodzala] na mabvuto.’ (Djb 14:1) Tenepo bzimwebzi nthawe zinango bzingatimalise mphanvu. Bzimwebzi kale-kale bzidacitikambo na atumiki winango wa Yahova. Mpaka winango wa iwo akhakhumba kufa. (1Am 19:2-4; Djb 3:1-3, 11; 7:15, 16) Koma Yahova nthawe zentse akhawatsangalaza ndipo akhawapasa mphanvu. Nkhani zawozo zidanembedwa m’Bibliya kuti tikambaziwerenga zimbatitsangalaze na kutipfunzisa. — Aro 15:4.
g 1/12 tsa. 16-17
Kodi n’Ciyani Comwe Mungacite Mukakhala na Makumbukidwe Yakufuna Kubzipha?
Napo kuti mungawone ninga kuti mabvuto yomwe mukugumana nayo mungakwanise lini kuyapirira, mbakumbukirani kuti ndimwepo lini mwekha omwe mukugumana na mabvuto. Pafupi-fupi munthu ali-wentse akugumana na mabvuto yakusiyana-siyana. Bibliya limbalewa kuti: “Cirengedwe centse cikupitiriza kubuula cicimbabva kuwawa mpaka pano.” (Aro 8:22) N’cadidi kuti mungawone ninga kuti mabvuto yanu yangamale lini, mbakumbukirani kuti bzinthu bzimbacinja na kupita kwa nthawe. Tsono n’ciyani comwe mun’funika kucita?
Uzani mwanzanu omwe mumbamuthemba mabvuto yomwe mukugumana nayo. Bibliya limbalewa kuti: “Xamwali wacadidi ambakufuna nthawe zentse, ndipo iye ni m’bale omwe adabadwira kuti akuthandize pakawoneka mabvuto.” (Mim 17:17) Bibliya limbalewa kuti Djobi, omwe akhali munthu wakukhulupirika akhambafotokozera anzace mabvuto yomwe akhagumana nayo. Pa nthawe yomwe ‘akhanyantsidwa na moyo wace,’ iye adalewa kuti: “Ndikundolewalewa bza madandaulo yangu. Ndikulewalewa thangwe ra kuwawidwa kwangu.” (Djb 10:1) Mukambauza anzanu bza mabvuto yanu mungabve bwino mu mtima ndipo bzingakuthandizeni kuti mumbawone mabvuto yanuyo mwakuthemera.
Mbapembani kwa Yahova. Wanthu winango ambakumbuka kuti mpembo umbandocitisa munthu kuti abzibve bwino pang’ono, tsono Bibliya limbafotokoza bzakusiyana na bzimwebzi. Cinembo ca Salimo 65:2 cimbalewa kuti Yahova Mulungu ni “Mbveseri wa mpembo” ndipo cinembo ca 1 Pedru 5:7 cimbalewa kuti: “Iye ambakukonkhobzani.” Bibliya limbafotokoza mwakubwereza-bwereza kuti tin’funika kumbathemba Mulungu. Onani bzinembo bzomwe bziri m’nyantsibzi:
“Khulupira Yahova na mtima wako wentse ndipo leka kuthemba luso lako la kubvesesa bzinthu. Umbamukumbukire m’njira zako zentse, ndipo iye an’dzalungamiza njira zako.” — MIM 3:5, 6.
“Iye an’dzacita bzakukhumba bza wale omwe ambamugopa; iye an’dzabva kukuwa kwawo kwakukumbira thandizo ndipo an’dzawapulumusa.” — SL 145:19.
“Ndipo ifepano tina citsimikizo mwa iye cakuti bziribe basa bzomwe tikumbirebzo, tikakumbira mwakubverana na kufuna kwace, iye an’dzatibva.” — 1JU 5:14.
“Yahova ambakhala kutali na wanthu wakuipa, ndipo ambabva mipembo ya wanthu wakulungama.” — MIM 15:29.
Mukambamuuza Mulungu mabvuto yomwe mukugumana nayo, iye an’dzakuthandizani. Ndipopa Bibliya limbatilimbikisa kuti: “Khulupirani Mulungu ntsiku zentse, . . . Mukhuthulireni bza mu mtima mwanu.” — Sl 62:8.
Cuma Cauzimu
Tetekerani, Dziwani Ndipo Mbabverani Ntsisi Winango
10 Tingatewezerembo Yahova mwa kumbabvesesa abale na mpfumakazi zathu. Yezerani kuwadziwa bwino abale na mpfumakazi zanu. Kodi mungawadziwe tani? Mbacezani nawo pomwe mitsonkhano ikanati kuyamba ayai pambuyo pace, mbapalizirani nawo pabodzi, ndipo bzikakwanisika acemereni kuti mukadye nawo pabodzi. Mukacita bzimwebzo, pinango mun’dzazindikira kuti mpfumakazi yomwe imbawoneka ninga yakutepa, njamanyazi; ndipo m’bale omwe mumbamuwona kuti ambafunisisa kwene-kwene kobiri, ambadziwa kutambira bwino alendo; ndipo banja lomwe nthawe zizinji limbacedwa kufika pa mitsonkhano, likugumana na mabvuto mazinji. (Djb 6:29) Cadidi n’cakuti ifepano tin’funika lini ‘[kumbapitira] nkhani za wene.’ (1Ti 5:13) Napo bziri tenepo, bzimbakhala bwino kudziwa momwe moyo wa abale wathu uliri na mabvuto yomwe akugumana nayo. Tikacita bzimwebzi tin’dzawadziwa bwino abalewo.
23-29 OUTUBRO
CUMA CA M’FALA LA MULUNGU | DJOBI 8-10
“Lufoyi Lacadidi la Yahova Limbatikhotcerera ku Magunkha ya Sathani”
w15 1/7 tsa. 12 ndi. 3
Kodi Wanthufe Tingamukondwese Mulungu?
Djobi adagumana na mabvuto mazinji kabodzi na kabodzi ndipo bzikhawoneka ninga kuti bzikhafunika lini kuti agumane nayo. Bzimwebzi bzidamucitisa kuti akumbuke mwakuphonyeka aciwona ninga kuti Mulungu akhalibe nabzo basa bzakuti iye akhali munthu wakukhulupirika. (Djb 9:20-22) Djobi akhabziwona ninga kuti akhali wakulungama kwene-kwene mwakuti wanthu akhakumbuka kuti iye akhabziwona kuti akhali wakulungama kuposa Mulungu. — Djb 32:1, 2; 35:1, 2.
Kodi Lufoyi Lacadidi la Yahova Limbathandauza Ciyani Kuna Imwepo?
14 Lufoyi lacadidi la Mulungu limbatikhotcerera mwauzimu. Davide, mu mpembo wace kwa Yahova, adalewa kuti: ‘Imwepo ndimwe mbuto yangu yakubisalikira, mun’dzandikhotcerera pa mabvuto. Mun’dzacitisa kuti mpfantso undizungulire pomwe mukundipulumusa. . . . Ule omwe ambakhulupira Yahova ambazunguliridwa na kudeka mtima komwe kumbamala lini.’ (Sl 32:7, 10) Ninga momwe malitsito ya mizinda yakale-kale yakhakhotcererera anyakukhala mu mzindamo, tenepombo mabasa ya lufoyi lacadidi ya Yahova yadatizungulira kuti yatikhotcerere mwauzimu ku bzinthu bza ngozi bzomwe bzingayeze kukhulupirika kwathu. Kuthimizira bzimwebzi, lufoyi lacadidi la Yahova limbamucitisa kutifenderera. — Jer 31:3.
Cuma Cauzimu
w10 15/10 matsa. 6-7 ndi. 19-20
“Mbani Angafike Pakudziwa Makumbukidwe ya Yahova?”
19 Kodi tapfunza ciyani pa nkhani ya “makumbukidwe ya Yahova”? Tin’funika kubvuma kuti Fala la Mulungu litithandize kudziwa makumbukidwe ya Yahova. Pakuti wanthufe timbadziwa lini bzinthu bzizinji, tin’funika lini kumbakumbuka kuti nzeru za Yahova n’zakuphonyeka zathu ndizo zabwino. Djobi adati: “Mulungu ni munthu lini ninga ine kuti ndimutawire, ayai kuti nditongesane naye mulandu.” (Djb 9:32) Mwakundendemerana na Djobi, tikayadziwa bwino makumbukidwe ya Yahova tin’dzalewa kuti: “Zimwezi ni mbali zakucepa zokha za njira zace; bzomwe tabva pakulewa bza iye ni kazewe-zewe basi! Tenepo, mbani omwe angabvesese kugunda kwa ciphaliwali?” — Djb 26:14.
20 Tikambawerenga Bibliya, n’ciyani comwe tin’funika kucita tikagumana nkhani yakunesa kuibvesesa maka-maka yakulewa bza makumbukidwe ya Yahova? Tikakhala tafufudza koma tiribe kugumana mtawiro wakubveka bwino, tin’funika kuwona kuti umweyu ni mwayi wathu wakuti tilatize kuti timbakhulupira kwene-kwene Yahova. Tin’funika lini kuyebwa kuti nfundo zinango zimbatithandiza kulatiza kuti timbakhulupira kuti Yahova ana makhalidwe yabwino. Bwerani tikhale wakubzicepesa ticibvuma kuti tingakwanise lini kubvesesa bzinthu bzentse bzomwe iye ambacita. (Mpa 11:5) Bzimwebzi bzin’dzatithandiza kutawiriza mafala ya mpostolo Paulo yakuti: “Bzisimbo bzakucokera kwa Mulungu, nzeru zace na udziwi bwace mpsakusaya malire. Kodi mbani angakwanise kubvesesa momwe iye ambatongera? Ndipo mbani angakwanise kudziwa njira zace? ‘Kodi mbani omwe angadziwe kakumbukidwe ka Yahova? Ndipo mbani omwe angamupase malango?’ Ayai, ‘mbani omwe adayamba kupasa cinthu Mulungu, kuti Mulunguyo abzibve kuti an’funika kumubwezera?’ Thangwe bzinthu bzentse bzidacokera kwa iye. Ndiye omwe adabzilenga ndipo bziripo thangwe ra iye. Iye apasidwe ulemerero mpaka kale-kale. Ameni.” — Aro 11:33-36.
30 OUTUBRO–5 NOVEMBRO
CUMA CA M’FALA LA MULUNGU | DJOBI 11-12
“Bzinthu Bzitatu Bzomwe Bzingakuthandizeni Kugumana Nzeru”
w09 15/4 tsa. 6 ndi. 17
Djobi Akhalemekeza Dzina la Yahova
17 Kodi n’ciyani comwe cidathandiza Djobi kuti apitirize kukhala wakukhulupirika? Bzikuwonekeratu kuti Djobi akhadalimbisa uxamwali bwace na Yahova pomwe akhanati kugumana na mabvuto. Napo kuti tiribe umboni bomwe bumbalatiza kuti Djobi akhadziwa kuti Sathani akhamutsutsa Yahova, iye akhali wakutsimikiza kupitiriza kukhala wakukhulupirika kwa Yahova na mtima wentse. Iye adati: “Mpaka kufa kwangu, ndin’dzasiya lini kukhala na mtima wakusaya kugawanika.” (Djb 27:5) Kodi n’ciyani comwe Djobi adacita kuti akhale pa uxamwali bwakulimba na Yahova? Mwakusaya kupenukira, iye adabva bzomwe Mulungu adacitira Abalahamu, Izaki na Djakobo, omwe akhali adzinza wace omwe akhakhala kutali. Ndipo iye adapfunzambo bza makhalidwe mazinji ya Yahova mwakuwona cirengedwe. — Werengani Djobi 12:7-9, 13, 16.
Muli Lini Mwekha, Yahova Anamwe
10 Citani uxamwali na Akristau wakukhulupirika. Citani uxamwali na wanthu omwe angakupfunziseni bzinthu bzizinji napo akhale wale omwe mudasiyana nawo magole ayai cikhalidwe. Bibliya limbatikumbusa kuti pakati pa acikulire ‘pambagumanika nzeru.’ (Djb 12:12) Acikulirembo angapfunze bzinthu bzizinji na maswaka yakukhulupirika. Davide akhali mng’ono kusiyana na Jonatani, tsono bzimwebzi bziribe kuphingiza kuti iwo akhale pa uxamwali bwakulimba. (1Sa 18:1) Davide na Jonatani akhathandizana kutumikira Yahova napo kuti akhagumana na mabvuto. (1Sa 23:16-18) Mpfumakazi Irina, yomwe ndiyo yokha Mboni ya Yahova m’banja mwace, idalewa kuti: “Abale na mpfumakazi zathu zacikristau angakhaledi ninga abereki wathu ayai abale wathu wa mimba ibodzi. Yahova angawaphatise basa kuti atipase bzomwe tikusaya.”
11 Bziribe kupusa kukhala na axamwali apsa maka-maka bzikakhala kuti ndiwe munthu wa manyazi. Mpfumakazi Ratna, yomwe idapfunza cadidi napo kuti ikhaboneresedwa na wanthu winango, idalewa kuti: “Ndidawona kuti ndikhafunikira thandizo la abale na mpfumakazi zangu mu gwere.” Bzinganese kufotokozera munthu winango momwe mukubvera, tsono mukacita bzimwebzi munthuyo angakhale xamwali wanu wakuti ponda-ndipondembo. Axamwali wanu akufuna kukulimbikisani na kukuthandizani. Tsono kuti acite bzimwebzi, imwepo mun’funika kuwafotokozera momwe mukubvera.
12 Njira ibodzi pa njira zabwino kwene-kwene zomwe zingatithandize kukhala pa uxamwali na wanthu winango, ni kupalizira na Akristau anzathu. Carol, omwe tamufotokoza kale ule, adalewa kuti: “Ndakhala na axamwali azinji wabwino mwa kupambula nthawe yakumbaceza na mpfumakazi mu utumiki na kumbacita nawo pabodzi mabasa ya Yahova. Ndipo papita magole mazinji Yahova akundithandiza mwakuphatisa basa axamwaliwa.” Nthawe zentse bzimbakhala bwino kwa ifepano kucita uxamwali na Akristau wakukhulupirika. Yahova ambaphatisa basa axamwaliwo kuti akulimbikiseni mukakhala mwagoboka m’mabondo, maka-maka mukabzibva kuti muli mwekha. — Mim 17:17.
it-2 tsa. 886 ndi. 4
Nzeru
Nzeru Yakucokera kwa Mulungu. Nzeru yacadidi tingaigumane kwa Yahova Mulungu thangwe “ndiye yekha wanzeru.” (Aro 16:27; Apo 7:12) Kuti munthu adziwe cinthu an’funika kumala nthawe ikulu akuphata basa na cinthuco. Ndipo pakuti Yahova ni Mulengi “wakukhala ku mibadwo na mibadwo” (Sl 90:1, 2), iye ambadziwa bzentse pakulewa bza cirengedwe, momwe cidakonzedwera na momwe cidayambira mpaka kufika nthawe yathu ino. Bzinthu bzentse bzomwe wanthu ambakonza ntsiku zino, ambakwanisa kubzikonza thangwe ra kupfunza cirengedwe. Pangadakhala palibe cirengedwe iwo angadakwanisa lini kukonza bzomwe akukonzabzo. (Djb 38:34-38; Sl 104:24; Mim 3:19; Jer 10:12, 13) Mitemo yomwe iye adapasa wanthu imbacitisa kuti moyo wawo ufambe bwino. (Deu 32:4-6) Palibe comwe iye angasaye kubvesesa. (Zai 40:13, 14) Napo kuti iye angalekerere kuti bzinthu bzomwe mpsakupitana na mitemo yace bzicitike, timbadziwa kuti kutsogolo bzinthu bzentse bzin’dzacitika ninga momwe iye akufunira “an’dzacita ninga momwe walewera.” — Zai 55:8-11; 46:9-11.
Cuma Cauzimu
w08 1/8 tsa. 11 ndi. 6
Kulalewa na Maswaka
▪ ‘Kodi nimbabvesesa bzomwe iwo akufuna kulewa?’ Cinembo ca Djobi 12:11 cimbati: “Kodi khutu limbakwanisa lini kudziwa bzomwe mafala yan’funa kulewa? Kodi mkamwa mumbalawidza lini cakudya?” Imwepo mun’funika ‘kubvesesa’ bzomwe mwana wanu an’funa kulewa akalewa cinthu. Kazinji-kazinji maswaka yambafuna kuthumizira bzinthu mwakuti yakakhala yakufotokoza cinthu bzimbakhala ninga kuti bzomwe akulewabzo bzimbacitika nthawe zentse. Mwa ciratizo, mwana wanu angalewe kuti: “Imwepo nthawe zentse mumbandiwona ninga mwana.” Ayai angalewe kuti: “Imwepo mumbandibvesesa lini.” M’mbuto mwakubva ciya na mafala yomwe iye walewa yakuti “nthawe zentse” na “mumbandibvesesa lini,” bzingakhale bwino kudziwa bzomwe mwana wanuyo an’funa kulewa. Mwa ciratizo, mafala yakuti “Imwepo nthawe zentse mumbandiwona ninga mwana,” yangathandauze kuti: “Ndikuwona kuti imwepo mumbandikhulupira lini.” Ndipo mafala yakuti “Imwepo mumbandibvesesa lini,” yangathandauze kuti: “Ndikufuna kukuuzani kuti bzimwebzi bzimbandiwawa.” Yezerani kubvesesa thandauzo la mafala yomwe mwana wanuyo akulewa.