Kodi Magereja Yakunama Yambapswipiza Tani Mbiri ya Mulungu?

Penu Mulungu ni lufoyi, thangwe ranyi bzinthu bzizinji bzakuipa bzimbacitidwa na magereja yomwe yambabziti yambamutumikira? Kulewa cadidi, magereja yamweya njakunama ndipo yambadzonga mbiri ya Mulungu. Kodi iyo yambadzonga tani mbiri ya Mulungu? Kodi Mulunguyo ambabva tani ndipo an’dzacita ciyani na bzimwebzi?

1.Kodi bzomwe magereja yakunama yambapfunzisa bzimbadzonga tani mbiri ya Mulungu?

Magereja yakunama yacinjanisa “cadidi ca Mulungu.” (Aroma 1:25) Mwa ciratizo, magereja mazinji yambapfunzisa lini wanthu wawo dzina la Mulungu. Tsono Bibliya limbalewa kuti dzina la Mulungu lin’funika kuphatisidwa basa. (Aroma 10:13, 14) Atsogoleri winango wa magereja ambalewa kuti bzinthu bzakuipa bzikacitika ni kufuna kwa Mulungu. Tsono bzimwebzo n’kunama. Mulungu ambacita lini bzinthu bzakuipa. (Werengani Tiyago 1:13.) Bzakupasa ntsisi mpsakuti bzinthu bzomwe magereja yambapfunzisa bzimbacitisa wanthu kusaya kufuna kukhala pa uxamwali na Mulungu.

2.Kodi bzomwe magereja yakunama yambacita bzimbadzonga tani mbiri ya Mulungu?

Magereja yakunama yambasamalira lini wanthu ninga momwe Yahova ambacitira. Bibliya limbalewa kuti magereja yakunama “pikado zawo n’zizinji kwene-kwene.” (Apokalipse 18:5) Kuyambira kale-kale, magereja yakhala yakupitira nkhani za ndale, kuthandizira nkhondo na kuphesa wanthu azinji. Atsogoleri winango wa magereja ambafuna kudala ndipo iwo ambakumbira wanthu wawo kuti ambawapase kobiri. Bzicito bzawobzi bzimbalatiziratu padeca kuti iwo ambamudziwa lini Mulungu na pang’onopo ndipo alibe ugo bwakumutumikira. — Werengani 1 Juwau 4:8.

3.Kodi Mulungu ambabva tani na bzicito bza magereja yakunama?

Penu bzicito bza magereja yakunama bzimbakukalipisani, kodi mukukumbuka kuti Yahova ambabva tani? Iye ambafuna wanthu, tsono ambakomedwa lini na atsogoleri wa magereja omwe ambadzonga mbiri yace na kuboneresa wanthu wawo. Iye walumbira kuti gereja yakunama in’dzapfudzidwa ndipo “cipo icidzawoneka pomwe.” (Apokalipse 18:21) Tsapanopapa Mulungu animalisa magereja yentse yakunama. — Apokalipse 18:8.

FUFUDZANI BZINANGO

4. Mulungu ambakomedwa lini na magereja yentse

Wanthu azinji ambalewa kuti magereja yali ninga njira zakusiyana-siyana ndipo yentse yambatifikisa kwa Mulungu. Tsono kodi bzimwebzi n’cadidi? Werengani Mateu 7:13, 14, ndipo mukamala cezeranani mbvunzo wakutewerayu:

• Kodi Bibliya limbati ciyani pa nkhani ya mseu omwe umbayendesa ku moyo?

Onani VIDIYO, ndipo mukamala cezeranani mbvunzo wakutewerayu.

VIDIYO: Kodi Mulungu Ambabvuma Magereja Yentse? — Cipande (3:22)

• Kodi Bibliya limbalewa kuti magereja mazinji yambakondwesa Mulungu?

5. Magereja yakunama yambalatiza lini lufoyi la Mulungu

Magereja yakunama yambadzonga mbiri ya Mulungu mu njira zakusiyana-siyana. Ibodzi mwa njira zimwezi ni kupitira nkhondo. Kuti muwone ciratizo cibodzi, onani VIDIYO. Ndipo mukamala cezeranani mibvunzo ikutewerayi.

VIDIYO: Magereja Yadathandizirambo Nkhondo Yaciwiri ya pa Dziko Lentse la Pantsi (2:22)

• Pa Nkhondo Yaciwiri ya pa Dziko Lentse la Pantsi, kodi magereja mazinji yadacita ciyani?

• Kodi imwepo mukubva tani thangwe ra bzomwe magerejayo yadacita?

Werengani Juwau 13:34, 35 na 17:16. Ndipo mukamala cezeranani mibvunzo ikutewerayi:

• Kodi mukuwona kuti Yahova ambabva tani magereja yakambathandizira nkhondo?

• Magereja yakunama yambacita bzinthu bzizinji bzakuipa. Kodi mukuwona kuti ni bzinthu bziponi bzomwe bzikulatiza padeca kuti magereja yambatazira kulatiza lufoyi la Mulungu?

6. Mulungu an’funa kuthandiza wanthu kuti acoke m’magereja yakunama

Werengani Apokalipse 18:4,a ndipo mukamala cezeranani mbvunzo wakutewerayu:

• Kodi imwepo mumbabva tani mukadziwa kuti Mulungu an’funa kuthandiza wanthu omwe akhadapumpsidwa na magereja yakunama?

7. Pitirizani kupfunza bza Mulungu wacadidi

Kodi bzomwe magereja yakunama yambalewa na kucita, bzimbacinja momwe mumbawonera Mulungu? Tiyezezere kuti mwana akulamba kubvera malango yabwino ya pai wace, wacoka pamui ndipo akucita bzinthu bzizinji bzakuipa. Paiyo akukomedwa lini na bzinthu bzomwe mwanayo akucita. Thangwe ranyi kungakhale kuphonyeka kupasa mulandu paiyo thangwe ra bzinthu bzakuipa bzomwe mwanayo akucita?

• Kodi mukuwona kuti bzingakhale bwino kupasa mulandu Yahova na kusiya kupfunza bza iye thangwe ra bzinthu bzakuipa bzomwe magereja yambacita?

KODI MWAPFUNZA CIYANI?

Magereja yakunama yambadzonga mbiri ya Mulungu thangwe ra bzomwe yambacita na bzomwe yambapfunzisa.

Mibvunzo yakubwerezera

• Kodi imwepo mumbabva tani na bzomwe magereja yakunama yambapfunzisa na kucita?

• Kodi Yahova ambabva tani na bzomwe magereja yakunama yambacita?

• Kodi Yahova an’dzacita ciyani na magereja yakunama?

ONANI POMWE IBZI

Pfunzani bzinthu bziwiri bzomwe magereja yakucita bzomwe bzimbakondwesa lini Mulungu.

“Kodi Magereja Yentse Njakundendemerana Ndipo Yambathandiza Wanthu Kudziwa Mulungu?” (Nkhani ya pa jw.org)

Thangwe ranyi Yahova ambafuna kuti timbamunamate pabodzi na anzathu?

“Kodi Pana Bvuto Munthu Akasaya Kuyenda ku Gereja Iri-yentse?”(Nkhani ya pa jw.org)

Wantsembe akhaboneresedwa na wanthu wa m’gereja yace. Koma bzimwebzi bziribe kumutazisa kupfunza cadidi cakulewa bza Mulungu.

“Thangwe Ranyi Wantsembe Adasiya Gereja Yace?”(Mukani! wa Fevereiro 2015)

Kuyambira kale-kale, magereja yakunama yakhala yakupfunzisa wanthu bzinthu bzakunama pakulewa bza Mulungu, aciwacitisa kukhulupira kuti Mulunguyo alibe basa na wanthu. Pfunzani cadidi ca bzinthu bzitatu bzakunama bzomwe magereja yambalewa.

“Mabodza Omwe Amalepheretsa Anthu Kukonda Mulungu” (Nsanja ya Olonda ya 1 Novembro, 2013)