Jezu na anyakupfunza wace adakhala nsiku zitatu ku Betanya pomwe adafika kucokera ku Jeriko. Tsapano ku macibese-bese kwa nsiku ya ciposi pa Nisani 10, iwo adanyamuka, aciyenda ku Jeruzalemu. Tsono Jezu akhabva njala kwene-kwene. Pomwe adawona muti wa mkuyu, iye adayenda kumweko kuti akadye nkhuyu. Tsono kodi mutiyo ukhadaberekadi nkhuyuzo?

Bzimwebzi bzidacitika kuphampha kwa mwezi wa Março koma nkhuyu zikhayamba kufwira mwezi wa Junho. Tenepo, muti wa mkuyuyo udafulumiza kupfundira masamba ndipo bzimwebzi bzidacitisa kuti Jezu akumbuke kuti angadakagumana nkhuyu zakuyambirira. Tsono pomwe adafika pamutipo, adawona kuti mukhalibe cinthu. Masambayo yadacitisa wanthu kuwona ninga kuti mukhana nkhuyu. Ndipopa Jezu adalewa kuti: ‘Palibe munthu omwe an’dzadya pomwe bzisapo bzako mpaka muyaya.’ (Marko 11:14) Nthawe imweyoletu mutiyo udayamba kuuma, ndipo anyakupfunza wace adadzabvesesa thandauzo la bzimwebzi mangwana yace.

Palibe kupita nthawe itali, Jezu na anyakupfunza wace adafika ku Jeruzalemu. Pomwe iwo adafika, adayenda ku templo kukawona bzinthu bzomwe akhadabziwona kale dzulo lace masikati. Pa nthawe imweyi, Jezu adacita bzizinji kuposa kundoyenda kukawona bzinthu ku templo. Iye adacita bzinthu ninga bzomwe akhadacita kale kwa magole matatu m’mbuyomo pa Paskwa ya mu 30 EC. (Juwau 2:14-16) Pa nthawe imweyi, Jezu ‘adathamangisa anyakugulisa malonda mu templo na anyakugula.’ Iye adagwesambo ‘meza za anyakucinja kobiri na mipando ya anyakugulisa nkhangaiwa.’ (Marko 11:15) Iye alibe kubvumiza kuti munthu ali-wense omwe wanyamula mtolo, kupita na ku temploko ninga njira yacigwatira pakuyenda ku mbuto inango ya mu mzindamo.

Thangwe ranyi Jezu adathamangisa anyakucinja kobiri pabodzi na anyakugulisa bzifuwo mu templo? Iye adalewa kuti: ‘Kodi bziribe kunembedwa kuti, “Nyumba yangu in’dzacemeredwa nyumba yakupembera mitundu yense”? Koma imwepo mwaisandusa mphako ya akapondo.’ (Marko 11:17) Jezu adalewa kuti wanthu amwewa akhali akambowa thangwe rakuti akhagulisira wanthu bzifuwo kuti akapereke nsembe pa mtengo wakuumira kwene-kwene. Tenepo, Jezu akhawona kuti bzomwe wanthuwo akhacita kukhali kuba.

Pomwe akulu-akulu wa ansembe, anembi, pabodzi na wanthu winango wa udindo adabva bzomwe Jezu adacita, iwo adapangana bza kuti aphe Jezuyo. Koma pakhana bvuto linango. Iwo akhagumana lini njira ya bwino yakuti amuphere, thangwe wanthu azinji akhayenda kwa iye kuti akabvesere bzomwe akhapfunzisa.

Ajuda pabodzi na wanthu winango wakutembenukira kucijuda, adayenda ku mwambo wa Paskwa. Winango wa iwo akhali Agerego. Ageregowo akhafuna kugumana na Jezu mwakuti iwo adabvunza Firipo penu bzingadakwanisika kuwonana naye. Pinango iwo adakabvunza Firipo thangwe dzina limweri likhali lacigerego. Tenepo, mpsakukwanisika kuti Firipo akhapenukira kuti bzikhali bzakuthemera ayai ne kuti iwo awonane na Jezuyo. Tenepo, iye adakacezerana na Andereya bza nkhani imweyi, ndipo awiriwo adakalewalewa na Jezu. Pa nthawe imweyo, Jezu akhali mu templo basi.

Jezu akhadziwa kuti akhadasala pang’ono kuti aphedwe, tenepo, imweyi ikhali lini nthawe yakuti iye acite bzinthu bzakukondwesa wanthu ayai kuti abvekere. Iye adatawira apostolo wace awiriwo mwakuwafotokozera there lakuti: ‘Yafika nthawe yakuti Mwana wa Munthu atumbizidwe. Cadidi ndinkukuuzani kuti: Kambewu ka tirigu kakasaya kugwa pa mataka kacifa, kambapitiriza kukhala kabodziko. Koma kakafa, kambadzabereka bzisapo bzizinji.’—Juwau 12:23, 24.

Kambeu kabodzi ka tirigu kangawoneke ninga kakusaya phindu. Koma kakabzalidwa, kambeuko ‘kambafa’ ndipo patsogolo pace kambadzamera, kacikula ndipo kambadzabereka bzisapo bzizinji. Bzimwebzi ndibzo bzomwe bzidacitikira Jezu, omwe akhali munthu wakulungamiratu. Jezu adakhala wakukhulupirika mpaka infa yace. Thangwe ra bzimwebzi, wanthu azinji omwe ana mtima wakubzipereka, ana mwayi wakudzatambira moyo wakusaya kumala. Ndipopa Jezu adalewa kuti: ‘Ali-wense wakufuna moyo wace an’dzaupfudza, tsono omwe aniwenga moyo m’dziko lino, ankuukoyera ku moyo wakusaya kumala.’—Juwau 12:25.

Jezu akhandokumbukira lini bza iye yekha, tenepo iye adalewa kuti: ‘Penu munthu an’funa kunditumikira, anditewere, ndipo komwe ndin’dzakhalako, mtumiki wanguyo an’dzakhalambo kumweko. Munthu ali-wense wakutumikira ine, umweyo an’dzalemekezedwa na Baba.’ (Juwau 12:26) Umweyu ukhali mwayi ukulu kwene-kwene thangwe wanthu omwe ambalemekezedwa na Baba, an’dzatonga pabodzi na Kristu mu Umambo.

Pakudziwa kuti angadaboneresedwa, aciphedwa mwakuwawa kwene-kwene, Jezu adati: ‘Tsapano moyo wangu unkutsautsika, ndingalewe pomwe ciyani ine? Baba, ndipulumuseni mu nthawe yakutsautsayi.’ Bzimwebzi bzinkuthandauza lini kuti Jezu akhafuna kutazira kukwanirisa bzakufuna bza Baba wace. Tinkulewa tenepo thangwe iye adapitiriza kulewa kuti: ‘Koma nthawe imweyi in’funika kundifikiradi pakuti ndibzo bzomwe ndidabwerera.’ (John 12:27) Jezu akhafunisisa kucita bzense bzomwe Mulungu akhafuna kuphatanidza bza kupereka moyo wace ninga nsembe.

Pomwe Jezu akhali ku templo pa ciposi, pa Nisani 10, iye adalewa bza infa yace. Thangwe ra thupo na momwe infa yace ingadatokonyera dzina la Mulungu, Jezuyo adalewa kuti: ‘Baba, tumbizani dzina lanu.’ Patsogolo pace, padabveka fala lamphanvu kucokera kudzulu, liciti: ‘Ndalitumbiza kale ndipo ndin’dzalitumbiza pomwe.’—Juwau 12:27, 28.

Wanthu omwe akhali pafupi na Jezuyo, adadabwa kwene-kwene. Winango adakumbuka kuti kudzulu kwagunda. Tsono winango adalewa kuti: ‘Anjo munango akhalewalewa naye.’ (Juwau 12:29) Koma ni Yahova omwe akhalewalewa. Kamweka kakhali lini kakuyamba wanthu kubva Mulungu ankulewa bza Jezu.

Kwa magole matatu na meya m’mbuyomo, pa nthawe ya batismo ya Jezu, Juwau Batista adabva Mulungu ankulewa bza Jezuyo kuti: ‘Uyu ndiye mwanangu, wakufunidwa, omwe ndimbakondwa naye.’ Ndipo pambuyo pa Paskwa ya mu 32 EC, Jezu adasandulika ndipo, pomwe bzimwebzi bzikhacitika, Tiyago, Juwau na Pedru adawona bzimwebzi. Pa nthawe imweyi, wanthu atatuwa adabva Mulungu ankulewa kuti: ‘Uyu ndiye Mwana wangu wakufunidwa, omwe ndimbakomedwa naye; mbamubverani.’ (Mateu 3:17; 17:5) Koma pa nthawe yacitatuyi, ni wanthu azinji omwe adabva Yahova ankulewalewa!

Tenepo, Jezu adati: ‘Mafala yamweya yalibe kubveka thangwe ra inepano, koma thangwe ra imwepo.’ (Juwau 12:30) Bumwebu bukhali umboni bwakuti Jezu akhalidi Mwana wa Mulungu, Mesiya omwe wanthu akhamudikhirira.

Jezu adakhala wakukhulupirika pa nthawe yense yomwe adakhala na moyo pa dziko la pansi. Thangwe ra bzimwebzi, iye adapereka ciratizo ca bwino kwa wanthu ndipo adatsimikizira kuti Sathani Dyabu, omwe ni mtongi wa dzikoli, an’funika kupfudzidwa. Jezu adalewa kuti: ‘Tsapano dzikoli linkutongedwa mulandu; tsapano mtongi wa dziko la pansiri an’cosedwa.’ Kufa kwa Jezu kukhali lini kukundidwa na Sathani koma kukhalatiza kukunda. Tikulewa tenepo thangwe rakuti Jezuyo adafotokoza yekha kuti: ‘Koma inepano ndikadzakwizidwa m’dzulu kucokera pa dziko la pansi, ndin’dzakwewera kwa ine wanthu wakusiyana-siyana.’ (Juwau 12:31, 32) Infa ya Jezu idacitisa kuti Jezuyo akwewe wanthu azinji, ndipo bzimwebzi bzidafungulira wanthuwo mwayi wakuti adzagumane moyo wakusaya kumala.

Pomwe Jezu adalewa kuti ‘an’dzakwizidwa m’dzulu,’ wanthuwo adati: ‘Ifepano tidabva kucokera mu Cakutonga kuti Kristu an’dzakhala kwamuyaya. Tsono imwepo munkulewa tani kuti Mwana wa Munthu an’dzakwizidwa m’dzulu? Kodi Mwana wa Munthu umweyo ni mbani?’ (Juwau 12:34) Wanthu azinji alibe kutawiriza kuti Jezu ni Mwana wacadidi wa Munthu ne kuti ni Mesiya omwe Mulungu akhadapicira. Iwo alibe kubvuma bzimwebzi napo pakhana umboni bwakukwanira na kuti adabva Mulungu ankulewalewa.

Jezu adalewa pomwe kuti iye ni ‘ceza’ ninga momwe adalewera pa nthawe inango m’mbuyomo. (Juwau 8:12; 9:5) Iye adauza wanthuwo kuti: ‘Ceza cinipitiriza kukhala pakati panu mu kanthawe kakucepa. Fambani pomwe cezaco mukanaco, kuti mdima uleke kukukundani . . . Pomwe cezaco mukanaco latizani cikhulupiro mwa cezaco, kuti mukhale wana wa cezaco.’ (Juwau 12:35, 36) Pomwe Jezu adalewa bzimwebzi, adacoka thangwe nthawe yakuti aphedwe ikhanati kukwana. Imweyi ikhali nsiku ya Nisani 10 ndipo Jezu akhafunika ‘kukwizidwa m’dzulu’ ayai kumanikidwa pa muti pa nthawe ya Paskwa ya pa Nisani 14.—Wagalata 3:13.

Pomwe Jezu akhacita utumiki bwace, Ajuda azinji alibe kufuna kumukhulupira ndipo bzimwebzi bzidakwanirisa polofesiya inango. Zaiya adaleweratu kuti, maso ya wanthu yan’dzacita mdima ndipo an’dzaumisa mitima yawo pakuti wanthuwo an’dzatembenuka lini kuti apozedwe. (Zaiya 6:10; Juwau 12:40) Ajuda adalambiratu umboni bwakutsimikizirika bwakuti Jezu ndiye Mpulumusi omwe adapiciridwa na kuti ndiye njira yakugumanira moyo.

Pakhana wanthu winango ninga Nikodemo, Zuze wa ku Arimateya pabodzi na atongi winango azinji omwe ‘adakhulupira’ Jezu. Kodi wanthu amwewa adacita bzinthu bzakulatiza kuti akhakhulupiradi Jezu? Ayai adabwerera m’mbuyo pinango thangwe ra kugopa kucosedwa mu sinagoga ayai thangwe ‘akhafuna umbiri bwa wanthu’?—Juwau 12:42, 43.

Jezu adafotokoza kuti kukhulupira iye kumbaphatanidza ciyani. Iye adati: ‘Omwe ambakhulupira inepano ambandokhulupira lini inepano ndekha, koma ambakhulupirambo ule omwe adandituma.’ Cadidi comwe Mulungu adauza Jezu kuti adzapfunzise na kupalizira cikhali cakufunika kwene-kwene mpaka Jezuyo adalewa kuti: ‘Ali-wense wakundipulumbudza na wakusaya kutambira mafala yangu, anaye m’bodzi omwe an’dzamuyeruza. Mafala yomwe inepano ndalewa ndiyo yomwe yan’dzamuyeruza pa nsiku ya kumalizira.’—Juwau 12:44, 45, 48.

Patsogolo pace, Jezu adamaliza na mafala yakuti: ‘Ndiribe kulewalewa bzakundokumbuka bzangu, koma Baba omwe adanditumayo adandipasa lamulo pa bzomwe ndin’funika kulewa na bzomwe ndin’funika kufotokoza. Ndipo ndikudziwa kuti lamulo lacero limbathandauza moyo wakusaya kumala.’ (Juwau 12:49, 50) Jezu akhadziwa kuti pakhadasala nsiku zing’ono-ng’ono kuti apereke moyo wace ninga nsembe ya kulombola wanthu omwe ambamukhulupira.—Waroma 5:8, 9.