BIBLIYOTEKA YA PA INTERNETI ya Watchtower
Watchtower
BIBLIYOTEKA YA PA INTERNETI
Cinyungwe
  • BIBLIYA
  • MABUKHU
  • MITSONKHANO
  • mwbr24 Setembro matsa. 1-13
  • Mareferentsiya ya “Kabukhu ka Mitsonkhano ka Moyo Wathu na Utumiki”

Mbuto mwasankhulayi iribe vidiyo iri-yentse.

Pepani, bzikukhala bzakunesa kuti vidiyoyi iwoneke.

  • Mareferentsiya ya “Kabukhu ka Mitsonkhano ka Moyo Wathu na Utumiki”
  • Mareferensiya ya Kabukhu ka Mitsonkhano—2024
  • Tumisolo twa nkhani
  • 2-8 SETEMBRO
  • 9-15 SETEMBRO
  • 16-22 SETEMBRO
  • 23-29 SETEMBRO
  • 30 SETEMBRO–6 OUTUBRO
  • 7-13 OUTUBRO
  • 14-20 OUTUBRO
  • 21-27 OUTUBRO
  • 28 OUTUBRO–3 NOVEMBRO
Mareferensiya ya Kabukhu ka Mitsonkhano—2024
mwbr24 Setembro matsa. 1-13

Mareferentsiya ya Kabukhu ka Mitsonkhano ka Moyo Wathu na Utumiki

© 2024 Watch Tower Bible and Tract Society of Pennsylvania

2-8 SETEMBRO

CUMA CA M’FALA LA MULUNGU MASALIMO 79-81

Latizani Lufoyi pa Dzina Lakulemekezeka la Yahova

w17.02 tsa. 10 ndi, 5

Cakulombolera  —  ‘Mphaso Yakulungamiratu’ Yakucokera kwa Baba

5 Kodi tingalatize tani kuti timbafuna dzina la Yahova? Mwa khalidwe lathu. Yahova ambafuna kuti timbakhale wakucena. (Werengani 1 Pedru 1:15, 16.) Bzimwebzi bzimbathandauza kuti tin’funika kunamata iye yekha ticimbamubvera na mtima wathu wense. Napo tigumane na mazunzo, tin’funika kucita ciri-cense comwe tingakwanise kuti tipitirize kukhala na moyo mwakubverana na bzomwe Yahova ambatipfunzisa. Tikakhala na moyo wakubverana na mitemo ya Yahova, timbalemekezesa dzina lace. (Mateu 5:14-16) Timbalatiza kuti malamulo ya Yahova njabwino na kuti Sathani ni nyakunama. Timbaphonya bzinthu bzinango thangwe ndife lini wakulungama. Koma tikaphonya, timbakungula ndipo timbacita ciri-cense kuti tileke kucita bzinthu bzomwe bzingapswipise dzina la Yahova.  —  Psalymo 79:9.

ijwbv tsa. 3 ndi. 4-5

Aroma 10:13  —  “Cemerani Dzina la Mbuya”

M’Bibliya, mafala yakuti ‘kucemera dzina la Yahova’ yambathandauza bzizinji kuposa kundodziwa dzina la Mulungu na kuliphatisa basa pa kumunamata. (Salimo 116:12-14) Mafalaya yambathandauza kumukhulupira na kumuthemba kuti an’dzatithandiza.  —  Salimo 20:7; 99:6.

Dzina la Mulungu likhali lakufunika kwene-kwene kwa Jezu Kristu. Mafala yakuyambirira mu mpembo wace wa ciratizo, iye adati: “Baba wathu omwe muli kudzulu, dzina lanu licenesedwe.” (Mateu 6:9) Jezu adalatizambo kuti tin’funika kumudziwa Yahova na kumubvera kuti tidzagumane moyo wakusaya kumala.  —  Juwau 17:3, 6, 26.

Cuma Cauzimu

it-2 tsa. 111

Zuze

Dzina la Zuze Lidakuzidwa. Pakuti Zuze adakhala wakubvekera kwene-kwene pakati pa wana wa Djakobo, bzidakhala bzakuthemera kuti dzina lacero liphatisidwembo basa pakulewa bza madzinza yentse ya Ajirayeri (Sl 80:1) ayai pakulewa bza madzinza 10 ya ku norte. (Sl 78:67; Amo 5:6, 15; 6:6) Dzina lace limbagumanikambo m’mapolofesiya ya m’Bibliya. M’masomphenya ya Ezekiyeli, Zuze adatambira utaka kubwerezera kawiri. (Eze 47:13) M’bodzi mwa misuwo ya mu mzinda wakuti “Yahova Ali Kumweko” udapasidwa dzina la Zuze (Eze 48:32, 35), ndipo pakulewa bza kuphatanidzidwa pomwe kwa wanthu wa Yahova, Zuze ambalewedwa kuti ni mtsogoleri wa mbali ibodzi ya mtunduyo ndipo Djuda ambalewedwa kuti ni mtsogoleri wa mbali inango. (Eze 37:15-26) Polofesiya ya Obadiya idafotokoza kuti “nyumba ya Zuze” ingadadzathandizirambo kupfudza “nyumba ya Esau” (Oba 18), ndipo polofesiya ya Zakariya idalatiza kuti Yahova angadadzapulumusa “nyumba ya Zuze.” (Zek 10:6) M’mbuto mwa Efraimu, Zuze ndiye omwe ambagumidwa ninga m’bodzi wa madzinza ya Jirayeri wauzimu.  —  Apo 7:8.

Kugumidwa kwa Zuze m’bukhu la Apokalipse 7:8 pinango kumbalatiza kuti mafala yomwe Djakobo adalewa pomwe akhadasala pang’ono kufa yakhalewa bza Jirayeri wauzimu. Bzikuwonekeratu kuti Wamphanvu-zentse wa Djakobo, Yahova Mulungu, adatuma Jezu Kristu ninga M’busa Wabwino omwe angadadzapereka moyo wace thangwe ra ‘mabira.’ (Ju 10:11-16) Jezu ambalewedwambo kuti ni mwala wapakhona wa aliserse pomwe padamangidwa templo ya Mulungu ya Ajirayeri wauzimu. (Aef 2:20-22; 1Pe 2:4-6) Ndipo M’busa na Mwala umweyu ali pabodzi na Mulungu Wamphanvu-zentse.  —  Ju 1:1-3; Mab 7:56; Ahe 10:12; ndendemezerani na Gen 49:24, 25.

9-15 SETEMBRO

CUMA CA M’FALA LA MULUNGU MASALIMO 82-84

Mbatendani Mwayi Omwe Munawo

wp16.6 tsa. 8 ndi. 2-3

Bzomwe Tingapfunze na Mbalame

Wanthu omwe akhakhala ku Jeruzalemu akhazidziwa bwino mbalame zakucemeredwa nyamsuza-nvula zomwe zimbafuna kukonza bzitsa bzawo ku ntsodzi kwa nyumba. Mbalame zimwezi zikhakonzambo bzitsa bzawo kudzaulu kwa templo ya Salomau. Izo zikhawona kuti imweyo ikhali mbuto yakukhotcerereka kwa wana wazene.

M’bodzi mwa wana wa Kora, omwe adanemba Salimo 84, akhatumikira pa templo sumana ibodzi pa minyezi 6 iri-yentse, ndipo akhawona bzitsa bza mbalamezo ku temploko. Iye akhafuna kwene-kwene kukhala pa nyumba ya Yahova nthawe zentse ninga momwe mbalamezi zikhacitira. Iye adati: “Imwe Yahova wa anyankhondo, nimbafuna kwene-kwene tabernakulo yanu ikulu! Ine ndasuwa, inde, ndatepa kwene-kwene, thangwe ra kufunisisa kuyenda ku nyumba ya Yahova . . . Napo mbalame imbagumana kumweko mbuto yakukhala ndipo nyamsuza-nvula ambakonza citsa cace, kuti wana wace akhale pafupi na guwa lanu la ntsembe likulu, imwe Yahova wa anyankhondo, Mambo wangu na Mulungu wangu!” (Salimo 84:1-3) Kodi ifepano pabodzi na wana wathu timbalatiza kuti timbafunisisa kukhala mu gwere la wanthu wa Mulungu nthawe zentse?  —  Salimo 26:8, 12.

w08 15/7 tsa. 30 ndi. 3-4

Lekani Kubzipanikiza, Ndipo Mun’dzakhala Wakukondwa

Tingakhale na malire pa bzomwe timbacita pa kutumikira Yahova thangwe ra kukalamba ayai matenda. Penu ndimwe m’bereki, mungawone ninga kuti mukugumana lini phindu na pfunziro lanu la pamwekha ayai mitsonkhano thangwe mumbamala nthawe na mphanvu zanu mukusamalira wana wanu. Tsono kodi nthawe zinango mumbatazira kuwona bzomwe mungakwanise kucita thangwe rakuti mumbandokumbuka kuti mukukwanisa lini kucita ciri-centse?

Magole mazinji m’mbuyomu, Mlevi munango akhakhumba bzinthu bzomwe bzingadakwanisika lini. Iye akhana mwayi wakutumikira pa templo sumana ziwiri pa gole. Tsono iye akhafuna kuti ambakhale pafupi na guwa la ntsembe moyo wace wentse, ndipo bzimwebzi bzikhali bzabwino. (Sal. 84:1-3) Kodi n’ciyani comwe cidathandiza munthu wakukhulupirikayu kukomedwa na mwayi omwe akhanawo? Iye adazindikira kuti kukhala m’bwalo la templo napo ntsiku ibodzi ukhali mwayi ukulu kwene-kwene. (Sal. 84:4, 5, 10) Ifembo, m’mbuto mwa kumbandokumbukira bzinthu bzomwe tingakwanise lini kucita, tin’funika kutenda mwayi omwe tinawo.

w20.01 tsa. 17 ndi. 12

Imwepo Ndimwe Wakufunika kwa Yahova!

12 Penu imwepo mukuduwala, khalani na citsimikizo cakuti Yahova akudziwa bza matendayo. Tenepo, mukumbireni kuti akuthandizeni kumbawona bzinthu mu njira yakuthemera pa matendayo. Mukamala werengani m’Bibliya mafala yabwino yomwe Yahova adakunemberani kuti yakutsangalazeni. Ndipo ikhani makumbukidwe yanu pa mavesi yomwe yakulatiza momwe Yahova ambawonera mtumiki wace ali-wentse kukhala wakufunika. Mukacita bzimwebzi, mun’dzawona kuti Yahova ngwabwino kwa wentse omwe ambamutumikira mwakukhulupirika.  —  Psalymo 84:11.

Cuma Cauzimu

it-1 tsa. 816

Mwana Wakusaya Pai

Pakuti bzikhali bzakupusa kuyebwa wana omwe akhali nkhungwa na wakusaya kukhotcerereka, Yahova adaphatisa basa mafala yakuti “mwana wakusaya pai” pomwe akhafotokozera Ajirayeri cirungamo cace ayai bzomwe Ajirayeri akhatazira kuteweza. Pomwe Ajirayeri akhabvera malamulo ya Mulungu, iwo akhasamalira wana wakusaya pai. Tsono pomwe iwo akhabvera lini malamulo ya Mulungu, akhasiya kucita bzimwebzi. (Sl 82:3; 94:6; Zai 1:17, 23; Jer 7:5-7; 22:3; Eze 22:7; Zak 7:9-11; Mlk 3:5) Matemberero ya Yahova yakhagwera wale omwe akhaponderera wana wakusaya pai. (Deu 27:19; Zai 10:1, 2) Yahova akubzilewa yekha kuti ni Nyakulombola, Mthandizi na Pai wa iwo. (Mim 23:10, 11; Sl 10:14; Sl 68:5) Iye ndiye Omwe ambatonga kuti awathandize, kuwalatiza ntsisi, kuwatsangalaza na kuwacitisa kuti apitirize kukhala na moyo.  —  Deu 10:17, 18; Oze 14:3; Sl 146:9; Jer 49:11.

Cinthu cibodzi comwe cimbalatiza kuti ndife Akristau wacadidi ndico momwe timbacitira na mkazi omwe afedwa mwamuna ayai wana omwe afedwa pai. Nyakupfunza Tiyago adanembera Akristau kuti: “Kunamata komwe n’kwakucena na kwakusaya kupswipizidwa kwa Mulungu Baba wathu ni uku: Kuthandiza nkhungwa na amamsiwa pa mabvuto yawo, ticipitiriza kukhala wakusaya kupswipizidwa na dzikoli.”  —  Tiy 1:27.

16-22 SETEMBRO

CUMA CA M’FALA LA MULUNGU MASALIMO 85-87

Mpembo Umbatithandiza Kuti Tipirire

w12 15/5 tsa. 25 ndi. 10

Kodi Mukukwanisa Kuwona Ulemerero bwa Yahova?

10 Kuti tikwanise kuwona ulemerero bwa Mulungu, tin’funika ‘kupitiriza kumbapemba.’ (Aroma 12:12) Tin’funika kupemba kwa Yahova kuti atithandize kumutumikira mu njira yakuthemera. Tin’funikambo kupemba kuti atipase mzimu wakucena, atithandize kukhala na cikhulupiro cakulimba, atithandize kukunda mabvuto na kutithandiza kukhala na luso la ‘kuphatisa basa bwino mafala ya cadidi.’ (2 Timotio 2:15; Mateu 6:13; Luka 11:13; 17:5) Ninga momwe mwana ambathembera pai wace, ifepanombo tin’funika kuthemba Yahova omwe ni Baba wathu wakudzulu. Tikapemba kuti atithandize kumutumikira mu njira yakuthemera, tingakhale na citsimikizo cakuti iye an’dzatithandizadi. Tin’funika lini kukumbuka kuti mipembo yathu imbamupasa basa! Koma tikambapemba tin’funika kumutumbiza, kumutenda na kumukumbira kuti atithandize tikakhala tikugumana na mabvuto. Tin’funikambo kumupemba kuti atithandize kumutumikira mu njira yakuthemera yomwe ingalemekezese dzina lace lakucena.  —  Salimo 86:12; Tiyago 1:5-7.

w23.05 tsa. 13 ndi. 17-18

Kodi Yahova Ambatawira Tani Mipembo Yathu?

17 Werengani Salimo 86:6, 7. Nyakunemba salimo Davide akhakhulupira kuti Yahova akhabva ndipo akhatawira mipembo yace. Imwepo mungakhalembo na cikhulupiro cibodzi-bodzici. Bziratizo bzomwe tawona mu nkhani ino bzikutitsimikizira kuti Yahova angatipase nzeru na mphanvu kuti tikwanise kupirira. Iye angaphatise basa abale wathu wacikristau ayai wanthu omwe ambamunamata lini kuti atithandize.

18 Napo kuti Yahova angatawire lini mipembo yathu ninga momwe ifepano tikufunira, koma timbadziwa kuti iye an’dzatawira mipembo yathuyo. Iye an’dzatipasa bzomwe tikufunikira pa nthawe yomwe ifepano tikufunikira bzinthu bzimwebzo. Ndipopa pitirizani kupemba mwa cikhulupiro mucitsimikizira kuti Yahova an’dzakuthandizani ndipo mu dziko lipsa iye ‘an’dzapereka cakukhumba ca bzamoyo bzentse.’  —  Salimo 145:16.

Cuma Cauzimu

it-1 tsa. 1058 ndi. 5

Mtima

Kutumikira “na Mtima Wentse.” Mtima umbafunika kukhala wantero kuti uphate bwino basa, tsono mtima wakuyezezera ungagawike. Davide adapemba kuti: “Ndipaseni mtima wakusaya kugawanika kuti ndigope dzina lanu,” bzomwe bzikufuna kulewa kuti mtima wa munthu ungagawike thangwe ra momwe munthuyo akubvera pabodzi na mantha yomwe angakhale nayo. (Sl 86:11) Munthu angakhale na “mtima wakugawanika” acikhala wakudjedjera pakunamata Yahova. (Sl 119:113; Apo 3:16) Munthu angakhalembo na “mtima wakugawanika” (kulewa kwinango, iye angakhale na mitima miwiri), aciyezera kutumikira ambuya awiri, ayai kulewa cinthu cakunama uko akukumbuka cinango. (1Nk 12:33; Sl 12:2) Jezu adatsimula mwamphanvu bza cinyengo cimweci.  —  Mat 15:7, 8.

23-29 SETEMBRO

CUMA CA M’FALA LA MULUNGU MASALIMO 88-89

Utongi bwa Yahova n’Bwabwino

w17.06 tsa. 22 ndi. 5

Thandizirani Utongi bwa Yahova!

5 Onani thangwe linango lomwe limbacitisa kuti Yahova athemere kutonga. Iye ambaphatisa basa mphanvu zace mwa cirungamo. Iye ambatiuza kuti: “Ine ndine Yahova, omwe ndimbalatiza lufoyi lacadidi na kucita bzinthu bzakulungama pa dziko la pantsi, pakuti bzinthu bzimwebzi bzimbandikondwesa.” (Jeremiya 9:24) Yahova ambathemba lini malamulo ya wanthu kuti yamuthandize kucita bzinthu bzabwino. M’mbuto mwace, iye ambapereka mitemo yomwe njabwino. Ndipo Yahova ambapasa wanthu malamulo mwakubverana na cirungamo cace. Nyakunemba bukhu la Psalymo adati: ‘Cirungamo na ciyeruzo ndiyo mbuto yakukhazikika ya mpando wanu waumambo.’ Tenepo, lamulo liri-lentse, mtemo na cakusankhula comwe cimbaperekedwa na Yahova n’cabwino. (Psalymo 89:14; 119:128) Sathani adalewa kuti Yahova ni Mtongi lini wabwino. Tsono Sathaniyo angakwanise lini kubweresa cirungamo pa dziko la pansi.

w17.06 matsa. 23-24 ndi. 10-11

Thandizirani Utongi bwa Yahova!

10 Yahova ambatonga lini wanthu wace mwa kuuma mtima. Ndipo wale omwe ambamubvera ambakhala wakutsudzuka na wakukondwa. (2 Wakolinto 3:17) Pa kulewa bza Yahova Davide adati: ‘Pamaso pace pana ulemu na umbiri; ndipo pa mbuto yace yakukhala pana mphamvu na cikondweso.’ (1 Nkhani 16:7, 27) Ndipo nyakunemba bukhu la Psalymo Etani adati: ‘An’kondwa ni wale omwe ambakuwa mwakukondwa. Iwo ambafamba m’ceza ca nkhope yanu, imwe Yahova. Iwo ambakondwa m’dzina lanu nsiku yense ndipo thangwe ra cirungamo canu iwo ambalemekezedwa.’  —  Psalymo 89:15, 16.

11 Tikambakumbukira kudeka mtima kwa Yahova, tin’dzathumizira citsimikizo cathu cakuti utongi bwace n’bwabwino kwene-kwene. Timbabzibva ninga nyakunemba bukhu la Psalymo omwe adati kwa Mulungu: ‘Pakuti nsiku ibodzi pa bwalo la nyumba yanu, iri bwino kwene-kwene kuposa kukhala nsiku 1.000 ku mbuto inango!’ (Psalymo 84:10) Yahova adatilenga, tenepo iye ambadziwa bzomwe bzingatikondwese. Iye ambatipasa bzinthu bzizinji kwene-kwene kuposa bzomwe tikhafunikira. Ndipo ciri-cense comwe Yahova ambatiuza kuti ticite cimbabweresa phindu kwa ifepano. Ifepano tin’dzakhala wakukondwa nthawe zense tikabvera Yahova, napo kuti pangafunike kucita nyongo ikulu kwene-kwene.  —  Werengani Zaiya 48:17.

w14 15/10 tsa. 10 ndi. 14

Khulupirani Kwene-kwene Umambo bwa Mulungu

14 Onani bzomwe Yahova adapicira Mambo Davide wa Jirayeri mwakuphatisa basa mpangano wa Davide. (Werengani 2 Samuyeli 7:12, 16.) Yahova adacita mpangano umweyu na Davide pa nthawe yomwe Davideyo akhatonga ku Jeruzalemu, ndipo adamupicira kuti Mesiya angadakhala mbadwa yace. (Luka 1:30-33) Mwa njira imweyi, Yahova adalatiza kuti mbadwa yakucokera mu dzinza la Davide ‘ingadathemera . . . mwa lamulo’ kukhala Mambo wa Umambo bwa Mulungu. (Ezekiyeli 21:25-27) Mwakuphatisa basa Jezu, mpando wa umambo wa Davide “un’dzakhala wakukhazikika mpaka kale-kale.” Kulewa cadidi, mbeu ya Davide ‘in’dzakhala mpaka kale-kale; ndipo mpando wace wa umambo un’dzakhala mpaka kale-kale ninga dzuwa.’ (Salimo 89:34-37) Inde, Umambo bwa Mesiya bun’dzatonga lini kuipa, ndipo bzomwe bun’dzacita bzin’dzamala lini!

Cuma Cauzimu

cl tsa. 281 ndi. 4-5

“Imwepo Mwekha Ndimwe Wakukhulupirika”

4 Fala lakuti ‘kukhulupirika,’ ninga momwe limbaphatisidwa basa mu Bzinembo Bzacihebereu, limbafuna kulewa bza munthu wakudeka mtima omwe thangwe ra lufoyi ambaphatisisa cinthu cinango ndipo ambacisiya lini cinthuco mpaka cakulinga comwe anaco na cinthuco cikwanisike. Kukhulupirika kumweko n’kwakusiyana na kukhala munthu wakuthembeka. Thangwe munthu wakuthembeka angakhale wakukhulupirika thangwe ra kudziwa kuti ndibzo bzomwe an’funika kucita. Mwakusiyana na bzimwebzi, kukhulupirika komwe tikufotokoza mu nkhani ino n’kule komwe munthu ambakulatiza thangwe ra lufoyi. Thangwe bzinthu bzakusaya moyo bzingakhalembo bzakukhulupirika. Mwa ciratizo, nyakunemba salimo adacemera mwezi kuti “mboni yakukhulupirika yakudzulu” thangwe rakuti umbawoneka nthawe zentse usiku. (Salimo 89:37) Tsono tingalewe lini kuti mwezi ngwakukhulupirika ninga momwe munthu ambacitira. Thangwe ranyi? Thangwe munthu ambalatiza kukhulupirika thangwe ra lufoyi, khalidwe lomwe bzinthu bzakusaya moyo bziribe.

5 M’Bibliya, munthu wakukhulupirika ngwa uxamwali. Fala lakuti kukhulupirika limbalatiza uxamwali bomwe bulipo pakati pa munthu omwe ambalatiza khalidwe limweri na omwe ambalatizidwayo. Kukhulupirika kumweku kumbandocitika lini kokha. Iko kulibe kukhala ninga plástico yomwe imbandoyenda kuli-kwentse thangwe ra kugwinyidwa na mphepo. M’mbuto mwace, munthu wakukhulupirika ngwakulimba ndipo ambacinja lini napo akagumana na mabvuto makulu.

30 SETEMBRO–6 OUTUBRO

CUMA CA M’FALA LA MULUNGU MASALIMO 90-91

Thembani Yahova Kuti Mukhale na Moyo Utali

wp19.3 tsa. 5 ndi. 3-5

Kufufudza Moyo Utali

Ni masiyentista lini yentse yomwe yambatawiriza kuti njira zakuthandiza munthu kuti aleke kukalamba zingacitise kuti munthu akhaledi na moyo utali kuposa omwe ambakhala nawo ntsiku zino. N’cadidi kuti kuyambira m’magole ya 1800 wanthu akukhala na moyo utali. Bzimwebzi bzikukwanisika thangwe rakuti wanthu akuyezera kukhala wa khonkho. Pana mankhwala mazinji yomwe yakuthandiza ndipo pana vasina zomwe zimbakhotcerera ku matenda yakusiyana-siyana. Masiyentista yanango yambawona kuti tsapano wanthu ambakhala lini na moyo ufupi ayai utali kwene-kwene ninga yomwe tikhadikhirira.

Magole 3500 m’mbuyomu, Mozeji adalewa kuti: “Ntsiku za moyo wathu zimbandokwana magole 70, ndipo tikakhala na mphanvu zakupambulika yambafika 80. Tsono napo bziri tenepoyo, yambandodzaza na mabvuto na kuwawa. Thangwe ntsiku zomwe timbakhala na moyo zimbafulumiza kumala ndipo timbacoka mwakamfulumize.” (Salimo 90:10) Napo kuti wanthu ambayezera kuthumizira magole yomwe timbakhala na moyo, moyo wathu ngufupi basi ninga momwe Mozeji adalewera.

Pana bzirombo bzomwe bzimbakhala na moyo kupitirira magole 200 ndipo pana miti yomwe imbakhala na moyo mamidyau mazinji ya magole. Tikandendemezera magole yamweya na magole yomwe wanthufe timbakhala nayo, pinango tingabzibvunze kuti: ‘Kodi wanthufe tidalengedwa kuti timbandokhale na moyo magole 70 ayai 80 basi?’

wp19.1 tsa. 5, kwadru

Kodi Mulungu Dzina Lace ni Mbani?

Umweyu ni mbvunzo omwe wanthu azinji ambabzibvunza. Pinango imwepo mumbabzibvunzambo kuti: Penu dziko la pansi pabodzi na bzinthu bzense bzidacita kukonzedwa ayai bzidalengedwa na Mulungu, tsono mbani adalengambo Mulunguyo?

Masiyentista yambabvuma kuti bzinthu bza moyo bza m’cirengedwe bzina ciyambi. Ndipo mwakubverana na nfundo imweyi, vesi yakuyamba ya m’Bibliya imbalewa kuti: “Pakuyamba Mulungu adalenga kudzulu na dziko la pansi.”  —  Genesesi 1:1.

Bzinthu bzingalengeke lini bzokha; ne kusandulika kucokera ku cinthu cinango. Palibe cinthu comwe cingabwere kucokera ku cinthu cinango. Tenepo, bzingadakhala kuti paciyambi pakhalibe moyo uli-wense, pangadakhala palibe cirengedwe nsiku zino. Napo bzingatinese kubvesesa bwino-bwino, koma palibe cinthu cakuyambirira comwe cidacitisa kuti bzinthu bza moyo bziwoneke m’cirengedwe. Tsono Yahova Mulungu, omwe ngwamphanvu zense na wa nzeru, ndiye omwe adalenga bzinthu bzense.  —  Juwau 4:24.

Bibliya limbalewa bza Mulungu kuti: “Yanati kubadwa mapiri ayai munati kubweresa dziko la pansi na mbuto yakukhala wanthu, kucokera kwa nthawe yakusaya kumala mpaka kwa nthawe yakusaya kumala, imwe ndimwe Mulungu.” (Salimo 90:2) Tenepo, Mulungu alipo kuyambira kale-kale. Ndipo “pakuyamba” iye adalenga bzinthu bza m’cirengedwe.  —  Apokalipse 4:11.

w22.06 tsa. 18 ndi. 16-17

Lufoyi la Yahova Limbatithandiza Kukunda Mantha

16 Sathani ambadziwa kuti ifepano timbafuna kukhala na moyo. Ndipo iye adalewa kuti tin’dzabvuma kudzonga uxamwali bwathu na Yahova na kucita cinthu ciri-centse kuti tipulumuse moyo wathu. (Djobi 2:4, 5) Koma iye akhanama. Pakuti ndiye “omwe ambacitisa kuti wanthu afe,” ndipopa ambayezera kutigopswa mwakuphatisa basa infa kuti tisiye kutumikira Yahova. (Ahebereu 2:14, 15) Nthawe zinango wanthu omwe ambatsogoleredwa na Sathani ambatigopswa mwakulewa kuti an’tipha tikapitiriza kutumikira Yahova. Tikakhala kuti tikuduwala, nthawe zinango Sathani ambaphatisa basa mpata umweyu kuti adzonge cikhulupiro cathu. Adotolo ayai abale wathu omwe ni Mboni lini za Yahova angayezere kutingingimiza kuti tiikhidwe mulopa, komwe ni kuphonyera mitemo ya Mulungu. Ayai munthu unango angayezere kutingingimiza kuti tibvume thandizo la ulapi lomwe limbabverana lini na bzomwe Bibliya limbapfunzisa.

17 Napo timbafuna lini kufa, timbadziwa kuti Yahova an’dzapitiriza kutifuna napo ticifa. (Werengani Aroma 8:37-39.) Axamwali wa Yahova akafa, iye ambapitiriza kuwakumbukira ninga kuti iwo akana moyo. (Luka 20:37, 38) Ndipo iye an’dzawalamusa kuti akhale pomwe na moyo. (Djobi 14:15) Yahova adapagali pereso yakuumira kwene-kwene kuti ifepano ‘tidzakhale na moyo wakusaya kumala.’ (Juwau 3:16) Ifepano timbadziwa kuti Yahova ambatifuna kwene-kwene ndipo ambatithandiza. Ndipopa timbathemba iye kuti atitsangalaze, atipase nzeru na mphanvu tikakhala tikuduwala ayai wanthu akafuna kutipha. Ndipo mpsimwebzi bzomwe mpfumakazi Valérie na mwamuna wawo adacita.  —  Salimo 41:3.

Cuma Cauzimu

wp17.5 tsa. 5

Kodi Munthu Ali-wentse ana Anjo Omwe Ambamukhotcerera?

Bibliya limbalewa lini kuti munthu ali-wentse ana anjo wace omwe ambamukhotcerera. N’cadidi kuti Jezu adalewa kuti: “Citani mphole kuti muleke kunyoza wanthu omwe ali ninga tuwanatu [anyakupfunza wa Kristu], thangwe ndikukuuzani kuti, anjo wawo omwe ali kudzulu, nthawe zentse ambawona nkhope ya Baba wangu omwe ali kudzulu.” (Mateu 18:10) Pamwepa Jezu akhalewa lini kuti munthu ali-wentse ana anjo omwe ambamukhotcerera. M’mbuto mwace, akhafuna kulewa kuti anjo ambakomedwa kwene-kwene na nyakupfunza ali-wentse wa Jezu ndipo ambafuna kuti bzinthu bzimufambire bwino. Ndipopa atumiki wa Mulungu ambaikha lini utowa moyo wawo pa ngozi acikumbuka kuti anjo wa Mulungu aniwakhotcerera.

Kodi bzimwebzi bzin’funa kulewa kuti anjo ambathandiza lini wanthu? Ne ndibzo lini. (Salimo 91:11) Wanthu winango ambakhulupira na mtima wentse kuti Mulungu ambawakhotcerera na kuwatsogolera mwakuphatisa basa anjo. M’bodzi mwa wanthu amwewa ni Kenneth, omwe adafotokozedwa mu nkhani yakuyamba ire. N’cadidi kuti Mulungu ndiye omwe adathandiza Kenneth. Kazinji-kazinji Mboni za Yahova zimbakwanisa kuwona umboni bwakulatiza kuti anjo ambazithandiza pa basa lakupalizira. Tsono pakuti anjo ambawoneka lini, tingakwanise lini kufotokoza bwino-bwino bzinthu bzentse bzomwe iwo ambacita kuti athandize wanthu mu njira zakusiyana-siyana. Koma n’kuphonyeka lini munthu kutenda Yahova thangwe rakuti wamuthandiza mwakuphatisa basa anjo.  —  Akolose 3:15; Tiyago 1:17, 18.

7-13 OUTUBRO

CUMA CA M’FALA LA MULUNGU MASALIMO 92-95

Kutumikira Yahova Kumbaticitisa Kuti Tikhale na Moyo Wabwino!

w18.04 tsa. 28 ndi. 5

Maswaka, Kodi Muna Bzakulinga Bzauzimu Pakutumikira Mulungu?

5 Thangwe likulu lomwe limbaticitisa kukhala na bzakulinga bzauzimu ni kufuna kutenda Yahova thangwe ra lufoyi lace pabodzi na bzinthu bzense bzomwe iye ambaticitira. Munembi munango wa bukhu la Psalymo adati: ‘Mpsabwino kukutendani imwe Yahova . . . Pakuti imwe Yahova, mwandikondwesa thangwe ra mabasa yanu, ndimbakuwa mwakukondwa thangwe ra mabasa ya manja yanu.’ (Psalymo 92:1, 4) Ndokumbukirani bzinthu bzomwe Yahova adakupasani: Moyo, cikhulupiro, Bibliya, gwere pabodzi na cidikhiro comwe munaco cakudzakhala m’Paraizo kwa muyaya. Tenepo, mukakhala na bzakulinga bzauzimu, imwepo mumbalatiza kwa Yahova kuti mumbamutenda thangwe ra bzinthu bzensenebzi, ndipo mumbakhalambo wakufendererana naye.

w18.11 tsa. 23 ndi. 8

Kodi Mumbatewezera Makumbukidwe ya Mbani?

8 Ninga m’bereki wabwino, Yahova ambafuna kuti wana wace akhale na moyo wabwino kwene-kwene. (Zaiya 48:17, 18) Ndipopa iye ambatipfunzisa nfundo zakuyambirira zakulewa bza makhalidwe yabwino na momwe tingambacitire bzinthu na anzathu. Yahova ambatiuza kuti timbawone bzinthu ninga momwe iye ambabziwonera ticikhala na moyo wakubverana na makhalidwe yace yabwino. Iye akacita bzimwebzi ambatiphera lini ufulu bwathu, koma bzimbaticitisa kukhala wanzeru na kutithandiza kumbacita bzakusankhula bzabwino. (Psalymo 92:5; Mimwani 2:1-5; Zaiya 55:9) Tenepo, tikapitiriza kumbacita bzakusankhula bzabwino tin’dzakhala wakukondwa. (Psalymo 1:2, 3) Ndipo tikakhala na makumbukidwe ya Yahova, tin’dzagumana bzisimbo bzizinji!

w20.01 tsa. 19 ndi. 18

Imwepo Ndimwe Wakufunika kwa Yahova!

18 Yahova angapitirize kutiphatisira basa, napo tikakalamba. (Psalymo 92:12-15) Pinango mungakumbuke kuti bzomwe mumbacitira Yahova mpsing’ono-ng’ono. Tsono Jezu adatipfunzisa kuti kwa Yahova, bzentse bzomwe timbacita pakumutumikira mpsakufunika kwene-kwene. (Luka 21:2-4) Tenepo, mbaikhani makumbukidwe yanu pa bzomwe mungakwanise kucita. Mwa ciratizo, imwepo mungauze winango bza Yahova, kupembera abale na mpfumakazi zanu na kuwalimbisa kuti apitirize kutumikira mwakukhulupirika. Bzomwe bzimbacitisa Yahova kukuwonani kukhala anyabasa anzace, ni kumubvera komwe mungacite sikuti bzinthu bzomwe mungakwanise kucita.  —  1 Wakolinto 3:5-9.

Cuma Cauzimu

cl tsa. 176 ndi. 18

‘Nzeru Zakucokera kwa Mulungu ni Zakusaya Malire!’

18 Onani momwe mpostolo Paulo adalatizira kuti nzeru za Yahova n’zapadzulu kwene-kwene. Iye adati: “Bzisimbo bzakucokera kwa Mulungu, nzeru zace na udziwi bwace mpsakusaya malire. Kodi mbani angakwanise kubvesesa momwe iye ambatongera? Ndipo mbani angakwanise kudziwa njira zace?” (Aroma 11:33) Na mafalaya, Paulo adalatiza momwe iye akhakumbukira, kugopa kwace Mulungu na ulemu bomwe akhanabo kwa iye. Mafala ya Cigerego yakuti “mpsakusaya malire” njakundendemerana na fala lakuti “dindi.” Ndipopa mafala yace yambatithandiza kubvesesa bwino bzimwebzi. Tikambakumbukira bza nzeru za Yahova bzimbakhala ninga tikuwona cidindi cakuzika comwe ciribe malire comwe mpsakunesa kufotokoza momwe ciriri. (Salimo 92:5) Kodi kudziwa bzimwebzi kun’funika lini kuticitisa kukhala wakubzicepesa?

14-20 OUTUBRO

CUMA CA M’FALA LA MULUNGU MASALIMO 96-99

“Dziwisani Mafala Yabwino”!

w11 1/3 tsa. 6 ndi. 1-2

Kodi Mafala Yabwino n’Ciyani?

AKRISTAU an’funika kupalizira “mafala yabwino ya Umambo.” An’funikambo kufotokozera winango kuti Umambobo ni boma lakutsogolo lomwe lin’dzatonga mwacirungamo pa dziko la pantsi. Tsono m’Bibliya “mafala yabwino” yambaphatisidwa basa mu njira zakusiyana-siyana. Mwa ciratizo, m’Bibliya muna mafala yakuti “mafala yabwino yacipulumuso” (Salimo 96:2); “mafala yabwino . . . ya Mulungu” (Aroma 15:16); na “mafala yabwino yakulewa bza Jezu Kristu.”  —  Marko 1:1.

Mwacigwatho tingalewe kuti mafala yabwino ni nfundo zentse za cadidi zomwe Jezu adalewa na zomwe anyakupfunza wace adanemba. Pomwe Jezu akhanati kuyenda kudzulu adauza ateweri wace kuti: “Tenepo, ndokoni, ndipo kapfunziseni wanthu wa mitundu yentse kuti akhale anyakupfunza wangu, muciwabatiza mu dzina la Baba, la Mwana na la mzimu wakucena, muciwapfunzisa kuteweza bzinthu bzentse bzomwe ndidakuuzani.” (Mateu 28:19, 20) Na tenepo, basa la Akristau wacadidi n’kundouza lini wanthu mafala yabwino ya Umambo, koma an’funikambo kupfunzisa wanthuwo kuti akhale anyakupfunza wa Jezu.

w12 1/9 tsa. 16 ndi. 1

Kodi N’ciyani Cin’dzacitika pa Ntsiku ya Kutongedwa?

Ninga momwe cikulatizira cithunzi-thunzici, wanthu azinji ambakumbuka kuti pa Ntsiku ya Kutongedwa, wanthu wentse an’dzaima patsogolo pa mpando wa Umambo wa Mulungu ndipo ali-wentse an’dzatongedwa mwakubverana na mabasa yomwe adacita. Iwo ambakumbuka kuti wanthu winango an’dzatambira moyo kudzulu ndipo winango an’dzakaboneresedwa ku moto. Tsono Bibliya limbalatiza kuti cakulinga ca Ntsiku ya Kutongedwa ndico kupulumusa wanthu ku bzinthu bzakusaya cirungamo bzomwe bzimbacitika m’dzikoli. (Salimo 96:13) Mulungu wasankhula Jezu ninga Mtongi wace omwe an’dzabweresa cirungamo kwa wanthu.  —  Werengani Zaiya 11:1-5; Mabasa 17:31.

w12 15/9 tsa. 12 ndi. 18-19

Mtendere Un’dzayamba Kuyambira m’Magole 1000!

18 Ciphatano cimweci cidadzongeka pomwe Sathani adacitisa kuti wanthu apandukire utongi bwa Yahova. Kuyambira mu 1914, Umambo bwa Mesiya bukucita ciri-centse kuti bubwezerese mtendere na ciphatano. (Aefezo 1:9, 10) Mu Utongi bwa Magole 1000 bzinthu bzabwino bzomwe tikubzidikhirira bzin’dzacitika. Patsogolo pace, cin’dzafika “cimaliziro,” comwe ni kumala kwa Utongi bwa Kristu bwa Magole 1000. N’ciyani comwe cin’dzacitika patsogolo pace? Napo kuti Jezu ‘adapasidwa utongi bwentse kudzulu na pa dziko la pantsi,’ iye ngwakubzikuza lini. Iye ambakumbuka lini bzakutengera Yahova mpando wace. Mwakubzicepesa “iye an’dzapereka umambo kwa Mulungu Baba wace.” Iye an’dzaphatisa basa udindo na utongi bomwe anabo kuti ‘Mulungu apasidwe ulemerero.’  —  Mateu 28:18; Afilipi 2:9-11.

19 Pa nthawe imweyi, wanthu wentse pa dziko la pantsi an’dzakhala wakulungamiratu. Mwakubzicepesa na mwakucita kufuna kwawo, iwo an’dzatewezera Jezu ndipo an’dzabvuma kutongedwa na Yahova. An’dzakhala na mwayi wakulatiza bzimwebzo pomwe an’dzapulumuka pa mayezo yakumalizira. (Apok. 20:7-10) Patsogolo pace, wanthu pabodzi na anjo wakuipa an’dzapfudzidwa kwa muyaya. Kulewa cadidi, nthawe imweyi in’dzakhala yakudekeza kwene-kwene! Mwakukondwa, banja la pa dziko lentse la pantsi na la kudzulu lin’dzatumbiza Yahova ndipo iye an’dzakhala “bzinthu bzentse kwa wanthu wentse.”  —  Werengani Salimo 99:1-3.

Cuma Cauzimu

it-2 tsa. 994

Nyimbo

Mafala yakuti “nyimbo ipsa” yambandogumanika lini m’bukhu la Masalimo lokha koma yambagumanikambo m’bukhu la Zaiya na Apokalipse. (Sl 33:3; 40:3; 96:1; 98:1; 144:9; 149:1; Zai 42:10; Apo 5:9; 14:3) Tikawona bwino-bwino thandauzo la mafala yakuti “nyimbo ipsa” m’mbuto yomwe yambabwera kawiri-kawiri, nyimboyi imbaimbidwa thangwe ra cinthu cipsa comwe cin’dzacitika Yahova akalatiza kuti ana mphanvu ya kutonga cirengedwe centse. Pa Salimo 96:10 pambalewa kuti: “Yahova wakhala mambo.” Mafala yamweya yakulewedwa thangwe ra bzinthu bzomwe Yahova an’dzacita ninga mtongi wa dziko la pantsi na kudzulu na momwe bzomwe iye ambacitabzo bzimbatokonyera kudzulu na dziko la pantsi. Pinango bzimwebzi ndibzo bzomwe bzikucitisa kuti mafala yamweya yacemeredwe “nyimbo ipsa.”  —  Sl 96:11-13; 98:9; Zai 42:10, 13.

21-27 OUTUBRO

CUMA CA M’FALA LA MULUNGU MASALIMO 100-102

Latizani Kuti Mumbatenda Lufoyi Lacadidi la Mulungu

w23.03 tsa. 12 ndi. 18-19

Kodi Mungakonzekere Tani Kuti Mubatizidwe?

18 Lufoyi lanu kwa Yahova ni cinthu cakufunika kwene-kwene. (Werengani Mimwani 3:3-6.) Tikakhala na lufoyi kwa Yahova tin’dzabwerera lini m’mbuyo pomwe tikugumana na mabvuto. Bibliya limbalewa kuti Yahova ana lufoyi lacadidi kuna atumiki wace. Ndipo lufoyi limweri limbamala lini. (Salimo 100:5) Imwepo mudalengedwa m’cifanikiso ca Mulungu. (Ciyambo 1:26) Kodi lufoyiro tingalilatizembo tani?

19 Mbayambani ntsiku iri-yentse na kutenda Yahova. (1 Atesalonika 5:18) Ntsiku iri-yentse, mbabzibvunzani kuti: ‘Kodi Yahova ambalatiza tani kuti ambandifuna?’ Mukamala pembani kwa Yahova mucimutenda pa bzinthu bzomwe ambakucitirani. Ninga momwe mpostolo Paulo adazindikirira kuti Yahova adamucitira bzinthu bzizinji kwene-kwene, imwepo mbazindikiranimbo bzomwe Yahova ambakucitirani pamwekha. (Werengani Agalatiya 2:20.) Bzibvunzeni kuti: ‘Kodi ningalatize tani kuti nimbamufunambo Yahova?’ Lufoyi lanu kwa Yahova lin’dzakuthandizani kuti mudzakunde mabvuto yomwe mungadzagumane nayo. Ndipo lin’dzakuthandizanimbo kukhala na ndondomeko yabwino yauzimu na kulatizambo kuti mumbafuna Yahova ntsiku iri-yentse.

w23.02 tsa. 17 ndi. 10

“Khalani Wanzeru, Ndipo Khalanimbo Tceru!”

10 Bzinthu bzinango bzomwe tin’funika lini kumbabzicita ndibzo kumbaceza kwene-kwene na munthu omwe tin’funa lini kulowolana naye, kumwa kwene-kwene, kudya kwene-kwene, kumbalewa mafala yakuipa, kukhala na axamwali wakuipa, kuwona mavidiyo yakumenyana, kuwona pornografia na bzinthu bzinango bzakundendemera na bzimwebzi. (Salimo 101:3) Nyamadulanthaka wathu, Sathani, akunyang’ana manera kuti adzonge uxamwali bwathu na Yahova. (1 Pedru 5:8) Tikasaya kucenjera, iye angaticitise pang’ono na pang’ono kukhala wanthu wakusaya kulungama, wa ukali, wa ciwengo na wakukoyera anzathu cakumtima. (Agalatiya 5:19-21) Bzinthu bzimwebzi bzingakhale bziribe kuipiratu. Tsono tikasaya kucita cinthu kuti tibzimalise, ibzo bzingakule mu mtima mwathu ndipo bzingatidzonge.  —  Tiyago 1:14, 15.

w11 15/7 tsa. 16 ndi. 7-8

Kodi Imwepo Mun’dzabvera Mcenjezo Wakubveka Bwino wa Yahova?

7 Kodi kutcenkha apfunzisi wakunama kumbaphatanidza ciyani? Kumbaphatanidza kuleka kuwatambira ku mui kwathu ayai kuwamusa. Timbawerenga lini mabukhu yawo, timbawona lini nkhani zawo pa TV, timbawona lini bzomwe iwo ambaikha pa interneti ayai kubzitawira. Thangwe ranyi timbacita lini bzimwebzi? Thangwe ra lufoyi. Timbafuna “Mulungu wacadidi,” ndipopa timbafuna lini kubva bzipfunziso bzakupitana na cadidi cakugumanika m’Fala lace, Bibliya. (Salimo 31:5; Juwau 17:17) Kuthumizira bzimwebzi, timbafuna gulu la Yahova thangwe timbapfunza bzinthu bzabwino ninga dzina la Mulungu, thandauzo lace, cakulinga cace na dziko la pantsi, mkhalidwe wa anyakufa na cidikhiro cawo cakutsogolo. Kodi imwepo mukukumbukira momwe mudabvera pomwe mudapfunza cadidi cimweci na bzinango pakulewa bza Yahova? Lekani kulekerera kuti apfunzisi wakunama akucitiseni kucoka mu gulu la Mulungu lomwe lakupfunzisani nfundo zacadidi zentsenezi.  —  Juwau 6:66-69.

8 Bziribe basa bzomwe apfunzisi wakunama angalewe, ifepano tin’dzawatewera lini! Tikawabvera tingasuname thangwe ali ninga micera yakusaya madzi. M’mbuto mwace, tin’funika kukhala wakukhulupirika kwa Yahova na gulu lace. Gulu limweri likanati kutisunamisa kale, ndipo kuyambira kale-kale iro limbatipasa madzi yakucena yakudjedjera bwino ya m’Fala la Mulungu.  —  Zaiya 55:1-3; Mateu 24:45-47.

Cuma Cauzimu

it-2 tsa. 596

Mbalame Yakucemeredwa Pelikano

Mbalame imweyi ikakhala idakhuta imbambuluka iciyenda kutali kwa yokha. Kumweko na patali imbawoneka ninga mwala ucena ikaikha msolo wace m’nyantsi mwa maphaphidwe yace. Mbalame imweyi imbamala ora zizinji iri tenepo bzomwe bzimbakhala ninga kuti iri pa mabvuto. Bzimwebzi bzikubverana na bzomwe nyakunemba Salimo adalewa thangwe ra mabvuto yomwe akhagumana nayo. Iye adati: “Ndandokhala ninga mbalame yakucemeredwa pelikano m’dambo.” (Salimo 102:6) “Dambo” lomwe likulewedwali ni dambo lini cairo, koma likuthandauza mbuto yomwe iri kutali na wanthu ayai thawale. Pa nthawe inango mbalame zakucemeredwa pelikano zikhambakhala m’mathawale ya ku norte kwa Mkulo wa Jordano. Mitundu mitatu ya mbalame zimwezi imbagumanika ku Jirayeri. Mtundu omwe umbagumanika kwene-kwene ni pelikano mcena. Pelikano wa maphaphidwe mapswipa ku ntsonga na pelikano wakupfumbuka ambawoneka lini kazinji-kazinji kumweko.

Mbalame imweyi imbafuna kukhala ku mbuto komwe kulibe wanthu. Imbakonza citsa ca wana wace ndipo imbayenda kukaphata ntsomba ikamala imbabwerera. Pakuti mbalame imweyi imbafuna kukhala ku mbuto ya yokha na yakusaya wanthu, m’Bibliya imbandendemezeredwa na mzinda omwe umbadzakhalidwa lini pomwe na wanthu ukapfudzidwa. Pakufuna kuyezezera bza momwe ungadakhalira mzinda wa Edomu pambuyo pa kupfudzidwa, mpolofeta Zaiya akhadaleweratu kuti pelikano angadadzakhala mu dzikolo. (Zaiya 34:11) Mpolofeta Zefaniya akhadaleweratumbo kuti mbalame zimwezi zingadadzakhala mu mzinda wa Ninive bzomwe bzikuthandauza kuti ungadakhala matere ndipo ungadadzakhalidwa lini pomwe na wanthu.  —  Zefaniya 2:13, 14.

28 OUTUBRO–3 NOVEMBRO

CUMA CA M’FALA LA MULUNGU MASALIMO 103-104

Iye “Ambakumbukira Kuti Ndife Pfumbi”

w23.07 tsa. 21 ndi. 5

Tewezerani Yahova mwa Kuleka Kumbangingimira Nzeru Zanu

5 Kubzicepesa na ntsisi za Yahova bzimbamucitisa kuti aleke kungingimira nzeru zace. Mwa ciratizo, kubzicepesa kwa Yahova kudawonekera pomwe iye akhadasala pang’ono kupfudza mzinda wa Sodoma. Mwakuphatisa basa anjo wace, Yahova adacenjeza munthu wakulungama Loti kuti athawire ku mapiri. Loti akhana mantha kuti ayende kumweko. Iye pabodzi na banja lace adakumbira Yahova kuti athawire ku Zoari omwe ukhali mzinda omwe Yahova akhafuna pomwe kuupfudza. Yahova angadangingimira kuti Loti ateweze malango yomwe iye adalewa. Tsono Yahova adabvuma mkumbiro wa Loti ndipo alibe kudzapfudza mzindayo. (Genesesi 19:18-22) Na kupita kwa magole, Yahova adalatiza ntsisi kwa wanthu wa ku Ninive. Iye adatumiza mpolofeta Djona kuti akadziwise bza kupfudzidwa kwa mzindayo pabodzi na wanthu wakuipa. Pomwe wanthu wa ku Ninivewo adalatiza kukungula, Yahova adawabvera ntsisi ndipo alibe kuwapfudza.  —  Djona 3:1, 10; 4:10, 11

w23.09 tsa. 6-7 ndi. 16-18

Mbathembani Yahova Ninga Momwe Samusoni Adacitira

16 Napo kuti Samusoni akhagumana na mabvuto thangwe ra bzakusankhula bzace bzakuipa, iye alibe kusiya kucita bzomwe Yahova ambafuna. Ifepano tikacita bzinthu bzakuipa ticiluza mwayi omwe tikhanawo, tin’funika lini kubwerera m’mbuyo. Kumbukirani kuti Yahova ngwakukonzeka kutilekerera. (Salimo 103:8-10) Napo kuti tidacita bzinthu bzakuphonyeka, Yahova angapitirize kutiphatisa basa ninga momwe adacitira na Samusoni.

17 Onani ciratizo ca m’bale m’bodzi wacitswaka wakucemeredwa Michael. Iye akhacita bzizinji pakutumikira Yahova, akhatumikira ninga mtumiki wakuthandiza na mpainiya wakukhazikika. Tsono iye adacita bzinthu bzakuipa ndipo bzimwebzi bzidacitisa kuti iye aluze udindo bomwe akhanabo m’gwere. Iye adati: “Pomwe ndikhanati kucosedwa pa udindo bzinthu bzikhandifambira bwino pakutumikira Yahova! Tsono kabodzi na kabodzi ndidasiya kucita bzinthu bzentse bzomwe ndikhacita pakutumikira Yahova. Inepano ndiribe kukumbuka kuti Yahova akhadandisiya ndekha, tsono ndikhabzibvunza penu ningadakhala pomwe pa uxamwali bwakulimba na Yahova ndicikwanisa pomwe kucita bzizinji mu gwere ninga momwe ndikhacitira pakuyamba.”

18 Bzakudekeza mpsakuti Michael alibe kubwerera m’mbuyo. Iye adalewa pomwe kuti: “Ndidacita nyongo kuti ndikhale pomwe pa uxamwali bwakulimba na Yahova mwa kumbapemba kwa iye na mtima wangu wentse, kupfunza na kumbakumbukira bzomwe ndapfunzabzo.” Pomwe padapita nthawe, Michael adadzakhala pomwe na udindo ninga bomwe akhanabo pakuyamba m’gwere. Tsapano iye akutumikira ninga mkulu na mpainiya wakukhazikika. Iye adati: “Thandizo na cilimbikiso comwe ndidatambira maka-maka kwa akulu bzidandithandiza kuti ndizindikire kuti Yahova akadandifuna. Ndikucita bzizinji pakutumikira Yahova m’gwere na cikumbu-mtima cakucena. Bzimwebzi bzidandipfunzisa kuti Yahova ambalekerera munthu ali-wentse omwe ambakungula na mtima wentse.” Ifepanombo tingakhale na citsimikizo cakuti tikacita nyongo ya kucinja njira zathu na kupitiriza kuthemba Yahova, iye angatiphatise basa na kutisimba napo kuti tidacita bzinthu bzakuphonyeka.  —  Salimo 86:5; Mimwani 28:13

w23.05 tsa. 26 ndi. 2

Imwepo Mungakwanirise Bzakulinga Bzanu Bzauzimu

2 Penu pana cakulinga cibodzi cauzimu comwe mukanati kucikwanirisa, lekani kuwofoka thangwe nthawe zinango bzimbakhala bzakunesa kukwanirisa cakulinga napo cikhale cing’ono. Mtima wanu wakufuna kukhala na cakulinga na kufuna kucikwanirisa ukulatiza kuti mumbawona kuti ni mwayi ukulu kwene-kwene kukhala pa uxamwali na Yahova, ndipo mukufuna kucita bzizinji pa kumutumikira. Yahova ambatenda nyongo yanu, ndipo iye ambadikhirira lini kuti mucite bzinthu bzomwe mungakwanise lini kubzicita. (Salimo 103:14; Mika 6:8) Ndipopa mukafuna kukhala na bzakulinga bzauzimu sankhulani bzinthu bzomwe mun’kwanisa kucita bzomwe bzikubverana na moyo wanu. Mukakhala na cakulinga, kodi mungacite ciyani kuti mucikwanirise? Bwerani ticezerane bzinthu bzomwe bzingakuthandizeni.

Cuma Cauzimu

cl tsa. 55 ndi. 18

Mphanvu ya Kulenga ya “Omwe Adakonza Kudzulu na Dziko la Pantsi”

18 Tingapfunze ciyani na mphanvu yakulenga ya Yahova? Bzinthu bzakusiyana-siyana bza m’cilengedwe bzimbatidabwisa. Nyakunemba Salimo adalewa kuti: “Mabasa yanu n’mazinji, imwe Yahova! . . . Dziko la pantsi lidadzala na bzinthu bzomwe mudakonza.” (Salimo 104:24) Bzimwebzi mpsacadidi! Masiyentista yomwe yambapfunza bzinthu bza moyo yadalewa kuti pa dziko la pantsi pana bzinthu bza moyo bzakusiyana-siyana bzakupitirira midyau ibodzi. Tsono bzikuwoneka kuti pinango pangakhale na bzinthu bzinango bza moyo bzakusiyana-siyana bzakukwana mamidyau 10, mamidyau 30 ayai kuposa pamwepo. Munthu omwe ana luso lakudezenyari bzinthu bzakusiyana-siyana angawone ninga kuti akusaya cakudezenyari. Mwakusiyana na munthu umweyu, luso lakukonza bzinthu la Yahova na mphanvu yakukumbuka bzinthu bzipsa kuti abzikonze bzimbamala lini.

    Mabukhu ya Cinyungwe (2008-2025)
    Bulani
    Pitani
    • Cinyungwe
    • Tumizani
    • Bzomwe mumbafuna
    • Copyright © 2025 Watch Tower Bible and Tract Society of Pennsylvania
    • Mitemo Yomwe Mun'funika Kuteweza
    • Mtemo Wacintsintsi
    • Privacy Settings
    • JW.ORG
    • Pitani
    Tumizani