Mareferentsiya ya Kabukhu ka Mitsonkhano ka Moyo Wathu na Utumiki
© 2024 Watch Tower Bible and Tract Society of Pennsylvania
4-10 NOVEMBRO
CUMA CA M’FALA LA MULUNGU SALIMO 105
“Iye Ambakumbukira bza Mpangano Wace Mpaka Kale-kale”
Kodi Tingalimbise Tani Cikhulupiro Cathu Cakuti Yahova An’dzabweresa Dziko Lipsa?
11 Onani bzinthu bzinango bzomwe Yahova adauza wanthu kuti iye angadacita bzomwe bzikhawoneka ninga kuti bzingadacitika lini. Iye adatsimikizira Abalahamu na Sara kuti iwo angadakhala na mwana napo kuti akhadakalamba. (Ciyambo 17:15-17) Ndipo iye adalewambo kuti mbadwo za Abalahamuyo zingadadzapasidwa dziko la Kanani. Mbadwo za Abulahamuyo, omwe akhali Ajirayeri, adakhala ku Edjipito magole mazinji ninga akapolo, ndipo bzimwebzi bzikhawacitisa kukumbuka kuti bzomwe Mulunguyo adalewa bzin’citika lini. Tsono bzidadzacitika. Ndipo pomwe padapita nthawe, Yahova adalewa kuti Elizabeti angadadzakhala na mwana. Ndipo iye adauzambo Mariya omwe akhali dende kuti angadadzabereka Mwana omwe Yahova akhadamulewa kale-kale mu zunde la Edeni, ndipo bzimwebzi bzidacitikadi! — Ciyambo 3:15.
12 Tikambakumbukira bzinthu bzentse bzomwe Yahova adalewa na kucita, ifepano timbakwanisa kubvesesa kuti iye ana mphanvu ndipo bzimwebzi bzimbaticitisa kuti tikhulupirembo kuti bzomwe iye adalewa bzakuti an’dzabweresa dziko lipsa bzin’dzacitikadi. (Werengani Djoswe 23:14; Zaiya 55:10, 11.) Bzimwebzi bzimbatikonzekeresa kuti tikwanisembo kuthandiza anzathu kudziwa kuti nkhani yakuti Mulungu an’dzabweresa dziko lipsa ni maloto lini, koma ni bzinthu bzomwe bzin’dzacitikadi. Yahova caiyeyo adacita kulewa bza kudzulu kupsa na dziko la pantsi lipsa, kuti: “Mafala yamweya njakukhulupirika na yacadidi.” — Apokalipse 21:1, 5.
it-2 tsa. 1201 ndi. 2
Fala la Mulungu
Bzakulengedwa bza moyo na bzakusaya moyo bzimbabvera fala la Mulungu ndipo iye angabziphatise basa kuti akwanirise cakulinga cace. (Sl 103:20; 148:8) Fala lace ndakukhulupirika. Bzimwebzi bzikuthandauza kuti bzomwe Mulungu ambapicira ambayebwa lini kubzicita. (Deu 9:5; Sl 105:42-45) Ndipo ninga momwe iye adalewera, fala lace “lin’dzakhala mpaka muyaya”; iro lin’dzabwerera lini likanati kukwanirisa cakulinga cace. — Zai 40:8; 55:10, 11; 1Pe 1:25.
Cuma Cauzimu
w86 1/11 tsa. 19 ndi. 15
Maswaka — Bzomwe Mungacite Kuti Muthandizire Kuti Banja Lanu Likhale Lakukondwa na Lakuphatana
15 “Nzayo [za Zuze] adazimanga na makorenti; khosi lace adaliikha simbi; mpaka pa nthawe yomwe mafala yace yadakwanisika, mafala ya Yahova ndiyo yomwe yadamucitisa kuti acene.” (Salimo 105:17-19) Kwa magole 13, Zuze adabonera ninga kapolo na kuikhidwa m’kawoko mpaka pomwe piciro la Yahova lidakwanisika. Mwa njira imweyi, iye adakhala wakulimba. Napo kuti ni Yahova lini omwe akhacitisa kuti iye agumane na mabvuto, Yahovayo adalekerera mabvutoyo thangwe rakuti akhana cakulinga. Kodi Zuze angadapitiriza kukhulupira “mafala ya Yahova” napo kuti akhagumana na mabvuto? Kodi mabvutoyo yangadacitisa kuti iye akulise makhalidwe yabwino ninga kupirira, kubzicepesa, kukhala wakulimba mwauzimu na wakukonzeka kucita basa lakunesa lomwe angadapasidwa? Pomwe Zuze adayezedwa, iye adacoka ninga oro m’manja mwa anyakuyenga ndipo adakhala wakufunika kwene-kwene kwa Mulungu omwe patsogolo pace adadzamuphatisa basa mwakudabwisa. — Genesesi 41:14, 38-41, 46; 42:6, 9.
11-17 NOVEMBRO
CUMA CA M’FALA LA MULUNGU SALIMO 106
“Iwo Adayebwa Mulungu Mpulumusi Wawo”
“Mbani Ali Kumbali ya Yahova?”
13 Ajirayeri wense adabva mantha kwene-kwene na bzomwe bzikhacitikabzo, tenepo, iwo adakumbira Mozeji kuti akwire m’phiri la Sinai kuti akalewelewe na Yahova m’dzina lawo. (Ekisodo 20:18-21) Mozeji adakwiradi m’phirimo koma adacedwa kubwerera. Ajirayeriwo adasaya bzakucita m’dambomo pakuti mtsogoleri wawo pakhalibe. Tsono n’ciyani comwe iwo adacita? Bzinkuwoneka kuti iwo akhakhala wakukhulupirika kokha Mozeji akakhala alipo. Tenepo, iwo adacita thupo kwene-kwene ndipo adauza Aroni kuti: ‘Tikonzere mulungu kuti atitsogolere, pakuti tinkudziwa lini comwe cacitikira Mozeji, munthu omwe adaticosa m’dziko la Edjipito.’ — Ekisodo 32:1, 2.
Cuma Cauzimu
w06 15/7 tsa. 13 ndi. 9
Nfundo Zikulu-zikulu za Cigawo Cacitatu na Cacinai ca Bukhu la Masalimo
106:36, 37. Mavesiya yakulatiza kuti pana kubverana pakati pa kunamata bzifanikiso na kupereka ntsembe kwa madimonyo. Bzimwebzi bzikulatiza kuti munthu omwe ambaphatisa basa bzifanikiso angayambe kuphatisidwa basa na madimonyo. Bibliya limbaticenjeza kuti: “Tcenkhani kunamata bzifanikiso.” — 1 Juwau 5:21.
18-24 NOVEMBRO
CUMA CA M’FALA LA MULUNGU MASALIMO 107-108
“Tendani Yahova, Thangwe iye Ngwabwino”
w07 15/4 tsa. 20 ndi. 2
Gwere Limbatumbiza Yahova
Gwere ni grupo lini la wanthu ninga magrupo yakusiyana-siyana yomwe yalipo. Ndipo ni grupo lini la wanthu lomwe limbapangana kuti licite cinthu cinango ayai kutsonkhana kuti licite masenzeka yanango. Koma, gwere lidakhazikisidwa na cakulinga ca kutumbiza Yahova Mulungu. Makonzedwe yamweya yadayamba kale-kale ninga momwe limbalatizira bukhu la Masalimo. Salimo 35:18 ambati: “Nin’dzakutendani mu gwere likulu; ndipo nin’dzakutumbizani pakati pa thimu la wanthu.” Ndipo Salimo 107:31, 32 ambatilimbikisa kuti: “Wanthu atende Yahova thangwe ra lufoyi lace lacadidi na thangwe ra bzicito bzace bzakudabwisa bzomwe ambacitira wana wa wanthu. Iwo amutumbize pakati pa wanthu omwe adatsonkhana.”
w15 15/1 tsa. 9 ndi. 4
Tendani Yahova Kuti Musimbidwe
4 Kuti tikhale na mtima wakutenda tin’funika kumbawona bzisimbo bzomwe Yahova ambatipasa, kumbabzikumbukira na kumbakumbukirambo momwe iye ambatilatizira lufoyi. Pomwe nyakunemba salimo adacita bzimwebzi, adadabwa kwene-kwene thangwe ra kuwona bzinthu bzizinji bzomwe Yahova akhadamucitira. — Werengani Salimo 40:5; 107:43.
Cuma Cauzimu
it-2 tsa. 420 ndi. 4
Mowabe
Pomwe Mambo Davide akhatonga, pakhacitika nkhondo pakati pa Ajirayeri na Amowabe. Amowabe adakundidwa ndipo adauzidwa kuti ambapereke mtsonkho kwa Davide. Pomwe nkhondoyo idamala, acikunda azinji wa Mowabe adaphedwa. Bzikuwoneka kuti Davide adauza acikunda winango wa Mowabe kuti agone pantsi kuti awapime na kukwanisa kuwona omwe akhafunikira kuphedwa na omwe akhafunika kusiyidwa na moyo. (2Sa 8:2, 11, 12; 1Nk 18:2, 11) Pinango-pentse ni pa nthawe imweyi yomwe Benaya, mwana wa Jehoyada, “adapha wana awiri wa Arieli wa ku Mowabe.” (2Sa 23:20; 1Nk 11:22) Bzomwe Davide adacita Amowabebzi bzidakwanirisa mafala yomwe Balamu adayalewa pambuyo pakupita magole 400 yakuti: “Nyenyezi in’dzacoka kwa Djakobo, mpsimbo ya umambo in’dzacoka kwa Jirayeri. Kulewa cadidi, iye an’dzang’amba mkuma wa Mowabe na nkhadzi za misolo yentse ya acikunda waukali.” (Num 24:17) Ndipo bzikuwoneka kuti nyakunemba salimo adalewa bza kukundidwa kumweku pomwe adalewa kuti Mulungu akhawona Mowabe ninga “basiya [lace] lakusambira.” — Sl 60:8; 108:9.
25 NOVEMBRO–1 DEZEMBRO
CUMA CA M’FALA LA MULUNGU MASALIMO 109-112
Thandizirani Mambo Jezu!
w06 1/9 tsa. 13 ndi. 6
Nfundo Zikulu-zikulu za Cigawo Cacixanu ca Masalimo
110:1, 2 — N’ciyani comwe “Mbuya [wa Davide],” Jezu Kristu, akhacita pomwe akhadakhala ku boko la madidi la Mulungu? Pomwe Jezu adalamusidwa adayenda kudzulu ndipo adadikhirira ku boko la madidi la Mulungu mpaka pomwe adayamba kutonga ninga Mambo mu 1914. Pa nthawe imweyi, Jezu akhatonga anyakudzozedwa na kuwatsogolera pakucita basa la kupalizira na kuthandiza wanthu kuti akhale anyakupfunza wace pa kuwakonzekeresa kuti adzatonge naye pabodzi mu Umambo bwace. — Mateu 24:14; 28:18-20; Luka 22:28-30.
w00 1/4 tsa. 18 ndi. 3
Wale Omwe Ambamenyana na Mulungu An’dzakunda Lini!
Wanthu wa Yahova akuteweredwa m’mbuyo kuyambira kale-kale. M’madziko mazinji, wanthu wakuipa ambayezera kucita bzinthu bzakusiyana-siyana kuti aimise basa la kupalizira mafala yabwino ya Umambo bwa Mulungu. Iwo ambacitisidwa na Nyamadulanthaka wathu Sathani, omwe “akufamba-famba ninga mphondolo yomwe ikulirima, yomwe ikunyang’ana munthu kuti imukhudyule.” (1 Pedru 5:8) Pomwe “nthawe zakuikhidwiratu za wanthu wa mitunduwo” zidamala mu 1914, Mulungu adaikha Mwana wace ninga Mambo mupsa ndipo adamuuza kuti: “Ndoko ukakunde anyamadulanthaka wako.” (Luka 21:24; Salimo 110:2) Mwakuphatisa basa mphanvu zace, Kristu adathotha Sathani kudzulu ndipo adamuthusira pa dziko la pantsi. Pakudziwa kuti asala na nthawe yakucepa, Sathani ambaboneresa Akristau wakudzozedwa na anzawo. (Apokalipse 12:9, 17) Kodi ni bzakutewera bziponi bzomwe ambakhala nabzo wale omwe ambamenya nkhondo na Mulungu?
be tsa. 76 ndi. 2
Kulani Mwauzimu
Malango yakulewa bza kuphatisa basa maluso yomwe tinayo yambaphatanidza kukhala wakuyamba kucita bzimwebzo. Kodi mumbakhala wakuyamba kuuza m’bale ayai mpfumakazi kuti mukufuna kucoka nayo mu upalizi? Kodi mumbanyang’ana mipata kuti muthandize apalizi apsa wa mu gwere mwanu, maswaka na wale omwe akuduwala? Mumbabzipereka kuti mucenese Nyumba ya Umambo ayai kuthandizira pa mtsonkhano wa cigawo ayai wa dera? Kodi mumbacita upainiya bwakuthandiza nthawe zinango? Kodi mungakwanise kutumikira ninga mpainiya wakukhazikika ayai kukatumikira komwe kukufunikira apalizi azinji? Kodi mumbacita nyongo kuti mukwanirise malango ya m’Bibliya yakulewa bza atumiki wakuthandiza na akulu? Nyongo yanu yakuthandiza na kubvuma mabasa imbalatiza kuti mukuyenda patsogolo. — Salimo 110:3.
Cuma Cauzimu
it-1 tsa. 524 ndi. 2
Mpangano
Mpangano Kuti Akhale Wantsembe Ninga Melikizedeki. Mpangano umweyu umbalewedwa pa Salimo 110:4. Ndipo pa Ahebereu 7:1-3, 15-17, munembi wa bukhu limweri adalatiza kuti mpangano umweyu umbalewa bza Kristu. Ni mpangano omwe Yahova adaucita na Jezu Kristu. Ndipo bzikuwoneka kuti Jezu adalewa bza mpangano umweyu pomwe adacita mpangano wa umambo na ateweri wace. (Lu 22:29) Yahova adacita kulumbira kuti Jezu Kristu, Mwana wakudzulu wa Mulungu, angadadzakhala wantsembe ninga Melikizedeki. Melikizedeki akhali mambo na wantsembe wa Mulungu pa dziko la pantsi. Jezu angadakhalambo Mambo na Mkulu wa Antsembe sikuti pa dziko la pantsi koma kudzulu. Iye adapasidwa maudindo yamweya pomwe adayenda kudzulu. (Ahe 6:20; 7:26, 28; 8:1) Pakuti Jezu mwakutsogoleredwa na Yahova an’dzakhala Mambo na Mkulu wa Antsembe mpaka kale-kale, mpangano umweyu un’dzamala lini. — Ahe 7:3.
2-8 DEZEMBRO
CUMA CA M’FALA LA MULUNGU MASALIMO 113-118
Kodi Tingamubwezere Ciyani Yahova?
w01 1/1 tsa. 11 ndi. 13
Kulisani Lufoyi
13 Mafala ya Jezu yambalatiza padeca kuti cakuyamba tin’funika kufuna Yahova. Tsono timbabadwa lini ticifuna Yahova. Ndipopa timbafunika kucita kukulisa lufoyiro. Pomwe tidayamba kupfunza bza Yahova tidakomedwa na bzomwe tidabva. Pang’ono na pang’ono tidapfunza momwe iye adakonzera dziko la pantsi kuti wanthu akhale. (Genesesi 2:5-23) Tidapfunza momwe iye ambacitira bzinthu na wanthu, momwe iye alibe kutilambira pomwe pikado idafikira wanthu wentse na bzomwe adacita kuti atilombole. (Genesesi 3:1-5, 15) Iye adacita bzinthu mwakudeka mtima kwa wale omwe akhali wakukhulupirika ndipo adapereka Mwana wace wakubadwa yekha kuti pikado zathu zilekereredwe. (Juwau 3:16, 36) Kudziwa bzimwebzi kudacitisa kuti kutenda kwathu Yahova kuthumizirike. (Zaiya 25:1) Mambo Davide adalewa kuti akhafuna Yahova thangwe rakuti iye akhamusamalira mwalufoyi. (Salimo 116:1-9) Ntsiku zino, Yahova ambatisamalira, kutitsogolera, kutipasa mphanvu na kutilimbikisa. Tikapfunza bzizinji bza iye, lufoyi lathu limbathumizirika. — Salimo 31:23; Zefaniya 3:17; Aroma 8:28.
w09 15/7 tsa. 29 ndi. 4-5
Tambirani Mwakutenda — Perekani na Mtima wentse
Munembi wa salimo adabvunza kuti: “Kodi nin’dzamubwezera ciyani ine Yahova pa bzabwino bzentse bzomwe wandicitira?” (Salimo 116:12) Ni bzisimbo bziponi bzomwe iye akhadapasidwa? Yahova akhadamuthandiza pa nthawe ya “thupo pabodzi na msunamo.” Kuthumizira bzimwebzi, Yahova “[akhadamupulumusa] ku infa.” Nyakunemba salimoyu akhafuna “kubwezera” Yahova pa bzomwe akhadamucitirabzo. N’ciyani comwe iye angadacita? Iye adati: “Nin’dzateweza bzomwe ndapicira kwa Yahova.” (Salimo 116:3, 4, 8, 10-14) Iye adasankhula kukwanirisa mapiciro yentse yomwe akhadacita kwa Yahova na kucita bzentse bzomwe Yahova akhafuna.
Imwepo mungacitembo bzibodzi-bodzibzo. Mwa njira iponi? Mwa kukhala na moyo omwe umbabverana na malamulo pabodzi na mitemo ya Yahova. Ndipopa, citani ciri-centse kuti kunamata kwanu Yahova kukhale pa mbuto yakuyamba pa moyo wanu ndipo bvumani kuti mzimu wa Mulungu ukutsogolereni pa bzinthu bzentse bzomwe mumbacita. (Mpalizi 12:13; Agalatiya 5:16-18) Kulewa cadidi, imwepo mun’dzakwanisa lini kubwezera bzentse bzomwe Yahova ambakucitirani. Koma mukabzipereka na mtima wentse pa basa lace bzimwebzi ‘bzimbakondwesa mtima wace.’ (Mimwani 27:11) Ni mwayi ukulu kwene-kwene kukondwesa Yahova mwa njira imweyi!
Bzomwe Tingapfunze na Bukhu la Mwambo
9 Pfunziro laciwiri: Timbatumikira Yahova thangwe ra kumutenda. Pfunziro limweri limbawonekera pa nsembe ya wense. Ndipo nsembe imweyi ikhacita mbali yakufunika kwene-kwene pa kunamata kwacadidi mu nthawe ya Ajirayeri. Bukhu la Mwambo, limbalewa kuti Mjirayeri alatize kutenda kwace akhafunika kupereka nsembe ya wense. (Mwambo 7:11-13, 16-18) Ndipo iye akhapereka nsembeyo thangwe ra kufuna Yahova, sikuti mwakungingimizidwa. Cifuwo comwe cikhaperekedwa ninga nsembeyo, nyama yace ikhadyedwa na wanthu wa m’banja la munthu omwe akhapereka nsembeyo pabodzi na ansembe. Koma nyama inango ikhaperekedwa ninga nsembe kokha kwa Yahova. Kodi nyamayo njiponi?
10 Pfunziro lacitatu: Timbacitira Yahova bzense bzomwe tingakwanise thangwe rakuti timbamufuna. Yahova akhawona mafuta ya nyama yomwe ikhaperekedwa ninga nsembe kukhala cinthu cakufunika kwene-kwene. Ndipo iye adalewa kuti mbali zinango za nyamayo, ninga masapi na impso zikhali zakupambulika kwene-kwene. (Werengani Mwambo 3:6, 12, 14-16.) Na tenepo, Yahova akhakomedwa kwene-kwene Mjirayeri akapereka kuna iye mafuta na mbali zinango zakufunika za nsembeyo mwakufuna yekha. Mjirayeri omwe akhapereka bzimwebzi, akhalatiza kuti akhafunisisa kupereka kwa Yahova bzinthu bzabwino bzomwe akhanabzo pa moyo wace. Mpsibodzi-bodzimbo na Jezu, thangwe ra kufuna Yahova adabzipereka ninga nsembe mwakucita bzense bzomwe adakwanisa kuti amutumikire na moyo wace wense. (Juwau 14:31) Jezu akhakomedwa na kucita kufuna kwa Mulungu, thangwe iye akhafuna kwene-kwene malamulo yace. (Psalymo 40:8) Mwakusaya kupenukira, Yahova akhakomedwa kwene-kwene pomwe akhawona Jezu akucita nyongo kuti acite kufuna kwa Yahovayo!
11 Ninga nsembe ya wense, basa lomwe ifepano timbacitira Yahova mwakufuna tekha, ni njira ibodzi yakulatiza kuti timbamufuna. Ifepano timbacitira Yahova bzabwino bzomwe timbakwanisa thangwe timbamufuna na mtima wense. Kumbukirani momwe Yahova ambakhalira wakukondwa akawona bzulu na bzulu bza wanthu akumutumikira mwakubzipereka thangwe ra kufuna iye pabodzi na malamulo yace! Ndipo mpsakutsangalaza kwene-kwene kudziwa kuti Yahova ambalemekeza bzomwe timbacita, kuphatanidzambo mathangwe yomwe yambaticitisa kucita bzimwebzo. Mwa ciratizo, penu imwe mwakalamba ndipo mukukwanisa lini kucita bzomwe mukhafuna pakutumikira Yahova, dziwani kuti iye ambabvesesa bzimwebzo. Pinango mungayambe kukumbuka kuti mun’kwanisa lini kucitira bzizinji Yahova, koma dziwani kuti iye ambawona lufoyi lomwe limbakucitisani kucita bzomwe mukukwanisa. Iye ambakomedwa kwene-kwene kutambira bzabwino bzomwe mungakwanise kumucitira.
Cuma Cauzimu
w12 15/5 tsa. 22 ndi. 1-2
Mibvunzo Yakucokera kwa Anyakuwerenga
Mwakucita kufuliziridwa, munembi wa salimo adaimba kuti: “Yahova bzimbamuwawa kwene-kwene atumiki wace wakukhulupirika akafa.” (Salimo 116:15) Moyo wa m’bodzi na m’bodzi wa atumiki wa Yahova ngwakufunika kwene-kwene kwa iye. Tsono mafala yomwe yali padzauluya ya pa Salimo 116, yambandolewa lini bza infa ya munthu m’bodzi payekha.
Pakufotokoza nkhani pa nkhawa, bzingakhale lini bwino kuphatisa basa Salimo 116:15 pakulewa bza munthu omwe wafayo, napo kuti akhali mtumiki wakukhulupirika wa Yahova. Thangwe ranyi? Thangwe rakuti mafala yomwe nyakunemba salimoyo adalewa yana thandauzo likulu. Yakuthandauza kuti kwa Mulungu, kufa kwa grupo likulu la wanthu omwe mbakukhulupirika kwa iye kungakhale kwakunesa kwene-kwene kwa iye kulekerera kuti kucitike. — Onani Salimo 72:14; 116:8.
9-15 DEZEMBRO
CUMA CA M’FALA LA MULUNGU SALIMO 119:1-56
“Kodi Tswaka Lingakhale Tani Lakucena pa Moyo Wace?”
w87 1/11 tsa. 18 ndi. 10
Kodi Ndimwe Wakucena mu Bzinthu Bzentse?
10 Pa Aefezo 5:5, Paulo adacenjeza kuti: “Pakuti imwepo mumbadziwa bzimwebzi na kubvesesa bwino kuti, anyakucita upombo ayai uputa, wanthu wakupswipa, wanthu wa umbombo bzomwe bzimbathandauza kunamata bzifanikiso, an’dzapita lini mu Umambo bwa Kristu na bwa Mulungu.” Tsono, gole liri-lentse azinji ambacosedwa thangwe ra kucita upombo komwe ni ‘kuphonyera thupi lawo.’ (1 Akolinto 6:18) Kazinji-kazinji, bzimwebzi bzimbacitika bzikakhala kuti munthuyo alibe “kupitiriza kukhala tceru na kucita bzinthu mwakubverana na fala [la Mulungu].” (Salimo 119:9) Mwa ciratizo, abale azinji ambasiya kukhala tceru akakhala ali pa feriya. Ambasiya kukhala na axamwali omwe mbakristau ndipo ambacita uxamwali na wanthu winango omwe ali pa feriyambo omwe ni Mboni lini za Yahova. Thangwe ra kukumbuka kuti ‘amwewo ni wanthu wabwino,’ ambayamba kucita nawo bzinthu pabodzi. Ndipo winango ambadzakhala pa uxamwali bwa ponda ndipondembo na anzawo wa ku basa. Mkulu munango wa gwere adakhala pa umakhadzi na mwanzace wa ku basa ndipo adasiya banja lace acikhala na mwanzace wa ku basayo! Bzimwebzi bzidacitisa kuti iye acosedwe m’gwere. Bzikuwonekeratu kuti mafala ya m’Bibliya yakuti “kubverana na wanthu wakuipa kumbadzonga makhalidwe yabwino” njacadidi! — 1 Akolinto 15:33.
w06 15/6 tsa. 25 ndi. 1
“Nimbafuna Kwene-kwene Malamulo Yanu”
YAHOVA ambapasa malamulo atumiki wace kuti awathandize kulimbana na mayezo yomwe ambagumana nayo. Timbabva malamuloyo pomwe tikuwerenga Bibliya patekha, anzathu akatiuza na pomwe tiri pa mitsonkhano. Bzomwe timbabva pomwe tikuwerenga na pa mitsonkhano bzimbakhala lini bzipsa. Bzimbakhala bzinthu bzomwe tidabzibva kale m’mbuyomu. Tsono pakuti timbayebwa, timbafunikira kupfunza pomwe bza cakulinga, malamulo na malango ya Yahova. Tin’funika kutenda malamulo ya Yahova. Iyo yambatitsangalaza ndipo yambatithandiza kuikha makumbukidwe yathu pa mathangwe yomwe yadaticitisa kusankhula kutumikira Mulungu. Ndipopa nyakunemba Salimo adaimba kuti: “Nimbafuna kwene-kwene malamulo yanu.” — Salimo 119:24.
w10 15/4 tsa. 20 ndi. 2
Lekani Kumbawona Bzinthu Bzapezi-pezi!
Bzinthu bzomwe ifepano timbawona bzingatidzonge. Pana kubverana kukulu pakati pa bzomwe timbawona na bzomwe timbakumbuka mwakuti bzomwe timbawonabzo bzingaticitise kuti tikhale na cikhumbo. Pakuti tikukhala mu dziko lakuipa lomwe wanthu azinji mbakubzifuna ndipo mtongi wace ni Sathani Dyabu, timbawona na kubva bzinthu bzomwe bzingatipambuse mwakusaya kunesa napo ticibziwona mu kanthawe kakucepa. (1 Juwau 5:19) Ndipopa munembi wa salimo adadandaulira Mulungu kuti: “Citisani kuti maso yangu yaleke kuwona bzinthu bzapezi-pezi. Ndifambiseni mu njira yanu kuti ndipitirize kukhala wamoyo.” — Salimo 119:37.
Cuma Cauzimu
w05 15/4 tsa. 10 ndi. 2
Thembani Fala la Yahova
Nfundo ikulu yomwe iri pa Salimo 119 imbalewa bza phindu la Fala la Mulungu. Munembiyu adanemba mavesi yakukwana 176 mu nyimbo imweyi mwakuphatisa basa bzinembo bza alfabeto ya Cihebereu. Mu bzinembo bzakuyambirira bza Cihebereu, salimo limweri lina bzigawo bzakukwana 22 ndipo gawo liri-lentse lina linha zakukwana 8 ndipo linha iri-yentse imbayamba na letra ibodzi-bodzi. Salimo limweri limbalewa bza Mulungu, fala lace, malamulo yace, momwe tingambacitire bzinthu, mitemo yace na katongedwe kace. Mu nkhani ino na nkhani yomwe ikubwerayi, tin’dzacezerana Salimo kapitulo 119 mwakubverana na momwe lidasanduliziridwira ku Bibliya la Cihebereu. Kukumbukira bzinthu bzomwe bzidacitikira atumiki wa Yahova wakale-kale na wa ntsiku zino, kun’tithandiza kuibvesesa bwino nyimbo imweyi na kuthumizira kutenda kwathu Bibliya lomwe ni Fala la Mulungu.
16-22 DEZEMBRO
CUMA CA M’FALA LA MULUNGU SALIMO 119:57-120
Kodi Tingapirire Tani Mabvuto?
w06 15/6 tsa. 20 ndi. 2
“Nimbafunadi Lamulo Lanu!”
Pinango imwepo mungabzibvunze kuti: “Kodi malamulo ya Mulungu yakhatsangalaza tani munembi wa salimoyi?” Comwe cikhamuthandiza kuti akhale wakulimba ni kudziwa kuti Yahova akhacita naye thupo. Kudziwa kuti malamuloyo yadaikhidwa thangwe ra lufoyi kukhakondwesa munembi wa salimoyu napo kuti akhateweredwa m’mbuyo. Iye akhadziwa kuti Yahova akhamucitira bzinthu mwacirungamo. Kuthumizira bzimwebzi, kuteweza malamulo ya Mulungu kudacitisa kuti munembi wa salimoyu akhale wanzeru kuposa anyamadulanthaka wace ndipo kudapulumusa moyo wace. Kubvera malamulo kukhamucitisa kuti akhale na mtendere na cikumbu-mtima cakucena. — Salimo 119:1, 9, 65, 93, 98, 165.
w00 1/12 tsa. 14 ndi. 3
Kodi Imwepo Mumbafuna Kwene-kwene Malamulo ya Yahova?
Malamulo ya Yahova yakhali yakufunika kwene-kwene kwa nyakunemba salimoyu omwe adaimba kuti: “Nimbafulumiza ndipo nimbacedwa lini kukoya mitemo yanu. Bzingwe bza wanthu wakuipa bzandizungulira, tsono niniyebwa lini malamulo yanu.” (Salimo 119:60, 61) Malamulo ya Yahova yangatithandize kulimbana na mazunzo thangwe timbakhulupira kuti Baba wathu wakudzulu angakwanise kugwata bzingwe bzomwe anyamadulanthaka wathu angatimange nabzo. Pa nthawe yakuthemera, iye ambatitsudzula ku mabvuto yamweya kuti tikwanise kucita basa la kupalizira. — Marko 13:10.
w06 1/9 tsa. 14 ndi. 4
Nfundo Zikulu-zikulu za Cigawo Cacixanu ca Bukhu la Masalimo
119:71 — Kodi kuzunzidwa kungakhale kwabwino mwa njira iponi? Mabvuto yangatipfunzise kuthemba kwene-kwene Yahova, kupemba kwa iye na kucita nyongo ya kupfunza Bibliya na kuphatisa basa bzomwe Bibliyalo limbalewa. Ndipo bzomwe timbacita tikakhala tikuzunzidwa, pinango bzingalatize momwe ifepano tiriri na bzinthu bzomwe tin’funika kucinja. Tikabvuma kuti mabvuto yatipfunzise, tin’dzasunama lini.
‘Lirani na Omwe Ankulira’
Baba wathu wa nsisi, Yahova, ndiye omwe ambatipasa mtsangalazo wacaiwo. (Werengani 2 Akolinto 1:3, 4.) Iye ni ciratizo cikulu pa nkhani ya nsisi, ndipo iye ambapicira wanthu wace kuti: ‘Ine ndine Ule omwe ambakutsangalazani.’ — Zaiya 51:12; Salimo 119:50, 52, 76.
Tingatsimikize na mtima wense kuti Yahova an’dzatithandiza. Tenepo, tin’funika nthawe zense kupemba kuna iye ticimufotokozera momwe tinkubvera. Mpsakutsangalaza kwene-kwene kudziwa kuti Yahova ambabvesesa mabvuto yomwe timbagumana nayo nakuti ambatipasa mtsangalazo omwe timbafuna! Kodi iye ambacita tani bzimwebzi?
Cuma Cauzimu
w06 1/9 tsa. 14 ndi. 5
Nfundo Zikulu-zikulu za Cigawo Cacixanu ca Bukhu la Masalimo
119:96 — Kodi mafala yakuti “kulungamiratu kuna malire” yambathandauza ciyani? Nyakunemba salimoyu akulewa bza kulungamiratu mu kawonedwe ka wanthu. Bzikuwoneka kuti iye akhadziwa kuti kulungamiratu komwe wanthu ambakuwona kuna malire. Mwakusiyana na bzimwebzi, mitemo ya Mulungu iribe malire. Malamulo yace yambaphata basa pa mbali zentse za moyo. Bibliya la A Nova Versão Internacional limbalewa kuti: “Ndakwanisa kuwona kuti kulungama kwentse kuna malire, koma malamulo yanu yalibe malire.”
23-29 DEZEMBRO
CUMA CA M’FALA LA MULUNGU SALIMO 119:121-176
Kodi Mungatcenkhe Tani Kubzibweresera Mabvuto?
Kodi Cikumbu-mtima Canu Cimbatsogoleredwa na Mitemo ya Mulungu?
Tikafuna kuti malamulo ya Mulungu yambatitsogolere, tin’funika kucita bzizinji kuposa kundoyawerenga ayai kuyadziwa. Ifepano tin’funika kumbayafuna na kuyalemekeza. Bibliya limbati: ‘Wengani comwe n’cakuipa, mucifuna comwe n’cabwino.’ (Amosi 5:15) Kodi tingacite tani bzimwebzi? Mwa kumbawona bzinthu ninga momwe Yahova ambabziwonera. Onani ciratizoci: Tiyezeze kuti imwepo mumbaneseka kugona. Tenepo, mwayenda kwa dotolo ndipo iye wakuuzani kuti mun’funika kumbadya cakudya ca thanzi, kumbacita masenzeka yakulimbisa thupi na kucinja bzinthu bzinango pa moyo wanu. Tsono imwepo mwateweza malango yense ndipo tsapano munkukwanisa kugona. Kodi imwepo mungayawone tani malango ya dotolo umweyu?
6 Mpsibodzi-bodzimbo na Mulengi wathu Yahova. Iye adatipasa malamulo yomwe yambatithandiza pa moyo wathu na kutikhotcerera ku bzakutewera bzakuipa bza pikado. Mwa ciratizo, Bibliya limbalewa kuti tin’funika lini kumbanama, kukhala wakusaya kukhulupirika, kuba, kucita upombo, ciwembo ayai kucita bzinthu bzakubverana na bzamizimu. (Werengani Mimwani 6:16-19; Apokalipse 21:8) Tikambateweza malamuloya na kuwona bzakutewera bzace bzabwino, ifepano timbafika pakufuna Yahova pabodzi na malamulo yace.
w93 15/4 tsa. 17 ndi. 12
Maswaka — N’ciyani Comwe Imwepo Mukufuna?
12 Kuthumizira bzimwebzi, mun’funika kupfunza kuwenga na kutcenkha kucita bzinthu bzakuipa. (Salimo 97:10) Kodi mungawenge tani cinthu comwe pakuyamba mukhaciwona ninga cabwino na cakudekeza? Mwa kumbakumbukira mabvuto yomwe mungadzagumane nayo! “Lekani kupumpsika: Mulungu angapumpsidwe lini. Pakuti comwe munthu an’bzala, ndico comwe an’dzabvuna; thangwe ule omwe an’bzala mwakubverana na thupi, an’dzabvuna bzinthu bzakuipa, mwakubverana na bzikhumbo bzace bza pikado.” (Agalatiya 6:7, 8) Pomwe mukuyezedwa na cikhumbo cakuipa, kumbukirani bza cinthu comwe n’cakufunika kwene-kwene na momwe bzimwebzi bzingasunamisire Yahova Mulungu. (Ndendemezerani na Salimo 78:41.) Kumbukiranimbo kuti mungakhale na mimba yomwe mukhaidikhirira lini ayai kutenga matenda, ninga SIDA. Mbakumbukirani bza msunamo omwe mungadzakhale nawo na kuluza ulemu. Mungadzagumanembo na mabvuto yomwe yangadzatenge nthawe ikulu kwene-kwene. Mkazi munango adalewa kuti: “Inepano na bayangu tidacita malume ya pamphasa na wanthu winango pomwe tikhanati kulowolana. Napo kuti tsapano ndife Akristau, bzomwe tidacita m’mbuyobzi bzimbaticitisa kuti ticitirane ntcanje m’banja mwathu.” Ndipo tileke kuyebwa kuti tingaluze udindo bomwe tinabo ayai kucosedwa m’gwere lacikristau! (1 Akolinto 5:9-13) Kodi mungabvume kuluza bzinthu bzentsenebzi thangwe ra cikhumbo cakusaya kukhalisa?
Cuma Cauzimu
Khulupirani Kuti ‘Fala la Mulungu ni Cadidi’
Atumiki wa Yahovafe timbakhulupira na mtima wentse kuti Yahova ni Mulungu wacadidi ndipo timbakhulupirambo kuti iye ambafuna kuti ifepano tikhale na moyo wabwino. (Salimo 31:5; Zaiya 48:17) Timbadziwa kuti tin’funika kumbakhulupirambo bzomwe timbawerenga m’Bibliya thangwe “mafala . . . yentse [ya Mulungu] ni cadidi.” (Werengani Salimo 119:160.) Timbatawiriza mafala yomwe mpfunzi munango wa Bibliya adanemba. Iye adati: “Bzinthu bzentse bzomwe Mulungu adalewa mpsacadidi ndipo bzentse bzomwe ambalewa bzimbacitika. Wanthu wa Mulungu ambakhulupira bzomwe [Bibliya] limbalewa thangwe ambakhulupira Mulungu omwe ni mwenekaciro Bibliyalo.”
30 DEZEMBRO–5 JANEIRO
CUMA CA M’FALA LA MULUNGU MASALIMO 120-126
Iwo Adabzala Mwakubonerera, Koma Adabvuna Mwakukondwa
w04 1/6 tsa. 16 ndi. 10
Wale Omwe Ambatumbiza Mulungu Ambasimbidwa
10 Tikabvuma kukhala nyakupfunza wa Jezu timbakhala tikulimbana na Sathani. Tiyago 4:7 ambapicira kuti: “Gazani Dyabu ndipo iye an’dzakuthawani.” Bzin’funa lini kulewa kuti kucita bzimwebzi n’kwakupusa. Kutumikira Mulungu kumbafuna nyongo. (Luka 13:24) Tsono pa Salimo 126:5, Bibliya limbatipicira kuti: “Omwe ambabzala akulira an’dzabvuna na cikondweso cikulu.” Kulewa cadidi, timbatumikira lini Mulungu omwe ngwakusaya kutenda. Iye “ambabaira wanthu omwe ambamulinga na mtima wentse,” ndipo ambasimba omwe ambamutumbiza. — Ahebereu 11:6.
Kodi Cikhulupiro Canu Cin’dzakhala Camphanvu?
17 Kodi imwepo mwafedwa wadzinza wanu tsapanopa? Pambulani nthawe kuti mulimbise cikhulupiro canu pakulewa bza kulamusidwa kwa anyakufa mwa kuwerenga nkhani za m’Bibliya zakulewa bza wale omwe adalamusidwa. Kodi imwepo mukulira thangwe rakuti wadzinza wanu wacosedwa m’gwere? Pfunzani kuti mutsimikize mwekha kuti njira imweyi yomwe Mulungu ambaiphatisa basa kuti atilange njabwino. Onani bvuto liri-lentse lomwe mungagumane nalo ninga mpata wakuti mulimbise cikhulupiro canu. Uzani Yahova momwe mukubvera. Lekani kumbabzipambula, koma citani uxamwali na abale na mpfumakazi zanu. (Mimwani 18:1) Citani mabasa yomwe yangakuthandizeni kupirira, napo kuti mungacite bzimwebzo uko mukukumbukira bzomwe bzidakucitikirani m’mbuyomu. (Salimo 126:5, 6) Pitirizani kumbagumanika pa mitsonkhano, kupalizira na kuwerenga Bibliya. Ndipo pitirizani pomwe kumbakumbukira bzisimbo bzomwe Yahova an’dzakupasani kutsogolo. Imwepo mukambawona momwe Yahova akukuthandizirani, cikhulupiro canu cin’dzayenda cicilimba.
w01 15/7 matsa. 18-19 ndi. 13-14
Pitirizani Kucita Basa Lakubvuna!
13 Mafala yomwe yali pa Salimo 126:5, 6 yambatsangalaza wale omwe akuphata basa lakubvuna la Mulungu, maka-maka omwe akuzunzidwa. Iyo yambati: “Omwe ambabzala akulira an’dzabvuna na cikondweso cikulu. Omwe ambayenda kumunda akulira, uko adanyamula sakha wa mbeu, kulewa cadidi an’dzabwerera akukuwa mwakukomedwa, uko adanyamula mtolo wa bzinthu bzomwe abvuna.” Mafala yomwe nyakunemba salimo adafotokoza pakulewa bza kubzala na kubvuna yakulatiza momwe Yahova adasamalirira na kusimbira wale omwe adabwerera kucokera ku ukapolo ku Babiloniya. Iwo adakomedwa kwene-kwene pomwe adatsudzulidwa, tsono pinango adalira pomwe adabzala mbeu pa mataka yomwe yakhabzalidwa lini bzinthu kwa magole 70 yomwe iwo akhali ku ukapolo. Tsono omwe adapitiriza kubzala na kumanga adabvuna bzinthu bzizinji ndipo adagumana phindu na basa lomwe akhacita.
14 Pinango tingalire tikakhala tikugumana na mabvuto ayai abale wathu akakhala akucitiridwa bzinthu bzakusaya cirungamo. (1 Pedru 3:14) Pa basa lathu lakubvunali, pakuyamba bzingatinese kuwona phindu lomwe tikukhala nalo pa nyongo yomwe tikucita pa basalo. Koma tikapitiriza kubzala na kuthirizira, Mulungu an’dzakulisa mu njira yomwe tikhaidikhirira lini. (1 Akolinto 3:6) Phindu lomwe takhala nalo thangwe ra kugawira Mabibliya na mabukhu yakulewa bza Bibliya likulatiziratu padeca bzimwebzi.
Cuma Cauzimu
cl tsa. 73 ndi. 15
Mphanvu Yakukhotcerera — “Mulungu ni Mbuto Yathu Yakuthawira”
15 Cakuyamba, mbatikumbukireni momwe Yahova ambakhotcererera moyo wathu. Atumiki wa Yahovafe tingakhale na citsimikizo cakuti iye an’dzatikhotcerera ninga thimu. Yahova angadasaya kucita bzimwebzi, bzingadakhala mpsakupusa kukundidwa na Sathani. Kumbukirani kuti: Sathani, omwe ni “mtongi wa dzikoli,” angakomedwe kwene-kwene acimalisa kunamata kwacadidi. (Juwau 12:31; Apokalipse 12:17) Atongi winango wamphanvu wa pa dziko la pantsi adaletsa basa lathu la kupalizira ndipo adayezera kutipfudza. Koma napo bziri tenepo, wanthu wa Yahova akupitiriza kukhala wakukhwimika na kucita basa la kupalizira mwakusaya kuneta! Thangwe ranyi maboma yakutazira kuimisa basa la Akristau omwe ambawoneka kuti mbakucepa na wakusaya kukhotcerereka? Thangwe rakuti Yahova, mu njira yakuyezezera, ambawakhotcerera na matenga yace ya mphanvu! — Salimo 17:7, 8.