Pambuyo pa kuthothedwa mu zunde la Edeni, Adamu na Eva adadzakhala na wana azinji. Mwana wakuyamba akhali Kaini, ndipo waciwiri akhali Abeli. Kaini akhali mulimi, ndipo Abeli akhasamalira mabira.

Nsiku ibodzi, Kaini na Abeli adapereka nsembe kwa Yahova. Kodi un’dziwa kuti nsembe n’ciyani? Ni mphaso yakupambulika kwene-kwene. Yahova adakomedwa na nsembe ya Abeli, tsono alibe kukomedwa na nsembe ya Kaini. Bzimwebzi bzidacitisa kuti Kainiyo akalipe kwene-kwene na m’bale waceyo. Yahova adacenjeza Kaini kuti asamale na ukali bwacebo thangwe bungadadzamucitisa cinthu cakuipa. Tsono Kaini alibe kubvera.

Tenepo, Kaini adauza Abeli kuti: ‘Mbatiyende ku munda.’ Ndipo pomwe akhali kumundako, Kaini adamenya m’bale wace na cimuti, acimupha. Kodi n’ciyani comwe Yahova adacita na Kainiyo? Yahova adamuthamangisa kuti akakhale kutali na wadzinza wace.

Kodi tikupfunza ciyani pamwepa? Nthawe zinango, ifepano tingakalipe kwene-kwene bzinthu bzikasaya kutifambira bwino. Tsono, tikazindikira kuti tidakalipa kwene-kwene, ayai anzathu akaticenjeza bza ukali bwathubo, ifepano tin’funika kubumalisiratu.

Abeli akhali munthu wabwino, ndipo akhafuna kwene-kwene Yahova. Ndipopa Yahova cipo acidzamuyebwa. Iye an’dzalamusa Abeliyo m’paraizo.

Na kupita kwa nthawe, wanthu adadzadzala pa dziko la pansi. Ndipo azinji wa iwo akhali wakuipa. Napo wanjo winango adakhalambo wakuipa. Iwo adacoka kudzulu, acibwera pansi pano. Un’dziwa adabwera kudzacita ciyani? Iwo adabwera kudzabvala mathupi yaunyama, kuti alowole akazi.

Wanjowo adabereka wana na akaziwo. Ndipo wanawo adakula, acikhala wamphanvu kwene-kwene, ndipo akhambaboneresa na kumbapweteka wanthu. Tsono Yahova alibe kulekerera kuti bzimwebzo bzipitirize kumbacitika. Tenepo, iye adakumbuka bza kubweresa cigumula ca madzi.

Tsono pakhana munthu m’bodzi omwe akhafuna Yahova, ndipo dzina lace akhali Nowe. Iye akhana mkazi na wana atatu wacimuna, omwe akhali Semu, Hamu na Jafeti. Ndipo wanawo akhana azikazi wawombo. Yahova adauza Nowe kuti akonze cingalawa cikulu, kuti adzapulumuke iye pabodzi na banja lace pa cigumulaco. Ndipo adamuuzambo kuti apitise bzirombo mu cingalawamo kuti bzidzapulumukembo.

Pa nthawe ibodzi-bodziyo, Nowe adayamba kumanga cingalawaco. Nowe na banja lace adamala magole 50 akumanga cingalawaco. Iye adamanga ndendende ninga momwe Yahova akhadamuuzira, ndipo iye akhambauzambo wanthu bza kubwera kwa cigumulaco. Tsono wanthuwo akhambamubvera lini.

Pakumalizira pace, Yahova adauza Nowe na banja lace kuti apite m’cingalawamo. Mbatiwone bzomwe bzidadzacitika patsogolo pace.