Ku dziko linango lakucemeredwa Uzi, kukhana mwamuna m’bodzi omwe akhanamata Yahova. Dzina lace akhali Djobi. Iye akhali munthu wakudala, ndipo akhana banja likulu. Iye akhali munthu wakudeka mtima, ndipo akhathandiza wanthu wakusauka, amansiwa na nkhungwa. Tsono, kodi iye angadagumanambo lini na mabvuto thangwe ra kukhala munthu wabwino?

Djobi akhadziwa lini kuti Sathani akhaipidwa naye. Ndipo Yahova adati kwa Sathani: ‘Mtima wako uli pa mtumiki wangu Djobi? Pakuti palibe munthu ninga iye pa dziko la pansi. Iye ni munthu wakubvera na wakulungama.’ Tsono Sathani adatawira kuti: ‘Djobi ambakubverani thangwe imwepo mumbamukhotcherera na kumusimba. Mwam’pasa mbuto na bzifuwo bzizinji. Mucosereni bzensebzi, muwone penu iye an’siya lini kukunamatani.’ Ndipo Yahova adati: ‘Ndoko ukamuyeze Djobiyo, tsono leka kukamupha.’ Kodi thangwe ranyi Yahova adalekerera kuti Sathani ayeze Djobi? Thangwe iye akhadziwa kuti Djobi akhali munthu wakukhulupirika.

Sathani adayamba kuyeza Djobi mu njira zakusiyana-siyana. Cakuyamba, iye adacitisa kuti wanthu abe ng’ombe na mabulu ya Djobi. Caciwiri, iye adatumiza moto kuti ukaconthe mabira yense ya Djobi. Cacitatu, iye adacitisa kuti mbava zibe ngamira za Djobi na kupha anyabasa wace womwe akhasamalira bzifuwo. Tsono cidacitika pomwe cinthu cakuwawa kwene-kwene. Wana wa Djobi akhacita phwando m’nyumba, ndipo nyumbayo idawagwera, aciferatu wensewo. Djobi adasunama kwene-kwene na bzimwebzo, tsono iye alibe kuleka kunamata Yahova.

Sathani akhafuna kuti Djobi abonere kwene-kwene kuposa pamwepa. Tenepo, iye adacitisa kuti thupi race lense likhale na bzironda. Djobi akhadziwa lini kuti thangwe ranyi bzikacitika bzensenebzo. Tsono, iye alibe kusiya basi kunamata Yahova. Ndipo Yahova adakomedwa kwene-kwene na kukhulupirika kwaceko.

Patsogolo pace, Sathani adatumiza wanthu atatu kuti akayeze Djobi. Iwo adauza Djobi kuti: ‘Pinango iwepo waphonyera Mulungu, ucibisa bzakuphonya bzakobzo, ndipopa Mulungu ankukulanga.’ Koma Djobi adati: ‘Ndiribe kucita cinthu ciri-cense cakuphonyeka.’ Tsono Djobi adayamba kukumbuka kuti Yahova ndiye omwe akhacitisa mabvuto yaceyo, ndipo adati: ‘Si cirungamo kuti Mulungu andicitire bzimwebzi.’

Munthu munango, omwe dzina lace ni Eliu, akhali pafupipo, ndipo akhabva maceza yawoyo mwa tceru. Ndipo iye adadzapitirambo nkhaniyo, acilewa kuti: ‘Bzomwe munkulewabzi n’cadidi lini. Nthawe zinango tingabvesese lini thangwe ranyi Yahova ambalekerera kuti bzinthu bzinango bzicitike. Tsono iye ambacita lini bzinthu bzakuipa, mbuto mwace iye ambawona bzense, acithandiza wanthu pa mabvuto yawo.’

Patsogolo pace, Yahova adalewalewa na Djobi, aciti: ‘Ukhali kuponi pomwe ndidakonza kudzulu na dziko la pansi? Thangwe ranyi unkukumbuka kuti ndikukucitira lini cirungamo? Iwepo ukhandolewalewa, koma unkudziwa lini thangwe ranyi bzimwebzi bzinkukucitikira.’ Djobi adabvuma kuphonya kwaceko, ndipo adati: ‘Ndakuphonyerani. Tsapano ndazindikira kuti imwepo ndimwe Mulungu wa mphanvu zense, ndipo inepano ndine munthu omwe ndin’dziwa lini cinthu. Palibe cinthu comwe cingatazike kwa imwepo. Ndilekerereni pa bzomwe ndalewabzi.’

Djobi adabonera kwene-kwene, koma iye adapitiriza kukhala xamwali wa Yahova. Thangwe ra bzimwebzo, Yahova adapoza Djobi, acimusimba na bzinthu bzizinji kuposa pakuyamba pale. Djobi adadzakhala na moyo utali na wacikondweso. Yahova adamusimba thangwe ra kumubvera napo pa nthawe zakunesa. Kodi un’funambo kukondwesa Yahova ninga momwe Djobi adacitira? Tenepo, mbabvera Yahova, ucipitiriza kumunamata napo pa nthawe zakunesa.

Ku Edjipito, banja la Djakobi lidadzadziwika na dzina la Jirayeri. Pambuyo pa kufa kwa Djakobi na Zuze, Farawo munango adadzayamba kutonga ku Edjipitoko. Ndipo iye adayamba kubva mantha pakuwona kuti Ajirayeri akhawanda, ndipo akhali wamphanvu kuposa Aedjipitowo. Ndipopa iye adakakamiza Ajirayeriwo kuti ambaphate basa ninga akapolo kumunda na kumbaumba njedwa. Napo Aedjipito akhambawaboneresa kwene-kwene, Ajirayeriwo akhapitiriza basi kumbabalana, acimbathumizirika. Pakuti Farawo akhakomedwa lini na bzimwebzo, iye adatonga kuti aphedwe mwana wacimuna ali-wense omwe abadwe na Ajirayeri. Ajirayeriwo adacita mantha kwene-kwene na bzimwebzo, nandi?

Tsono, mkazi m’bodzi Mjirayeri omwe akhacemeredwa Jokebedi, adabereka mwana wacimuna wakudeka kwene-kwene. Kuti amukhotcerere, iye adamuikha m’citundu mwanayo, acibisa citundoco m’mauswa matali-matali ya m’phepete mwa mkulo wa Nilo. Tenepo, Miriyamu mpfumakazi ya mwanayo, adaima pafupi kuti awone n’ciyani comwe cingadacitika.

Ndipo mwana wacikazi wa Farawo, adayenda mu mkulo wa Nilo kuti akasambe. Tsono pomwe adafika kumweko, iye adawona citunduco. Mkati mwace, adawona kamwana komwe kakhalira, ndipo adakabvera nsisi. Pomwe Miriyamu adawona bzimwebzo, iye adafendera, acibvunza mwana wa Farawoyo kuti: ‘Kodi mun’funa ndikunyang’anireni munthu kuti ambakumamisireni mwanayu?’ Pomwe mwana wa Farawo adatawira kuti inde, Miriyamu adayenda kukacemera Jokebedi mai wace caiye wa mwanayo. Ndipo mwana wacikazi wa Farawoyo adamuuza kuti: ‘Tenga mwanayu ukandilerere, ndipo ndin’dzakulipira.’

Pomwe mwanayo adakula pang’ono, Jokebedi adayenda kukamupereka kwa mwana wacikazi wa Farawo, ndipo mwana wa Farawoyo adamufuwa ninga mwana wace caiye, acim’pasa dzina lakuti Mozeji. Tenepo, Mozejiyo adaleredwa ninga nduna, ndipo akhana ciri-cense comwe angadafuna. Tsono Mozeji akhalibe kumuyebwa Yahova. Iye akhadziwa bwino-bwino kuti akhali Mjirayeri sikuti Mdjipito. Ndipo iye adasankhula kunamata Yahova.

Pomwe akhana magole 40 yakubadwa, Mozeji adakumbuka bza kuthandiza wanthu wa mtundu wace. Pa nsiku inango, Mozeji adawona Mdjipito m’bodzi akumenya kapolo Mjirayeri. Pamwepo Mozejiyo adamenya Mdjipitoyo mpaka kumupha, acifucira thupi racero pa mcenga. Pomwe Farawo adadziwa bzimwebzo, adafuna kupha Mozeji. Tsono Mozeji adathawa, aciyenda ku dziko lakucemeredwa Midiyani. Ndipo Yahova adapitiriza kumusamalira kumweko.