Mu nkhani yamalayi tapfunza kuti Djosuwe adatumiza azondi awiri ku mzinda wa Jeriko. Unkukumbukira? Pomwe azondiwo adayenda, adakafikira m’nyumba mwa mkazi munango omwe akhacemeredwa Rahabi. Pomwe mambo wa Jeriko adadziwa bzimwebzo, iye adatumiza acikunda wace kumui kwa Rahabi kuti akaphate azondiwo. Tsono Rahabi adabisa azondi awiriwo ku nsodzi ya nyumba yace, acinamiza acikundawo kuti: ‘Iwo ayendera uku, athamangireni pinango mungawaphate.’ Patsogolo pace iye adati kwa azondiwo: ‘Ndinkukuthandizani thangwe ndin’dziwa kuti Yahova ali namwe, ndipo mun’dzakunda dziko lathuli. Ndaphata minyendo, ndipicireni kuti mun’dzandipulumusa pabodzi na adzinza wangu.’

Azondiwo adati kwa Rahabi: ‘Tinkukupicira kuti munthu omwe an’dzakhala mkati mwa nyumba yakoyi, an’dzapulumuka. Tenga cingwe cifuiraci, ucimangirire pa janera yakoyi, ndipo palibe cinthu cakuipa comwe cin’dzakucitikirani.’

Azondiwo adabuluka na pa janera mwakuphatisa basa cingwe cifuiraco, acithawira ku mapiri. Atamala nsiku zitatu ku mapiriko, iwo adabwerera kuna Djosuwe. Patsogolo pace, Ajirayeri adayambuka mkulo wa Joridano, acikonzekera kukunda dziko la Kanani. Mzinda omwe iwo adayamba kuukunda mu Kananimo, ni mzinda wa Jeriko. Yahova adauza Ajirayeri kuti azungulire mzindayo kabodzi pa nsiku iri-yense kwa nsiku zitanthatu. Pa nsiku yacinomwe, iwo adazungulira mzindayo kanomwe-kense. Patsogolo pace, wansembe adaliza bzimbututu bzawo, ndipo acikunda adakuwa mwa mphanvu. Un’dziwa n’ciyani cidacitika? Mpanda wense wa mzindayo udagwa! Tsono nyumba ya Rahabi iribe kugwa, thangwe iye akhakhulupira Yahova, ndipo adapulumuka pabodzi na adzinza wace.

Mbiri ya kupfudzidwa kwa mzinda wa Jeriko, idabvekera m’dziko lense la Kanani. Wamambo azinji adapangana kuti akamenye nkhondo na Ajirayeriwo. Tsono Agibeyoni adakumbuka mwakusiyana. Iwo adatuma wanthu kuti akacite mpangano wa mtendere na Ajirayeri. Ndipo omwe adatumidwawo, adabvala bzakubvala bzakusakala, kuti awoneke ningati acokera ku mzinda wakutali kwene-kwene. Iwo adauza Djosuwe kuti: ‘Ifepano tacokera ku dziko la kutali kwene-kwene. Tabva bzense bzomwe Yahova adakucitirani ku Edjipito na ku Moabe. Tipicireni kuti mun’dzamenya lini nafe nkhondo, ndipo ifepano tin’dzakhala akapolo wanu.’

Djosuwe adakhulupira bzimwebzo, aciwapicira kuti angadamenya lini nawo nkhondo. Pambuyo pa nsiku zitatu, iye adadzadziwa kuti Agibeyoniwo, akhali lini wakutali. Iwo akhali wa m’dziko la Kananiro. Ndipo Djosuwe adawabvunza kuti: ‘Thangwe ranyi imwepo mwatinamiza?’ Iwo adati: ‘Ifepano tagopa kuphedwa na imwepo! Tin’dziwa kuti Yahova Mulungu wanu, ankukumenyerani nkhondo. Taphata minyendo, lekani kutipha.’ Djosuwe adasunga piciro lace, ndipo adawalekerera.

Patsogolo pace, wamambo axanu wa ku Kanani pabodzi na acikunda wawo, adayenda kuti akamenye nkhondo na Agibeyoni. Atabva bzimwebzi, Djosuwe na anyankhondo wace adafamba usiku bwense kuti akathandize Agibeyoniwo. Ndipo mangwana yace, ku macibese-bese nkhondoyo idayambika. Akananiwo adadabwa kwene-kwene, ndipo adayamba kulikobola pfumbi. Tsono Yahova adabvumbisa bzimatalala bzikulu-bzikulu ndipo bzidapha azinji wa Akananiwo. Patsogolo pace, Djosuwe adakumbira Yahova kuti abakaimise dzuwa kuti lireke kumira. Thangwe ranyi Djosuwe adakumbira Yahova kuti abakaimise dzuwa, napo acidziwa kuti ciyambiremo dzuwa likhanati laima? Thangwe iye akhakhulupira Yahova. Ndipo dzuwalo lidaimadi kwa nsiku yathunthu mpaka Ajirayeri atamala kukunda wamambo wa ku Kananiwo na acikunda wawo wense.