Pambuyo pa kutsogolera Ajirayeri kwa magole mazinji, Djosuwe adafa na magole 110 yakubadwa. Pomwe Djosuwe akhana moyo, Ajirayeri akhanamata Yahova. Tsono, pomwe iye adafa, Ajirayeri adayamba kumbanamata bzifanikiso ninga momwe akhacitira wanthu wa ku Kanani. Thangwe ra kusaya kubvera kwawoko, Yahova adalekerera kuti iwo ambaboneresedwe na Jabini, mambo wa ku Kanani. Ajirayeri adadandaulira Yahova kuti awathandize. Ndipo Yahova adasankhula Baraki kuti awatsogolere. Barakiyo angadathandiza Ajirayeriwo kuti abwerere kwa Yahova.

Akhalipo mkazi munango omwe dzina lace akhali Debora, ndipo iye akhali mpolofeta. Iye adauza Baraki mafala yakucoka kwa Yahova yakuti: ‘Tenga amuna wakukwana 10.000, uyende kukamenyana na acikunda wa Jabini ku cigwa ca Kisomi. Kumweko un’kakunda Sizera, mkulu wa anyankhondo wa Jabini.’ Tsono Baraki adati kwa Debora: ‘Ndiniyenda pokha-pokha imwepo mukayendambo nande.’ Ndipo Debora adatawira kuti: ‘Ndiniyenda nawe. Tsono, dziwa kuti ndiwepo lini omwe un’kapha Sizera. Yahova walewa kuti ni mkazi omwe animupha.’

Debora adayenda na Baraki pabodzi na anyankhondo wace pa phiri la Tabori kuti akakonzekere nkhondoyo. Pomwe Sizera adabva bzimwebzo, iye adakonkhanisa acikunda wace na ngolo zawo za nkhondo, aciyenda kukawadikhirira m’cigwa ca Kisomi. Debora adauza Baraki kuti: ‘Lero ni nsiku yomwe Yahova an’pereka anyamadulanthaka wako m’manja mwako.’ Tenepo, Baraki na acikunda wace 10.000 adapolikambo kuti akamenyane na anyankhondo wa Sizera.

Yahova adacitisa kuti cigwa ca Kisomi cidzale na madzi mwadzidzidzi, yacisefukira. Madzi yakusefukirayo yadacitisa matope yomwe yadatcereresa ngolo za anyankhondo wa Sizera. Ndipo Sizerayo adabuluka m’ngolo mwace, aciliceka liwiro. Baraki na acikunda wace adapha acikunda wense wa Sizera. Tsono Sizera adakabisalika mu tendi mwa mkazi munango omwe dzina lace akhali Jayeri. Jayeriyo adam’mwesa mkaka, acimufunikiza na bulangeti. Ndipo Sizera adamalizira kugona tulo twamphanvu thangwe ra kuneta. Tenepo, mwakazizizi Jayeri adatenga kamuti komwe kakhadjirikira tendi lace, acikakhomerera mu msolo mwa Sizerayo, acimupha.

Baraki adafika komwe kukhana Jayeriko, acimbanyang’ana Sizerayo. Ndipo Jayeri adabula m’tendi mwace, aciuza Barakiyo kuti: ‘Pitani mkatimu kuti ndikuwoneseni munthu munkumunyang’anayo.’ Pomwe Baraki adapita mu tendimo, adakagumana Sizera wafa. Baraki na Debora adatumbiza Yahova thangwe ra kuwathandiza kukunda anyamadulanthaka wawo. Ndipo Ajirayeri adakhala pa mtendere kwa magole yakukwana 40.

Pa nthawe inango pomwe ku Jirayeri kukhana njala, mkazi munango Mjirayeri, omwe dzina lace akhali Naomi, adafulukira ku Moabe na bayace pabodzi na wana wace awiri wacimuna. Na kupita kwa nthawe, bayace Naomi adadzafa. Ndipo wana wacewo adadzalowola akazi wa ku Moabe omwe madzina yawo akhali Rute na Oripa. Ndipo na kupita kwa nthawe, wana wace awiriwo adadzafambo.

Pomwe Naomi adadzabva kuti njala ikhadamala ku Jirayeri, iye adakumbuka bza kubwerera kwawo. Alowola wace, Rute na Oripa, akhayendambo naye pabodzi, tsono pakati pa njira, Naomi adawauza kuti: ‘Imwepo mukhali akazi wabwino kwa wana wangu na alowola wabwino kwa inepano. Ndin’funa kuti awirimwe mukalowodwe pomwe. Ndipopa bwererani kwanu, ku Moabe.’ Tsono Rute na Oripa adati: ‘Ifepano timbakufunani! Ndipo tin’funa lini kukusiyani.’ Naomi adawangingimira basi kuti abwerere. Pakumalizira pace, Oripa adabwerera ku Moabe, tsono Rute adasala. Ndipo Naomi adati kwa Ruteyo: ‘Mwanzako Oripa ankubwerera kwa adzinza wace na kwa mirungu yace. Bwerera naye pabodzi, ndipo ndoko kumui kwa mai wako.’ Tsono Rute adati: ‘Ndin’kusiyani lini. Wanthu wa kwanu an’kakhalambo wanthu wangu, ndipo Mulungu wanu an’kakhalambo Mulungu wangu.’ Un’kumbuka kuti Naomi adabva tani mu mtima mwace pa kubva mafala yamweya?

Rute na Naomi adafika ku Jirayeri pa nyengo yakubvuna sevada. Ndipo Rute adayenda kukaphata basa lakukonkhanisa sevada m’munda mwa Bowazi, omwe akhali mwana wa Rahabi. Iye adabva kuti Rute akhali wa ku Moabe nakuti akhali munthu wakukhulupirika kwa Naomi, mibzala wace. Ndipopa iye adauza anyabasa wace kuti amusiyire sevada munango kuti aphalasire momwe angadafuniramo.

Pomwe Rute adafika ku mui usiku, Naomi adamubvunza kuti: ‘Kodi wakaphata basa m’munda mwa yani lero?’ Ndipo iye adati: ‘Ndakaphata basa m’munda mwa mwamuna munango omwe dzina lace ni Bowazi.’ Naomi adauza Rute kuti: ‘Bowazi ngwa dzinza la abayangu. Pitiriza kuphata basa na atsikana omwe ankumuphatira basawo. Palibe omwe an’dzakunesa.’

Ndipo Rute adapitiriza kuphata basa m’munda mwa Bowazi mpaka atamala kubvunako. Bowazi adawona kuti Rute akhali mkazi wabwino, ndipo akhalimbika pa basa. Mu nthawe zimwezire, mwamuna akafa, acisaya kusiya wana, munango wa dzinza lawo akhafunikira kupita nthaka. Ndipopa Bowazi adadzalowola Rute. Ndipo iwo adadzabereka mwana wacimuna omwe dzina lace akhali Obede, omwe adadzakhala yavu wa mambo Davide. Axamwali wa Naomi adakomedwa kwene-kwene, acilewa kuti: ‘Pakuyamba Yahova akupasa Rute, omwe ni mkazi wabwino kwene-kwene, ndipo tsapano akupasambo mzukulu! Yahova alemekezeke.’