Ajirayeri adadzapandukira pomwe Yahova, aciyamba kumbanamata bzifanikiso. Tsono bzifanikisobzo bziribe kuwathandiza pomwe wanthu wa ku dziko la Amoni adayenda kukamenya nawo nkhondo. Ajirayeriwo adacita magole mazinji, acimbaboneresedwa nawo. Pakumalizira pace, iwo adadandaulira Yahova, aciti: ‘Takuphonyerani. Taphata minyendo, tipulumuseni kwa anyamadulanthaka wathu.’ Ndipo iwo adapfudza bzifanikiso bzawo, aciyamba kumbanamata Yahova. Tenepo, Yahova adawathandiza.

Akhalipo mcikunda m’bodzi omwe dzina lace akhali Djafeti. Ndipo iye adasankhulidwa kuti atsogolere Ajirayeri pa kukamenya nkhondo na wanthu wa ku Amoni. Pomwe Djafeti akhanati kuyenda ku nkhondoko, iye adapicira kwa Yahova kuti: ‘Mukatithandiza kukunda anyamadulanthaka wathu, munthu ali-wense omwe an’dzayamba kubula m’nyumba mwangu kuti adzanditambire pakucokera ku nkhondoko, ndin’dzamupereka kuti akakutumikireni ku tendi la mkonkhano pa moyo wace wense.’ Yahova adabva mpembo wa Djafeti, ndipo adawathandizadi.

Pomwe Djafeti adabwerera kumui, munthu wakuyamba omwe adabula kuti akamutambire, ni mwana wace wacikazi. Mwanayo akhabzina, acimbaimba na katambuleta. Ndipo Djafeti akhana mwana m’bodzi yekhayo basi. Kodi iye angadacita tani? Iye adakumbukira bza piciro lacero, ndipo adati: ‘Oh, mwanangu! Wandisunamisa kwene-kwene. Inepano ndapicira cinthu kwa Yahova. Tsono kuti nditeweze picirolo, ndin’funika kukutumiza ku Silo kuti ukamutumikire mu tendi la mkonkhano.’ Tsono mwanayo adati: ‘Papa, citani ninga momwe mwaleweramo . Tsono ndikukumbira minyezi miwiri yokha kuti ndiyende m’mapiri na axamwali wangu. Ndikabwerera, ndin’dzayenda.’ Ndipo mwana wa Djafetiyo adatumikira mwakukhulupirika mu tendi la mkonkhanolo pa moyo wace wense.Pa gole liri-lense, axamwali wace akhambayenda kamuzungira ku Siloko.

Eli, mkulu wa ansembe, akhatumikira mu tendi la mkonkhano pabodzi na wana wace awiri, Ofini na Fineya. Wanawo akhambabvera lini bzakutonga bza Yahova, ndipo akhacitira wanthu bzinthu bzakuipa. Pomwe Ajirayeri akambayendesa nyama kuti akacite cakupereka kwa Yahova, Ofini na Fineya akhambatengeratu mbali zabwino za nyamayo, acimbadya ndiwo. Pai wawo Eli, akhadziwa bzomwe iwo akhacita, tsono iye akhacita lini cinthu. Kodi un’kumbuka kuti Yahova angadalekerera kuti bzimwebzo bzipitirize kumbacitika?

Napo Samuyeri akhali mwana kuposa Ofini na Fineya, iye alibe kutewezera makhalidwe yawo yakuipayo. Ndipo Yahova adakomedwa na bzimwebzo. Usiku bunango pomwe Samuyeri akhagona, iye adabva fala lomwe likhamucemera. Iye adamuka, acithamanga komwe kukhana Eli, aciti: ‘Ndiri pano ine, ndabwera!’ Tsono Eli adati: ‘Ndiribe kukucemera. Bwerera ukagone.’ Samuyeri adayenda kagona. Bzimwebzi bzidacitika kawiri-kense, tsono pomwe bzidadzacitika kacitatu, Eli adazindikira kuti iye akhacemeredwa na Yahova. Tenepo, Eli adauza Samuyeri kuti: ‘Ukacemeredwa pomwe, iwepo tawira kuti: “Lewani Yahova, mtumiki wanune ndikubva.”’

Samuyeri adayenda kagona. Ndipo iye adabva pomwe fala linkumucemera, liciti: ‘Samuyeri! Samuyeri!’ Iye adatawira kuti: ‘Lewani Yahova, mtumiki wanune ndikubva.’ Ndipo Yahova adati: ‘Muuze Eli kuti ndinimulanga pabodzi na banja lace. Thangwe iye an’dziwa bzakuipa bzomwe wana wace ambacita mu tendi la mkonkhano, koma ankucita lini cinthu.’ Ku macibese yace, Samuyeri adakafungula misuwo ya mu tendi la mkonkhano kuti aphate basa ninga momwe akhambacitira nsiku zense. Iye akhagopa kulewa kwa mkulu wa ansembe bzomwe Yahova akhadamuuza. Tsono Eli adamucemera, acimubvunza kuti: ‘Samuyeri, mwana wangu, kodi Yahova wakuuza ciyani? Ndiuze bzense.’ Ndipo Samuyeri adamuuzadi bzense.

Pomwe Samuyeri akhakula, Yahova akhapitiriza kumbamutsogolera. Mu dziko lense la Jirayeri, wanthu akhadziwiratu kuti Samuyeri akhadasankhulidwadi na Yahova kuti akhale mpolofeta na muyeruzi.