Pa nyengo ya cirala ire, Yahova adauza Eliya kuti: ‘Ndoko ku Zarefati. Kumweko un’kawona mkazi mansiwa, ndipo iye an’kakupasa cakudya’. Atafika pa cipata ca mzinda wa Zarefatiyo, iye adawona mkazi mansiwayo ankulokota nkhuni. Ndipo Eliya adamukumbira madzi yakumwa. Pomwe mkaziyo akhayenda katenga madziyo, Eliya adamucemera, acimuuza kuti: ‘Ndaphata minyendo, ndipasembo pau, ndidye.’ Tsono mkaziyo adati: ‘Ndiribe pau na ibodziyo kuti ndikupaseni. Koma ndinabo ufa pang’ono na tumafuta kuti inepano na mwananguyu tidye.’ Tsono Eliya adamuuuza kuti: ‘Yahova walewa kuti ukandiphikira pauyo, ufa bwako pabodzi na mafutayo bzin’mala lini mpaka kudzayambe kubvumba.’

Tenepo, mkazi mansiwayo adapita m’nyumba, aciphikira pau mpolofeta wa Yahovayo. Ninga momwe Yahova akhadalewera, mkazi mansiwayo pabodzi na mwana wace, nthawe zense iwo adakhala na cakudya cakukwanira pa nyengo yense ya cirala ire. Mtsuko wace wa ufa pabodzi na mtsuko wace wa mafuta bzidapitiriza kukhala bzakudzala.

Patsogolo pace, cidacitika cinthu cakupasa nsisi kwene-kwene. Mwana wa mkazi mansiwayo adaduwala, acifa. Mkaziyo adadandaulira Eliya kuti amuthandize. Ndipo Eliya adanyamula mwanayo, aciyenda naye m’cipinda ca padzulu. Adakamugonesa pa kama pace, acipemba kuti: ‘Yahova, ndaphata minyendo, citisani kuti mwanayu akhale pomwe na moyo.’ Bzomwe Yahova angadacitabzo, bzingadakhala cinthu cakudabwisa kwene-kwene. Un’dziwa thangwe ranyi? Thangwe mpaka pa nthawe imweyi, palibe munthu omwe akhadamusidwa kale kwa anyakufa. Ndipo mkazi mansiwayo na mwana waceyo akhali lini wa mtundu wa Jirayeri.

Tsono mwanayo adamukadi, acikhala pomwe na moyo. Ndipo Eliya adauza mkazi mansiwayo kuti: ‘Ona! Mwana wako wakhala pomwe na moyo!’ Mkaziyo adakondwa kwene-kwene, ndipo adauza Eliyayo kuti: ‘Imwepo ndimwedi munthu wa Mulungu. Ndikudziwa bzimwebzi thangwe imwepo mumbalewa bzomwe Yahova ambakuuzani, ndipo bzomwe ambakuuzanibzo bzimbacitika nthawe zense.’

Mambo Akabe akhakhala ku Jezireyeri, ndipo na pa janera ya nyumba yace, iye akhakwanisa kuwona munda wa mpesa wa mwamuna munago omwe dzina lace akhali Nabote. Akabe akhaufuna kwene-kwene mundayo, mwakuti adayezera kuugula. Tsono Nabote adalamba kumugulisira thangwe mundayo akhadacita kupasidwa ninga utaka, ndipo kuugulisa kukhali kusaya kuteweza Cakutonga ca Yahova. Kodi Akabe adalemekeza Naboteyo thangwe ra kucita cinthu cabwino? Nee, alibe. Ndipo iye adabva ciya kwene-kwene mwakuti akhatazira kugona, ndipo akhalambambo kudya.

Tsono, mkazi wace wakuipa, Jezabeli, adamuuza kuti: ‘Imwepo ndimwe mambo wa Jirayeri. Mungatenge cinthu ciri-cense comwe mungafuneco. Inepano ndin’kuthandizani kutenga munda ule.’ Ndipo Jezabeliyo adanembera tsamba akulu-akulu wa mu mzinda wa Naboteyo, aciwauza kuti: ‘Munamizireni kuti iye watukwana Mulungu, mucimupha na minyala.’ Akulu-akuluwo adadzacita bzomwe Jezabeliyo adawauza, ndipo Jezabeli adauzambo bayace Akabe kuti: ‘Nabote wafa! Munda wace ule ngwanu tsapano!’

Jezabeli adapha wanthu azinji wakusaya mulandu, sikuti Nabote yekhayo. Iye adapha wanthu azinji omwe akhabvera Yahova, ndipo akhambanamatambo bzifanikiso na kumbacita bzinthu bzinango bzakuipa. Yahova akhawona bzinthu bzense bzomwe Jezabeli akhacita. Kodi n’ciyani comwe Yahovayo adamucitambo thangwe ra bzakuipa bzacebzo?

Pomwe Akabe adadzafa, mwana wace Jeoramu, ndiye omwe adadzakhala mambo. Ndipo Yahova adatuma mwamuna munango omwe dzina lace akhali Jehu kuti akalange Jezabeli na banja lace lense.

Jehu adakwira ngolo yace, aciyenda ku Jezireyeri, komwe Jezabeli akhakhala. Jeoramu adakwirambo ngolo kuti akagumane naye, ndipo adakamubvunza kuti: ‘Kodi ukubwerera mtendere?’ Tsono Jehu adamutawira, aciti: ‘Pangawoneke tani mtendere pomwe mai wako ankucita bzinthu bzakuipa!’ Na bzimwebzi, Jeoramu adawona kuti pan’khalika lini, ndipo iye adazungunusa ngolo yace kuti athawe. Tsono Jehu adamulasiratu na uta, acifa.

Patsogolo pace, Jehu adapitiriza kuyenda kumui kwa Jezabeli. Pomwe Jezabeli adabva kuti Jehu akhabwera, iye adabzidekesa kuti adzawoneke bwino, acimudikhirira pa janera ya nyumba yace ya padzulu. Pomwe Jehu adafika, Jezabeliyo adalewalewa naye mu njira yakuipa, ndipo Jehu adakuwira anyabasa wa Jezabeliyo, aciti: ‘Muthuseni pansi pano!’ Ndipo anyabasawo adamuthusadi pansipo, acifa.

Pambuyo pa bzimwebzi, Jehu adaphambo wana 70 wa Akabe, acimalisiratu bza kunamata Baala mu dziko la Jirayeri. Kodi unkukwanisa kuwona kuti Yahova ambadziwa bzinthu bzense bzomwe bzimbacitika, ndipo ambalanga wanthu omwe ambacita bzakuipa?