Inepano Ndikhakhulupira Lini Kuti Mulungu Alipo

MOMWE MOYO WANGU UKHALIRI

Ndidabadwira m’mudzi wa Saxônia, omwe ukhali ku República Democrática Alemã. Banja lathu likhali labwino, wanthu akhambafunana ndipo abereki wangu adandipfunzisa makhalidwe yabwino. Dziko lathu likhali lacikomunista, ndipo wanthu azinji wa m’mudzi wathu wa Saxônia, akhalibe basa na nkhani zakupemphera-pemphera. Ndipo ine ndikhakhulupira lini kuti Mulungu alipo. Kuyambira ndiri mwana mpaka pomwe ndidapfitsa magole 18 ndikhaphatisa basa nzeru zacikomunismo na yakuti Mulungu kulibe.

Ndikhakomedwa na cikomunismo thangwe cikhambalewa kuti wanthu wentse mbabodzi-bodzi. Ndipo ndikhawonambo kuti bzinthu bzentse bzikhafunika kugawidwa ndendende, ndipo bzimwebzi bzingadathandiza kuti paleke kugumanika wanthu wakudala ayai wakusauka kwene-kwene. Tenepo ndidayamba kukaphatasa basa ku ka bungwe kanango ka maswaka komwe kakhalimbisa nzeru zacikomunista. Pomwe ndikhana magole 14 ndidayamba kuphata basa lakukonza bzinthu mwakuphatisa basa matsamba yomwe yataidwa. Akulu-akulu wa mzinda wa Aue adakomedwa kwene-kwene na basa langu mwakuti adandipasa mabaibai. Bzimwebzi bzidacitisa kuti ndidziwane na akulu-akulu wa boma azinji napo kuti ndikhali tswaka. Ndikhawona kuti bzinthu bzingadandifambira.

Mwadzidzidzi bzinthu bzentse bzidadzacinja. Litsito la Berlim lidagwa ndipo maboma mazinji yacikomunista ya ku Europa, yadamala mphanvu. Bzimwebzi bzidanditokonya kwene-kwene. Mwakusaya kucedwa ndidadzazindikira kuti boma lathulo likhadacita bzinthu bzizinji bzakusaya cirungamo. Mwa ciratizo, wanthu omwe akhambateweza lini nfundo zacikomunismo akhambawonedwa ninga wakusaya basa. Ndikhambabzibvunza kuti: ‘Kodi bzimwebzi bzikucitika tani? Kodi ife omwe timbateweza cikomunismo timbalewa lini kuti wanthu wentse mbabodzi-bodzi? Kodi wanthu amwewa ambandolewa bzinthu na pa mulomo koma ambacita bzinango?’ Bzinthu bzentsenebzi bzidandicitisa thupo.

Tenepo, ndidasiya bzinthu bzacikomunismo ndiciyamba kupfunza kuimba na kupintali. Ndidakapfunza kuimba nyimbo ku xikola inango na cakulinga cakuti ndiyende ku univesidade—kuti ndikhale nyakuimba na nyakupintali wa luso. Pa nthawe imweyi ndidasiya kuteweza nfundo za makhalidwe yabwino zomwe abereki wangu adandipfunzisa pomwe ndikhali mwana. Kwa inepano ndikhawona kuti cinthu cakufunika cikhali kupfatsa na moyo, bzomwe bzikhaphatanidza kukhala na amakhadzi azinji. Tsono kuimba, kukhala na luso la kupintali na kukhala na moyo wakucita bzomwe nin’funa, bziribe kuthandiza kuti thupo langu limale. Napo bzithunzi-thunzi bzomwe ndikhapintali bzikhalatiziratu kuti ndikhali munthu wa mantha na thupo. Ndipo ndikhambabzihvunza kuti: ‘Kodi tsogolo langu liri tani? Thangwe ranyi wanthufe tina moyo?’

Ndidadabwa kwene-kwene pomwe ndidagumana mitawiro ya mibvunzo yangu. Ntsiku inango ku xikola usiku, inepano na anzangu tidayamba kucezerana bza nkhani yakulewa bza tsogolo la wanthu. Mtsikanaa munango omwe tikhapfunza naye pabodzi wakucemeredwa Mandy, akhali Mboni ya Yahova. Bzomwe adandiuza pa ntsiku imweyire, bzidandithandiza kwene-kwene, iye adati: “Andreas, penu un’funa kudziwa bza mitawiro ya mibvunzo yako yakulewa bza moyo na bzakutsogolo, ukawerenge bwino-bwino Bibliya.”

Ndiribe kukhulupira bzomwe iye adandiuzabzo, koma ndidakumbuka bza kukaliwerenga kuti ndigumane mitawiro. Mandy adandiuza kuti ndikawerenge kapitulo 2 ya Danyeri, ndipo ndidadabwa kwene-kwene na bzomwe ndidakawengabzo. Kapitulo imweyi imbalewa bza maboma yamphanvu yakusiyana-siyana yomwe yakhalipo mbuyomu na yomwe yalipo ntsiku zino. Mandy adandilatizambo mavesi manango yomwe yambalewa bzatsogolo lathu. Ndidaigumanadi mitawiro ya mibvunzo yangu! Tenepo, ndidabzibvunza kuti: Kodi bumwebu ni umboni lini bwakuti Mulungu alipodi? Kodi mbani omwe angakwanise kulewa bzinthu bzomwe bzin’dzacitika kutsogolo mwakulondoza?

MOMWE BIBLIYA LIDACINJIRA MOYO WANGU

Mandy adakumbira a Horst na akazi wawo a Angelika kuti apfunze nande Bibliya. Banja limweri lidandithandiza kubvesesa bwino Fala la Mulungu. Mwakusaya kucedwa ndidazindikira kuti ni Mboni za Yahova zokha zomwe zimbafuna kuphatisa basa dzina la Mulungu lakuti Yahova na kuthandizambo winango kudziwa dzinali. (Psalymo 83:18; Mateu 6:9) Ndidapfunza kuti Yahova Mulungu, adacita makonzedwe yakuti wanthu wakubvera adzakhale na moyo wakusaya kumala m’paraizo pa dziko la pantsi pano. Cinembo ca Psalymo 37:9 cimbati: ‘Omwe ankudikirira Yahova ndiwo an’dzatambira dziko la pantsi.’ Ndidakomedwa kwene-kwene kubva kuti munthu ali-wentse omwe an’teweza malango ya Bibliya, angadzakhale na moyo wakusaya kumala pa dziko la pantsi pano.

Ntsono bzidandinesa kuti ndicinje moyo wangu kuti ndicite bzinthu bzomwe Bibliya limbapfunzisa. Ndikhali munthu wakubvekera thangwe ndikhayimba ndipo ndikhana luso lakucosa foto, ndipo bzimwebzi bzidandicitisa kukhala wakusamwa. Na tenepo ndidafunika kupfunza kukhala wakubzicepesa. Ntsono napo bzikhali tenepo, bzikhandinesa kusiya khalidwe langu la upombo. Ndimbatenda kwene-kwene Yahova thangwe ngwakupirira na wantsisi ndipo ambabvesesa wanthu omwe akuyeza kubvera bzomwe Bibliya limbapfunzisa.

Kuyambira ndiri mwana mpaka pomwe ndidapfitsa magole 18 ndikhaphatisa basa nzeru zacikomunismo na yakuti Mulungu kulibe. Tsono Bibliya lidacinja moyo wangu. Bzomwe ndidapfunza m’Bibliya bzidamalisa thupo langu la bzinthu bzakutsogolo ndipo bzidandithandizambo kudziwa cakulinga ca moyo wangu. Mu gole la 1993 ndidabatizidwa ndicikhala Mboni ya Yahova ndipo mu 2000 ndidalowola Tabita omwembo ni Mboni. Timbamala nthawe ikulu tikuthandiza wanthu winango kuti adziwe bzomwe Bibliya limbapfunzisa. Wanthu azinji omwe timbagumana nawo ambakhulupira kuti kulibe Mulungu ndipo akhaphatisa basa nzeru zacikomunismo ninga momwe ine ndikhacitira. Nimbakomedwa kwene-kwene pa kuwathandiza kudziwa bwino Yahova.

PHINDU LOMWE NDAGUMANA

Pomwe ndidayamba kupfunza Bibliya na Mboni za Yahova abereki wangu adakalipa kwene-kwene. Tsono iwo adazindikira kuti kupfunza Bibliya na Mboni za Yahova kudandithandiza kucinja khalidwe langu. Ndine wakukondwa kwene-kwene thangwe rakuti abereki wangu akupfunza Bibliya ndipo ambagumanikambo pa mitsonkhano ya Mboni za Yahova.

Ine na mkazi wangu Tabita tina banja lakukondwa kwene-kwene thangwe timbayeza kuphatisa basa malango ya m’Bibliya. Mwa ciratizo, kukhala wakukhulupirika m’banja kwandithandiza kukhala na banja lakulimba.—Wahebereu 13:4.

Tsapano nimbakhala ndiribe pomwe thupo na tsogolo langu. Ndipo nimbabzibva kuti ndiri mu gulu la abale na mpfumakazi la padziko lentse la pantsi, omwe ni wanthu wa mtendere na wakuphatana. Abale na mpfumakaziwa ambacitira bzinthu pabodzi. Bzimwebzi ni bzomwe ndikhafuna kuyambira kale-kale.