Kodi Mun’dzakonzekera Tani Cikumbuso?

Kuyambira gole lino, tin’khala na nthawe izinji yakukonzekera Cikumbuso ca infa ya Kristu. Nsiku ya Cikumbuso ikadzagwera pa nsiku ya pakati pa mdzinga, mitsonkhano ya pakati pa mdzinga in’dzacitidwa lini. Tsono ikadzagwera kuphampha kwa Mdzinga, mitsonkhano yomwe timbacita kuphampha kwa Mdzingayo in’dzacitidwa lini. Kodi mun’dzaphatisa bwino basa nthawe imweyi pa ndandanda yanu? Ninga momwe Akristau wakuyambirira akhacitira, bzimbafunika kukonzekera pa nyengo yakupambulika. (Lu 22:7-13; km-CN 15/3 tsa. 1) Koma tensenefe tin’funika kukonzekeresa mitima yathu. Kodi tingacite tani bzimwebzi?

• Kumbukirani kufunika kwa kukagumanika pa msindayu.—1Wak 11:23-26

• Mwa mpembo pendani momwe uxamwali bwanu na Yahova buliri.—1Wak 11:27-29; 2Wak 13:5

• Werengani mucikumbukira bzinembo bzomwe bzimbalewa kufunika kwa Cikumbuso.—Ju 3:16; 15:13

Winango ambasankhula kuwerenga na kukumbukira mavesi yomwe yambagumanika mu kabukhu ka Kupfunza Mavesi Nsiku na Nsiku pa mbali yakuti kuwerenga Bibliya pa nthawe ya Cikumbuso. Winango ambawerenga mavesi yomwe yankugumanika mu kwadru yomwe mukuwona panyansiyi. Ndipo winango ambasankhula kuwerenga nkhani za mu Nsanza ya Mulindiri zomwe zimbalewa bza Cikumbuso na bza lufoyi lomwe Yahova na Jezu adatilatiza. Bziribe basa ndondomeko yomwe tin’phatisa basa koma cakufunika n’cakuti mun’dzalimbisa uxamwali bwanu na Yahova pabodzi na Mwanace.