DZIKO LOMWE LIRI PA MABVUTO

1 | Khotcererani Thanzi Lanu

THANGWE RANYI BZIMWEBZI MPSAKUFUNIKA?

Mabvuto ayai malengwa ya pantsi bzingadzonge thanzi la wanthu mu njira zakusiyana-siyana.

Bzinthu bzakuipa bzikacitika, wanthu azinji ambakhala na thupo. Ndipo wanthu omwe ambakhala na thupo kwa nthawe itali ambaduwala.
Malengwa ya pantsi yangacitise kuti bzikhale bzakunesa kutambira thandizo labwino la ulapi thangwe rakuti adotolo angakhale na wanthu azinji omwe angafune kuwasamalira pa nthawe ibodzi-bodzi, ndipo pangakhale palibe mankhwala yomwe yangakwane wanthu wentse.
Malengwa ya pantsi yambacitisa kuti wanthu aluze bzinthu bzawo yacicitisa kuti asaye cakudya na mankhwala.

Bzomwe Mun’funika Kudziwa

Matenda makulu na thupo bzingacitise kuti muleke kucita bzakusankhula bza nzeru. Thangwe ra bzimwebzo mungasiye kusamalira thanzi lanu ndipo matendayo yanganyanyiretu.
Mukasaya kunyang’ana thandizo la ulapi, matendayo yangakule ndipo mungafe nayo.
Mukakhala na thanzi labwino, imwepo mungacite bzakusankhula bza nzeru napo mucikhala mukugumana na mabvuto.
Napo penu ndimwe wakusauka, imwepo mungacite bzinthu bzomwe bzingakhotcerere thanzi lanu.

Bzomwe Mungacite

Munthu wanzeru ambakumbukira mabvuto yomwe angagumane nayo ndipo ambacita ciri-centse kuti ayatcenkhe. Mpsakundendemerambo na thanzi lanu. Imwepo mungatcenkhe kukhala na matenda mukambasamba na kupswaira pa mui panu. Bziri bwino kutcenkha bvuto m’mbuto mwakubonera nalo kuti mulikonze.

“Tikasamalira thanzi lathu na kumbacenesa pa mui pathu, tin’dzadzonga lini kobiri kuti tigulire mankhwala.” — Andreas.a

a Madzina ya mu revista ino yacinjidwa.

MOMWE MUNGABZIKHOTCERERERE—Bzinthu Bzomwe Bzingakuthandizeni

Bzinthu bzomwe bziri m’nyantsibzi bzingakuthandizeni kuti mukhotcerere thanzi lanu pa nthawe ya malengwa ya pantsi

KHOTCERERANI THANZI LANU

Khotcererani Thanzi Lanu

Bibliya limbati: “Nyakucenjera ngule omwe akawona tsoka ambabisalika.” (Mimwani 22:3) Yezerani kukumbukira na kutcenkha bzinthu bzomwe bzingadzonge thanzi lanu.

Sambani m’manja kawiri-kawiri na sabau, pomwe mukanati kudya na pomwe mwacokera ku cimbudzi.
Pukutani m’nyumba mwanu ndipo pukutanimbo bzinthu bzomwe mumbabziphatisa basa kawiri-kawiri.
Citani nyongo ya kukhala kutali na wanthu omwe ana matenda yakupasirana.

MBADYANI CAKUDYA CAKUPASA THANZI

Mbadyani Cakudya Cakupasa Thanzi.

Bibliya limbalewa kuti: “Palibe munthu omwe adawenga kale thupi lace, koma ambalidyesa acilisamalira bwino.” (Aefezo 5:29) Timbalatiza kuti timbafuna thupi lathu tikambatcenkha kudya bzinthu bzomwe bzingadzonge thupiro.

Mbamwani madzi kawiri-kawiri.
Mbadyani bzisapo bzakusiyana-siyana na muliwo wa masamba.
Lekani kumbadya bzinthu bzakunenepesa na kumbadya kwene-kwene bzinthu bzomwe bzina munyu na asuka.
Lekani kufumali, kumwa kwene-kwene ayai kuphatisa basa mankhwala yakudzungulumwisa msolo.

“Kuti tileke kuduwala, inepano na mkazi wangu nthawe zentse timbadya bzakudya bzakupasa thanzi; tingadasaya kumbacita tenepoyo, tingadambadzonga kobiri yathu kuti tipagali adotolo na kumbagulira mankhwala. Timbawona kuti bziri bwino kuphatisa basa kobiri yathu kuti tigulire cakudya cakupasa thanzi.” — Carlos.

MBACITANI MASENZEKA YAKULIMBISA THUPI NDIPO MBAGONANI MWAKUKWANIRA

Mbacitani Masenzeka Yakulimbisa Thupi

Bibliya limbalewa kuti: “Kupuma pang’ono kuli bwino kuposa kuphata basa mwa nyongo na kuthamangisa mphepo.” (Mpalizi 4:6) Tin’funika kuphata basa, tsono tin’funikambo kumbapuma.

Mbacitani masenzeka yakulimbisa thupi. Imwepo mungayambe na kumbafamba-famba ntsiku iri-yentse. Masenzeka yakulimbisa thupi yangakuthandizeni kukhala na thanzi labwino, napo penu imwepo ndimwe wakukalamba ayai mumbakwanisa lini kucita bzizinji thangwe ra matenda.
Mbagonani Mwakukwanira

Mbagonani mwakukwanira. Imwepo mukasaya kugona mwakukwanira, mungatazire kukumbuka bwino na kucita bwino bzinthu. Imwepo mukasaya kumbagona mwakukwanira kwa nthawe itali, bzimwebzi bzingacitise kuti muduwale.
Sankhulani nthawe yomwe mun’funika kugona, ndipo ikakwana nthaweyo kagoneni. Yezerani kumbagona mucimbamuka nthawe ibodzi-bodzi ntsiku zentse.
Tcenkhani kuwona TV ayai kuphatisa basa foni pomwe mun’funa kugona.
Tcenkhani kudya kwene-kwene, kumwa café na kumwa bzakumwa bzakuledzeresa pomwe mukanati kugona.

“Ndidawona kuti kugona kumbandicitisa kuti ndikhale na thanzi labwino. Ndikasaya kugona mwakukwanira msolo umbawawa ndipo thupi langu limbakhala liribe mphanvu. Tsono ndikagona mwakukwanira nimbabzibva bwino, nimbakhala wakukonzeka kucita bzomwe nimbafuna, nimbabzibva kukhala wamphanvu ndipo nimbaduwala lini kawiri-kawiri!” — Justin.