DZIKO LOMWE LIRI PA MABVUTO

4 | Khulupirani Kuti Mabvuto Yan’dzamala

THANGWE RANYI BZIMWEBZI MPSAKUFUNIKA?

Thupo thangwe ra mabvuto yomwe yakucitika m’dzikoli lingacitise kuti wanthu aleke kubzibva bwino. Wanthuwo ambawona ninga kuti mabvutoyo yangamale lini. N’ciyani comwe iwo ambacita?

Wanthu winango ambafuna lini kukumbukira bza kutsogolo.
Winango ambamwa bzakumwa bzakuledzeresa ayai kumwa mankhwala yakudzungulumwisa msolo kuti ayebwe bza mabvuto yawo.
Ndipo winango ambawona kuti bziri bwino kufa. Iwo ambabzibvunza kuti: “Kodi ndipitirizerenyi kukhala na moyo?”

Bzomwe Mun’funika Kudziwa

Mabvuto manango yambakhalisa lini ndipo pa nthawe iri-yentse iyo yangamale.
Napo kuti mabvuto manango yangamale lini, pana bzinthu bzomwe mungacite kuti mukwanise kulimbana nayo.
Bibliya limbapicira kuti mabvuto yomwe timbagumana nayo m’dzikoli yan’dzamala. Ndipo ifepano tingakhulupire piciro limweri.

Bzomwe Mungacite

Bibliya limbalewa kuti: “Lekani kumbacita thupo na bzinthu bza ntsiku ya mangwana, pakuti ntsiku ya mangwana in’dzakhala na bzinthu bzace bzakucitisa thupo. Ntsiku iri-yentse ina mabvuto yace.” — Mateu 6:34.

Lekani kumbakhala na thupo kwene-kwene na bzinthu bza kutsogolo mpaka kutazira kucita bzinthu bzomwe mukhafunikira kucita.

Kumbakumbukira bzinthu bzakuipa bzomwe ne bzingacitike lini kungathumizire thupo lanu ndipo mungawone ninga kuti mabvuto yan’dzamala lini.

MOMWE MUNGABZIKHOTCERERERE—Nfundo Zomwe Zingakuthandizeni

MBAWONANI BZINTHU MU NJIRA YAKUTHEMERA

Bibliya limbalewa kuti: “Ntsiku zentse za munthu wakutsautsika zimbakhala zakuipa, tsono munthu wa mtima wakukondwa ambakhala na madyo nthawe zentse.” (Mimwani 15:15) Kukumbukira kwene-kwene bza mabvuto yathu kungaticitise kuti tiwone ninga kuti mabvutoyo yangamale lini. Tsono kukumbukira bzomwe mungacite kuti mumalise mabvutoyo kungakuthandizeni kuti mukwanise kulimbana nayo.

Lekani kumbawona kwene-kwene notisiya.
Kuphampha kwa ntsiku iri-yentse mbakumbukirani bzinthu bza bwino bziwiri ayai bzitatu bzomwe bzakucitikirani.
Ntsiku iri-yentse mbanembani lista ya bzinthu bzomwe mun’funa kucita, ndipo mbanembani bzokha bzomwe mun’kwanisa kucita. Mukakhala muna basa, mbaligawani kuti mulicite pang’ono-pang’ono. Mukacita bzimwebzi, basa lanulo lin’dzafamba bwino.

LEKANI KUMBABZIPAMBULA

Bibliya limbalewa kuti: “Munthu omwe ambabzipambula . . . ambalamba nzeru zentse zomwe n’zakuthandiza.” (Mimwani 18:1) Mukagwera m’cidindi cakuzika, mungakwanise lini kubula mwekha. Koma mukuthandizidwa na anzanu, imwepo mungakwanise kubula.

Kumbirani thandizo famidya zanu ayai axamwali wanu.
Ndipo mbawonanimbo bzomwe mungawacitire kuti muwathandize. Kucitira bzinthu wanthu winango kun’dzakuthandizani kuti muleke kumbakumbukira kwene-kwene bza mabvuto yanu.
Mukawona ninga kuti mabvuto yanu yangamale lini ndipo mukakumbuka kuti bziri bwino kundofa, bzingakhale bwino kunyang’ana thandizo kuna adotolo. Nthawe zinango mukambabzibva kuti mudaneta kwene-kwene, cimweci cingakhale cizindikiro cakuti mukuduwala matenda ya makumbukidwe. Wanthu winango omwe akhaduwalambo matenda yamweya adalimba pomwe adathandizidwa na adotolo.a

a Mukani! ambafotokoza lini bza thandizo liri-lentse la ulapi.

Bibliya Limbalatiza Kuti Mabvuto Yan’dzamala

Munembi munango wa bukhu la Salimo adapemba kwa Mulungu aciti: “Mafala yanu ni mbvuniko wa minyendo yangu, ndipo ni ceza cakubvunikira njira yangu.” (Salimo 119:105) Onani momwe Bibliya limbalatizira kuti ni ceza kwa ifepano.

Tikakhala tikufamba usiku, ceza cimbatithandiza kuti tiwone pomwe tingaponde. Bibliya lidakhala ninga ceza thangwe limbatipasa malango yomwe yambatithandiza kucita bzinthu mwa nzeru napo pa nthawe zakunesa.

Kuthumizira bzimwebzi, ceza cingatithandize kuwona bzomwe bziri ku tsogolo.

Napo kuti Bibliya limbafotokoza bza dziko la pantsi kuyambira pa ciyambi, iro limbalatizambo kuti mabvuto yomwe tikugumana nayoya yan’dzamala. Iro limbatawira mibvunzo ninga iyi:

1. Kodi kubonera kudayamba tani?

Bibliya limbalewa kuti: “Thangwe ra munthu m’bodzi pikado idapita m’dziko, ndipo pikadoyo idabweresa infa, tenepo infayo idafikira wanthu wentse thangwe wentse akhana pikado.” — Aroma 5:12.

2. Thangwe ranyi wanthu akutazira kumalisa mabvuto yathu?

Bibliya limbalewa kuti: “Munthu omwe an’famba, alibe mphanvu yakutsogolera nzayo zace.” (Jeremiya 10:23) Bzomwe bzikucitika m’dzikoli bzikulatiza kuti mafala yamweya njacadidi.

3. Kodi n’ciyani comwe Mulungu an’dzacita kuti amalise mabvuto yomwe wanthu akugumana nayo?

Bibliya limbalewa kuti: “Iye an’dzapukuta misozi yentse m’maso mwawo, ndipo infa in’dzawoneka lini pomwe. Pan’dzawoneka lini pomwe kusunama, kulira ne kuwawidwa.” — Apokalipse 21:4.