Kodi mumbadziwa wanthu wangasi womwe ni Mboni za Yahova? Winango wa ifepano tingakhale wapafupi namwe, anzanu wa ku basa, ayai anzanu wa ku nyumba ya mapfunziro. Ayai pinango tidaceza namwe kale nkhani za m’Bibliya. Kodi ndife yani maka-maka, ndipo thangwe ranyi timbauza wanthu winango bzinthu bzomwe timbakhulupira?

Ndife wanthu ninga winango. Ndife wa m’mbuto na bzikhalidwe bzakusiyana-siyana. Winango wa ifepano tikhali m’bzipembedzo bzakusiyana-siyana, ndipo winango tikhakhulupira lini Mulungu. Tsono pomwe tikhanati kukhala Mboni, tidapambula nthawe kuti tipfunze na tceru bzipfunziso bza m’Bibliya. (Mabasa 17:11) Tidabverana na bzomwe tidapfunzabzo, ticisankhula tekha kunamata Yahova Mulungu.

Kupfunza Bibliya kumbatipasa phindu. Ninga munthu ali-wense, ifepano timbawonekeredwa na mabvuto ndipo timbathethambo. Tsono thangwe ra kulimbikira kuphatisa basa mitemo ya m’Bibliya nsiku na nsiku, moyo wathu udakhala wabwino kwene-kwene. (Psalymo 128:1, 2) Limweri ni thangwe libodzi lomwe limbaticitisa kuuza anzathu bzinthu bzabwino bzomwe timbapfunza m’Bibliya.

Timbakhala na moyo wakuteweza mitemo ya Mulungu. Mitemo imweyi, yomwe timbapfunzisidwa kucokera m’Bibliya, imbatithandiza kukhala na moyo wabwino, kulemekeza anzathu na kulatiza makhalidwe yabwino, ninga cirungamo na kudeka mtima. Mitemoyo imbatithandiza kukhala wanthu wabwino m’mudzi womwe timbakhala, ndipo imbatirimbisa kukhala na makhalidwe yabwino na kubverana m’banja. Pakuti timbakhulupira kuti ‘Mulungu alibe tsankhulo,’ ifepano tiri pa ubale bwauzimu bwa pa dziko lense la pansi, bwakusaya kugawanisidwa na mtundu ayai ndale. Napo ndife wanthu ninga winango, ndife mbumba ya makhalidwe yakusiyana na wanthu winango.​—Mabasa 4:13; 10:34, 35.

• Kodi n’ciyani cimbacitisa Mboni za Yahova kukhala ninga wanthu winango?

• Kodi Mboni za Yahova zidapfunza mitemo iponi kucokera m’Bibliya?

Wanthu wazinji wambayesa kuti Mboni za Yahova ni dzina la cipembedzo cipsa. Tsono, papita kale magole yakuposa 2.700 pomwe atumiki wa Mulungu m’bodzi-yekha wacadidi, wambacemeredwa ninga ‘mboni’ zace. (Zaiya 43:10-12) Nthawe yenseneyi mpaka mu gole la 1931, ifepano tikhadziwika ninga Apfunzi wa Bibliya. Tsono, thangwe ranyi tidaphata dzina la Mboni za Yahova?

Dzinali limbazindikirisa Mulungu wathu. Mwakubverana na mabukhu yakale-kale, dzina la Mulungu, Yahova, likhagumanika m’Bibliya nthawe yakuposa bzulu na bzulu. M’mabibliya mazinji yakusanduliziridwa, dzinali lidacinjidwa na madzina ya umbiri, ninga Mbuya ayai Mulungu. Tsono, Mulungu wacadidi adazimbula yekha dzina lace, Yahova, kuna Mozeji, aciti: ‘Limweri ndiro dzina langu, mpaka kale-kale.’ (Kufuluka 3:15) Mwa njira imweyi, iye adabzisiyanisa na mirungu yense yakunama. Ifepano timbakomedwa kudziwika na dzina lakucena la Mulungu.

Dzinali limbalewa bza basa lathu. Mwamuna wakulungama wakutoma, Abeli, ndiye adayambisa mfolo ukulu wa wanthu womwe wadacitira umboni bwa cikhulupiro cawo kwa Yahova. Mkati mwa magole mazinji, Nowe, Abalahamu, Sara, Mozeji, Davide na winango wadapita mu ‘mtambo ukulu wa mboni’. (Wahebereu 11:4–12:1) Ninga momwe munthu ambacitira umboni mu nyumba yakuyeruzira mirandu kuti athandize mwanzace omwe alibe kuphonya, ifepano timbafunisisa kudziwisa cadidi ca Mulungu wathu.

Timbateweza Jezu. Bibliya limbalewa bza Jezu ninga ‘mboni yakukhulupirika na yacadidi.’ (Cibvumbulutso 3:14) Jezu caiyeyo adalewa kuti iye ‘adalidziwisa dzina la Mulungu’ ndipo adapitiriza ‘kucitira umboni cadidi’ ca Mulungu. (Juwau 17:6; 18:37) Ateweri wacadidi wa Jezu wan’funika kutenga dzina la Yahova na kulidziwisa. Bzimwebzi ndibzo bzomwe Mboni za Yahova zinkucita na nyongo.

• Kodi thangwe ranyi Apfunzi wa Bibliya wadaphata dzina la Mboni za Yahova?

• Kodi Yahova ana mboni pa dziko la pansi pano kuyambira lini?

• Kodi mboni ikululetu ya Yahova ni yani?

Bibliya lidaleweratu kuti pambuyo pa kufa kwa Jezu, apfunzisi wakunama wangadadzawoneka pakati pa Wakristau wakuyambirira, wacidzadzonga cadidi ca m’Bibliya. (Mabasa 20:29, 30) Na nthawe, bzimwebzo ndibzo bzomwe bzidadzacitikadi. Iwo wadasanganiza mapfunziso ya Jezu pabodzi na nzeru za bzipembedzo bzakusaya kukhulupira Mulungu wacadidi, ndipo mkhalidwe wakunamizira wa Cikristau udayenda kutsogolo. (2 Timotio 4:3, 4) Kodi tingatsimikize tani nsiku zino kuti ifepano timbabvesesa bwino bzomwe Bibliya limbapfunzisa maka-maka?

Idafika nthawe kuti Yahova azimbule cadidi. Iye adaleweratu kuti pa ‘nthawe yacimaliziro, cidziwiso cacadidi cingadadzawanda’. (Danyeri 12:4) Mu gole la 1870, kathimu kang’ono ka anyakulinga cadidi kadazindikira kuti bzipfunziso bza magereja mazinji bzikhali lini bza m’Bibliya. Tenepo, kathimuko kadayamba kufufudza kuti kabvesese mapfunziso yakuyambirira ya m’Bibliya, ndipo Yahova adakathandiza kubvesesa.

Amuna wa mitima yadidi wadapfunza Bibliya na tceru. Apfunzi wa Bibliya wakuyambirirawa, wadalipfunza mu njira yomwe ifepano tikadaiphatisa basa nsiku zino. Iwo wakhacezerana nkhani za m’Bibliya, nfundo ibodzi na ibodzi. Pomwe wakhagumana mbali ya m’Bibliya yakunesa kubvesesa, iwo wakhanyang’ana mavesi manango kuti yawathandize kubvesesa mbaliyo. Wakawona kuti mbaliyo ikhabverana na mbali zinango za m’Bibliya, iwo wakhanemberatu. Pakuti iwo wakhasiya kuti Bibliya libzifokotoze lokha, tenepo iwo wadacizindikira cadidi cakulewa bza dzina la Mulungu, Umambo bwace, bzomwe iye an’funa kwa wanthu na dziko la pansi, bza mkhalidwe wa anyakufa pabodzi na cidikhiro ca kumuka kwa anyakufa. Kufufudza kwawoko kudawatsudzula ku bzikhulupiro bzakunama na bzicito bzizinji bzakuipa.​—Juwau 8:31, 32.

Kuyambira m’gole la 1879 Apfunzi wa Bibliya wadazindikira kuti ikhadafika nthawe ya kudziwisa cadidi m’mbuto zense. Tenepo, m’gole limwero, iwo wadayamba kukonza revista yomwe ikadapitiriza kukonzedwa mpaka pano, A Sentinela Anunciando O Reino de Jeová. Nsiku zino ifepano tinkuuza wanthu bza cadidi ca m’Bibliya ku madziko yakupitirira 239, m’bzirewedwe bzakupitirira 700. Ikhanati kuwoneka kale nthawe yakuwanda kwa cidziwiso cacadidi ninga nsiku zino!

• Kodi pambuyo pa kufa kwa Kristu, n’ciyani comwe cidacitika na cadidi ca m’Bibliya?

• Kodi n’ciyani cidatithandiza kuzindikira cadidi ca m’Fala la Mulungu?

Pa magole mazinji mbuyomu, Mboni za Yahova zikhaphatisira basa, zikhadinda na kugawa mabibliya mazinji yakusandulizidwa mwakusiyana-siyana. Tsono, tidadzawona kufunika kwa kukonza Bibliya lakusanduliziridwa papsa lomwe lingadathadiza bwino wanthu kupfunza ‘cidziwiso caico cacadidi,’ pakuti n’kufuna kwa Mulungu kuna ali-wense. (1 Timotio 2:3, 4) Tenepo, mu gole la 1950 ifepano tidayamba kudziwisa bzipande bza Bibliya lathu la cirewedwe catsapano, Tradução do Novo Mundo. Bibliyali lidasanduliziridwa mwacaimo na mwakukhulupirika m’bzirewedwe bzakupitirira 120.

Likhafunika Bibliya lakupusa kubvesesa. Bzirewedwe bzimbacinja na nthawe, ndipo mabibliya mazinji yakusandulizidwa yana mafala yakale-kale ayai mafala yakusaya kubveseseka. Kusiya bzimwebzi, yadazindikiridwa mabukhu mazinji yakale-kale yacaiyo yomwe yambabverana pafupi na mabukhu yakuyambirira, ndipo bzimwebzi bzidathandiza kubvesesa bwino mabibliya ya cirewedwe ca Ciheberi, Ciharamu na Cigrego.

Bzikhafunika kusandulizira Bibliya lakukhulupirika pa Fala la Mulungu. M’mbuto mwa kukhala na ufulu bwa kucinja-cinja mafala ya Mulungu, anyakusandulizira Bibliya, wadalisandulizira mwakukhulupirika mwakuteweza mafala yakuyambirira. Na tenepo, m’mabibliya mazinji yakusanduliziridwa, dzina la Mulungu, Yahova, liribe kuphatisidwa basa mu Bzinembo Bzakucena.

Bzikhafunika Bibliya lakupasa mbiri Mweneciro. (2 Samuweri 23:2) Mu Bibliya la Tradução do Novo Mundo, dzina la Yahova lidabwezeredwa pomwe mu mbuto zomwe likhagumanika cinyau 7.000 m’mabibliya yakale-kale, ninga momwe bzinkulatizidwira pacithunzi-thunzi ca panyansipa. (Psalymo 83:18) Pambuyo pa magole mazinji yakufufudza, Bibliyali limbadekeza na kuliwerenga pakuti limbafokotoza bwino makumbukidwe ya Mulungu. Penu munalo Bibliya la Tradução do Novo Mundo m’cirewedwe canu ayai ne, ifepano tinkukulimbisani kukhala na cizolowezi ca kumbawerenga Fala la Yahova nsiku zense.​—Djosuwe 1:8; Psalymo 1:2, 3.

• Thangwe ranyi ifepano tidafuna kuti liwoneke Bibliya lakusanduliziridwa papsa?

• N’cizolowezi ciponi comwe an’funika kukhala naco ali-wense omwe an’funa kudziwa bza kufuna kwa Mulungu?