M’gulu lathu, ifepano tiribe atsogoleri womwe wambalipiridwa. Mbuto mwace, ninga momwe bzikhacitikira pomwe gwere la Wakristau lidandoyamba, anyakunyang’anira wakuthemera wambalatidwa kuti ‘wauuse gwere la Mulungu.’ (Mabasa 20:28) Akulu amwewa mba amuna wakukhwima mwauzimu womwe wambatsogolera gwere na kuusa, ‘sikuti mwakucita kukakamizidwa, koma mwakufunisisa, sikutimbo thangwe ra kufuna kugumana phindu pa ciri-cense, koma na mtima wense.’ (1 Pedru 5:1-3) Kodi iwo wambaticitira mabasa yaponi?

Iwo wambatisamalira na kutikhotcerera. Akulu wambatsogolera na kukhotcerera gwere mwauzimu. Pakuzindikira kuti Mulungu adawakhulupira pakuwapasa basa lakufunikali, akuluwo wambaponderera lini wanthu wawo, koma wambathandiza kuti bziwafambire bwino, wacikondwa. (2 Wakolinto 1:24) Ninga momwe m’busa ambalimbikira kusamalira bira m’bodzi na m’bodzi pa yekha, akuluwo wambayezerambo kudziwa wense wa m’gwere, m’bodzi na m’bodzi pa yekha.​—Mimwani 27:23.

Iwo wambatipfunzisa momwe tingacitire kufuna kwa Mulungu. Pa mdzinga uli-wense, akulu wambatsogolera mitsonkhano ya gwere kuti walimbise cikhulupiro cathu. (Mabasa 15:32) Amuna wakubziperekawa wambatsogolerambo basa lakupalizira, mwakuphata basa nafe pabodzi na mwa kutipfunzisa njira zakusiyana-siyana zakucitira utumiki bwathu.

Iwo wambalimbisa munthu m’bodzi na m’bodzi pa yekha. Pakufuna kutithandiza kukhotcerera uxamwali bwathu na Yahova, akulu womwe wambakhala pafupi nafe, wangatizungire kumui kwathu ayai wangaceze nafe ku Nyumba ya Umambo kuti watipase thandizo na mtsangalazo wakucokera m’Bibliya.​—Tiyago 5:14, 15.

Kusiya kutumikira m’gwere, akulu wazinji wambaphatambo basa lakunembedwa ndipo wana mabanja yawo yomwe yambafunambo nthawe na thandizo lawo. Abale womwe wambaphata basa mwakulimbawa, wan’funikira ulemu bwathu.​—1 Watesalonika 5:12, 13.

• Kodi akulu wa m’gwere wambacita mabasa yaponi?

• Kodi akulu wambatisamalira tani m’bodzi na m’bodzi pa yekha?

Bibliya limbalewa bza mathimu mawiri ya amuna Wacikristau womwe wambasamalira maudindo m’gwere, womwe ni anyakunyang’anira na atumiki wakuthandiza.’ (Wafiripo 1:1) M’gwere liri-lense, mumbagumanika amuna wazinji womwe wambatumikira ninga anyakunyang’anira na atumiki wakuthandiza. Kodi njaponi mabasa yomwe atumiki wakuthandiza wambacita kuti tikhale na phindu?

Iwo wambathandiza bungwe la akulu. Atumiki wakuthandiza mba amuna womwe wali pa uxamwali bwa kulimba na Mulungu ndipo mbanthu wakukhulupirika na wakuzindikira, winango ni alumbwana, ndipo winango ni akulu-akulu. Iwo wambaphata mabasa ya nsiku na nsiku yakufunika kwene-kwene yomwe yambaphatidwa na manja, ndipo wambayacita mwakulinganizidwa bwino m’gweremo. Bzimwebzo bzimbathandiza kuti akulu watanganidwe na udindo bwa kupfunzisa na kuusa.

Iwo wambacita mabasa yakufunika. Atumiki winango wakuthandiza wambalatidwa kuti wambatambire wanthu womwe wambabwera pa mitsonkhano. Winango wambaphata basa na mtcini wakukuizira mafala, basa la kugawanisa mabukhu, kunemba kupita na kucoka kwa kobiri na kulata mbuto zomwe abale wa m’gwere wangakapalizire. Iwo wambathandizambo kusamalira Nyumba ya Umambo. Iwo wangakumbiredwe na Akulu kuti wathandize mkhalamba. Pa mabasa yali-yense yomwe atumiki wakuthandiza wangapasidwe, momwe iwo wambacitira na mtima wense, kumbawabweresera ulemu kwa wense m’gwere.​—1 Timotio 3:13.

Iwo wambapereka ciratizo cabwino ninga amuna Wacikristau. Atumiki wakuthandiza wambasankhulidwa thangwe ra makhalidwe yawo yauzimu yabwino. Pakufotokoza nkhani zawo pa mitsonkhano, iwo wambalimbisa cikhulupiro cathu. Mwakutsogolera basa lakupalizira, iwo wambatithandiza kuphata basalo na nyongo. Thangwe ra mzimu wawo wakuthandizana na akulu, iwo wambakhazikisa cikondweso na ciphatano. (Wayefezo 4:16) Na kupita kwa nthawe, amuna wazinji wambadzathemerambo kuti watumikire ninga akulu.

• Kodi atumiki wakuthandiza mbanthu wa mtundu wanyi?

• Kodi atumiki wambathandiza tani gwere kufamba bwino?

M’Bzinembo Bzacigrego bza Wakristau, Barnaba na mpostolo Paulo yambagumidwa mwakubwereza-bwereza. Amunawa wadatumikira ninga anyakunyang’anira wakuyenda-yenda, wacimbazungira magwere yakuyambirira. Thangwe ranyi? Iwo wakhana thupo cairo na abale wawo wauzimu. Paulo adalewa kuti iye adafuna ‘kukazungira abalewo’ kuti akawone momwe iwo wakhaliri. Iye akhafunisisa kucita ulendo bwa mtantho wakutalimpha makilometro dzana libodzi kuti akawalimbise. (Mabasa 15:36) Cimweci ndico cikhumbo ca anyakunyang’anira wakuyenda-yenda wa nsiku zino.

Iwo wambabwera kudzatilimbisa. Nyakunyang’anira dera ali-wense ambazungira magwere yakukwana 20, ndipo ambakhala mdzinga ubodzi na gwere liri-lense, kawiri pa gole. Ifepano timbagumana phindu likulu na cizolowezi ca abalewa na ca azikazi wawo, wakakhala wadalowola. Iwo wambacita nyongo ya kudziwa wana na akulu-akulu, ndipo wambafunisisa kuwaperekeza mu utumiki bwa kumunda na ku mapfunziro ya Bibliya. Anyakunyang’anirawa wambacita cizungiro ca ubusa pabodzi na akulu, ndipo wambatilimbisa, mwa kutifotokozera nkhani zakulimbisa pa mitsonkhano ya gwere na pa mitsonkhano mikulu-mikulu.​—Mabasa 15:35.

Iwo wambatisamalira tense. Anyakunyang’anira wakuyenda-yenda wambafunisisa kusamalira uzimu bwa magwere. Iwo wambatsonkhana na akulu pabodzi na atumiki wakuthandiza kuti awone momwe gwere layendera patsogolo, na kuperekambo malango yakufunika kuti waphate bwino mabasa yawo. Iwo wambathandiza apainiya kupitiriza kucita utumiki bwawo, ndipo wambakondwa kudziwana na wanthu wapsa na kubva momwe wankuyendera patsogolo mwauzimu. M’bodzi na m’bodzi wa abalewa ambabziperekeratu ninga ‘mwanzathu wa basa wakutithandiza.’ (2 Wakolinto 8:23) Ifepano tin’funika kutewezera cikhulupiro na kubzipereka kwawo kwa Mulungu.​—Wahebereu 13:7.

• Kodi anyakunyang’anira dera wambazungira magwere na thangwe liponi?

• Kodi kuzungira kwawo kungakupaseni phindu liponi?

Pakawoneka malengwa ya pansi, pa nthawe ibodzi-bodziyo Mboni za Yahova zimbalinganiza thandizo kuti zitsangalaze abale wawo womwe wagwedwa na malengwayo. Nyongo imweyi imbalatiza lufoyi lathu cairo kuna anzathu. (Juwau 13:34, 35; 1 Juwau 3:17, 18) Kodi thandizolo timbalipereka tani?

Timbapereka kobiri. Pomwe cidawoneka cinjala cikulu ku Judeya, mwakanfulumize Wakristau wa ku Antiyokiya wadatumiza kobiri kuna abale wawo wa ku Judeya. (Mabasa 11:27-30) Bzibodzi-bodzimbo, tikadziwa kuti abale wathu wa ku mbali zinango za pa dziko la pansi wankugumana bzineso, ifepano timbacita cakupereka m’gwere mwathu kuti kobirizo zikaphatisidwe basa pakusamalira bzakusaya bzawo.​—2 Wakolinto 8:13-15.

Timbapereka thandizo la pa nthawe yace. Akulu wakugwedwambo na malengwayo wambanyang’ana anzawo wa m’gwere kuti adziwe penu alipo wense, wacikhala wakusungika. Bungwe lakuthandiza anyakugwedwa na malengwa ya pansi, limbakhazikisa cakudya, madzi yakumwa yakucena, bzakubvala, mui na thandizo la mankhwala. Mboni zizinji za luso, zimbabzipereka, ziciyenda mwakubzilipirira zokha kuti zikathandize kukonza nyumba zakudzongeka pabodzi na Nyumba za Umambo. Ciphatano comwe tinaco ninga gulu na cizolowezi comwe timbakhala naco pakuphata basa pabodzi, bzimbatithandiza kugumanana mwakufulumize pa nthawe ya bzineso. Napo timbathandiza ‘womwe tidaphatana nawo cikhulupiro,’ ifepano timbathandizambo winango bzikakwanisika, bziribe basa cipembedzo comwe iwo wali.​—Wagalata 6:10.

Timbapereka thandizo lauzimu na mtsangalazo. Anyakugwedwa na malengwa ya pansi, iwo wambafuna kutsangalazidwa maka-maka. Pa nthawe zimwezo, ifepano timbapasidwa mphamvu na Yahova, ‘Mulungu wa mtsangalazo wense.’ (2 Wakolinto 1:3, 4) Ifepano timbakomedwa kuuza anzathu wakugwedwa na matsokayo bza mapiciro ya m’Bibliya, ticiwapasa cikhulupiro cakuti Umambo bwa Mulungu bun’dzamala na malengwa yense ya pansi yomwe yambacitisa kuti wanthu wabve kuwawa na kubonera.​—Cibvumbulutso 21:4.

• Thangwe ranyi Mboni za Yahova zimbathandizana mwakanfulumize pakawoneka malengwa ya pansi?

• Kodi tingawatsangalaze tani mwauzimu wanthu wakupulumuka pa malengwa ya pansi?

Mu nsiku zing’ono-ng’ono pomwe Jezu akhanati kufa, iye adaceza pambali na anyakupfunza wace anai​—Pedru, Tiyago, Juwau na Andereya. Pomwe Jezu akhaleweratu bza cizindikiro ca kukhala kwace pa nsiku zakumalizira, iye adabvunza mbvunzo ukulu, wakuti: ‘Mbani maka-maka kapolo wakukhulupirika na wanzeru omwe mbuya wace adamuikha kuti ambanyang’anire wa pamui pace, na kumbawapasa cakudya pa nthawe yakuthemera?’ (Mateu 24:3, 45; Marko 13: 3, 4) Jezu akhatsimikizira anyakupfunza wace kuti iye ninga ‘Mbuya’ wawo, angadadzalata wale womwe wangadadzapasa ateweri wace cakudya cauzimu pa nthawe yacimaliziro. Kodi mbani wangadadzakhala kapoloyo?

Ni kathimu kan’gono ka ateweri wakudzozedwa wa Jezu. ‘Kapoloyo’ ni Bungwe Lakutonga la Mboni za Yahova. Iye ambapereka cakudya cauzimu pa nthawe yace kwa anzace womwe wambanamata naye pabodzi Yahova. Ifepano timbathemba gulu lakukhulupirika la kapoloyo kuti lipitirize kumbatipasa, ‘pa nthawe yace, cakudya cathu cakukwana.’​—Luka 12:42.

Iye ambasamalira wa pamui pa Mulungu. (1 Timotio 3:15) Jezu adapasa gulu lakapoloyo, udindo bwa mphanvu bwakusamalira basa la gulu la Yahova pa dziko lense la pansi​—kusamalira bzinthu bzawo bza kuthupi, kutsogolera basa lakupalizira na kutipfunzisa m’magwere yathu. Tenepo, pakufuna kutipasa ifepano bzomwe tin’funa pa nthawe yace, ‘kapolo wakukhulupirika na wanzeru’, ankugawanisa cakudya cauzimu mwakuphatisa basa mabukhu yomwe timbayaphatisa basa mu utumiki bwathu, pabodzimbo na nkhani zakufotokozedwa pa mitsonkhano yathu ya gwere na pa mitsonkhano mikulu-mikulu.

Kapoloyo ngwakukhulupirika pa cadidi ca m’Bibliya na pa basa lace lakupalizira bzipsa bzabwino, ndipo ngwanzeru pakuti ambasamalira mwa nzeru bzinthu bza Jezu pansi pano. (Mabasa 10:42) Yahova ankusimba basa lawo mwa kulipasa cakudya cauzimu cizinji.​—Zaiya 60:22; 65:13.

• Kodi mbani adalatidwa na Jezu kuti ambadyese ateweri wace mwauzimu?

• Kodi kapoloyo ngwakukhulupirika na wanzeru mu njira ziponi?

Pa magole dzana yakutoma, kathimu kang’ono ka ‘wapostolo na amuna akulu ku Jeruzalemu,’ kadatumikira ninga bungwe lakutonga kuti kacite bzakutonga bzakufunika kwene-kwene m’dzina la gwere lense la Wakristau wakudzozedwa. (Mabasa 15:2) Pomwe iwo wadacita cakutonga mwakubverana, kubveranako kudakwanisika thangwe iwo wakhadafokotozerana bzomwe mafala ya Mulungu yambalewa, ndipo wadatsogoledwa na mzimu wakucena wa Mulungu. (Mabasa 15:25) Imweyi ndiyo njira yomwe inkuphatisidwambo basa nsiku zino.

Linkuphatisidwa basa na Mulungu kuti licite kufuna kwace. Abale wakudzozedwa womwe wambatumikira m’Bungwe Lakutonga, wambafuna kwene-kwene Fala la Mulungu ndipo wadazolowera kuphata basa na bzinthu bzauzimu pabodzi na bzakubverana na basa lathu. Iwo wambatsonkhana mdzinga uli-wense kuti wafotokozerane bzinthu bzakufunika kwene-kwene bzakutokonya abale wathu wa pa dziko lense la pansi. Ninga momwe bzikhacitika pa magole dzana yakutoma, malango yakucokera m’Bibliya, yambaperekedwa mwakucita kutumiza matsamba ayai anyakunyang’anira wakuyenda-yenda na mwa njira zinango. Bzimwebzi bzimbathandiza kuti wanthu wa Mulungu wambakumbuke na kucita bzinthu bzakubverana. (Mabasa 16: 4, 5) Bungwe Lakutonga limbanyang’anira kakonzedwe ka cakudya cauzimu, limbalimbisa tense kuikha patsogolo basa lakupalizira Umambo ndipo limbanyang’anirambo kusankhulidwa kwa abale kuti wakhale na udindo m’gwere.

Limbabvera utsogoleri bwa mzimu wa Mulungu. Bungwe Lakutonga limbalinga utsogoleri bwa Mkululetu wa bzense, Yahova, pabodzi na Jezu, omwe ni Msolo wa gwere. (1 Wakolinto 11:3; Wayefezo 5: 23) Wanthu wa m’bungweri wambabziwona lini ninga atsogoleri wa wanthu wa Mulungu. Iwo pabodzi na Wakristau wense wakudzozedwa, ‘wankupitiriza kutewera Mwana wa bira [Jezu] kuli-kwense komwe iye ayende.’ (Cibvumbulutso 14:4) Bungwe Lakutonga limbatenda kwene-kwene tikambapembera iwo na basa lawo.

• Mbani akhali m’bungwe lakutonga pa magole dzana yakutoma?

• Kodi Bungwe Lakutonga limbalinga tani utsogoleri bwa Mulungu nsiku zino?

Beteli ni dzina la Ciheberi lomwe limbathandauza ‘Nyumba ya Mulungu.’ (Ciyambo 28:17, 19) Ni dzina labwino lakuperekedwa kuna nyumba zikulu zomwe Mboni za Yahova zidamanga pa dziko lense la pansi komwe basa lakupalizira limbatsogoleredwa na kuthandizidwa. Bungwe Lakutonga limbatumikira ku likulu mu Mzinda wa Nova York, America, ndipo na kumweko iro limbanyang’anira basa la bzipinda bza mthambi bza m’madziko mazinji. Ninga thimu, womwe wambatumikira pa nyumba zimwezi wambadziwika ninga banja la Beteli. Ninga banja, iwo wambakhala na kuphata basa pabodzi, wambapfatsa kudyera pabodzi na kupfunza Bibliya pabodzi mwaciphatano.​—Psalymo 133:1.

Ni mbuto yakupambulika yomwe wanthu wambaphata basa mwakubzipereka ninga banja. Ku nyumba zense za Beteli, kuna amuna na akazi womwe wadabzipereka kwa Mulungu, wacimutumikira mwa nthawe zense kuti wayendese patsogolo bzakufunika bza Umambo. (Mateu 6:33) Palibe omwe ambatambirisidwa kobiri pa mwezi, tsono wense wambapasidwa mui na cakudya pabodzi na kakobiri kakuthandizira bzakufunika bza pa moyo wawo. Munthu ali-wense pa Beteli ambakhala na basa lace, lomwe lingakhale m’gabineti, m’cipinda cakuphikira ayai m’cipinda cakudyera. Winango wambatumikira m’mbuto yakudindira mabukhu, yakuphatanidza matsamba ya mabukhu, kusamalira nyumba, kufula, kukonza bzinthu bzakudzongeka ayai kucita mabasa manango.

Ni mbuto yomwe imbathandizira kupalizidwa kwa Umambo. Cakulinga cikulu ca Beteli iri-yense ni kucitisakuti wanthu wazinji wagumane cadidi ca m’Bibliya.. Broxura lino n’ciratizo cibodzi ca bzimwebzo. Iro lidanembedwa mwakutsogoleredwa na Bungwe Lakutonga, licitumizidwa na mitcini ya nzeru kuna madzana ya mathimu ya anyakusandulizira yakugumanika pa dziko lense la pansi, licikadindidwa na mitcini yakuthamanga kwene-kwene ya ku mabeteli mazinji, licitumizidwa ku magwere yakupitirira 110.000. Pa mbali iri-yense ya basa limweri, banja la Beteli limbathandizira basa lakufunika mwakanfulumize pa bzense​—kupalizira bzipsa bzabwino.​—Marko 13:10.

• Mbani wambatumikira pa Beteli, ndipo wambasamalidwa tani?

• Kodi ni basa liponi lakufunika mwakanfulumize lomwe linkuthandizidwa na mabasa ya pa Beteli iri-yense?

Banja la Beteli limbatumikira m’bzipinda bzakusiyana-siyana kuti lisamalire basa la kupalizira la dziko libodzi ayai madziko mazinji. Wanthu wa m’banja la beteli wangatumikire m’mathimu ya anyakusandulizira, kudinda mabukhu, kuphatanidza matsamba ya mabukhu, kusunga mabukhu m’nyumba ya mabukhu, kukonza ma audio/vidiyo ayai kusamalira bzinthu bzinango bza m’gawo lakunyang’aniridwa na mthambi yawo.

Komiti ya Mthambi imbanyang’anira basalo. Bungwe Lakutonga limbakhulupira Komiti ya Mthambi, yomwe imbakhala ya amuna atatu ayai wazinji wakuthemera kuti wambafambise mthambiyo. Nthawe zense, Komitiyi imbadziwisa Bungwe Lakutonga bza kafambidwe ka basa la m’dziko liri-lense lakutsogoledwa na komiti ya mthambiyo pabodzi na mabvuto yali-yense yomwe yangawoneke. Bzidziwiso bzimwebzi bzimbathandiza Bungwe Lakutonga kuti lisankhule nkhani zomwe zingadzafokotozedwe m’mabukhu yakutsogolo, pa mitsonkhano ya gwere na pa mitsonkhano mikulu-mikulu. Aimikiri wa Bungwe Lakutonga wambatumizidwa kawiri-kawiri kuti wakazungire mthambizo na kupereka malango kwa Makomiti ya Mthambi pa nkhani ya kaphatidwe ka basa lawo. (Mimwani 11:14) Pambakonzedwa mtsonkhano wakupambulika omwe muimikiri m’bodzi ambafotokoza nkhani kuti alimbise wense womwe wambakhala m’mbuto zakunyang’aniridwa na mthambiyo.

Thandizo limbaperekedwa kwa magwere yakunyang’aniridwa na mthambiyo. Abale wa udindo pa cipinda ca mthambi, wambabvumiza kumangidwa kwa gwere lipsa na kuikhidwa kwa akulu pabodzi na atumiki wakuthandiza. Abalewo wambatsogolerambo mabasa ya apainiya, amisiyonario na anyakunyang’anira dera womwe wambatumikira m’mbuto zakunyang’aniridwa na mthambiyo. Iwo wambalinganiza mitsonkhano mikulu-mikulu na ya cigawo, wambasamalira kamangidwe ka Nyumba za Umambo zipsa na kuwona katumizidwe ka mabukhu kuna magwere kuti yakasamalire bzakufunika bzawo. Bzinthu bzense bzomwe bzimbacitidwa pa mthambi, bzimbathandiza kuti basa lakupalizira licitidwe bwino.​—1 Wakolinto 14:33, 40.

• Kodi Komiti ya Mthambi imbathandiza tani Bungwe Lakutonga?

• Kodi Cipinda ca Mthambi cimbacita mabasa yaponi?

Thangwe ra kufuna kudziwisa bwino ‘bzipsa bzabwino’ kuna ‘madzinza na mapfuko yense na bzirewedwe bzense na wanthu wense,’ ifepano timbakonza mabukhu yakupitirira bzirewedwe 700. (Cibvumbulutso 14: 6) Kodi timbakwanisa tani kucita basa lakulimbali? Ifepano timbalikwanisa na thandizo la wanembi wa pa dziko lense la pansi pabodzi na anyakusandulizira wakukwana 3.300—wense wacikhala Mboni za Yahova.

Mafala yakuyambirira yambanembedwa m’Cingerezi. Bungwe Lakutonga limbanyang’anira basa la Cipinda Cakunembera ku likulu lathu la pa dziko lense la pansi. Cipindaci cimbalata mabasa ya wanembi womwe wambatumikira ku likuluko na ku bzipinda bzinango bza mthambi. Kukhala na wanembi wazinji wakuthandiza, bzimbatithandiza kunemba nkhani zakutokonya mitima ya wanthu wa makhalidwe yakusiyana-siyana, ndipo na thangwe ra bzimwebzo mabukhu yathu yambakwewa wanthu wa madziko yense.

Patsogolo pace mafalayo yambatumizidwa kwa anyakusandulizira. Yakamala kunembedwa na kubvumidwa mafala yakuyambirira, iyo yambatumizidwa na mitcini ya nzeru kwa mathimu ya anyakusandulizira wakugumanika pa dziko lense la pansi, womwe wambayasandulizira, kuyandendemeza na mafala yakuyambirirayo na kuyawerenga kuti yalungamizidwe. Iwo wambacita nyongo ya kusankhula ‘mafala ya cadidi’ yomwe yakasanduliziridwa m’cirewedwe cinango, yambandendemereratu na kubveraniratu na bzomwe bzimbalewedwa m’cingerezico.​—Mpalizi 12:10.

Komputadori zimbafulumizisa basalo. Komputadori zingacinje lini wanthu womwe wambanemba na kusandulizira. Tsono, komputadorizo zina bzinthu bzomwe bzimbafulumizisa basalo thangwe zimbakhala na mabukhu yakuthandauzira mafala, programa zakuthandiza anyakusandulizira na bzinango bzakufufudzira. Mboni za Yahova zidakonza programa yakudziwika ninga Sistema Electrónico de Publicação Multilingue (MEPS) yomwe imbacitisa kuti mafala yakusanduliziridwa m’bzirewedwe yaphatanidzidwe na bzithunzi-thunzi kuti yakadindidwe.

Kodi thangwe ranyi ifepano timbacita nyongo imweyi, napo bzirewedwe bzinango bzimbalewalewedwa na wanthu ang’ono-ng’ono? Thangwe n’kufuna kwa Yahova kuti ‘wanthu wa mtundu uli-wense wafike pa kupulumusidwa na kukhala na cidziwiso caico ca cadidi.’​—1 Timotio 2:3, 4.

• Kodi ndiponi basa lomwe limbacitidwa kuti mabukhu yathu yanembedwe?

• Thangwe ranyi ifepano timbasandulizira mabukhu yathu m’bzirewedwe bzizinji?

Gulu lathu limbakonza na kugawanisa bzulu bzizinji bza mabibliya na mabukhu manango pa magole yenseneya mwakusaya kusunda kobiri. Ifepano timbamanga na kusamalira Nyumba za Umambo pabodzi na bzipinda bza mthambi. Timbalipira bzakufunika bza wa m’banja la beteli na mamisiyonario, ndipo timbapereka thandizo pa pakawoneka malengwa ya pansi. Tenepo, imwepo mungabzibvunze kuti: ‘Kodi kobiri zakulipirira bzensenebzi zimbacokera kuponi?’

Timbasunda lini cakhumi, kusunda kobiri ningati mangawa ayai kufambisa ntsengwa. Napo kuthandiza basa lakupalizirali kumbafuna kobiri zizinji, ifepano timbasunda lini kobiri. Magole dzana m’mbuyomu, A Sentinela yakucosedwa kaciwiri idalewa kuti ifepano timbakhulupira kuti ni Yahova omwe ambatithandiza, ‘tin’dzakumbira lini wanthu kuti wathandize basa lathu’​—ndipo tin’dzabzicita lini, cipo!​—Mateu 10:8.

Basa lathu limbathandizidwa na bzakupereka bza ufulu. Wanthu wazinji wambalitenda basa lathu lakupfunzisa Bibliya ndipo wambapereka kobiri zakuthandizira basalo. Mboni caizozo zimbakomedwambo kuthandiza na nthawe yawo, mphanvu zawo, kobiri zawo na bzinango kuti kufuna kwa Mulungu kucidwe pa dziko lense la pansi. (1 Nkhani 29:9) Mu nyumba za Umambo pabodzi na m’Nyumba za mitsonkhano mikulu-mikulu, muna makaxa ya bzakupereka ndipo omwe an’funayo angakacite cakuperekaco. Mbali ikulu ya kobirizo, zimbacokera kwa wanthu wakusaya kudala, wazinji wali ninga mansiwa wakusauka omwe Jezu adamulewa bwino pakuikha tukobiri tuwiri m’mbuto yakusungira cuma ca m’nyumba yakunamatira. (Luka 21:1-4) Tenepo, ali-wense ‘angambakoye pa mbali cinthu comwe angafune kukacipereka mwa kubverana na momwe watongera mu mtima mwace.’​—1 Wakolinto 16:2; 2 Wakolinto 9:7.

Ifepano tatsimikiza kuti Yahova an’dzapitiriza kutokonya mitima ya womwe wan’funa ‘kumulemekeza na bzinthu bzawo bzakufunika’ pa kuthandizira basa la Umambo, kuti kufuna kwace kucitike.—Mimwani 3:9.

• Kodi n’ciyani cimbasiyanisa gulu lathu na bzipembedzo bzinango?

• Kodi kobiri zakuperekedwa mwa ufulu zimbaphatisidwa tani basa?

Ninga momwe dzinali limbalewera, Nyumba za Umambo, ni mbuto zomwe yambacitidwa mapfunziro ya Bibliya, ndipo nkhani ikulu yomwe imbapfunzidwa njakubverana na Umambo bwa Mulungu, bomwe bukhali nkhani ikulu mu utumiki bwa Jezu.​—Luka 8:1.

Ni mbuto zomwe wanthu wambanamatira Mulungu m’njira yakubvumizika. Ku Nyumba za Umambo ni ku mbuto komwe Mboni za Yahova zimbakonzekera basa lawo lakupalizira bzipsa bzabwino bza Umambo. (Mateu 24:14) Nyumba za Umambozo zimbasiyana-siyana kukula kwace pabodzi na mawonekedwe. Tsono nyumba zensezo zimbakhala zakuwoneka bwino, ndipo zingaphatisidwe basa na magwere mazinji. Magole yakumalizira yano, tamanga Nyumba za Umambo zipsa zakukwana makumi ya bzulu (kukhala ningati pa nsiku ibodzi kumanga nyumba zixanu) kufuna kuteweza kuthumizirika kwa apalizi na magwere manango. Kodi bzimbakwanisika tani bzimwebzi?​—Mateu 19:26.

Izo zimbamangidwa na bzakupereka bzakumangira nyumbazo. Bzakuperekabzo bzimbatumizidwa ku cipinda ca mthambi kuti kobirizo zikaperekedwe kwa magwere yomwe yangafune kumanga Nyumba ya Umambo ayai kukonzeredza yomwe iripo kale, mwakusaya kulipira juro.

Izo zimbamangidwa na anyakubzipereka wakusiyana-siyana wakusaya kulipidwa. M’madziko mazinji, yadalinganizidwa Mathimu ya Cimango ca Nyumba za Umambo. Mathimu ya atumiki wa cimango pabodzi na anyakubzipereka wambayenda gwere na gwere m’dziko lawo, napo ku mbuto zakutali, kuti wakathandize magwere kumanga nyumba zawo za Umambo. M’madziko manango, abale wakuthemera wambasankhulidwa kuti wakanyang’anire kumangidwa kwa Nyumba za Umambo ayai kukonzeredza zomwe ziripo kale, ku mbuto yakulatidwayo. Wanthu wazinji wa ganyo wa m’dzikomo wambabzipereka pa basa lakumangalo, tsono mbali ikulu ya anyakubziperekawo, ni abale. Mzimu wa Yahova na nyongo ya mtima wense ya wanthu wace, bzinkucitisa kuti bzensebzi bzikwanisike.​—Psalymo 127:1; Wakoloso 3:23.

• Thangwe ranyi mbuto zathu zakunamatira zimbacemeredwa Nyumba za Umambo?

• Bzimbakwanisika tani kumanga Nyumba za Umambo kuzungulira dziko lense la pansi?

Nyumba za Umambo zense za Mboni za Yahova zimbatenga dzina lakucena la Mulungu. Tenepo, ifepano timbawona kuti ni mpata wakupambulika kuthandiza kusiya nyumba yathu yakucena, yakuwoneka bwino na yakusamalidwa bwino, ndipo ni mbali yakufunika kwene-kwene pa kunamata kwathu. Tensenefe tingathandize.

Bziperekeni pambuyo pa mtsonkhano kuti mucenesembo. Pambuyo pa mtsonkhano uli-wense, abale na mpfumakazi wambakomedwa kupsaira m’Nyumba ya Umambo kuti isale idacena. Kabodzi pa mdzinga, timbacenesa nyumba yense. Mkulu m’bodzi ayai mtumiki wakuthandiza ambatsogolera basalo, ndipo kawiri-kawiri iye ambateweza katsamba komwe kambakhala kadandandalika bzinthu bzakufunika kucita. Mwakubverana na bzomwe bzingafunikebzo, wanthu wambabzipereka kuti wapsaire, wakwexe ayai wapukute pfumbi pansi, walungamize mipando, wacenese na kuikha mankhwala m’sekereta, wapukute majanera na masupedyo, wataye lixo ayai kucenesa kunja kwa nyumbayo na kusamalira litsito. Pa gole lirirense pambakoyedwa nsiku ibodzi kuti ticenese bzinthu, bzense bza m’Nyumba ya Umambo. Pakuti wana wathu wambaphatambo mabasa manango, ifepano timbawapfunzisa iwo kulemekeza mbuto yathu yakunamatira.​—Mpalizi 5:1.

Bziperekeni kuti muthandize pa ciri-cense comwe cingafunikeco. Gole liri-lense, Nyumba ya Umambo imbawonedwa bwino-bwino mkati na kunja. Mwa kubverana na kawonedweko, bzinthu bzakudzongekabzo bzimbakonzedwa kuti nyumbayo ikhale, pacitcenkhedwa kutaya kobiri zizinji. (2 Nkhani 24:13; 34:10) Kucenesa na kusamalira Nyumba ya Umambo ni mbali yakupambulika yakunamata Mulungu wathu. Pakuthandiza basa limweri, ifepano timbalatiza kuti timbamufuna kwene-kwene Yahova, ndipo timbalemekeza mbuto yathu yakunamatira. (Psalymo 122:1) Bzimwebzi bzingatokonyembo wanthu wa m’mudzi mwathu.​—2 Wakolinto 6:3.

• Thangwe ranyi tin’funika lini kuilekerera nyumba yathu yakunamatira?

• Kodi njaponi makonzedwe yomwe yalipo kuti Nyumba ya Umambo ikhale yakucena?

Kodi mungafune kufufudza nkhani iri-yense kuti muthumizire cidziwiso canu ca Bibliya? Mungafune kudziwa bzizinji bza mbali ya bzinembo, munthu, mbuto ayai cinthu ciri-cense cakufokotozedwa m’Bibliya? Ayai kodi mudabzibvunza kale penu Fala la Mulungu lingakuthandizeni kumalisa kabvuto komwe munako? Izungireni Biblioteka ya ku Nyumba ya Umambo.

Iyo ina mabukhu yakufufudzira nayo. Pinango imwepo mulibe m’cirewedwe canu mabukhu yense ya Mboni za Yahova yakufotokoza Bibliya. Tsono biblioteka ya ku Nyumba ya Umambo imbakhala na mabukhu mazinji yatsapano. Ndipo imbakhalambo na mabibliya mazinji yakusanduliziridwa mwakusiyana-siyana, mabukhu yabwino yakuthandauzira mafala na mabukhu manango yakuthandiza. Ndimwe wakutsudzuka kupita mu bibliotekamo pomwe mitsonkhano ikanati kuyamba ayai pomwe yamala. Penu iripo komputadori m’mwemo, komputadoriyo ingakhale na programa yakudziwika ninga Watchtower Library. Programayi imbakhala na mabukhu yathu mazinjisa pabodzi na bzinthu bzomwe bzimbathandiza pakufufudza nkhani, mafala ayai mavesi ya m’Bibliya.

Njakufunika kwa anyakupfunza wa pa Xikola ya Utumiki bwa Mulungu. Penu mudabzinembesa pa Xikola, ndiye kuti mun’dzafunika kuiphatisa basa bwino bibliotekayo pakukonzekera nkhani zanu. Nyakunyang’anira Xikola ndiye omwe ambasamalira bibliotekayo. Iye ana udindo bwakuwonesesa kuti yalipo mabukhu yatsapano m’bibliotekamo, yacikhala yakulongedwa bwino-bwino. Iye ayai mpfunzisi wanu wa Bibliya angakulatizeni momwe mungagumanire nkhani zomwe mungafune kufufudza. Tsono, palibe bukhu lomwe lin’funika kucosedwa kunja kwa Nyumba ya Umambo. Ndipo tin’funikambo kumbayasamalira bwino mabukhuyo, ticitcenkha kuyafonyola ayai kuyanemba-nemba.

Bibliya limbafokotoza kuti ‘kugumana’ cidziwiso caico ca Mulungu’, kumbafunika ifepano tifunisise kucifufudza ‘ninga cuma cakubisika.’ (Mimwani 2:1-5) Biblioteka ya ku Nyumba ya Umambo ingakuthandizeni kuyamba kufufudzako.

• Kodi mpsiponi bzinthu bzakufufudzira bzomwe bzimbagumanika m’biblioteka ya ku Nyumba ya Umambo?

• Mbani angakuthandizeni kuphatisa basa bwino bibliotekayo?

Jezu Kristu adalewa kwa ateweri wace kuti: ‘Tenepombo, wabvunikireni wanthu ceza canu, kuti wayawone mabasa yanu yabwino, wacipasa mbiri Baba wanu, omwe ali kudzulu.’ (Mateu 5:16) Kuti titeweze bzimwebzi, ifepano tinkuphatisa basa bwino mitcini ya nzeru yatsapano, kuphatikidzambo internet. Webisaite yathu, jw.org/nyu, ni mbuto yakubvumizidwa yakugumanira nkhani zakulewa bza bzikhulupiro pabodzi na mabasa ya Mboni za Yahova. Kodi n’ciyani cimbagumanika pa webisaiteyi?

Mitawiro ya m’Bibliya ya mibvunzo yakucitidwa kawiri-kawiri. Imwepo mungagumane mitawiro ya mibvunzo yakufunika kwene-kwene yomwe wanthu wadayicita kale. Mibvunzo mixanu imbatawiridwa pa katsamba kakuti Mun’funa Kudziwa Cadidi? komwe kankugumanika pa internet m’bzirewedwe bzakupitirira 400. Mungagumanembo Bibliya la Tradução do Novo Mundo m’bzirewedwe bzakupitirira 100, na mabukhu mazinji yakutithandiza kupfunza Bibliya, pabodzi na kabukhu kakuti Kodi Bibliya Limbapfunzisa Ciyani Maka-maka? na nkhani zipsa za mu Nsanza ya Mulindiri na Despertai! Mabukhu mazinji yangawerengedwe ayai kubvedwa pa internet ndipo yangacosedwe mu mtundu wa audio, PDF ayai EPUB. Mungafikembo pakudinda matsamba yakucepa kuti mukaceze na munthu wakufuna kudziwa bzizinji m’cirewedwe cace. Mabukhu yakukonzedwa ninga vidiyo yambagumanikambo m’bzirewedwe bza manja. Imwepo mungacose nkhani za m’Bibliya zakuwerengedwa ninga drama pabodzi na nyimbo zakudekeza kuti mukondwe nazo.

Nkhani zacadidi zakulewa bza Mboni za Yahova. Padaikhidwambo nkhani zipsa na mavidiyo yakulewa bza basa lathu la pa dziko lense la pansi, bzakucitika bzakulewa bza Mboni za Yahova na nyongo yathu yakuthandiza anzathu wakugwedwa na malengwa ya pansi. Mungawonembo nsiku zomwe zin’dzacitika mitsonkhano ya cigawo na mirewengo ya mtedwe yomwe mungaphatise basa kuti mupfuwire ku bzipinda bzathu bza mthambi.

Mwa njira imweyi, ifepano tinkulatiza ceza cathu ca cadidi ku mbuto zakutali za pa dziko lense la pansi. Wanthu wa ku mbuto zense, kuphatanidzambo na ku Madziko ya Mphepo, wankugumana phindu na webisaiteyi. Tinkupemba kuti ‘fala la Yahova lipitirize kumwazidwa’ pa dziko lense la pansi, kuti lipase mbiri Mulungu.​—2 Watesalonika 3: 1.

• Kodi webisaite ya jw.org/nyu inkuthandiza tani wanthu wazinji kupfunza cadidi ca m’Bibliya?

• Kodi n’ciyani comwe mungafune kufufudza pa webisaite yathu?