Wanthu wazinji waleka kuwonekera pa mabasa yacipembedzo thangwe ra kusaya kugumana utsogoleri bwauzimu na mtsangalazo. Tsono, kodi thangwe ranyi mun’funika kumbawonekera pa mitsonkhano yakulinganizidwa na Mboni za Yahova? Kodi mun’dzagumana ciyani kumweko?

Cikondweso cakukhala pakati pa wanthu wa lufoyi na wakusamalana. Pa magole dzana yakutoma, Wakristau wakhadalinganizidwa m’magwere, ndipo iwo wakhapitiriza kutsonkhana kuti wanamate Mulungu, kupfunza Bibliya na kulimbisana. (Wahebereu 10:24, 25) Pomwe wakhatsonkhana na anzawo, iwo wakhabzibva kukhala pakati pa axamwali wacadidi​—abale wawo wauzimu. (2 Watesalonika 1:3; 3 Juwau 14) Ifepano timbatewezera ciratizo ca Wakristau wakuyambirira, ndipo timbabva cikondweso cibodzi-bodzico.

Phindu la kupfunza momwe tingaphatisire basa mitemo ya m’Bibliya. Ninga momwe bzikhaliri mu nthawe za mbuyo, amuna, akazi na wana wambatsonkhanambo wense pabodzi nsiku zino. Apfunzisi wa luso wambaphatisa basa Bibliya kuti watithandize kuzindikira momwe tingaphatisire basa mitemo yace pa moyo wathu wa nsiku na nsiku. (Bzakutonga 31:12; Nehemiya 8: 8) Wense pa mtsonkhanopo, wangatawire pa mbali za mibvunzo na mitawiro pabodzi na kuimba, komwe kumbatipasa mpata wakufokotoza cidikhiro.​—Wahebereu 10:23.

Cisimbo cakukhala na cikhulupiro canu cakulimbisidwa na Mulungu. Mpostolo Paulo adauza gwere libodzi la mu nthawe yace kuti: ‘Ndina cisuwo cakukuwonani, . . . kuti tirimbisane, ali-wense na cikhulupiro comwe mwanzace anaco, canu na cangu.’ (Waroma 1:11, 12) Pa mitsonkhano yathu, tikambaceza kawiri-kawiri na anzathu, cikhulupiro cathu cimbalimba, ticifunisisa kukhala na moyo Wacikristau.

Kodi mun’sayiranyi kubvuma mcemo wakukawonekera pa mtsonkhano wathu wa gwere womwe unkubwerayu, mucidzabva mwekha bzinthu bzimwebzi? Imwepo mun’dzatambiridwa na manja mawiri. Mitsonkhano yathu yense njafovolo​—pambakumbiridwa lini kobiri.

• Kodi mitsonkhano yathu imbateweza njira za yani?

• Kodi ni phindu liponi lomwe tingagumane tikambawonekera pa mitsonkhano yacikristau?

Ifepano timbawonekera nthawe zense- pa mitsonkhano yathu napo bzifunike kupita m’thengo lakugudira, napo kubvumbe ayai kutenthe. Napo timbalimbana na bzizinji pa moyo wathu, ticinetambo pambuyo pa nsiku ya basa, kodi thangwe ranyi ifepano Mboni za Yahova timbacita nyongo kuti titsonkhane na anzathu wa cikhulupiro cibodzi?

Kutsonkhanako kumbaticita bwino. Mpostolo Paulo adalewa kuti ‘timbakumbukirane,’ m’tsamba lace pomwe akhanembera wale womwe wambatsonkhana nafe. (Wahebereu 10:24) Fala limweri limbathandauza ‘kukumbukira bwino-bwino,’ bzomwe bzin’funa kulewa kuti, tin’funikira kufika pa kudziwana bwino-bwino. Tenepo, mafala ya mpostolo Paulo yambatilimbisa kuti timbacite thupo na anzathu. Tikafika pakuyadziwa mabanja manango yacikristau, ifepano tingazindikire kuti mabanja manango yadakwanisa kulimbana na mabvuto mabodzi-bodzi na yomwe tinkugumana nayo, ndipo bzimwebzo bzingatithandize kulimbana nayombo.

Kutsonkhana kumbalimbisa mbverano wathu. Ifepano timbakonkhana pabodzi, sikuti ninga wanthu wakundodziwana kokha, koma timbatsonkhana ninga axamwali wakubverana. Nthawe zinango, ifepano timbakoya nthawe yakuceza na kusenzeka pabodzi mwakusaya kupwetekana. Kodi kucita bzimwebzi kumbakhala na phindu liponi kwa ifepano? Ifepano timbapfunza kutenda kwene-kwene axamwali wathu, ndipo bzimbathumizirambo lufoyi lathu. Ndipopa, anzathu wakagwedwa na matsoka, ifepano timbawathandiziratu thangwe ra uxamwali bwathu bwakulimba bomwe tinabo. (Mimwani 17:17) Pakucita uxamwali na wense wa m’gwere lathu, ifepano timbalatiza kuti ‘timbasamalana.’​—1 Wakolinto 12:25, 26.

Ifepano tinkukulimbisani kusankhula ninga axamwali wanu wale womwe wambacita kufuna kwa Mulungu. Mun’dzawagumana axamwaliwo pakati pa Mboni za Yahova. Taphata minyendo, lekani kubvumiza kuti munthu akuletseni kutsonkhana nafe.

• Kodi thangwe ranyi ifepano timbagumana phindu pakutsonkhana na anzathu?

• Kodi ni lini mungafune kudziwana na wanthu wa m’gwere lathu?

Wakristau wakuyambirira, pa mitsonkhano yawo iwo wakhaimba nyimbo, wakhacita mipembo, ndipo wakhawerenga na kufokotozerana mafala ya m’Bibliya​—ndipo pakhalibe misambo yapezi-pezi. (1 Wakolinto 14:26) Imwepo mungadikhirire kuwona bzibodzi-bodzimbo pa mitsonkhano yathu.

Mapfunziso yambacokera m’Bibliya ndipo njakuphata basa. Pa nsiku za kumala kwa mdzinga, gwere liri-lense limbatsonkhana kuti libve nkhani ya m’Bibliya ya mphindi 30 yakulewa momwe mafala ya m’Bibliya yambalewera bza moyo wathu na bza nthawe zomwe tinkukhala zino. Tense timbalimbisidwa kutewera nkhaniyo na mabibliya yathu. Pambuyo pa nkhaniyo, timbakhala na Pfunziro la “A Sentinela” la ora ibodzi, lomwe wanthu wa womwe wali pa mtsonkhanopo wambakhala wakutsudzuka kupereka mitawiro pa nkhani yakufokotozedwa kucokera mu revista ya A Sentinela yakupfunzira. Nkhani yakufokotozeranayi imbatithandiza kuphatisa basa malango ya m’Bibliya pa moyo wathu. Nkhani ibodzi-bodziyo imbapfunzidwa m’magwere yakupitirira 110.000 pa dziko lense la pansi.

Timbathandizidwa kupfunzisa bwino. Ifepano timbatsonkhanambo pakati pa mdzinga, ndipo mtsonkhanoyo umbakhala na mbali zitatu. Mbali yakuyamba nja mphindi-30 yomwe ni Pfunziro la Bibliya la Gwere, ni mbali ya mibvunzo na mitawiro yomwe imbatithandiza kubvesesa bwino mitemo na mapolofesiya ya m’Bibliya. Patsogolo pace, timbakhala na Xikola ya Utumiki bwa Mulungu ya mphindi-30 yomwe imbayamba na kufokotozedwa kwa cipande ca m’Bibliya comwe gwere limbakhala litawerenga kale. Pambuyo pace, anyakupfunza wakusankhulidwa pa xikolayo wambafotokoza nkhani zakucepa zomwe wambakhala watakonzekera. Wakamala, Mulangizi m’bodzi ambawauza bzomwe iwo wan’funikira kucita bwino pa nkhani ya kuwerenga na kulewalewa. (1 Timotio 4:13) Pakumalizira, pambacitidwa Mtsonkhano wa Basa wa mphindi-30, pomwe pambafotokozedwa nkhani, pambacitidwa bziratizo na mibvunzo, ndipo timbapfunza momwe tingapfunzisire Bibliya wanthu winango.

Mukawonekera pa mitsonkhano yathu, imwepo mwakusaya kupenukira mun’dzadabwa na mkhalidwe wa mapfunziro ya Bibliya yomwe mun’dzatambira.​—Zaiya 54:13.

• Kodi mungadikhirire kubva ciyani pa mitsonkhano ya Mboni za Yahova?

• Kodi ni mitsonkhano iponi ya pa mdzinga yomwe mungafune kuwonekera pakuyamba?

Mwawona kale pa bzithunzi-thunzi bza m’broxuramu momwe Mboni za Yahova zimbabvalira pomwe ziri pa mitsonkhano yawo ya gwere? Kodi thangwe ranyi timbakhala na tceru na bzakubvala bzathu pabodzi na kabvalidwe kathu?

Kuti tiremekeze Mulungu wathu. N’cadidi kuti Mulungu ambanyang’anisisa lini kawonekedwe kathu ka kunja. (1 Samuweri 16: 7) Tsono, pomwe tatsonkhana kuti timunamate, timbafuna kucokera pansi pa mtima kulemekeza iye na anzathu womwe timbanamata nawo. Penu tingadafunika kuima pa maso pa muyeruzi m’nyumba yakuyeruzira mirandu, ifepano tingadasamala na kabvalidwe kathu kuti tiremekeze ugo bwa muyeruziyo. Bzibodzi-bodzimbo, mkhalidwe wa kabvalidwe kathu pomwe tinkuwonekera pa mitsonkhano, umbalatiza ulemu bwathu bukulu kwa ‘Muyeruzi wa dziko lense la pansi,’ Yahova Mulungu, pabodzi na mbuto yomwe timbamunamatirayo.​—Ciyambo 18:25.

Kuti tiratize mitemo yomwe imbatsogolera moyo wathu. Bibliya limbalimbisa Wakristau kuti wabvale ‘mwakubzicepswa na mwa nzeru’. (1 Timotio 2:9, 10) Kubvala ‘mwakubvicepswa’ bzimbathandauza kutcenkha bzakubvala bzomwe bzingacitise wanthu kutinyang’anisisa thangwe bzakubvalabzo mpsakuti bwerani mudzawone, mpsakunyosa, ayai mpsakungwerewera. Ndipo, kukhala na ‘nzeru’ kumbatithandiza kusankhula bzakubvala bzabwino bzomwe si bzakunyanyirira. Mitemo imweyi imbatipasa basi mpata ukulu wakusankhula mwakusiyana-siyana. Mwakusaya kulewa fala na libodziro, mawonekedwe yathu yabwino ‘yangadekese mapfunziso ya Mpulumusi wathu’ na ‘kupasa mbiri Mulungu.’ (Tito 2:10; 1 Pedru 2:12) Pakubvala bwino pakuyenda ku mitsonkhano yathu, ifepano tingacinje momwe wanthu wambawonera kunamata kwathu Yahova.

Lekani kubvumiza kuti bzakubvala bzanu bzikutaziseni kuyenda ku mitsonkhano ya ku Nyumba ya Umambo. Bzakubvala bzathu bzin’funika lini kukhala bzakuumiriratu ayai bzakuti bwerani mudzawone, koma bzikhale bzakulongosoka, bzakucena na bzakuwoneka bwino.

• Thangwe ranyi tin’funika kukhala na tceru na kabvalidwe kathu pomwe tinkunamata Mulungu?

• Kodi ni mitemo iponi yomwe imbatitsogolera pa kusankhula kabvalidwe na kawonekedwe kathu?

Penu munkupfunza Bibliya na Mboni za Yahova, ndiye kuti mumbatoma mwakonzekera bzomwe mun’dzapfunzabzo pomwe ikanati kufika nsiku yakudzapfunza. Kuti mugumane phindu likulu, mpsabwino kuti mupitirize kucita bzibodzi-bodzi pomwe mukanati kuwonekera pa mtsonkhano wa gwere. Mun’dzagumana phindu labwino mukambacita bzimwebzi ninga cizolowezi.

Sankhulani nsiku na mbuto yakupfunza. Kodi ni nthawe iponi yomwe mumbakhala muna tceru kwene-kwene? Ni nthawe ya ku macibese pomwe mukanati kuyamba nsiku yanu ya basa, ayai ni usiku pambuyo pa wana kuyenda kagona? Napo penu mungapfunze lini mwa nthawe itali, sankhulani nthawe yomwe mungaisunge kuti mumbapfunze, ndipo lekani kubvumiza kuti cinthu ciri-cense cikuphingizeni. Nyang’anani mbuto yakusaya baludya, mucicosa bzense bzomwe bzingakuceukiseni mwa kuthimisa cikasi ca mphepo, ca bzithunzi-thunzi na mtedwe wa m’manja. Kucita mpembo pomwe mukanati kuyamba kupfunza, kun’dzakuthandizani kucepesa thupo la nsikuyo, mucikhala wa tceru pa Fala la Mulungu.​—Wafiripo 4:6, 7.

Talani mabukhu yanu, ndipo konzekerani kuti mukatawire. Tomani mwawona mwapadzulu nzeru zense za nkhaniyo. Kumbukirani bza msolo wa nkhaniyo, onani momwe tumisolo twace tunkubverana na msolo ukuluyo, ndipo onesesani bzithunzi-thunzi bziri-bzense pabodzi na mibvunzo yakubwerezera yomwe imbalatiza nfundo zikulu-zikulu. Pambuyo pace, werengani ndime ibodzi na ibodzi, mucinyang’anambo mitawiro ya mibvunzo yakudindidwa. Yagumaneni na kuyawerenga mavesi yakulatidwa, ndipo kumbukirani momwe yankubveranira na nkhaniyo. (Mabasa 17:11) Mukauzindikira mtawiro wa mbvunzo uli-wense, talani m’nyansi mwace mafala yomwe yankutawira mbvunzo wa pa ndimeyo, bzomwe bzin’dzakuthandizani kukumbukira mtawiroyo pa mtsonkhano. Ndipo, pa mtsonkhano, mungalamuse boko lanu mukafuna, mucitawira na mafala yanu yakucepa.

Mukazikonzekereratu nkhani zakusiyana-siyana zomwe zin’dzafotokozedwa pa mtsonkhano wa mdzinga uli-wense, imwepo mun’dzathumizira makumbukidwe yapsa mu ‘thungwa’ lanu la cidziwiso ca m’Bibliya.​—Mateu 13:51, 52.

• Kodi ni cizolowezi ciponi comwe mun’funika kukhala naco pa nkhani yakukonzekera mitsonkhano?

• Kodi mungakonzekere tani kuti mukatawire pa mtsonkhano?

Kutomera kale-kale, Yahova ambafuna kuti banja liri-lense likoye nthawe yakukhala pabodzi kuti lirimbise uzimu bwawo na mbverano wawo m’banjamo. (Bzakutonga 6:6, 7) Limweri ndiro thangwe lomwe limbacitisa kuti mabanja yomwe ni Mboni za Yahova yasunge nthawe mdzinga uli-wense kuti yanamate pabodzi​—mwa kucezerana nkhani zauzimu zakubverana na bzomwe yambagumana nabzo pa moyo wawo. Napo penu mumbakhala mwekha, nthawe imweyo mungaiphatisire basa bwino kuna Mulungu mwakucita pfunziro la Bibliya la nkhani yakubzisankhulira mwekha.

Ni nthawe kuti tifenderere Yahova. ‘Mufenderereni Mulungu, ndipo iye an’dzakufendereranimbo.’ (Tiyago 4:8) Timbafika pa kumudziwa bwino Yahova pomwe tinkupfunza cibodzi na cibodzi bza makhalidwe yace na bzicito bzace kucokera m’matsamba ya m’Fala lace lakunembedwa, Bibliya. Njira yakusaya kunesa yakunamata ninga banja, ndiyo ya kuwerenga Bibliya pabodzi, ndipo pinango mungatewere ndondomeko ya pa mdzinga ya mu Xikola ya Utumiki bwa Mulungu. M’bodzi na m’bodzi m’banjamo angapasidwe cipande kuti awerenge, ndipo patsogolo pace mwense mungafokotoze bzomwe mwapfunza kucokera pa bzomwe mwawerengabzo.

Ni nthawe yakufendererana na anzathu wa m’banjamo. Misolo ya mabanja na azikazawo, wabereki na wana, wambalimbisa mbverano wawo pomwe wanipfunza Bibliya pabodzi ninga banja. Bzin’funika kuti nthawe imweyi imbakhale nthawe yakudekeza, ya mtendere na yakufunidwa kwene-kwene pa mdzinga uli-wense. Mwakubverana na msinkhu wa wana wawo, wabereki wangasankhule nkhani zakubverana na bzomwe wanawo wankugumana nabzo kuti wafokotozerane nawo, ndipo pinango wangaphatise basa mbali za mu A Sentinela na Despertai!, ayai nkhani za pa Webisaite yathu ya jw.org. Mungacezerane bza mabvuto yomwe wana wanu wankugumana nayo ku xikola na momwe iwo wangalimbanirane nayo. Mungapfatsembo kukonzekera nyimbo zomwe zin’dzakaimbidwa pa mitsonkhano na kusenzeka pambuyo pa kunamata kwanu ninga banja.

Nyengo imweyi yakupambulika yakunamata Yahova pabodzi pa mdzinga uli-wense, in’dzathandiza wense m’banjamo kukomedwa kupfunza Fala la Mulungu, ndipo iye an’dzasimba pakulu nyongo yanu.​—Psalymo 1:1-3.

• Thangwe ranyi timbakoya nthawe kuti tinamate ninga banja?

• Kodi wabereki wangacite tani kuti nyengo imweyi imbakhale yacikondweso kwa wense m’banjamo?

Kodi thangwe ranyi wanthuwa wankuwoneka wakukomedwa? Iwo wankuwonekera pa mtsonkhano wathu ukulu. Atumiki wa Mulungu wakale-kale wakhauzidwa kuti wambawonekere pa mtsonkhano ukulu katatu-kense pa gole, ndipo ifepano tinkupitiriza kutsonkhana pabodzi m’mathimu makulu-makulu. (Bzakutonga 16:16) M’gole liri-lense, ifepano timbakhala na mitsonkhano mitatu mikulu-mikulu: mitsonkhano miwiri ya dera ya nsiku ibodzi-ibodzi, pabodzi na mtsonkhano wa cigawo wa nsiku zitatu. Kodi timbagumana phindu lanyi na mitsonkhano imweyi?

Imbalimbisa ubale bwathu bwacikristau. Ninga momwe Wajirayeri wakhakhalira wakukondwa pakutumbiza Yahova pa ‘mitsonkhano mikulu-mikulu,’ ifepano timbakondwambo kumunamata pabodzi ninga thimu pa nyengo zakupambulikazi. (Psalymo 26:12; 111:1) Mitsonkhano imweyi imbatipasa mipata ya kucita uxamwali na Mboni zakucokera m’magwere manango ayai zakucokera m’madziko manango. Pa nthawe ya masikati, ifepano timbakomedwa kudya pabodzi na anzathu pa mbuto yakucitikira mtsonkhanoyo, pakati pa nyengo yabwino yauzimu. (Mabasa 2:42) Pa mitsonkhanoyi ifepano timbacita kuwoneratu tekha lufoyi lomwe limbaphatanidza ‘thimu lense la abale’ wa pa dziko lense la pansi.​—1 Pedru 2:17.

Imbatithandiza kuyenda patsogolo mwauzimu. Wajirayeri wakhagumanambo phindu thangwe ra ‘kubvesesa mafala’ ya m’Bibliya yomwe wakhafotokozeredwa. (Nehemiya 8:8, 12) Ifepanombo timbayatenda malango ya m’Bibliya yomwe timbatambira pa mitsonkhano yathu mikulu-mikulu. Msolo wa ndondomeko iri-yense umbacokera m’Bibliya. Kuyambira nkhani zakufotokozedwa na abale, nkhani zakusiyirana pabodzi na bziratizo bzakuyezezera bzinthu bzomwe bzidacitikadi, ifepano timbapfunza momwe tingacitire kufuna kwa Mulungu pa moyo wathu. Timbalimbisidwa tikabva momwe anzathu wadakwanisira kulimbana na bzineso pa moyo wawo ninga Wakristau mu nthawe zakunesa zino. Pa mitsonkhano ya cigawo, drama zakufotokoza nkhani za m’Bibliya zimbatithandiza kubvesesa momwe bzinthu bzikhaliri pa nthaweyo, ticipfunza momwe tingaphatisire basa bzimwebzo pa moyo wathu nsiku zino. Pa mitsonkhano yense mikulu-mikulu, wanthu wambabatizidwa pakufuna kulatiza padeca kuti wabzipereka kwa Mulungu.

• Thangwe ranyi mitsonkhano yathu mikulu-mikulu imbakhala nyengo yacikondweso?

• Kodi ni phindu liponi lomwe mungagumane pakuwonekera pa mtsokhano ukulu?

Mu nthawe ing’ono-ng’ono pomwe Jezu akhanati kufa, iye adati: ‘Bzipsa bzabwino bza Umambo, bzin’dzapaliziridwa pa dziko lense la pansi komwe kuna wanthu, ninga umboni kwa mitundu yense, ndipo pamwepo cimaliziro cin’dzafika.’ (Mateu 24:14) Tsono, kodi basa limweri lakupalizira pa dziko lense la pansi lingadakwanisika tani? Mwakutewezera ciratizo ca Jezu pomwe iye akhali pansi pano.​—Luka 8:1.

Timbalimbikira kuzungira wanthu m’mii mwawo. Jezu adapfunzisa ateweri wace kuti wambapalizire bzipsa bzabwino nyumba na nyumba. (Mateu 10:11-13; Mabasa 5: 42; 20:20) Apalizi wakuyambirira wale, wakhadapasidwa gawo kuti wakapalizire. (Mateu 10: 5, 6; 2 Wakolinto 10:13) Bzibodzi-bodzimbo lero, basa lathu lakupalizira lidalinganizidwa bwino, ndipo gwere liri-lense limbapasidwa gawo lace-lace kuti lipalizire. Bzimwebzi bzimbatithandiza kuteweza cakutonga ca Jezu cakuti ‘tipalizire wanthu, na kumbacitira umboni.’​—Mabasa 10:42.

Timbacita nyongo yakugumana wanthu kuli-kwense komwe wangagumanike. Jezu adapereka ciratizo mwa kupalizira wanthu m’mbuto zakugumanika wanthu wazinji, ninga m’misika ayai pa mcera. (Marko 4:1; Juwau 4:5-15) Ifepano timbauzambo wanthu bza Bibliya kuli-kwense komwe tingakwanise​—m’miseu, m’misika, m’mbuto zakusenzekera wana ayai mwa kuwapfuira mtedwe. Ifepano timbapalizirambo anzathu womwe tidafendererana nawo nyumba, anzathu wa ku basa, anzathu wa ku xikola na wadzinza wathu tikakhala na mpata. Nyongo yenseneyi imbathandiza kuti wanthu bzulu na bzulu pa dziko lense la pansi wabve ‘bzipsa bzabwino bza cipulumuso.’​—Psalymo 96:2.

Kodi mungamukumbukire munthu omwe mungafune kumuuza bzipsa bzabwino bza Umambo bwa Mulungu pabodzi na bzomwe bzipsabzo bzin’thandauza kuna ifepano kutsogoloku? Lekani kubzikoyera mwekha nkhani ya cidikhiroyi, koma auzenimbo anzanu mwakafulumize.

• Kodi mpsiponi ‘bzipsa bzabwino’ bzomwe bzin’funika kudziwisidwa?

• Kodi Mboni za Yahova zinkutewezera tani njira zakupalizira za Jezu?

Fala lakuti “mpainiya” kawiri-kawiri limbalewa bwa wanthu womwe wambafungula mbuto zipsa na kufungula njira kuti winango watewerembo. Jezu akhali ninga mpainiya, pakuti iye adatumizidwa pansi pano kuti adzacite utumiki bwakupasa moyo na kufungula njira ya cipulumuso. (Mateu 20:28) Nsiku zino, ateweri wace wankumutewezera mwakuphatisira basa nthawe yawo momwe wangakwanisiremo kuti ‘wacite anyakupfunza.’ (Mateu 28:19, 20) Winango wambacita basa lomwe timbati basa la upainiya.

Mpainiya ni munthu omwe ambapaliza mwa nthawe zense. Mboni zense za Yahova zimbadziwisa bzipsa bzabwino. Tsono, pana winango womwe wambalinganiza moyo wawo kuti watumikire ninga apainiya wakukhazikika, waciphata basa lakupalizira maora 70 pa mwezi uli-wense. Kuti wakwanise kucita bzimwebzo, wazinji wambabweza nthawe yawo ya ku basa. Winango wambasankhulidwa kuti wakatumikire ninga apainiya wakupambulika ku mbuto zomwe zina apalizi wakucepa wa bzipsa bzabwino, ndipo wambaphata basa maora 130 ayai kuposaratu mwezi uli-wense. Apainiya wambakomedwa kukhala na moyo wakusaya kufuna bzizinji, wacimbakhulupira kuti Yahova an’dzawapasa bzakufunika bzawo bza pa moyo. (Mateu 6:31-33; 1 Timotio 6:6-8) Womwe wangakhale lini apainiya wa nthawe zense iwo wangatumikire ninga apainiya wakuthandiza pomwe wangakwanisepo, mwakuthumizira basa lawo lakupalizira mwakucita maora 30 ayai 50 pa mwezi.

Kufuna Mulungu na wanthu ndiko kumbacitisa wanthu kukhala apainiya. Ninga Jezu, ifepano timbawona kuti nsiku zino wanthu wazinji wali mu mkhalidwe wauzimu wakupasa nsisi. (Marko 6:34) Tsono ifepano tina cidziwiso comwe cingawathandize tsapanopa na kuwapasa cidikhiro cakukhazikika ca kutsogolo. Lufoyi na wanthu ndiro limbacitisa kuti mpainiya apereke mwakukoma mtima nthawe na mphanvu zace kuti athandize winango kudziwa bzipsa bzabwino. (Mateu 22:39; 1 Watesalonika 2:8) Phindu lace ndakuti mpainiya ambalimbisa cikhulupiro cace, ambafenderera Mulungu, ndipo ambakhala wakukondwa kwene-kwene.​—Mabasa 20:35.

• Kodi mungati mpainiya ni yani?

• N’ciyani cimbacitisa kuti winango atumikire ninga apainiya wa nthawe zense?

Kutomera kale-kale, Mboni za Yahova zimbadziwika na mapfunziso yomwe zimbatambira kwa Mulungu. Mapfunziro yakupambulika, yambaperekedwa kwa womwe wambamala nthawe yawo yense pa basa lakupalizira Umambo kuti iwo wakwanise ‘kucita mwakukwana utumiki bwawo.’​—2 Timotio 4:5.

Xikola ya Apainiya. Kuphampha kwa gole lakuyamba la upainiya bwa nthawe zense, m’bale ayai mpfumakazi angabzinembese ku xikola ya nsiku zitanthatu yomwe imbacitikira mu Nyumba ya Umambo ya m’dera lace. Cakulinga ca xikolayo, ni kuthandiza apainiya kufenderera Yahova, kucita bwino pa mbali zense za utumiki bwawo, na kupitiriza kukhulupirika pa basali.

Xikola ya Apalizi wa Umambo. Imweyi ni xikola yomwe imbamala minyezi miwiri, yomwe idakonzedwa kuti ipfunzise apainiya wakuzolowera basali, womwe wangafune kucoka komwe wambakhala, wacikatumikira kuli-kwense komwe kufunikire thandizo. Mwakutewezera Jezu Kristu, omwe akhali Mpalizi mkululetu wakukhala pansi pano, iwo wambalewambo kuti, ‘Ndiri pano ine! Nditumizeni!’ (Zaiya 6:8: Juwau 7:29) Kwa iwo, kufulukira ku mbuto zinango kumbathandauza kubvuma kukhala na moyo wakusaya bzinthu bzizinji. Cikhalidwe, nyengo na cakudya ca komwe wambayendako, bzimbasiyaniratu na bzomwe iwo wakhadazolowera. Ndipo bzingafunikembo kupfunza cirewedwe cinango. Xikolayi imbathandiza mabanja pabodzi na abale na mpfumakazi womwe wali lini m’banja, wa magole 23 mpaka 65 yakubadwa kuti wakuze makhalidwe yauzimu yakufunikira mu utumiki bwawobo pabodzi na luso lomwe lingacitise kuti waphatisidwe basa na Yahova pabodzi na gulu lace.

Xikola ya Bibliya ya Gileyade. M’Ciheberi, fala lakuti ‘Gileyade’ limbathandauza ‘Mudu wa umboni.’ Kuyambira pomwe xikola ya Gileyade idafungulidwa mu 1943, anyakupfunza 8.000 wadatumizidwa kuti wakacitire umboni ‘kumalekezero ya dziko la pansi’ ninga amisiyonario. (Mabasa 13:47) Pomwe anyakupfunza wakuyamba wa Gileyade wadafika ku dziko la Peru, kumweko kukhalibe gwere na libodzilo. Tsono lero yalipo magwere yakupitirira 1.000. Pomwe amisiyonario wadayamba kutumikira mu dziko la Japão, m’dzikomo mukhana Mboni za Yahova zakusaya kupitirira 10. Tsono lero ziripo Mboni zakupitirira 200.000. Mapfunziso ya Gileyade yomwe yambamala minyezi mixanuyo, yambaphatikizambo kupfunza Fala la Mulungu mwakukwana bwino. Wale womwe wankutumikira ninga apainiya wakupambulika ayai womwe wankutumikira kale ninga amisiyonario, na womwe wankutumikira ku mthambi ayai pa basa lakuyenda-yenda, wambacemeredwa ku xikolayi kuti wakapfunzisidwe momwe wangakhazikisire na kulimbisa basa lathu la pa dziko lense la pansi.

• Kodi Xikola ya Apainiya ina cakulinga ciponi?

• Kodi Xikola ya Apalizi wa Umambo idakonzedwera yani?