PFUNZIRO 17
Kodi Jezu ni Munthu wa Mtundu Wanyi?
Tikambapfunza bzomwe Jezu adalewa na kucita pomwe iye akhali pantsi pano, ifepano timbafika pa kuzindikira makhalidwe yabwino yomwe yambaticitisa kufuna kukhala pa uxamwali na Jezuyo, pabodzi na Baba wace Yahova. Kodi njaponi manango mwa makhalidwe yaceyo? Ndipo kodi tingatewezere tani Jezu pa moyo wathu?
1.Kodi Jezu adandendemerana tani na Baba wace?
Pomwe Jezu akhali kudzulu, iye adakhala na Baba wace kwa magole mabidyau mazinji ndipo adapfunza bzinthu bzizinji na iye. Ndipopa iye ambakumbuka na kucita bzinthu ninga Baba wace. (Werengani Juwau 5:19.) Kulewa cadidi, Jezu ambatewezera bwino kwene-kwene makhalidwe ya Baba wace mwakuti iye adalewa kuti:“Ule omwe wawona inepano, wawonambo Baba.” (Juwau 14:9) Tenepo, mukapfunza makhalidwe ya Jezu, imwepo mun’dzamudziwa bwino Yahova. Mwa ciratizo, Jezu akhabvera ntsisi wanthu pomwe akhali pantsi pano, ndipo bzimwebzi, bzikulatiziratu kuti Yahova ambatikumbukirambo.
2. Kodi Jezu adalatiza tani kuti ambafuna Yahova?
Jezu adati: “Kuti dziko lidziwe kuti nimbafuna Baba, nimbacita bzomwe Baba adandiuza kuti ndicite.” (Juwau 14:31) Pomwe Jezu akhali pa dziko la pantsi pano, iye adalatiza kuti ambafuna kwene-kwene Baba wace mwa kuwabvera napo pomwe bzikhali bzakunesa kucita bzimwebzo. Jezu akhafuna kumbauza wanthu bza Baba wace na kuwathandiza kuti akhalembo pa uxamwali na Baba waceyo. — Juwau 14:23.
3.Kodi Jezu adalatiza tani kuti ambafuna wanthu?
Bibliya limbalewa kuti Jezu ambafuna kwene-kwene wanthu. (Mimwani 8:31) Iye adalatiza lufoyi limweri mwa kumbalimbikisa wanthu na kuwathandiza na mtima wentse. Ndipo Jezu adacita bzakudabwisa bzomwe bzidalatiza mphanvu na ntsisi zomwe anazo kuna wanthu. (Marko 1:40-42) Iye adacitira bzinthu wanthu wentse mwakudeka mtima na mwakusaya tsankhulo. Mafala yace yadapereka mtsangalazo na cidikhiro kwa wanthu wentse wa mitima yabwino omwe akhamutetekera. Ndipo pakuti Jezu akhawafuna wanthuwo, iye akhali wakukonzeka kuwabonerera na kuwafera. Tsono iye ambafuna maka-maka wale omwe ambatewezera bzomwe iye ambapfunzisa. — Werengani Juwau 15:13, 14.
FUFUDZANI BZINANGO
Pfunzani bzizinji bza makhalidwe ya Jezu ndipo onani momwe mungalatizirembo lufoyi ninga momwe iye adacitira.
4. Jezu ambafuna Baba wace
Ciratizo ca Jezu cimbatipfunzisa momwe tingalatizirembo lufoyi lathu kuna Mulungu. Werengani Luka 6:12 na Juwau 15:10; 17:26. Mukamala cezeranani mbvunzo wakutewerayu:
Kodi tingatewezere tani Jezu pakulatiza kuti timbafuna Yahova?
Jezu ambafuna kwene-kwene Baba wace wakudzulu ndipo pomwe akhali pa dziko la pantsi pano, iye akhalewalewa naye kazinji kentse mu mpembo
5. Jezu ambasamalira wanthu omwe akufunikira thandizo
Jezu akhaikha patsogolo bzakufuna bza winango kuposa bzace. Napo pomwe akhadaneta, iye adaphatisa basa nthawe yace na mphanvu zace kuti athandize wanthu. Werengani Marko 6:30-44, ndipo mukamala cezeranani mibvunzo ikutewerayi:
Mwakubverana na mavesiya, kodi Jezu adalatiza tani kuti akhacitira thupo wanthu? — Onani mavesi 31, 34, 41 na 42.
Kodi n’ciyani comwe cidacitisa Jezu kuthandiza wanthu? — Onani vesi 34.
Pakuti Jezu ambatewezera makhalidwe ya Yahova, kodi bzimwebzi bzikukupfunzisani ciyani pakulewa bza Yahovayo?
Kodi tingatewezere tani Jezu pa nkhani yakucitira thupo wanthu winango?
6. Jezu ni munthu wakupasa
Jezu akhali munthu wakupasa napo kuti iye akhalibe bzinthu bzizinji, ndipo iye ambatiuza kuti tikhalembo wanthu wakupasa. Werengani Mabasa 20:35, ndipo mukamala, cezeranani mbvunzo wakutewerayu:
Mwakubverana na mafala ya Jezu pa vesiri, kodi tingacite ciyani kuti tikhale wakukondwa?
Onani VIDIYO, ndipo mukamala cezeranani mbvunzo wakutewerayu.
Kodi tingalatize tani kuti ndife wakupasa napo tiribe bzizinji?
Kodi mukhadziwa?
Bibliya limbatipfunzisa kuti timbapembe kwa Yahova mu dzina la Jezu. (Werengani Juwau 16:23, 24.) Tikacita bzimwebzi, ifepano timbalatiza kuti timbatenda bzomwe Jezu adaticitira kuti tikhale pa uxamwali na Yahova.
WANTHU WINANGO AMBALEWA KUTI: “Mulungu ambacita lini thupo na wanthufe.”
Pakuti Jezu ambalatiza makhalidwe ya Baba wace, kodi bzomwe iye adacita bzimbalatiza tani kuti Yahova ana thupo na wanthufe?
KODI MWAPFUNZA CIYANI?
Jezu ambafuna Yahova, ndipo iye ambafunambo wanthufe. Jezu ali ninga Baba wace, ndipopa imwepo mukacita nyongo yakumudziwa bwino, mun’dzafika pakudziwambo bwino Yahova.
Mibvunzo yakubwerezera
Kodi tingalatize tani kuti timbafuna kwene-kwene Yahova ninga momwe Jezu adacitira?
Kodi tingalatize tani kuti timbafuna wanthu ninga momwe Jezu adacitira?
Kodi ni khalidwe liponi la Jezu lomwe limbakudekerani kwene-kwene?
ONANI POMWE IBZI
Onani makhalidwe manango ya Jezu yomwe tingayatewezere.
“Kuti Mutewezere Jezu, Mun’funika . . . ” (Jezu ni Njira, Cadidi na Moyo, tsa. 317)
Onani thangwe ranyi tin’funika kumbapemba m’dzina la Jezu.
“Thangwe Ranyi Tin’funika Kumbapemba m’Dzina la Jezu?” (Ntsanza ya Mulindiri ya 1 Fevereiro, 2008)
Kodi Bibliya limbalewa ciri-centse pakulewa bza mawonekedwe ya Jezu?
“Kodi Jezu Akhana Mawonekedwe Yaponi?” (Nkhani ya pa jw.org)
Kodi tingapfunze ciyani na momwe Jezu akhacitira bzinthu na akazi?
“Mulungu Ambafuna Kuti Akazi Ambalemekezedwe” (Ntsanza ya Mulindiri ya 1 Setembro, 2012)