Kodi Tingakhale Tani Wakucena kwa Yahova?

Kumbukirani bzomwe mai ambacita pakukonzekeresa mwana wace kuti ayende kuxikola. Maiyo ambawonesesa kuti mwana waceyo wasamba ndipo bzakubvala bzace bzidacena. Bzimwebzi bzimbacitisa kuti mwanayo akhale adacena ndipo wanthu ambawonambo kuti abereki wace ambamusamalira bwino. Ninga abereki omwe ambafuna kuti wana wawo akhale adacena, Baba wathu Yahova, ambafuna kuti tikhale wakucena mwakuthupi, m’makumbukidwe, kalalewedwe na momwe timbacitira bzinthu. Tikakhala wakucena timbagumana phindu ndipo timbalemekezesambo Yahova.

1. Kodi tingakhale tani wakucena mwakuthupi?

Yahova ambatiuza kuti: “Khalani wakucena.” (1 Pedru 1:16) Kuti tikhale wakucena tin’funika kukhala na makhalidwe yabwino na wakucena mwakuthupi. Ifepano tingakhale wakucena tikambasamba, kufula bzakubvala bzathu, kupukuta m’nyumba, ndipo njinga, mota na karo zathu zimbakhale zakucena. Ndipo tingacenesembo Nyumba ya Umambo. Tikakhala wakucena mwakuthupi, timbatumbizisa Yahova. — 2 Akolinto 6:3, 4.

2. Kodi tin’funika kutcenkha ciyani kuti tikhale wakucena?

Bibliya limbati: “Mbatibziceneseni pa bzinthu bzomwe bzimbapswipiza thupi na mzimu.” (2 Akolinto 7:1) Bzimwebzi bzikuthandauza kuti ifepano tin’funika kutcenkha bzinthu bzomwe bzingadzonge thupi lathu na makumbukidwe yathu. Makumbukidwe yathu yambatumbizisa Yahova, ndipopa tin’funika kucita ciri-centse kuti ticose makumbukidwe yakuphonyeka mu msolo mwathu. (Salimo 104:34) Tin’funikambo kutcenkha kulewalewa mafala yakunyantsa. — Werengani Akolose 3:8.

Kodi ni bzinthu bzinango bziponi bzomwe bzingadzonge thupi lathu na makumbukidwe yathu? Bzinthu bzinango bzomwe timbabziphatisa basa bzingadzonge thupi lathu. Tenepo tin’funika kutcenkha bzinthu ninga kufumali na kuphatisa basa mankhwala yakudzungulumwisa msolo. Tikacita bzimwebzi, tin’dzakhala na thanzi labwino ndipo tin’dzalatiza kuti timbalemekeza moyo. Ifepano tingakhalembo wakucena m’makhalidwe tikatcenkha kusenzekesa cidzo ayai kumbawona bzinthu bza maika. (Salimo 119:37; Aefezo 5:5) Bzingakhale bzakunesa kukunda bzinthu bzimwebzi, koma Yahova angatithandize. — Werengani Zaiya 41:13.

FUFUDZANI BZINANGO

3. Kukhala wakucena mwakuthupi kumbatumbizisa Yahova

Tikambawerenga malamulo ya Yahova yomwe adauza Ajirayeri pa nkhani yakukhala wakucena, timbapfunza momwe iye ambawonera wanthu wace akakhala wakucena. Werengani Ekisodo 19:10 na 30:17-19, ndipo mukamala cezeranani mbvunzo wakutewerayu:

• Kodi mavesiya yakulatiza tani momwe Yahova ambawonera kukhala wakucena mwakuthupi?

• Kodi mungacite ciyani kuti mukhale wakucena mwakuthupi?

Kuti tikhale wakucena mwakuthupi pambafunika nthawe na nyongo. Tsono tingakwanise kucita bzimwebzi bziribe basa kuti timbakhala kuponi, tidadala ayai tidasauka. Onani VIDIYO, ndipo mukamala cezeranani mbvunzo wakutewerayi.

VIDIYO: Mulungu Ambafuna Wanthu Wakucena (4:10)

• Thangwe ranyi wanthu omwe timbawapalizira an’dzalemekeza kwene-kwene Yahova akambawona kuti bzinthu bzathu bzidacena?

4. Tcenkhani bzinthu bzakuipa

Penu imwepo mumbafumali ayai mumbaphatisa basa mankhwala yakudzungulumwisa msolo, mungawone kuti mpsakunesa kuleka cizolowezi cimweci. Kodi n’ciyani cingakuthandizeni? Onani bzomwe bzingakuthandizeni kuti mukunde cizolowezi cimweci. Werengani Mateu 22:37-39, ndipo mukamala cezeranani kuti muwone momwe fodya ayai mankhwala yakudzungulumwisa msolo yangadzongere . . .

• uxamwali bwanu na Yahova.

• m’banja mwanu na wanthu winango.

Citani nyongo kuti musiye bzizolowezi bzakuipa.a Onani VIDIYO.

VIDIYO: Khalani Wakubziretsa (2:47)

Werengani Afilipi 4:13, ndipo mukamala cezeranani mbvunzo wakutewerayu:

• Kodi kupemba, pfunziro la Bibliya na kugumanika pa mitsonkhano bzingathandize tani munthu kutcenkha makumbukidwe yakuphonyeka?

5. Citani nyongo kuti mukunde makumbukidwe na bzicito bzakuipa

Werengani Akolose 3:5, ndipo mukamala cezeranani mibvunzo ikutewerayi:

• Kodi timbadziwa tani kuti kuwona bzithunzi-thunzi na mavidiyo yakuwonesa bzinthu bza maika na kusenzekesa cidzo ni bzinthu bzakuipa kwa Yahova?

• Thangwe ranyi mpsakubveseseka kuti Yahova ambafuna kuti tikhale wakucena?

Onani momwe mungamalisire makumbukidwe yakuipa. Onani VIDIYO.

VIDIYO: Citani Nyongo Kuti Mupitirize Kukhala Wakucena (1:51)

Jezu adapereka ciratizo ca momwe tingakhalire wakucena. Werengani Mateu 5:29, 30, ndipo mukamala cezeranani mbvunzo wakutewerayu:

• Jezu alibe kulewa kuti timbawenge thupi lathu, koma iye akhathandauza kuti tin’funika kucita ciri-centse kuti tikhale wakucena. Kodi n’ciyani comwe cingathandize munthu kutcenkha makumbukidwe yakuphonyeka?b

Penu imwepo mukucita bzomwe mungakwanise kuti mumalise makumbukidwe yakuipa, Yahova akuwona nyongo yanu. Werengani Salimo 103:13, 14, ndipo mukamala cezeranani mbvunzo wakutewerayu:

• Penu imwepo mukucita nyongo kuti mumalise makumbukidwe yakuipa, kodi vesiri lingakuthandizeni tani?

Lekani kubwerera mbuyo!

Mpsakupusa kukumbuka kuti: ‘Ndidaphonya, tsono palibe comwe ningacite.’ Kumbukirani ibzi: Munthu omwe akuthamanga pamapici akagwa bzin’funa lini kulewa kuti iye waluza mapiciyo, thangwe iye angalamuke acipitiriza pomwe kuthamanga. Mpsibodzi-bodzimbo na imwepo, mukaphonya bzin’funa lini kulewa kuti mungakwanise lini kumalisa makumbukidwe yakuipa. Mungapitirize kubzibva bwino thangwe ra nyongo yomwe mwaicita kuti mumalise makumbukidwe yakuipayo. Tsono nthawe zinango mpsakubveka kukhala na makumbukidwe yamweya. Koma lekani kubwerera mbuyo! Na thandizo la Yahova imwepo mungamalise makumbukidwe yakuipa.

KODI MWAPFUNZA CIYANI?

Ifepano tingatumbizise Yahova mwa kukhala wakucena mwakuthupi, m’makumbukidwe na m’bzicito bzathu.

Mibvunzo yakubwerezera

• Thangwe ranyi mpsakufunika kukhala wakucena?

• Kodi mungakhale tani wakucena mwakuthupi?

• Kodi mungakhale tani wakucena m’makumbukidwe na m’bzicito?

ONANI POMWE IBZI

Kodi mungacite tani kuti mukhale wakucena mwakuthupi napo kuti ndimwe wakusauka?

Kukhala na Manungo Yabwino na Khonkho — Kusamba m’manja (3:01)

Onani bzinthu bzinango bzomwe bzingakuthandizeni kuti muleka kufumali.

“Bzomwe Mungacite Kuti Musiye Kufumali” (Mukani! wa Maio, 2010)

Bzomwe bzingacitike mukambawona bzinthu bza maika.

“Kodi Kuwona Bzinthu bza Maika Kungatibweresere Mabvuto Yaponi?” (Ntsanza ya Mulindiri ya 1 Agosto, 2013)

Onani bzomwe bzidathandiza munthu munango kusiya kumbawona bzinthu bza maika.

“Ndidaphonya Kazinji Tsono Ndidadzakwanisa” (Ntsanza ya Mulindiri N.° 4 2016)