PFUNZIRO 42
Kodi Bibliya Limbati Tani pa Nkhani ya Kukhala Khowa na Kulowola?
Wanthu winango ambakumbuka kuti munthu angakhale lini wakukondwa akasaya kulowola ayai kulowodwa. Tsono ni wanthu lini wentse omwe ali pa banja mbakukondwa ndipo ni wanthu lini wentse omwe ali lini pa banja omwe mbakukondwa lini. Bibliya limbalewa kuti kukhala khowa na kulowola ni mphaso zakucokera kwa Mulungu.
1. Kodi ndiponi phindu la kukhala khowa?
Bibliya limbati: “Ule omwe an’pita m’banja wacita bwino, tsono ule omwe an’pita lini m’banjamo, wacita bwino kwene-kwene.” (Werengani 1 Akolinto 7:32, 33, 38.) Thangwe ranyi tingalewe kuti omwe an’pita lini m’banja acita “bwino kwene-kwene”? Thangwe ndakuti Mkristau omwe ali lini pa banja an’dzafunikira lini kunyang’ana bzakufunika kwa mkazi ayai mwamuna wace. Ndipopa ambakhala na ufulu buzinji. Winango wa iwo akwanisa kucita bzizinji pakutumikira Yahova, ninga kuyenda kukapalizira m’madziko manango. Ndipo cinthu cakufunika kwene-kwene n’cakuti iwo angamale nthawe izinji akulimbisa uxamwali bwawo na Yahova.
2. Kodi wanthu omwe adalowolana ambagumana phindu liponi akanembesa malowozi yawo ku boma?
Kulowola ayai kulowodwa kuna phindu lace ninga momwe bziliri na kukhala khowa. Bibliya limbalewa kuti “awiri ambaposa m’bodzi.” (Mpalizi 4:9) Ndipo bzimbakwanisika maka-maka kwa Akristau omwe ambateweza bzomwe Bibliya limbapfunzisa m’banja mwawo. Wanthu omwe ambanembesa malowozi yawo ambalumbira kuti an’dzafunana, an’dzalemekezana ndipo an’dzakhala pabodzi moyo wawo wentse. Thangwe ra bzimwebzi, iwo ambawona kuti mbakukhotcerereka kusiyana na wanthu omwe ambandokhala pabodzi uko alibe kunembesa malowozi yawo ku boma. Ndipo wana wawo ambakhalambo wakukhotcerereka.
3. Kodi Yahova ambayawona tani Malowozi?
Pomwe Yahova adayambisa malowozi yakuyamba, iye adati: “Mwamuna an’dzasiya baba wace na mai wace, acidzaphatana na mkazace, ndipo awiriwo an’dzakhala thupi libodzi.” (Genesesi 2:24) Yahova ambafuna kuti mkazi na mwamuna ambafunane na kubverana kwene-kwene pa moyo wawo wentse. Iye ambabvumiza wanthu kulambana m’bodzi wa iwo akacita upombo ayai uputa. Bzimwebzi bzikacitika, Yahova adapasa omwe aphonyeredwayo ufulu bwakumalisa banjalo.a (Mateu 19:9) Yahova ambabvumiza lini Akristau kupalika. — 1 Timotio 3:2.
FUFUDZANI BZINANGO
Pfunzani kuti mungakhale tani wakukondwa na kukondwesa Yahova bziribe basa penu muli pa banja ayai ne.
4. Phatisani basa bwino mphaso ya kukhala khowa
Jezu akhawona kuti kukhala khowa ni mphaso. (Mateu 19:11, 12) Werengani Mateu 4:23, ndipo mukamala cezeranani mbvunzo wakutewerayu:
Kodi Jezu adaphatisa tani basa mphaso ya kukhala khowa kuti atumikire Baba wace na kuthandiza wanthu?
Akristau omwe akanati kupita m‘banja angakomedwe kwene-kwene akaphatisa basa nthawe imweyi ninga momwe Jezu adacitira. Onani VIDIYO, ndipo mukamala cezeranani mbvunzo wakutewerayu
N’ciyani comwe Mkristau angacite kuti acite bzizinji pomwe akanati kulowola ayai kulowodwa?
Kodi mukhadziwa?
Bibliya limbalewa lini kuti munthu an’funika kulowola ayai kulowodwa na magole mangasi. Tsono iro limbalewa kuti munthu an’funika kuyamba kukula kuti alowole ayai alowodwe bwino. Thangwe akakhala mwana cikhumbo cakufuna kucita malume ya pa mphasa cimbakhala ca mphanvu ndipo cingamutazise kucita bzinthu mwanzeru. — 1 Akolinto 7:36.
5. Sankhulani bwino munthu wakulowolana naye
Kusankhula munthu kuti mulowolane naye ni cibodzi mwa bzinthu bzakufunika kwene-kwene comwe mun’funika kucita. Werengani Mateu 19:4-6, 9, ndipo mukamala cezeranani mbvunzo wakutewerayu:
Thangwe ranyi Mkristau an’funika kukumbuka bwino pomwe akanati kulowola ayai kulowodwa?
Bibliya lingakuthandizeni kudziwa makhalidwe yomwe munthu omwe mungalowolane naye an’funika kukhala nayo. Cakufunika kwene-kwene ni kunyang’ana munthu omwe ambafuna Yahova.b Werengani 1 Akolinto 7:39 na 2 Akolinto 6:14, ndipo mukamala cezeranani mibvunzo ikutewerayi:
Thangwe ranyi tin’funika kulowola ayai kulowodwa na Mkristau mwanzathu basi?
Kodi mukuwona kuti Yahova angabve tani tikalowola ayai tikalowodwa na munthu omwe ambamutumikira lini?
Bzifuwo bziwiri bzakusiyana bzikamangiriridwa pa djoki libodzi bzimbabva kuwawa. Mpsibodzi-bodzimbo, Mkristau akalowolana na munthu omwe ambanamata lini Yahova ambagumana na mabvuto mazinji
6. Lemekezani malowozi ninga momwe Yahova ambacitira
Kale-kale Ajirayeri winango akhalamba azikazawo thangwe akhafuna kulowola atsikana. Werengani Malakiya 2:13, 14, 16, ndipo mukamala cezeranani mbvunzo wakutewerayu:
Thangwe ranyi Yahova ambaipidwa na wanthu omwe ambalambana pa mathangwe yakusaya kubveseseka?
Upombo na kulambana bzimbabweresa mabvuto kwa mwamuna ayai mkazi omwe aphonyeredwa na wana
Onani VIDIYO, ndipo mukamala cezeranani mbvunzo wakutewerayu.
Penu mudalowola ayai mudalowodwa na munthu omwe ambanamata lini Yahova, kodi mungacite tani kuti mukhale na banja labwino?
7. Phatisani basa mitemo ya Yahova m’banja mwanu
Munthu an’funika kucita nyongo kuti aphatise basa mitemo ya Yahova m’banja mwace.c Tsono Yahova ambasimba omwe ambacita bzimwebzi. Onani VIDIYO.
Werengani Ahebereu 13:4, ndipo mukamala cezeranani mibvunzo ikutewerayi:
Kodi mukuwona kuti mitemo ya Yahova pa nkhani ya banja njakupusa kuiteweza? Penu munti inde, thangwe ranyi? Ndipo penu munti ne thangwe ranyi?
Yahova ambafuna kuti Akristau akanembese malowozi ku boma ndipo akalambana akapfudzise, thangwe ndibzo bzomwe malamulo ya madziko mazinji yambalewa. Werengani Tito 3:1, ndipo mukamala cezeranani mbvunzo wakutewerayu:
Penu muli pa banja, kodi mudanembesa malowozi yanu ku boma?
WANTHU WINANGO AMBABVUNZA KUTI: “Thangwe ranyi tin’fuika kukanembesa malowozi yathu ku boma? Kodi tingaleke kumbandokhalambo tenepoyo?”
Kodi mungatawire tani?
KODI MWAPFUNZA CIYANI?
Kukhala khowa na kukhala na banja bzentse mpsabwino. Ndipo omwe ali pa banja na omwe ali lini pa banja wentse angakomedwe na moyo akateweza bzomwe Yahova akufuna.
Mibvunzo yakubwerezera
Kodi n’ciyani comwe munthu angacite akanati kulowola ayai kulowodwa?
Thangwe ranyi Bibliya limbalewa kuti Mkristau an’funka kulowolana na Mkristau mwanzace?
Kodi ndiponi thangwe la m’Bibliya lomwe limbabvumiza kuti wanthu wakulowolana alambane?
ONANI POMWE IBZI
Kodi kulowodwa “mwa Mbuya” kumbathandauza ciyani?
“Mibvunzo Yakucokera kwa Anyakuwerenga” (Ntsanza ya Mulindiri ya 1 Julho, 2004)
Onani vidiyo ziwiri zomwe zingakuthandizeni kucita bzinthu mwanzeru pa nkhani ya kukhala pa umakhadzi na malowozi.
Onani kuti thangwe ranyi m’bale akuwona kuti bzomwe Yahova adamupasa mpsabwino kwene-kwene kuposa bzomwe iye adasiya.
Kodi n’ciyani comwe munthu an’funika kukumbukira akafuna kulambana na mwanzace ayai kupumirana?
“Mbalemekezani ‘Comwe Mulungu Wacimanga Pabodzi’” (Ntsanza ya Mulindiri ya Dezembro, 2018)
a Onani Mafala Yakuthumizira 4 yomwe yakulewa nkhani ya kupumirana pakakhala palibe kucitika upombo ayai uputa.
b M’madziko manango abereki ndiwo ambasankhulira mwana wawo munthu kuti alowolane naye. Bzikakhala bziri tenepo, abereki wa lufoyi, ambawona lini bzomwe munthu anabzo ninga kobiri ayai kubvekera, koma ambawona lufoyi lomwe munthuyo analo kwa Yahova.
c Penu mukukhala na munthu omwe mulibe kunembesa naye malowozi, mungakanembese malowoziyo ayai mungasiyane naye.