‘Tithumizireni Cikhulupiro’

‘Limbisani cikhulupiro cangu!’​—MAR. 9:24.

NYIMBO: 81, 135

KODI MUNGADATAWIRE TANI?

Thangwe ranyi mpsakufunika kwene-kwene kulimbisa cikhulupiro cathu?

Kodi tingacite ciyani kuti tirimbise cikhulupiro cathu?

Kodi tingalatize tani kuti tina cikhulupiro camphanvu?

1. Kodi thangwe ranyi cikhulupiro n’cakufunika kwene-kwene? (Onani cithunzi-thunzi cakuyambirira.)

KODI mudabzibvunza kale penu imwepo ndimwe munthu omwe Yahova an’dzafuna kumupulumusa pa citsautso cikulu na kumupitisa m’dziko lipsa? Kulewa cadidi, kuti tidzapulumuke, pambafunika bzinthu bzizinji, tsono cinthu cibodzi cakufunika kwene-kwene cidanembedwa na mpostolo Paulo. Iye adati: ‘Mwakusaya cikhulupiro bzingakwanisike lini kukondwesa Mulungu’. (Waheb. 11:6) Mungawone ninga bzakukwanira, tsono cadidi n’cakuti ‘cikhulupiro si ca wanthu wense’. (2 Wat. 3:2) Mavesiya yankutithandiza kubvesesa kufunika kwa kulimbisa cikhulupiro cathu.

2, 3. (a) Kodi tingapfunze ciyani na mpostolo Pedru pa nkhani yakufunika kwa cikhulupiro? (b) Kodi tin’cezerana mibvunzo iponi tsapano?

² Mpostolo Pedru adacenjeza bza kufunika kwa cikhulupiro pomwe iye adalewa bza ‘cikhulupiro cathu cakuyezedwa’ comwe ‘cin’dzatitumbizisa na kutambira mbiri na ulemu, bzikadzazimbulidwa bzicito bza Jezu Kristu.’ (Werengani 1 Pedru 1:7.) Pakuti citsautso cikulu cinkufika mwakamfulumize, kodi ifepano tin’funika lini kukhala na citsimikizo cakuti tinaco cikhulupiro ninga ca wale womwe wan’dzatumbizidwa bzikadzazimbulidwa bzicito bza Mambo wathu. Ndipo tin’funambo kukhala ‘mtundu wa wanthu wakukhala na cikhulupiro cakusunga moyo wathu’. (Waheb. 10:39) Pomwe tinkukumbukira cakulinga cimweci, tifune kukhala ninga munthu omwe adalewa kuti: ‘Limbisani cikhulupiro cangu!’ (Mar. 9:24) Ayai pinango tingalimbisidwembo mwa kulewa bzomwe wapostolo wa Jezu wadalewa kuti ‘Tithumizireni cikhulupiro.’​—Lu. 17:5.

³ Kufunika kwa kulimbisa cikhulupiro kumbadzusa mibvunzo iyi: Kodi tingalimbise tani cikhulupiro cathu? Kodi tingalatize tani kuti tina cikhulupirocakulimba? Kodi n’ciyani cimbatitsimikizira kuti un’dzatawiridwa mpembo wathu wakukumbira kuthumiziridwa cikhulupiro?

KHALANI NA CIKHULUPIRO CAKUKONDWESA MULUNGU

4. Kodi ni bziratizo bza yani bzomwe bzingatithandize kulimbisa cikhulupiro cathu?

⁴ Pakuti ‘bzinthu bzense bzomwe bzidanembedwa, bzidanembedwa kuti bzitipfunzise,’ ifepano tingapfunze na bziratizo bzizinji bza wanthu wacikhulupiro womwe wambalewedwa m’Bibliya. (War. 15:4) Tikambawerenga bza wanthu ninga Abalahamu, Sara, Izaki, Djakobi, Mozeji, Rahabi, Gidiyoni, Baraki, na winango, nkhani zawo zingatithandize kupenda cikhulupiro cathu. (Waheb. 11:32-35) Ndipo kuthumizira bzimwebzi, tikambawerengambo nkhani zatsapano za abale wathu womwe wana cikhulupiro cakulimba, tingalimbisidwe kuphata basa mwakulimba kuti tirimbisembo cikhulupiro cathu.a

5. Kodi Eliya adalatiza tani kuti akhana cikhulupiro cakulimba? Ndipo ciratizo caceci cimbatirimbisa kucita ciyani?

⁵ Mbatiwoneni ciratizo ca mpolofeta Eliya. Kumbukirani bzakucitika bzomwe bzidacitisa kuti Eliya akhulupire Yahova na mtima wense. Pomwe Eliya adauza Mambo Akabe kuti Yahova akhafuna kubweresa cirala, iye adalewa na mtima wense kuti: ‘Kwa Yahova wamoyo, . . . kun’bvumba lini ne kucita mame mkati mwa magole yankubweraya, pokha ndikatonga inepano!’ (1 Wam. 17:1) Eliya akhakhulupira kuti Yahova angadapasa iye na anzace bzense bzomwe wangadafunikira mkati mwa magole yense ya ciralayo. (1 Wam. 17:4, 5, 13, 14) Iye akhakhulupira kuti Yahova angadalamusa kwa anyakufa mwana wa mkazi mansiwa. (1 Wam. 17:21) Iye akhapenukira lini kuti Yahova angadatumiza moto kuti udzanyekese nsembe pa Phiri la Karimelo. (1 Wam. 18:24, 37) Pomwe nthawe ya Yahova ikhadakwana kuti amalise cirala cire, napo kukhanati kuwoneka cizindikiro cakuti kungadabvumba, Eliya adauza mambo Akabe kuti: ‘Ndokoni mukadye na kumwa, thangwe kunkubveka kuunga kwa cinvula.’ (1 Wam 18:41) Kodi nkhani imweyi, inkutirimbisa lini kuti tibzipende tekha, ticiwona penu tinacombo cikhulupiro cakulimba?

KODI TINGALIMBISE TANI CIKHULUPIRO CATHU?

6. Kodi tin’funika kukumbira ciyani kwa Yahova kuti tirimbise cikhulupiro cathu?

⁶ Ifepano tingakwanise lini tekha kulimbisa cikhulupiro cathu. Cikhulupiro ni mkhalidwe m’bodzi wa cisapo ca mzimu wakucena wa Mulungu. (Wag. 5:22) Tenepo, n’kwa nzeru kuteweza malango ya Jezu ya kukumbira mzimu wakucenayo, pakuti Jezu adatitsimikizira kuti Baba wace ‘an’dzapereka mzimu wakucena kwa wense womwe wanimukumbira!’​—Lu. 11:13.

7. Perekani ciratizo ca momwe tingapitirizire kulimbisa cikhulupiro cathu.

⁷ Cikhulupiro cathu cikalimba pang’ono, tin’dzafunika kupitiriza kumbacirimbisa. Cikhulupiro cathu cingandendemezedwe na moto wa nkhuni. Motoyo ukagasidwa, pakuyamba iye ambagaka bwino. Tsono, tikasaya kugasirira motoyo, iye ungambombowe, yacisala masimbe, ndipo patsogolo pace, masimbeyo yangathime, licisala dotha lokha-lokha. Koma tikagasirira motoyo mwakumbaikha pomwe nkhuni zinango, motoyo ungapitirize kugaka mwakuyenderera. Tenepo, cikhulupiro cingapitirizembo kukhala ca mphanvu tikapitiriza kumbacidyesa na Fala la Mulungu. Tikambapitiriza kupfunza Bibliya, tingakulise lufoyi lathu kwa Mulungu na Fala lace, ndipo imweyi ndiyo njira ikulu yakulimbisira cikhulupiro cathu.

8. Kodi n’ciyani comwe cin’dzatithandiza kulimbisa na kusunga cikhulupiro cathu?

⁸ Kodi n’ciyani cinango comwe tingacite kuti tipitirize kulimbisa cikhulupiro cathu? Lekani kundokomedwa na bzomwe mudapfunza mpaka batismo yanu. (Waheb. 6:1, 2) Mbayakumbukirani mapolofesiya yense ya m’Bibliya yomwe yadakwanisika kale, pakuti yangakuthandizeni kukhala na mathangwe yakubveka yakulimbisira cikhulupiro canu. Mungaphatisembo basa Fala la Mulungu ninga cakupimira cikhulupiro canu kuti muwone penu cikhulupiro canuco cinkundendemerana na ca wale womwe wakhana cikhulupiro cakulimba.​—Werengani Tiyago 1:25; 2:24, 26.

9, 10. Kodi kuteweza malangoya kungalimbise tani cikhulupiro cathu: (a) kubverana na wanthu wabwino? (b) kutsonkhana? (c) kuyenda mu utumiki?

⁹ Mpostolo Paulo adauza Wakristau anzace kuti iwo wakhafunika kumbalimbisana m’cikhulupiro. (War. 1:12) Tikambatsonkhana na abale wathu, ifepano tingalimbisane m’cikhulupiro, maka-maka tikambakhala pabodzi na wale womwe cikhulupiro cawo cidayezedwa kale. (Tiy. 1:3) Kubverana na wanthu wakuipa kumbadzonga cikhulupiro, tsono kubverana na wanthu wabwino kumbalimbisa cikhulupiro. (1 Wak. 15:33) Limweri ndiro thangwe libodzi lomwe timbauzidwira kuti ‘tireke kusiya kumbatsonkhana, ‘koma tipitirize ‘kumbalimbisana.’ (Werengani Wahebereu 10:24, 25.) Thangwe linango ndakuti mitsonkhanoyo payokha, imbatipasa malango yomwe yambalimbisa cikhulupiro cathu. Bzimwebzi bzimbabverana na bzomwe Paulo adanemba kuti: ‘Cikhulupiro cimbabwera pambuyo pa kubva bzinthu.’ (War. 10:17) Kodi timbawona kuti mitsonkhano njakufunika kwene-kwene pa moyo wathu?

¹⁰ Tikambayenda mu utumiki, ifepano timbandolimbisa lini cikhulupiro ca wanthu winango, koma timbalimbisambo cikhulupiro cathu. Ninga Wakristau wakuyambirira wale, ifepano timbapfunza kukhulupira Yahova na mtima wathu wense, ticipalizira mwa kulimba mtima pa cakucitika ciri-cense.​—Mab. 4:17-20; 13:46.

11. Thangwe ranyi Kalebe na Djosuwe wakhana cikhulupiro cakulimba kwene-kwene, ndipo tingakhale tani ninga iwo?

¹¹ Tikambawona momwe Yahova ambatithandizira pa moyo wathu na momwe iye ambatitawirira mipembo yathu, cikhulupiro cathu cimbalimba. Bzimwebzi bzidacitikira Kalebe na Djosuwe. Iwo wadalatiza cikhulupiro kwa Yahova pomwe wadayenda kukazondera Dziko Lakupiciridwa. Tsono, pomwe wadawona momwe Yahova akhawatsogolelera pa nthawe iri-yense ya moyo wawo, cikhulupiro cawo cidalimbiratu kwene-kwene. Ndipopa Djosuwe adalewa mwakutsimikiza kwa Wajirayeri wale kuti: ‘Palibe kutazika na cibodzico pa mafala yabwino yense yomwe adakuuzani Yahova, Mulungu wanu.’ Iye patsogolo pace adadzathumizira kuti: ‘Tsapano, mugopeni Yahova, mucimutumikira mwakulungama na mwacadidi . . . Inepano na wa pa mui pangu, tin’tumikira Yahova.’ (Djos. 23:14; 24:14, 15) Tikalawidza ubwino bwa Yahova, ifepano tingakulisembo cikhulupiro cathu kwa iye.​—Psal. 34:8.

MOMWE TINGALATIZIRE KUTI TINA CIKHULUPIRO

12. Mwakubverana na Tiyago, n’ciyani cimbalatiza kuti tina cikhulupiro?

¹² Kodi tingalatize tani kuti tina cikhulupiro cakulimba? Nyakupfunza Tiyago ambatawira mbvunzoyu mwakulewa kuti: ‘Ine ndin’dzakulatiza cikhulupiro cangu mwa mabasa yangu.’ (Tiy. 2:18) Bzakucita bzathu ndibzo bzimbalatiza kuti tina cikhulupiro cacadidi. Mbatiwoneni bziratizo bzinango.

13. Kodi kucita basa kupalizira kumbalatiza tani kuti tina cikhulupiro?

¹³ Kucita basa lakupalizira ni njira yabwino yakulatiza kuti tina cikhulupiro. Thangwe ranyi? Kuti ticite basa limweri, tin’funika kukhulupira kuti inkufika nthawe kuti Mulungu amalise dzikoli, ticikhulupirambo kuti nthaweyo in’fika mwakusaya kucedwa! (Hab. 2:3) Njira ibodzi yakupimira cikhulupiro cathu ni kuwona kuti tidakonzeka mpaka paponi kubzipereka mu utumiki. Kodi tinkucita bzense bzomwe tingakwanise kuti tigumane njira zakuthumizira utu miki bwathu? (2 Wak. 13:5) Inde, kulewa padeca bza cikhulupiro cathu kuti tidzapulumuke, ni njira inango yakulatizira kuti tina cikhulupiro mu mtima mwathu.​—Werengani Waroma 10:10.

14, 15. (a) Kodi tingalatize tani cikhulupiro cathu pa moyo wathu wa nsiku na nsiku? (b) Fotokozani cakucitika cibodzi comwe cimbalewa bza wanthu womwe wakhana cikhulupiro cakulimba.

¹⁴ Ifepano tingalatizembo kuti tina cikhulupiro pomwe tinkulimbana na bzineso bza nsiku na nsiku pa moyo wathu. Napo tirimbane na matenda, kutaya mtima, kusauka na bzineso bzinango pa moyo wathu, ifepano timbakhulupira kuti Yahova na Mwana wace wan’dzatithandiza ‘pa nthawe yomwe tikufunikira thandizo.’ (Waheb. 4:16) Ifepano timbalatiza cikhulupiroco mwa kumupemba kuti atithandize pa cinthu ciri-cense, sikuti pa bzinthu bzauzimu bzokha. Jezu adalewa kuti tingapembere bzinthu bza kuthupi, kuphatanidza ‘cakudya cathu ca lero, mwakubverana na bzakufunika bza pa nsikuyo.’ (Lu. 11:3) Nkhani za m’Bibliya zimbatithandiza kukhulupira kuti Yahova angatithandize. Pa nthawe ya cirala mu dziko la Jirayeri, Yahova adapasa Eliya cakudya na madzi. ‘Akhungubwe wakhambamubweresera mkate na nyama ku macibese na ku maulo, ndipo iye akhamwa madzi ya mu mkulo’ ninga momwe Yahova akhadamuuzira. (1 Wam. 17:3-6) Ifepano tina cikhulupiro cakuti Yahova angacite momwe acitiremo, kuti atipase bzomwe tingafunikirebzo.

¹⁵ Timbakhulupira kuti kuphatisa basa mitemo ya m’Bibliya kungatithandize kugumana cakudya. Rebeka, mpfumakazi yakulowodwa ya ku Ásia, idawona kuti mafalaya njacadidi pa banja lawo. Iwo wadaphatisa basa mafala ya pa Mateu 6:33 na Mimwani 10:4, mwa kuikha Umambo bwa Mulungu pa mbuto yakuyamba pa moyo wawo, waciphata basa mwakulimbika. Rebeka adalewa kuti pa nthawe inango bayace adawona kuti mtundu wa basa lace pabodzi na momwe basalo likhamupanikizira, bzikhaikha pa ngozi moyo wawo wauzimu, tenepo iye adacoka basalo. Tsono iwo wakhana wana anai kuti awasamalire. Rebeka ambalewa bzomwe bzidacitika: “Ifepano tidayamba kumbaphika mabolo, ticimbayagulisa. Padapita magole ticimbacita bzimwebzo, ndipo timbawona kuti Yahova alibe kutisiya. Palibe nsiku yomwe tidagona nayo.” Kodi imwepo mudakwanisambo kale kulatiza cikhulupiro cakuti Bibliya limbatipasa malango yabwino kwene-kwene yomwe wanthu wangathandizike nayo nsiku zino?

16. Kodi tikakhulupira Mulungu, n’ciyani comwe iye an’dzaciticitira?

¹⁶ Ifepano tin’funika lini kumbapenukira penu bzinthu bzin’dzatifambira bwino tikateweza malango ya Mulungu. Mpostolo Paulo adalewa mafala yakunembedwa na mpolofeta Habakuki, yakuti: ‘Nyakulungama an’dzakhala na moyo thangwe ra cikhulupiro cace.’ (Wag. 3:11; Hab. 2:4) Tenepo, tin’funika kukhulupira Mulungu omwe angatithandizedi. Paulo ambatikumbusa kuti Mulungu ndiye ‘omwe angakwanise kucita bzinthu bzikulu kwene-kwene kuposa bzense bzomwe timbakumbira ayai kukumbuka, mwakubverana na mphanvu yace yomwe inkuphata basa pa ifepano.’ (Wayef. 3:20) Atumiki wa Yahova wambacita bzense bzomwe wangakwanise kuti wacite kufuna kwa Mulungu, tsono thangwe ra kuzindikira malire yawo, iwo wambakhulupira kuti Yahova an’dzawasimba. Kodi timbakomedwa lini kudziwa kuti Mulungu anafe?

KUTAWIRIDWA KWA MIPEMBO YAKUKUMBIRA CIKHULUPIRO

17. (a) Kodi pomwe wapostolo wadakumbira cikhulupiro, iwo wadatawiridwa tani? (b) Thangwe ranyi ifepano tingadikhirire kutawiridwa kwa mipembo yathu yakukumbira cikhulupiro?

¹⁷ Pambuyo pakucezerana nfundo za m’mbuyozi, ifepano tingafunembo kucita ninga bzomwe wapostolo wa Jezu wadacita mwa kuuza Mbuya kuti: ‘Tithumizireni cikhulupiro.’ (Lu. 17:5) Bzomwe wadakumbirabzo bzidatawiridwa, maka-maka pa Pentekosite 33 E.C. pomwe mzimu wakucena udathululidwa pa iwo, wacithandizidwambo kubvesesa bwino kufuna kwa Mulungu. Bzimwebzo bzidalimbisa cikhulupiro cawo. Ndipo wadayamba kucita basa likulu la kupalizira pa nthawe imweyo. (Wakol. 1:23) Kodi ifepano tingadikhirirembo kutawiridwa kwa mipembo yathu ya kukumbira cikhulupiro? Bibliya limbatitsimikizira kuti tingadikhire bzimwebzo malinge tikumbire ‘mwakubverana na kufuna’ [kwa Mulungu].​—1 Ju. 5:14.

18. Kodi Yahova ambasimba tani wale womwe wambalimbisa cikhulupiro cawo?

¹⁸ Bzinkuwonekeratu kuti Yahova ambakomedwa na wale womwe wambamukhulupira na mtima wense. Yahova an’dzatawira mipembo yathu yakukumbira kuthumizidwa kwa cikhulupiro, ndipo cikhulupiro cathuco cin’dzalimba kwene-kwene, ticiwonedwa kukhala ‘wakuthemera Umambo bwa Mulungu.’​—2 Wat. 1:3, 5.

[Mafala ya m’nyansi]