Kufenderera Mulungu n’Cinthu Cabwino kwa Inepano

POMWE ndidapfitsa magole mapfemba yakubadwa, ndidaleka kukula. Bzimwebzi bzidacitika magole 34 m’mbuyomu, ku dziko la Costa do Marfim, ndipo ndidatalimpha metro ibodzi basi. Pa nthawe yomwe mkhalidwe wanguyu udawonekera padeca, wabereki wangu wadandirimbisa kuti ndimbaphate basa mwa mphanvu kwene-kwene kuti ndireke kumbakumbukira kwene-kwene bza mawonekedwe yanguya. Ndidayamba kumbagulisa bzisapo bzomwe ndikhambabziikha pa meza, kutsogolo kwa nyumba yathu. Ndipo nsiku zense ikhakhala idacena . Tenepo, wanthu wadayamba kumbabwera kudzagula thangwe ra bzimwebzo.

N’cadidi kuti kuphata basa na mphanvu kulibe kucinja cinthu na cibodzico. Ndikadafupika basi, ndipo ndimbaneseka kucita bzinthu bzing’ono-bzing’ono pa moyo wangu, ninga kumanula bzinthu mu loja. Bzense bzikhawoneka ninga bzidakonzedwera wanthu atali-atali wokha-wokha wakupitirira msinkhu wangu. Ndikhabzibvera nsisi ndekhane, tsono bzinthu bzidacinja pomwe ndidapfitsa magole 14 yakubadwa.

Nsiku inango, akazi awiri womweni​—Mboni za Yahova—​wadabwera kudzagula bzisapo, ndipo iwo wadayamba kupfunza nane Bibliya. Tsapanopapa ndazindikira kuti kudziwa Yahova pabodzi na cakulinga cace, mpsakufunika kwene-kwene kuposa bvuto ndinaloli. Bzimwebzi bzandicitisa kuti ndikhale bwino. Psalymo 73:28 ni vesi lomwe ndimbalifuna kwene-kwene. Vesi limweri limbati: ‘Kwa ine kufendera kwa Mulungu n’cinthu cabwino.’

Mwakusaya kucedwa banja lathu lidafulukira ku dziko la Burkina Faso, ndipo moyo wangu udacinja kwene-kwene. M’mudzi omwe ndikhakhala kwathu ku Costa do Marfim, ndikhadziwika kwene-kwene thangwe bzisapo ndikhagulisa bzire. Tsono ku mbuto ipsayi, inepano ndikhali mulendo, ndipo ndikhadziwika lini. Wanthu wakhambandinyang’anisisa. Ndidacita midzinga mizinji ndicimbabzifungira m’nyumba. Tsono ndidakumbukira ubwino bomwe Yahova akhadandicitira thangwe ra kumufenderera. Ndidanembera tsamba mthambi ya Mboni za Yahova, ndipo ndidazungiridwa na munthu wakuthemera​—Nani, omwe ni misiyonario mkazi akhafamba na kamota kang’ono.

Miseu ya m’mudzi mwathu ikhali yakuterera kwene-kwene, ndipo nthawe za nvula kukhakhala na matope. A Nani akhagwa kazinji-kense pa kamota kawoko pomwe akhambabwera kudzapfunza nane, tsono iwo akhacita lini thupo na bzimwebzo. Patsogolo pace iwo adabzipereka kuti ambanditenge pa kuyenda ku mitsonkhano. Ndidazindikira kuti bzimwebzi bzikhathandauza kubvuma kumbanyang’anisidwa na wanthu pakucoka kumuiko. Kusiya bzimwebzo, kupakira kumambuyo kwa kamotako kukhalemeresa kamotako ndipo bzimwebzi bzikhacitisa kuti kaneseke kufamba. Tsono thangwe kukumbukira pomwe mafala ya pa mbali yaciwiri ya vesi langu lire, yomwe yambati: ‘Yahova Mbuya Mkululetu ndiye pakuthawira pangu.’

Inepano na a Nani tikhambagwera kawiri-kawiri m’matope, tsono cinthu cikulu cikhali kufika ku mitsonkhanoko. Mu mseu tikhambanyang’anisidwa na wanthu, tsono tikafika ku Nyumba ya Umambo, abale tikhatambiridwa na kumwetulira kwa lufoyi. Ndidabatizidwa pambuyo pa minyezi mipfemba.

Mbali yacitatu ya vesi langu lire imbati: ‘Kuti ndidziwise basa lense la manja yanu’. Ndidadziwa kuti utumiki bungadakhala bvuto likulu kwa inepano. Ndikadakumbukira ulendo bwakuyamba bomwe ndidayenda kukapalizira nyumba na nyumba. Wana pabodzi na akulu-akulu wakhambandinyang’anisisa, ndipo wakhambanditewera na kumbatewezera mafambidwe yangu. Bzimwebzo bzikhandiwawa kwene-kwene, tsono ndidapitiriza kubzikumbusa kuti iwo wakhafunika kudziwa bza Paraizo ninga inepanombo; tenepo, ndidalimbikira basi.

Kuti bzinthu bzimbandipusire, ndidagula kanjinga ka maroda matatu, kakucita kutcobva na manja. Mwanzangu omwe ndikhaphata naye basa akhambandigwinya mpaka pa kaphiri, pambuyo pace akhakwirambo kanjingako, ticiyamba kupolika pa kaphiriko. Mabvuto yakuyamba ya mu utumikiya, yadadzakhala nsansa ya cikondweso, tenepo mu 1998, ndidakhala Mpainiya wakukhazikika.

Ndimbapfunza Bibliya na wanthu wazinji, ndipo anai wa iwo wadabatiizidwa. Kuthumizira pamwepom’bodzi wa abale wangu wacikazi adabvumambo cadidi! Ndikambabva momwe winango wankupitira patsogolo bzimbandilimbisa kwene-kwene pomwe nimbafunika bzimwebzi. Nsiku inango pomwe ndikhaduwala malaria, ndidatambira tsamba lakucokera ku Costa do Marfim. Ndikhadayamba pfunziro la Bibliya na munthu omwe akhapfunza ku universidade ku Burkina Faso ndipo akhadakhala m’bale wangu. Nyakupfunzayo pa kupita kwa nthawe adafulukira ku Costa do Marfim. Ndidakomedwa kwene-kwene pomwe ndidadziwa kuti iye adadzakhala mpalizi wakusaya kubatizidwa!

N’ciyani comwe cimbandithandiza? Gulu linango lomwe limbapereka thandizo lidabzipereka kuti lindipfunzise kuluka. Mpfunzisi m’bodzi pomwe adawona kaphatidwe kangu ka basa iye adati: “Bzin’funika tikupfunzise iwepo kukonza sabau.” Iwo wadacitadi. Ku mui kwangu, ndimbakonza sabau. Ndipo wanthu wambakomedwa nazo sabau zanguzo, wacikauzambo anzawo. Inepano ndimbakapereka kumui kwawo sabauzo mwa kuphatisa basa mota wa maroda matatu.

Bzakupasa nsisi mpsakuti, mu 2004, kuwawa kwa msana wangu kudathumizirika ndipo bzimwebzi bzidacitisa kuti ndiime na upainiya. Tsono, ndikadacita basi mbali ya utumiki bwa nthawe zense.

Wanthu wambalewa kuti inepano ndimbadziwika na kumwetulira kwangu kwa kupasa kaso. Inepano ndina mathangwe mazinji yakukhalira yakukondwa thangwe ra kumufenderera Mulungu pafupi ni cinthu cabwino kwa inepano.​—Yakusimbidwa na Sarah Maiga.