Kodi ‘Mumbafuna Mwanzanu Ninga Momwe Mumbabzifunira Imwe Mwekha’?

‘Ufune mwanzako ninga momwe umbabzifunira iwe wekha.’​—MAT. 22:39.

NYIMBO: 73, 36

KODI MUNGATAWIRE TANI?

Thangwe ranyi atumiki wa Yahova an’funika kukhala walufoyi?

Thangwe ranyi lufoyi ndakufunika m’banja?

Kodi kufuna mwanzathu kumbatokonya tani uxamwali bwathu na akristau anzathu pabodzi na wanthu winango?

1, 2. Kodi Bibliya limbalatiza tani kufunika kwa lufoyi?

LUFOYI ndiro khalidwe likulu la Yahova Mulungu. (1Ju. 4:16) Jezu omwe ni cakulengedwa cace cakuyamba, adakhala na moyo kudzulu kwa magole yakusaya kulewengeka na Mulungu ndipo adapfunza momwe iye ambacitira bzinthu mwa lufoyi. (Wakol. 1:15) Pa nthawe yense yomwe iye adakhala kudzulu, na pomwe akhali pa dziko la pansi, Jezu adalatiza kuti akhadziwa bwino kuti Yahova ni Mulungu walufoyi, ndipo iye akhatewezerambo lufoyi la Baba wace. Tenepo, tingakhale wakutsimikiza kuti boma lomwe lidakhazikisidwa na Yahova pabodzi na Jezu, nthawe zense lin’dzatonga mwa lufoyi.

² Pomwe Jezu adabvunzidwa kuti n’ciponi cakutonga cikulu kuposa bzense, iye adati: ‘Umbafune Yahova, Mulungu wako, na mtima wako wense, na moyo wako wense, ndipo na nzeru zako zense. Cimweci ndico cakutonga cikululetu na cakutoma. Caciwiri cakutengana na cimweci, n’cici: ‘Ufune mwanzako ninga momwe umbabzifunira iwe wekha.’’​—Mat. 22:37-39.

3. Kodi ‘mwanzathu’ ni mbani?

³ Onani kuti Jezu adalewa kuti kufuna mwanzathu n’kwakufunika kwene-kwene ninga momwe timbafunira Yahova. Bzimwebzi bzinkulatiza kuti tin’funika kukhala na lufoyi pa bzakucita bzathu bzense. Pinango tingabzibvunze kuti: Kodi ‘mwanzathuyo’ ni mbani? Penu tiri pa banja, mwanzathu wapafupi ni mwamuna ayai mkazi wathu. Wanthu winango womwe ni anzathu ni abale na mpfumakazi wa mu gwere, womwe timbanamata nawo pabodzi Mulungu wacadidi. Ndipo winangombo ni wale omwe timbagumana nawo mu utumiki bwakumunda. Kodi womwe ambanamata Yahova na kuteweza mapfunziso ya Jezu, bzingakwanisike kulatiza lufoyi kwa anzawo?

LATIZANI LUFOYI KWA MWAMUNA AYAI MKAZI WANU

4. N’thangwe ranyi mpsakukwanisika kukhala na cikondweso m’banja napo ndife wakuperewera?

⁴ Yahova adayambisa banja pomwe adalenga Adamu na Eva. Cakulinga cace cikhali cakuti iwo akhale pabodzi mwa cikondweso kwa muyaya, na kuti adzaze dziko na wana wawo. (Ciy. 1:27, 28)Tsono kupandukira utongi bwa Yahova kudapswipiza banja lakuyamba lire ndipo kudabweresambo pikado na infa kwa wanthu wense. (War. 5:12) Napo bziri tenepo Bibliya limbatiuza momwe tingakhalire wakukondwa m’banja mwathu. M’Bibliya muna malango yabwino kwene-kwene ya nkhani imweyi thangwe rakuti malangoyo njakucokera kwa Mulungu, omwe adayambisa banja.​—Werengani 2 Timotio 3:16, 17.

5. Kodi lufoyi ndakufunika tani m’banja?

⁵ Fala la Mulungu limbalewa kuti lufoyi ndakufunika kwene-kwene kuti wanthu wakhale wakukondwa. Ndipo khalidwe limweri ndakufunika kwene-kwene m’banja. Pomwe akhanembera gwere la ku Kolinto, mpostolo Paulo adalewa kuti: ‘Lufoyi limbapirira, licikomera mtima. Lufoyi liribe nsanje, limbabziikha lini, limbabzikuza lini, limbacita lini bzinthu bzapezi, limbandosamala lini bzace bzokha, limbakalipa lini. Limbasunga lini mathangwe, Limbakomedwa lini na kusaya cirungamo, koma limbakomedwa na cadidi. Limbalekerera bzinthu bzense, limbakhulupira bzinthu bzense, limbadikhira bzinthu bzense, limbapirira bzinthu bzense Lufoyi lin’mala lini.’ (1 Wak. 13:4-8) Kumbakumbukira mafala yamweya na kuyaphatisa basa, mwakusaya kupenukira, tin’dzakhala wakukondwa kwene-kwene m’banja.

6, 7. (a) Kodi Bibliya limbalewa ciyani pa nkhani ya kutsogolera? (b) Kodi mwamuna Wacikristau an’funika kukhala naye tani mkazi wace?

⁶ Lufoyi ndakufunika kwene-wene kuna wale womwe ni misolo ya banja. Iwo wan’funika kucita bzinthu ninga momwe Mulungu ambacitira. Paulo adafotokoza kuti: ‘Ndin’funa mudziwe kuti msolo wa mwamuna ali-wense ni Kristu, ndipo msolo wa mkazi ni mwamuna, ndipo msolo wa Kristu ni Mulungu.’ (1 Wak. 11:3) Womwe ni misolo ya banja wan’funika lini kukhala wakupondereza. Mwa ciratizo, Yahova ambatsogolera mwana wace Jezu mwa lufoyi na mwakudeka mtima, ndipo iye ambamubvera. Jezu adatenda utsogoleri bwa Mulungu pomwe adalewa kuti: ‘Ndimbafuna Baba wangu.’ (Ju. 14:31) Bzingadakhala kuti Yahova ngwakupondereza na momwe akhacitira bzinthu na mwana wace, bzingadakhala bzakunesa kuti mwanayo abvere Babaceyo.

⁷ Napo mwamuna ni msolo wa mkazi wace, Bibliya limbalewa kuti iye an’funika ‘kumulemekeza’. (1 Pe. 3:7) Njira ibodzi yomwe mwamuna angalemekezere mkazi wace ndiyo mwa kuikha bzakufuna bza mkazi wace pa mbuto yakuyamba na kumbalemekeza bzinthu bzomwe iye ambafuna. Ndipopa Fala la Mulungu limbati: ‘“Imwembo amuna, mbawafunani akazanu, ninga momwe Kristu ambalifunira gwere lace, acibzipereka thangwe ra iro.’ (Wayef. 5:25) Inde, Jezu adapereka moyo wace kuti apulumuse ateweri wace. Amuna akambatewezera mwalufoyi utsogoleri bwa Jezu, bzin’dzanesa lini kuti mkazi wawo ambawafune, kuwalemekeza, na kumbawabvera.​—Werengani Tito 2:3-5.

LATIZANI LUFOYI KWA AKRISTAU ANZANU

8. Kodi atumiki wa Yahova an’funika kumbawona tani akristau anzawo?

⁸ Pa dziko lense la pansi, pana wanthu bzulu na bzulu womwe wankunamata Yahova, na kucitira umboni dzina lace pabodzi na cakulinga cace. Kodi mtumiki ali-wense wa Yahova, an’funika kumbawawona tani abale na mpfumakazi wa m’cikhulupiro cibodzi? Bibliya limbatawira kuti: ‘Mbaticitireni wense bzabwino ndipo maka-maka abale wathu m’cikhulupiro.’ (Wag. 6:10; werengani Waroma 12:10.) Mpostolo Pedru adanembambo kuti: ‘Tsapano pakuti mwabzicenesa mwa kubvera kwanu cadidi, mucikhala na lufoyi lakusaya cinyengo kwa abale ninga bzakutewera bzace, funanani na mtima wense.’​—1 Pe. 1:22; 4:8.

9, 10. Thangwe ranyi pana kubverana pakati pa wanthu wa Mulungu?

⁹ Thangwe ra lufoyi likulu lomwe tinalo kwa anzathu womwe tinkutumikira nawo pabodzi Yahova, ndife gulu libodzi laciphatano pa dziko lense la pansi. Kuthumizira bzimwebzi, timbamufuna Yahova ndipo timbabvera malamulo yace. Ndipo iye ambatithandiza na mphanvu yace ikulu ya cirengedwe cense, yomwe ni mzimu wakucena. Thangwe ra mphanvu imweyi, timbakwanisa kukhala pa ciphatano ca ubale bwathu bwa pa dziko lense la pansi.​—Werengani 1 Juwau 4:20, 21.

¹⁰ Pakulewa bza kufunika kwa kulatizana lufoyi pakati pa Wakristau, Paulo adanemba kuti: ‘Bvalani lufoyi likulu la kucitira winango nsisi, kukoma mtima, kubzicepsa m’makumbukidwe, kupfatsa na kupirira. Pitirizani kupirirana na kulekererana na mtima wense napo penu alipo omwe ana mathangwe yakudandaulira mwanzace. Ninga momwe Yahova adakulekererani na mtima wense, imwepo mucitembo tenepoyo. Tsono kuthumizira pa bzensenebzi, bvalani lufoyi, pakuti limbaphatanidzisa wanthu mwa mphamvu kwene-kwene kuposa cinthu ciri-cense.’ (Wakol. 3:12-14) Ndife wakutenda kwene-kwene kuti lufoyi ‘limbaphatanidzisa wanthu mwa mphamvu kwene-kwene kuposa cinthu ciri-cense,’ bziribe basa na mapfunziro yomwe munthuyo anayo ayai mtundu womwe adacokera.

11. Kodi lufoyi na ciphatano bzimbadziwikisa tani gulu la Yahova?

¹¹ Lufoyi lacadidi na ciphatano pakati pa atumiki wa Yahova bzimbawadziwikisa kuti wali m’cipembedzo cacadidi. Jezu adalewa kuti: ‘Wense wan’dzadziwa kuti ndimwe anyakupfunza wangu, mukambafunana’. (Ju. 13:34, 35) Ndipo mpostolo Juwau adanemba kuti: ‘Wana wa Mulungu na wana wa Dyabu wambadziwika pa thangweri: Wense womwe an’kucita lini cirungamo wambacokera lini kwa Mulungu mpsibodzi-bodzimbo na ule womwe alibe lufoyi na m’bale wace. Pakuti iri ndiro fala lomwe mudabva kutomera pa ciyambi, kuti timbafunane winango na mwanzace.’ (1 Ju. 3:10, 11) Ciphatanoci ciripo thangwe ra lufoyi. Ndipo lufoyiri, limbatidziwikisa kuti ndife Mboni za Yahova, na kuti ndife ateweri wacadidi wa Jezu. Na atumiki wace wamwewa, Yahova ambacita kufuna kwace kwa kuti bzipsa bzabwino bza Umambo bzipaliziridwe pa dziko lense la pansi.​—Mat. 24:14.

KUTSONKHANISA ‘THIMU LIKULU’

12, 13. (a) Kodi wanthu womwe wali mu ‘thimu likulu,’ ankucita ciyani nsiku zino? (b) Kodi n’ciyani comwe cin’dzacitika kwa wense womwe ali mu gulu limweri?

¹² Atumiki azinji wa Yahova ankucita mbali ya ‘thimu likulu lakucokera ku mitundu, madzinza, mbumba na bzirewedwe bzense. Iwo wadaima pa maso pa mpando wa umambo na pa maso pa Mwana wa bira [Jezu Kristu].’ Kodi iwo ni mbani? ‘Amwewa ni wale womwe wankucokera ku citsautso cikulu, ndipo wafula mikanjo yawo, waciicenesa na mulopa wa Mwana wa bira.’ Wanthu wamwewa adalatiza cikhulupiro mwa nsembe ya Jezu. Gulu limweri lomwe ni ‘thimu likulu’ linkupitiriza kuthumizirika, ndipo limbafuna Yahova na Mwana wace, ‘iro linkumucitira [Mulungu] utumiki bwakupambulika usiku na masikati.’​—Cibv. 7:9, 14, 15.

¹³ Tsapanopapa, Mulungu an’dzapfudza dziko lakuipali pa ‘citsautso cikulu.’ (Mat. 24:21; werengani Jeremiya 25:32, 33.) Thangwe ra lufoyi, Yahova an’dzapulumusa atumiki wace, ninga gulu aciwatsogolera ku dziko lipsa. Ninga momwe bzikhadalewedwera kale m’magole 2.000 m’mbuyomu, kuti: ‘[Mulungu] an’dzapukuta misozi yense m’maso mwawo, ndipo infa in’dzawoneka lini pomwe. Pan’dzawoneka lini pomwe kulira, ayai kubuula ne kuwawidwa.’ Kodi munkudikhirira na mtima wense kudzakhala na moyo m’paraizo, pomwe ‘bzinthu bzakale bzikadzakhala bzitapita’?​—Cibv. 21:4.

14. Kodi ni wanthu wangasi womwe wali mu gulu la thimu likulu nthawe zathu zino?

¹⁴ Pomwe nsiku zakumalizira zidayamba mu 1914, pakhana bzulu bzakucepa bza wanthu womwe wakhatumikira Yahova pa dziko lense. Thangwe ra lufoyi lomwe akhanalo na anzawo, ndipo na thandizo la mzimu wakucena, thimu lakucepa la akristau wakudzozedwa lidakhala lakulimbika pa basa lakupalizira. Phindu lace ndakuti, nsiku zino thimu likulu la wanthu womwe ana cidikhiro cakudzakhala pa dziko lapansi pano wankutsonkhanisidwa. Tsapano tiripo Mboni za Yahova zakupitirira 8.000.000, ndipo pana magwere yakupitirira 115.400 pa dziko lense la pansi. Ndipo mulewengo umweyu unkupitiriza kukula. Mwa ciratizo, mu gole la basa la 2014, padabatizidwa wanthu wakupitirira 275.500 wacikhala Mboni za Yahova. Ndipo pambabatizidwa wanthu wakukwanira 5.300 mdzinga uli-wense.

15. Fotokozani momwe basa lakupalizira likuyendera patsogolo, nthawe zathu zino.

¹⁵ Basa lathu lakupalizira linkuyenda patsogolo. Mabukhu yathu yakufotokoza Bibliya, tsapano yankugumanika mu bzirewedwe bzakupitirira 700. Revista ya Nsanza ya Mulindiri ndiyo yomwe imbagawiridwa kwa wanthu pa dziko la pansi kuposa revista iri-yense. Ndipo revista imweyi imbakonzedwa mwezi uli-wense pacidindidwa makopiya yakupitirira 52.000.000 mu bzirewedwe bzakukwana 247. Makopiya yakupitirira 200.000.000 ya bukhu lathu la kupfunzisira wanthu Bibliya, lakuti: Kodi Bibliya Limbapfunzisa Ciyani Maka-maka? yambadindidwa mu bzirewedwe bzakupitirira 250.

16. N’ciyani cinkuthandiza kuti bzinthu bzifambe bwino mu gulu la Yahova?

¹⁶ Basa lathu lakupalizira linkuyenda patsogolo nsiku zino ni thangwe ra cikhulupiro cathu kwa Mulungu na kubvera kwathu mitemo ya m’Bibliya lomwe lidafuliziridwa na Yahova. (1 Wat. 2:13) Cinthu cakudabwisa n’cakuti wanthu wa Yahova bzinthu bzikuwafambira bwino napo ambawengedwa acitsutsidwa na Sathani omwe ni ‘mulungu wa mkonzedwe uno wa bzinthu.’​—2 Wak. 4:4.

LATIZANI LUFOYI KWA ANZANU NTHAWE ZENSE

17, 18. Kodi atumiki wa Yahova an’funika kumbawawona tani wanthu womwe ambatumikira lini Mulungu?

¹⁷ Kodi atumiki wa Yahova an’funika kumbawawona tani wale womwe ambanamata lini Mulungu wacadidi? Tikakhala tiri mu utumiki, wanthu ambatitambira mu njira zakusiyana-siyana. Winango ambatetekera mafala yathu koma winango ambaticitira bzinthu bzakuipa. Tsono, bziribe basa bzomwe wanthu ambaticitira, thangwe Fala la Mulungu limbatiuza bza khalidwe lomwe atumiki wa Mulungu wan’funika kukhala nalo. Iro limbati: ‘Mafala yanu nthawe zense yan’funika kukhala yabwino, yakuikhidwa munyu, kuti mudziwe momwe mungatawirire ali-wense.’ (Wakol. 4:6) Tikambafotokozera munthu ali-wense bza cidikhiro cathu, tin’funika kucita bzimwebzo ‘mwakuderekha, na mwaciremekezo cikulu,’ thangwe rakuti tina lufoyi na wanthu anzathu.​—1 Pe. 3:15.

¹⁸ Napo wanthu ambakhala waukali tikambawapalizira ndipo winango ambaticitira bzinthu bzabwino, koma ifepano timbapitiriza kuwalatiza lufoyi. Timbatewezera Jezu pomwe adalewa kuti: ‘Pomwe akhatukwanidwa, iye alibe kutukwanambo. Pomwe akhabonera alibe kugopsa, koma akhabzipereka kwa ule womwe ambatonga mwakulungama.’ (1 Pe. 2:23) Napo tikakhala na akristau anzathu ayai wanthu winango, tin’funika kukhala wakubzicepswa ticiphatisa basa malango aya: ‘Leka kubwezera cakuipa pa cakuipa ayai kutukwana na kutukwana, koma m’mbuto mwace mumbawasimbe, thangwe mudacemeredwera njira imweyi, kuti mudzatambire bzisimbo.’​—1 Pe. 3:8, 9.

19. Kodi Jezu adalewa ciyani pa nkhani ya momwe tingakhalire na anyamadulanthaka wathu?

¹⁹ Thangwe ra kupitiriza kukhala wakubzicepswa, atumiki wa Yahova ambabvera mtemo wakufunika kwene-kwene womwe Jezu adawapasa. Pa nkhani yace ya Phiri iye adalewa kuti: ‘Imwepo mudabva bzomwe bzidalewedwa kuti: ‘mbafunani mwanzanu, ndipo mbawengani nyamadulanthaka wanu.’ Koma ine ndikukuuzani kuti: Pitirizani kufuna anyamadulanthaka wanu mucipembererambo womwe ankukuzunzani. Kuti mulatize kukhala wana wa Babanu omwe ali Kudzulu. Pakuti iye ambalicosa dzuwa lace, kulicosera wanthu wabwino na wakuipa; ndipo ambaibvumbisa nvula yace, kuibvumbisira anyakulungama na anyakusaya kulungama.’ (Mat. 5:43-45) N’cadidi, ifepano womwe ndife atumiki wa Mulungu tin’funika kupfunza ‘kumbafuna anyamadulanthaka wathu,’ tiribe nabzo basa bzomwe iwo ambatikumbukira.

20. Thangwe ranyi kufuna Mulungu na wanthu anzathu kun’dzapitiriza mu dziko lipsa? (Onani cithunzi-thunzi cakuyambirira.)

²⁰ Mu mbali zense za moyo wawo, atumiki wa Yahova ambafunika kulatiza lufoyi kwa Yahova na anzawo pa makhalidwe na bzicito bzawo. Mwa ciratizo, napo wanthu winango alambe kubva bzipsa bzabwino bza Umambo, ifepano timbapitiriza kuwalatiza lufoyi akakhala an’funika thandizo. Mpostolo Paulo adanemba kuti: ‘Wanthumwe lekani kukhala na mangawa na munthu ali-wense, koma mumbafunane pakuti omwe ambafuna munthu mwanzace wateweza cakutonga. Thangwe bzakutonga bzalewa kuti, ‘Leka kucita upombo, Leka kupha munthu, Leka kuba, Leka kusirira kwa nsanje’, ndipombo cakutonga ciri-cense comwe ciripo, cigwatho cace ciri m’mafala yakuti. ‘Umbafune mwanzako ninga momwe umbabzifunira wekha.’ Lufoyi limbalimbisa lini munthu kucitira bzakuipa mwanzace, na tenepo cakutonga cimbakwanisidwa mu lufoyi.’ (War. 13:8-10) Ifepano Mboni za Yahova timbalatiza lufoyi lacadidi mu dziko lakusaya ciphatano, la ciwembo, na lakuipa lomwe linkutongedwa na Sathani. (1 Ju. 5:19) Pambuyo pa Sathani na madimonyo yace pabodzi na wanthu wense wakupanduka akadzacosedwa, mabasa yense yomwe yan’dzacitika pa dziko la pansi mu dziko lipsa, yan’dzacitidwa mwa lufoyi. Bzin’dzakhala bwino kwene-kwene pomwe wanthu wense womwe wan’dzakhala pa dziko la pansi an’dzafuna Yahova pabodzi na wanthu anzawo!

[Cithunzi-thunzi pa tsamba 24]

Fala la Mulungu limbalatiza momwe tingakhalire na moyo wakukondwa m’banja (Onani ndime 6, 7)