Mibvunzo Yakucokera kwa Anyakuwerenga

Pomwe Sathani adauza Eva kuti angadafa lini angadadya cisapo ca muti wakudziwisa bzabwino na bzakuipa, kodi iye akhauza Evayo nzeru yomwe yadzala ntsiku zino yakuti moyo umbafa lini?

Bzikuwoneka kuti ne. Sathani alibe kuuza Eva kuti angadadya cisapo cakuletsedwa, angadakhala ninga kuti Eva wafa ndipo alibembo kumuuza kuti mbali inango yakusaya kuwoneka (yomwe winango ntsiku zino ambailewa kuti imbafa lini) ingadapitiriza kukhala na moyo mbuto inango. M’mbuto mwace, mwakuphatisa basa nyoka, Sathani adatsimikizira Eva kuti angadadya cisapo ca muti wakuletsedwa ule, ‘angadafa lini.’ Koma angadapitiriza kukhala na moyo wa kundendemerana na Mulungu.—Ciyambo 2:17; 3:3-5.

Penu cipfunziso cakunama cakulewa kuti moyo umbafa lini, ciribe kuyambira mu Edeni, tsono ni lini pomwe ico cidayamba? Tikudziwa lini bwino cadidi cace. Bzomwe tin’dziwa mpsakuti kunamata kwentse kwakunama, kudapfudzidwa pa nthawe ya Cigumula ca Madzi mu ntsiku za Nowa. Ndipo palibe nzeru ne ibodzi ya cipembedzo cakunama yomwe idapulumuka pa Cigumula ca Madzi. Koma omwe adapulumuka ni atumiki wakukhulupirika wa Mulungu, omwe ni Nowa pabodzi na banja lace.

Bzimwebzi bzikulatiza kuti cipfunziso comwe ciripo ntsiku zino cakuti moyo umbafa lini, cidayamba kuwoneka pambuyo pa Cigumula ca Madzi. Pomwe Mulungu adacitisa wanthu kusaya kubvesesana bzirewedwe pa Babeli, ‘aciwabalalisa pa mbutoyo acikakhala ku mbuto zakusiyana-siyana za dziko lentse la pantsi,’ kulewa mwakusaya kupenukira, wanthuwo adayenda ku mbutozo na nzeru yakuti munthu ana moyo omwe umbafa lini. (Ciyambo 11:8, 9) Koma bziribe basa kuti cipfunziso cakunamaci cidayamba lini, ifepano timbapenukira lini kuti ‘baba wa gunkha,’ Sathani Dyabu, ndiye akucitisa ndipo ambakomedwa kwene-kwene akawona kuti gunkhali likumwazika pa dziko lentse la pantsi.—Juwau 8:44.