Cadidi Cakulewa bza Tsogolo

Jezu adafotokoza bzomwe bzingatithandize kudziwa kuti ‘Umambo bwa Mulungu bwafendera.’ (Luka 21:31) Iye adalewa kuti pangadacitika nkhondo, bziteke-teke, njala na matenda yakusiyana-siyana, ndipo bzimwebzi bzikucitikadi ntsiku zino.—Luka 21:10-17.

Bibliya limbatiuza kuti cinthu cibodzi comwe cingadacitika mu ‘ntsiku zakumalizira’ za utongi bwa wanthu, ni makhalidwe yakuipa yakulatizidwa na wanthu. Mungawone makhalidweyo pa 2 Timotio 3:1-5. Mukawona makhalidwe na bzomwe wanthu akucita, imwepo mun’tawiriza kuti mafala ya Bibliyaya, yakubverana na bzomwe bzikucitika ntsiku zino.

Kodi bzimwebzi bzikuthandauza ciyani? Bzikuthandauza kuti nthawe yakuti Umambo bwa Mulungu bucinje bzinthu pano pa dziko la pantsi, na kucitisa moyo wa wanthu kukhala wabwino, iri pafupi kwene-kwene. (Luka 21:36) Bibliya limbafotokoza bzinthu bzizinji bzabwino bzomwe Mulungu an’dzacita pa dziko la pantsi, na bzomwe an’dzacitira wanthu omwe an’dzakhala m’mwemo. Onani bziratizo bzakucepa.

BOMA LABWINO

‘[Jezu] adapasidwa utongi, na ukulu, na umambo, kuti mbumba zentse, na madzinza yentse, na mitundu ya bzirewedwe bzentse imbamutumikire. Utongi bwace ni utongi bwamuyaya, bomwe cipo bucidzamala; ndipo umambo bwace bun’dzapfudzika lini.’—DANYERI 7:14.

Thandauzo lace: Imwepo mungakhale na moyo wabwino mwa kutongedwa na boma la Mulungu na mtongi wace Jezu Kristu, omwe an’dzatonga dziko lentse la pantsi.

THANZI LABWINO

‘Palibe munthu omwe an’dzakhala mdzikomo an’dzalewa kuti: “Ndikuduwala.”’—ZAIYA 33:24.

Thandauzo lace: Imwepo mun’dzaduwala lini pomwe ne kubonera thangwe ra kupunduka kwa mtundu uli-wentse; imwepo mun’dzakhala na moyo wamuyaya.

MTENDERE WA PA DZIKO LENTSE

‘[Mulungu] akuletsa nkhondo mpaka kumamaliziro ya dziko la pantsi.’—PSALYMO 46:9.

Thandauzo lace: Pan’dzawoneka lini pomwe nkhondo, ndipo wanthu an’dzabonera lini pomwe thangwe ra mabvuto yomwe yambabwera thangwe ra nkhondoyo.

DZIKO LA PANTSI LIN’DZADZALA NA WANTHU WABWINO

‘Anyakuipa an’dzawoneka lini pomwe . . . Ndipo anyakulungama an’dzatambira dziko la pantsi.’—PSALYMO 37:10, 11.

Thandauzo lace: Pan’dzawoneka lini pomwe wanthu wakuipa, koma wanthu wakubvera Mulungu okha-okha.

DZIKO LENTSE LA PANTSI LIN’DZAKHALA PARAIZO

‘[Wanthu] an’dzamanga nyumba, acikhala m’mwemo; an’dzalima minda ya mipesa, acidzadya bzisapo bzace.’—ZAIYA 65:21, 22.

Thandauzo lace: Dziko lentse la pantsi lin’dzakhala labwino na lakudekeza. Mulungu an’dzatawira mipembo yathu kuti cakulinga cace cicitike ‘pantsi pano.’—Mateu 6:10.