Pomwe Mulungu akhatonga dziko la pantsi, cirengedwe centse cikhali cakuphatana ndipo cikhali pa mtendere

Thangwe Ranyi Tikufunikira Umambo bwa Mulungu?

Pomwe wanthu wakuyambirira adayamba kukhala pano pa dziko la pantsi, Mulengi wathu, Yahova, ndiye yekha basi omwe akhali Mtongi. Iye akhatonga mwalufoyi. Yahova adakonza zunde la Edeni yomwe ikhali mbuto yakudeka kwene-kwene kuti wanthu akhale m’mwemo. Ndipo iye adapasambo wanthuwo bzakudya bzakuti kutapa kutaya na basa lakufunika kuti alicite. (Ciyambo 1:28, 29; 2:8, 15) Wanthuwo angadapitiriza kubvera utongi bwa Mulungu, angadakhala pa mtendere.

Adamu adaphata cisapo comwe adaletsedwa kudya comwe apasidwa na Eva. — Wanthu wakuyambirira adalamba kutongedwa na Mulungu

Bibliya limbalewa bza anjo wakupanduka wakucemeredwa, Sathani Dyabu, omwe adalewa kuti Mulungu ni mtongi lini wabwino. Sathani adacitisa wanthu kubziwona kuti angakhale wakukondwa kwene-kwene akasaya kutongedwa na Mulungu. Mpsakupasa ntsisi kuti abereki wathu wakuyambirira, Adamu na Eva adakhulupira gunkha limweri, mwa kutewezera Sathani acipandukira Mulungu.—Ciyambo 3:1-6; Cibvumbulutso 12:9.

Pakuti Adamu na Eva adalamba kubvera Utongi bwa Mulungu, iwo adaluza Paraizo na cidikhiro cakukhala na moyo wakusaya kumala. (Ciyambo 3:17-19) Bzomwe iwo adasankhulabzi bzidatokonya wana wawo omwe adadzabereka na kupita kwa nthawe. Bibliya limbalewa kuti thangwe ra kusaya kubvera kwa Adamu, ‘pikado idapita m’dziko thangwe ra munthu m’bodzi, idabwerambo infa thangwe ra pikado.’ (Waroma 5:12) Pikado idabweresambo bvuto linango iri: ‘Munthu ambapweteka munthu mwanzace pakumutonga.’ (Mpalizi 8:9) Kulewa kwinango tingati, mabvuto yambawanda wanthu akambatongana.

POMWE WANTHU ADAYAMBA KUTONGANA

Nimurodi adaima mwakubzikuza. Ndipo m’mambuyo mwace muna wanthu omwe akucita basa lakumanga-manga. — Nimurodi adapandukira Yahova

Bibliya limbafotokoza kuti munthu wakuyamba omwe adatonga wanthu ni Nimurodi. Iye adapanduka ndipo adalatiza kuti akhafuna lini utongi bwa Yahova. Ndipo kuyambira mu nthawe ya Nimurodi mpaka pano, atongi wa wanthu ntsiku zino akuphatisa basa utongi bwawobo mwakuphonyeka. Magole 3.000 mbuyomu, Mambo Salomau adanemba kuti: ‘Ndidawona misozi ya wanthu wakusunama, ndipo pakhalibe nyakuwatsangalaza. Anyakuwapondererawo akhana mphanvu.’—Mpalizi 4:1.

Ntsiku zino bzinthu bzikucitikambo ninga momwe bzikhaliri mu nthawe ya Mambo Salomau. Mu 2009, bukhu la bungwe la Nações Unidas lidalewa kuti “libodzi mwa mathangwe makulu-makulu yomwe yakubweresa mabvuto pa dziko la pantsi ni maboma yakuipa.”

BZOMWE BZIN’DZACITIKA NA MABOMA YOMWE YALIPOYA!

Wanthu akufunikira boma labwino na katongedwe kanango. Ndipo bzimwebzi ndibzo bzomwe Mulengi wathu adalewa kuti an’dzacita!

Cinthunzi-thunzi: Bzomwe bzikucitika thangwe ra utongi bwa wanthu. 1. Mkazi winango wa ku Asia adakhala pa mbuto yakupswipa pomwe adaphata mwana wace omwe akulira. 2. Mwamuna wacikulire omwe akuduwala adagona pa kama m’nyumba ya ulapi. 3. Acikunda akulizira nfuti zawo ku nkhondo. 4. Wanthu akukuwa mwakukalipa ndipo adaphata bzikwangwani m’manja. 5. Mai na mwana wace alikunja kwa nyumba yawo ndipo agumana janera yawo idasweka. 6. Mzinda wakudzala na utsi bwa m’mafabrika ndipo una mafiyo mazinji ya maluju. — Palibe ne boma libodzi labwino lakwanisa kumalisa mabvuto makulu-makulu yomwe wanthu akugumana nayo

Mulungu an’dzakhazikisa Umambo, ayai boma, lomwe lin’dzapita m’mbuto mwa maboma yentse ya wanthu, ndipo iro lin’dzakhala mpaka kale-kale. (Danyeri 2:44) Bumwebu ni Umambo bomwe wanthu azinji ambakumbira akakhala akupemba. (Mateu 6:9, 10) Koma Mulunguyo ndiye lini an’dzatonga mu Umambo bwacebo. M’mbuto mwace, iye adasankhula munthu omwe adakhala kale pano pa dziko la pantsi kuti an’dzakhale Mtongi. Kodi Mulungu adasankhula mbani?