Khalani Pomwe pa Uxamwali na Yahova

GOLE liri-lentse, mabira mazinji yakufunika yambabwerera mu gwere lacikristau. Ndokumbukirani “cikondweso cikulu” comwe cimbakhala ciripo kudzulu munthu m’bodzi na m’bodzi akabwerera m’gwere! (Luka 15:7, 10) Penu imwepo mwabwezeresedwa, khulupirani kuti Jezu, anjo na Yahova ali kukomedwa thangwe ra kukuwonani kuti mwabwerera mu gwere lacikristau. Napo kuti mwakhala pomwe pa uxamwali na Yahova, imwepo mungagumane na bzineso. Kodi bzinango mwa bzinesobzo mpsiponi, ndipo n’ciyani cingakuthandizeni?

BZINESO BZOMWE MUNGAGUMANE NABZO

Abale na mpfumakazi azinji ambabzibva kuti alibe mphanvu, napo pambuyo pa kubwezeresedwa m’gwere. Pinango imwepo mumbabvesesa momwe Mambo Davide adabvera. Napo pambuyo pa kulekereredwa pikado zace, iye adalewa kuti: ‘Bzakuphonya bzangu bzandiwandira.’ (Salimo 40:12; 65:3) Munthu omwe wabwerera kwa Yahova angamale magole mazinji akubzipasa mulandu ayai kubva manyazi. Mpfumakazi Isabelle adamala magole yakupitirira 20 ali kunja kwa gwere.a Iye adati: “Bzikhali bzakunesa kwene-kwene kubvuma kuti Yahova wandilekerera.” Imwepo mukawofoka, uxamwali bwanu na Yahova bun’dzamala mphanvu. (Mimwani 24:10) Citani nyongo kuti bzimwebzi bzileke kukucitikirani.

Winango ambacita thupo kuti angakwanise lini kucita cinthu ciri-centse cakufunikira kuti akhale pomwe pa uxamwali na Yahova. Pambuyo pa kubwezeresedwa, Antoine adalewa kuti: “Ndikhadayebwa bzinthu bzizinji bzomwe ndidapfunza ayai kucita pomwe ndikhali Mboni ya Yahova.” Nzeru zimwezi zimbacitisa wanthu winango kuzeza kucita bzomwe angakwanise pa kutumikira Yahova.

Mwa ciratizo, penu nyumba ya munthu yadzongeka kwene-kwene na conzi, iye angabve utofu akakumbukira nthawe yomwe angamale kuti akonze pomwe nyumbayo. Mpsibodzi-bodzimbo, penu uxamwali bwanu na Yahova bwadzongeka thangwe ra pikado ikulu yomwe mudacita, imwepo mungakumbuke kuti mun’funika kucita nyongo kuti mukhale pomwe xamwali wa Yahova. Tsono imwepo mungacite lini mwekha bzimwebzi.

Yahova akutiuza kuti: ‘Bwerani kuno wanthumwe, tidzacezerane nkhani zathu.’ (Zaiya 1:18) Imwepo mudacita kale bzizinji kuti ‘mulungamize njira zanu’ mwakubverana na bzomwe Yahova ambafuna. Yahova ambakomedwa na nyongo yomwe mukucita. Thangwe ra bzimwebzi, Yahova an’dzakwanisa kulatiza Sathani kuti iye ni nyakunama!—Mimwani 27:11.

Mwakucita bzimwebzi, imwepo mwakhala wakufendererana na Yahova, ndipo iye akulewa kuti an’dzakufendereranimbo. (Tiyago 4:8) Abale ambakomedwa kukuwonani kuti mwabwerera m’gwere. Tsono imwepo mun’funika kucita pomwe bzinthu bzinango. Imwepo mun’funika kupitiriza kulimbisa uxamwali bwanu na Baba wanu, Yahova. Kodi mungacite tani bzimwebzi?

KHALANI NA BZAKULINGA BZOMWE MUNGABZIKWANIRISE

Yezerani kukhala na bzakulinga bzomwe mungabzikwanirise. Pinango-pentse imwepo mukadakumbukira bzomwe mudapfunza pakuyamba pakulewa bza Yahova na bzinthu bzomwe iye akufuna kudzacita kutsogolo. Koma imwepo mun’funika kuyamba pomwe kucita bzinthu ninga: kupalizira nthawe zentse, kumbagumanika pa mitsonkhano na kumbaceza na abale na mpfumakazi zanu. Mbatiwoneni bzakulinga bzinango.

Mbacezani na Yahova nthawe zentse. Timbabvesesa kuti kundokhalira kubzipasa mulandu nthawe zentse kungakutaziseni kumbapemba kwa iye. (Aroma 8:26) Napo bziri tenepo, “pitirizani kumbapemba” kwa Yahova na kumufotokozera kuti mukufuna kwene-kwene kukhala xamwali wace. (Aroma 12:12) Andrej adalewa kuti: “Ndikhabzipasa mulandu ndipo ndikhabva manyazi. Tsono ndikambapemba ndikhambabzibva bwino. Ndikhabzibva kuti ndina mtendere mu mtima mwangu.” Penu imwepo mukudziwa lini bzomwe mungalewe mu mpembo, kumbukirani mipembo ya Mambo Davide, yomwe adaicita pambuyo pa kukungula, yomwe imbagumanika pa Masalimo 51 na 65.

Mbapfunzani Bibliya nthawe zentse. Bzimwebzi bzin’dzakuthandizani kukhala na cikhulupiro cakulimba ndipo bzin’dzakuthandizanimbo kukulisa lufoyi lanu kuna Yahova. (Salimo 19:7-11) Felipe adalewa kuti: “Ndidawofoka ndicisiya Yahova thangwe ra kusaya kuteweza ndondomeko ya kuwerenga Bibliya ntsiku zentse na kucita pfunziro langu lapandekha. Ndikhafuna lini kukalipisa pomwe Yahova, tenepo ndidatsimikiza kumbacita pfunziro langu lapandekha nthawe zentse.” Imwepo mungacitembo bzibodzi-bodzibzi. Penu mun’funa kuthandizidwa kuti mudziwe nkhani zomwe mungapfunze pa pfunziro lanu lapamwekha, kumbirani Mkristau wakukhwima kuti akuthandizeni.

Yambani pomwe kucita uxamwali na abale wanu. Winango omwe adabwerera m’gwere ambakhala na thupo kuti anzawo aniwawona lini bwino. Larissa adalewa kuti: “Ndikhabva manyazi kwene-kwene. Ndidabzibva kuti ndidacita bzinthu bzomwe bzidawawa abale na mpfumakazi. Ndidakhala na nzeru zimwezi nthawe ikulu.” Tsimikizani kuti akulu wa gwere pabodzi na abale wakukhwima mbakukonzeka kukuthandizani kuti mukhale pomwe pa uxamwali na Yahova. (Onani kwadru yakuti “Bzomwe Akulu Angacite.”) Iwo ambakomedwa kuti mwabwerera ndipo ambafuna kuti bzinthu bzikufambireni bwino!—Mimwani 17:17.

Kodi n’ciyani comwe cingakuthandizeni kuti mubverane na gwere? Mbayendani ku mitsonkhano na abale na mpfumakazi zanu ndipo mbapalizirani nawo pabodzi nthawe zentse. Kodi bzimwebzi bzin’dzakuthandizani tani? Felix adati: “Abale akhafunisisa kuti ndibwerere kwa Yahova. Ndidabzibva kuti nimbafunidwa. Iwo adandithandiza kucita pomwe mbali ya gwere, adandithandiza kubzibva kuti Yahova andilekerera na kundithandizambo kuwona kuti ningapitirize kutumikira Yahova.”—Onani kwadru yakuti “Bzomwe Mun’funika Kucita.”

LEKANI KUBWERERA M’MBUYO!

Sathani an’dzapitiriza “kukuyezani” kuti mutazire kukhala pomwe pa uxamwali na Yahova. (Luka 4:13) Khalani wakukonzeka kulimbisa uxamwali bwanu na Yahova.

Pakulewa bza mabira yace, Yahova akulewa kuti: ‘Nin’dzanyang’ana bira wakutaika, nin’dzabweresa bira wakutsakalira. Bira wakupwetekeka nin’dzamanga bzironda bzace, ndipo nin’dzapoza ule omwe akuduwala.’ (Zakiyeri 34:16) Yahova adathandiza kale wanthu azinji omwe akhadacosedwa kuti akhale naye pomwe pa uxamwali. Khulupirani kuti iye akufuna kukuthandizani kuti mupitirize kukhala naye pa uxamwali bwakulimba.

Bzomwe Akulu Angacite

Akulu wa gwere ana udindo bukulu kwene-kwene bwakuthandiza wanthu omwe abwezeresedwa kuti akhale pomwe pa uxamwali na Yahova. Onani bzomwe iwo angacite kuna wanthu omwe abwezeresedwa.

Atsimikizireni. Mpostolo Paulo akhadziwa kuti nyapikado omwe wakungula angakundidwe na “msunamo ukulu kwene-kwene.” (2 Akolinto 2:7) Iye angabzipase mulandu ndipo angabzibve kukhala wakusaya mphanvu. Paulo adapereka malango kuna gwere acilewa kuti: “Imwepo mun’funika kumulekerera tsapano na mtima wentse na kumutsangalaza.” Wanthu omwe abwezeresedwa m’gwere ambafuna kutsimikiziridwa kuti Yahova na abale wawo wauzimu ambawafuna kwene-kwene. Akulu wa gwere akambawatenda na kuwathandiza, bzin’dzacitisa kuti iwo aleke kubwerera m’mbuyo.

Mbapembani nawo pabodzi. “Mpembo wakudandaulira wa munthu wakulungama una mphanvu kwene-kwene.” (Tiyago 5:16) Larissa, omwe wafotokozedwa kale ule, adalewa kuti: “Inepano ndidafotokozera akulu wa gwere bza mantha na kupenukira komwe ndikhanako. Iwo adandipempherera ndipo adapemba nande. Ndipo ndidabvesesa kuti iwo akhalibe kukalipa nande. Iwo akhafuna kundithandiza kuti ndikhale pomwe pa uxamwali na Yahova.” Theo adalewa kuti: “Mipembo ya akulu idandithandiza kuwona kuti Yahova ambandifunadi, ndipo ambawona bzinthu bzabwino bzomwe nimbacita, sikuti bzakuipa bzokha-bzokha.”

Khalani axamwali wawo. Wanthu omwe abwezeresedwa ambafuna kucita uxamwali na abale wa m’gwere. M’bale winango wakucemeredwa Justin adalewa kuti: “Mukakhala na mpata mbayendani nawo mu upalizi, ndipo mbayendani kukawazungira kumui kwawo. Mpsabwino kwene-kwene kucita nawo uxamwali!” Ndipo mkulu munango wa gwere wakucemeredwa Henry adalewambo kuti: “Abale winango m’gwere akawona kuti akulu wa gwere akucita uxamwali na munthu omwe wabwezeresedwa, iwo ambayambambo kucita naye uxamwali.”

Athandizeni kupfunza. Xamwali wakukhwima mwauzimu angathandize munthu omwe wabwezeresedwa kuti ayambe pomwe kupfunza nthawe zentse. Mkulu munango wa gwere wakucemeredwa Darko adalewa kuti: “Nimbakomedwa kuwafotokozera bzomwe nimbagumana pa pfunziro langu lapandekha na kuwalatiza momwe nimbakhalira wakukondwa pomwe ndikupfunza Bibliya. Nimbacitambo makonzedwe yakuti nimbapfunze nawo nkhani zinango zakulimbikisa.” Clayton, omwe ni mkulu wa gwere, adalewa kuti: “Inepano nimbawalimbikisa kuti ambawone nkhani za wanthu wa m’Bibliya omwe adagumanambo na madede ninga yomwe iwo akugumana nayo, na bzomwe bzingawathandize kumalisa madede yawoyo.”

Khalani makabusa wawo. Wanthu omwe abwezeresedwa ambawona akulu wa gwere ninga ayeruzi. Tsono, iwo an’funika kuwona akuluwo ninga amakabusa. (Jeremiya 23:4) Khalani wakufulumiza kubva na wakukonzeka kutenda. Mbacezani nawo nthawe zentse. Onani bzomwe mkulu munango wa gwere wakucemeredwa Marcus ambacita akakhala akucita ulendo bwa ubusa. Iye adati: “Ifepano timbawalatiza nfundo za Bibliya, ndipo timbawatsimikizira kuti timbakomedwa thangwe ra nyongo yomwe adailatiza pakufuna kubwerera kwa Yahova ndipo Yahova ambakomedwambo. Tikamala kuceza nawo timbawauza ntsiku yomwe tin’dzawazungira pomwe.”

a Madzina ya mu nkhani ino yacinjidwa.