“Pitirizani Kumbalimbikisana”

1. Kodi ni basa liponi lakufunika lomwe tentsenefe tin’funika kulicita? (1 Atesalonika 5:11)

KODI gwere lanu limbatsonkhana mu Nyumba ya Umambo inovu ayai yomwe yakonzedwa papsa? Penu bziri tenepo, imwepo mudakomedwa kwene-kwene pomwe mudatsonkhana kakuyamba mu Nyumba ya Umambo inovuyo. Ndipo pinango mukhacita kucoka misozi pomwe mukhaimba nyimbo yakuyamba pa mitsonkhanoyo, thangwe ra kukomedwa. Nyumba ya Umambo ikamangidwa bwino imbatumbizisa Yahova. Tsono pana cinthu cinango comwe cimbatumbizisa kwene-kwene Yahova kuposa kumanga Nyumba za Umambo. Kodi cinthuco n’ciyani? Ni kulimbikisa abale na mpfumakazi zathu. Basa limweri ndakufunika kwene-kwene thangwe timbalimbikisa wanthu omwe ambabwera kudzatsonkhana nafe mu Nyumba za Umambozo. Mpostolo Paulo akhakumbukira bzimwebzi pomwe adalewa mafala yomwe yali pa vesi lomwe likutsogolera nkhani yathuyi, lomwe ni 1 Atesalonika 5:11. —  Werengani.

2. Kodi n’ciyani comwe tin’pfunza mu nkhani ino?

² Mpostolo Paulo akhadziwa bwino kulimbikisa Akristau anzace. Iye akhawabvera ntsisi. Mu nkhani ino, tin’pfunza bzomwe iye adacita pakuthandiza abale na mpfumakazi zace kuti (1) apirire mabvuto, (2) ambabverane na anzawo, na (3) kuti akhale na cikhulupiro cakulimba kwa Yahova. Ndipo tiniwonambo bzomwe tingacite kuti timutewezere kuti timbakwanise kulimbikisa abale na mpfumakazi zathu ntsiku zino.  —  1 Akolinto 11:1.

PAULO ADATHANDIZA ABALE NA MPFUMAKAZI ZACE KUTI AMBAPIRIRE MABVUTO

3. Thangwe ranyi tingalewe kuti Paulo akhali wacikati-kati?

³ Paulo akhafuna kwene-kwene abale na mpfumakazi zace. Iye akhabvera ntsisi abale omwe akhagumana na mabvuto, thangwe akhadagumanambo kale na mabvuto. Pa nthawe inango Paulo akhalibe kobiri, ndipo adafunika kuphata basa kuti agumane bzinthu bzakufunika pa moyo wace na kuthandizambo Akristau anzace. (Mabasa 20:34) Iye akhaphata basa lakukonza matendi. Pomwe adafika ku Kolinto, iye adaphata basa limweri pabodzi na Akila na Prisila. Tsono iye akhambapalizira kwa Adjuda na Agerego pa “ntsiku zentsene za Sabudu.” Pomwe Timotio adafika, “Paulo adayamba kukhala wakutanganika kwene-kwene na basa lakupalizira fala.” (Mabasa 18:2-5) Paulo alibe kuyebwa kuti cinthu cakufunika kwene-kwene pa moyo wace cikhali kutumikira Yahova. Iye akhaphata basa mwanyongo kuti agumane bzinthu bzakufunika pa moyo wace na kucita utumiki, ndipopa adakwanisa kulimbikisa abale na mpfumakazi zace kuti ambacitembo bzibodzi-bodzibzo. Iye adawakumbusa kuti an’funika lini kubvuma kuti thupo lakufuna kudyesa banja lawo na bzinthu bzinango bziwatazise kutumikira Yahova, comwe ni ‘cinthu cakufunika kwene-kwene.’  —  Afilipi 1:10.

4. Kodi Paulo na Timotio adathandiza tani Akristau kupirira cizunzo?

⁴ Pomwe gwere lacikristau lidakhazikisidwa ku Tesalonika, Akristau anovu adayamba kugumana na mabvuto. Bzimwebzi bzidacitika pomwe mthithi wa wanthu udayamba kunyang’ana Paulo na Sila kuti awacite kuipa. Tsono pomwe adawasaya, “adakwekweta . . . abale winango ndipo adayenda nawo kwa atsogoleri wa mu mzindamo acimbakuwa kuti: ‘Wanthu wentsenewa akucita bzinthu mwakupitana na malamulo ya Seza.’” (Mabasa 17:6, 7) Kodi mukukwanisa kuwona kuti Akristau anovu wale adabva tani pomwe adawona bzimwebzi bzikuwacitikira? Bzimwebzi bzidawawawa kwene-kwene, ndipo pinango bzingadawacitisa kusiya kucita nyongo pakutumikira Yahova. Tsono Paulo akhafuna lini kuti bzimwebzi bziwacitikire napo kuti iye pabodzi na Sila adacoka mu mzindamo. Ndipopa adanyang’ana manera kuti apitirize kuthandiza Akristau anovuwo. Iye adauza Atesalonikawo kuti: “Tidatuma Timotio, m’bale [wathu] . . . kuti adzalimbise cikhulupiro canu na kukutsangalazani, kuti munthu ali-wentse pakati panu aleke kutepa na matsautso yamweya.” (1 Atesalonika 3:2, 3) Pomwe Paulo adatumiza Timotio, pinango Timotioyo akhadazunzidwambo kale mu mzinda wa kwawo ku Listra. Pakuti adawona momwe Yahova adaphatisira basa Paulo kuti alimbikise abale na mpfumakazi wa ku Listra, iyembo adakwanisa kuthandiza abale na mpfumakazi wa ku Tesalonika wale na kuwatsimikizirambo kuti bzinthu bzingadawafambira bwino.  —  Mabasa 14:8, 19-22; Ahebereu 12:2.

5. Kodi m’bale Bryant adathandizidwa tani na mkulu wa gwere munango?

⁵ Kodi n’ciyani cinango comwe Paulo adacita kuti alimbikise Akristau anzace? Pomwe iye pabodzi na Barnaba adazungira kaciwiri mizinda ya Listra, Ikoniyo na Antiyokiya, “adaikha akulu mu gwere liri-lentse.” (Mabasa 14:21-23) Amuna omwe adasankhulidwawo adakwanisa kutsangalaza bwino gwere ninga momwe ambacitira akulu wa gwere ntsiku zino. Onani bzomwe m’bale munango wakucemeredwa Bryant adalewa. Iye adati: “Pomwe ndikhana magole 15, pai wangu adacoka pamui ndipo mai wangu adacosedwa m’gwere. Ndidawona kuti ndiri candekha ndipo ndidagoboka m’mabondo.” N’ciyani cidathandiza Bryant kupirira mabvuto yomwe adagumana nayo? Iye adalewa kuti: “Mkulu m’bodzi wa gwere wakucemeredwa Tony, akhaceza nande pa mitsonkhano na mbuto zinango. Iye adandifotokozera nkhani za wanthu omwe adagumana na mabvuto koma adapitiriza kukhala wakukondwa. Ndipo adandiwerengera Salimo 27:10, acindifotokozerambo nkhani ya Ezekiya, omwe adatumikira Yahova mwakukhulupirika napo kuti pai wace adacita bzinthu bzakuipa.” Kodi bzomwe Tony adacitabzi bzidathandiza tani Bryant? Bryant adati: “Ndidayamba kucita utumiki bwa nthawe zentse thangwe rakuti m’bale Tony adandilimbikisa.” Akulu, mbawonani abale na mpfumakazi m’gwere lanu omwe ali ninga Bryant, omwe akufunikira mafala ya mtsangalazo.  —  Mimwani 12:25.

6. Kodi Paulo adaphatisa tani basa nkhani za moyo wa atumiki wa Yahova wakale-kale kuti alimbikise abale na mpfumakazi zace?

⁶ Mpostolo Paulo adakumbusa Akristau anzace kuti ‘mtambo ukulu wa mboni’ udakwanisa kupirira mabvuto yakusiyana-siyana na thandizo la Yahova. (Ahebereu 12:1) Paulo akhadziwa kuti kukumbukira moyo wa atumiki wa Yahova wakale-kale, omwe adapirira mabvuto yakusiyana-siyana, kungadathandiza abale wace wacikristau kukhala wanthu wakukhwimika na kupitiriza kumbakumbukira “mzinda wa Mulungu wamoyo.” (Ahebereu 12:22) Mpsibodzi-bodzimbo na nthawe zathu zino. Tentsenefe timbalimbikisidwa kwene-kwene tikambakumbukira momwe Yahova adathandizira Gidiyoni, Baraki, Davide, Samuyeri na wanthu azinji kukunda mabvuto yakusiyana-siyana. (Ahebereu 11:32-35) Tsono tanimbo pakulewa bza atumiki wa Yahova ntsiku zino? Nkhani za moyo wawo zimbatilimbikisambo. Tikulewa tenepo thangwe ku likulu lathu la pa dziko lentse, timbatambira matsamba yakutenda yakucokera kwa abale na mpfumakazi. Iwo ambatenda kwene-kwene thangwe cikhulupiro cawo cidalimba pomwe adawerenga nkhani ya moyo wa atumiki wa Yahova wakukhulupirika wa ntsiku zino.

PAULO ADAPFUNZISA ABALE NA MPFUMAKAZI KUKHALA WAKUBVERANA

7. Kodi mwapfunza ciyani na malango ya mpostolo Paulo yomwe yali pa Aroma 14:19-21?

⁷ Ifepano timbalimbikisa abale na mpfumakazi zathu tikambacita ciri-centse kuti gwere likhale lakubverana. Tin’funika lini kubvuma kuti kusiyana nzeru pa nkhani zinango kuticitise kuleka kubverana. Ndipo tin’funikambo lini kungingimira kuti bzomwe tikufuna bzicitike, bzikakhala kuti bzomwe anzathu akufuna bzikupitana lini na nfundo za m’Bibliya. Onani bzomwe bzidacitika m’gwere la ku Roma. Mu gwere limweri, mukhana Akristau omwe akhali Adjuda na omwe akhali lini Adjuda. Pomwe Lamulo la Mozeji lidaima kuphata basa, atumiki wa Yahova akhafunika lini pomwe kuteweza malamulo yomwe yakhaletsa kudya bzakudya bzinango. (Marko 7:19) Kuyambira nthawe imweyire, Akristau omwe akhali Adjuda akhana ufulu bwa kudya cakudya ciri-centse comwe angadafuna. Tsono Akristau anango omwe akhali Adjuda akhawona kuti akhafunika lini kucita tenepoyo, ndipopa gwerelo lidayamba kugawanika. Paulo adabvekesa kufunika kwa kukhala wakubverana pomwe adalewa kuti: “Bziri bwino kuleka kudya nyama ayai kumwa vinyu ayai kucita cinthu ciri-centse comwe cingatepese cikhulupiro ca m’bale wako.” (Werengani Aroma 14:19-21.) Ndipo Paulo adathandizambo Akristauwo kuwona kuti nkhani ninga zimwezi zikhadzonga mbverano wa Akristau na gwere kubodzi. Ndipo iye akhali wakukonzeka kusiya kucita bzinthu bzinango kuti aleke kusunamisa Akristau anzace. (1 Akolinto 9:19-22) Mpsibodzi-bodzimbo na ifepano ntsiku zino. Kuti tibverane na anzathu, tin’funika kutcenkha kungingimiza anzathuwo kucita bzinthu bzomwe ifepano tikufuna.

8. Kodi Paulo adacita tani pomwe Akristau adapitana nzeru pa nkhani ya mgwatidwe?

⁸ Paulo akanesana na wanthu pa nkhani yakufunika kwene-kwene akhacita ciri-centse kuti amalise kusaya kubverana kwawoko. Kumbukirani bzomwe bzidacitika mu gwere la Akristau wakuyambirira. Pa nthawe imweyire, Akristau omwe akhali Adjuda akhangingimira kuti Akristau omwe akhali lini Adjuda acitidwe mgwatidwe. Pinango iwo akhalewa tenepo thangwe ra kugopa kulewedwa kuipa na Adjuda anzawo. (Agalatiya 6:12) Paulo alibe kukomedwa na nzeru imweyo, koma alibe kungingimira kuti iwo acite bzomwe iye akhafuna. Kodi n’ciyani comwe iye adacita? Iye adayendesa nkhaniyo kwa apostolo na akulu ku Jeruzalemu. (Mabasa 15:1, 2) Bzimwebzi bzidathandiza kuti Akristau wa mu nthawe imweyire apitirize kukhala wakukondwa na wakubverana mu gwere.  —  Mabasa 15:30, 31.

9. Kodi tingatewezere tani Paulo tikanesana na anzathu?

⁹ Tikanesana na anzathu, bzingakhale bwino kukumbira thandizo kuna akulu wa gwere. Iwo angatithandize kuti tibverane pomwe na anzathuwo. Ndipo cinthu cinango comwe cingatithandize ni kufufudza m’mabukhu yathu kuti tidziwe bzomwe Bibliya limbalewa pa nkhani yomwe tanesanayo na kuwonambo malango yomwe gulu lathu limbapereka. Tikambateweza malangoyo na kutcenkha kungingimira nzeru zathu, tin’dzacitisa kuti abale na mpfumakazi m’gwere ambabverane.

10. Kodi n’ciyani comwe Paulo akhambacita kuti abale na mpfumakazi m’gwere akhale wakubverana?

¹⁰ Paulo akhambacitisambo kuti abale na mpfumakazi ambabverane mwa kumbalewa bzinthu bzabwino bzomwe iwo akhacita, sikuti bzomwe akhaphonya. Iye adacita bzimwebzi pomwe akhamaliza kunemba tsamba lakuyenda kwa Aroma. Pakumaliza tsambali, Paulo adanemba madzina ya abale na mpfumakazi na kufotokozambo bzinthu bzabwino bzomwe iwo akhacita. Ifepanombo tingatewezere Paulo mwa kumbauza anzathu makhalidwe yabwino yomwe abale na mpfumakazi zathu anayo. Tikambacita bzimwebzi, timbacitisa kuti abale na mpfumakazi afune kukhala pa uxamwali bwa ponda-ndipondembo. Ndipo bzimwebzi bzin’dzacitisa kuti iwo ambafunane kwene-kwene m’gwere.

11. Kodi n’ciyani comwe tin’funika kucita tikanesana na abale wathu?

¹¹ Nthawe zinango Akristau wakukhwima mwauzimu anganesane. Ndipo mpsimwebzi bzomwe bzidacitikira Paulo na Barnaba. Iwo adanesana kwene-kwene thangwe rakuti Barnaba akhafuna kuti iwo atenge Marko pa ulendo bwawo bwa umisiyonariyo, tsono Paulo akhafuna lini. “Iwo adakalipizana kwene-kwene” ndipo adafika pa kumwazana. (Mabasa 15:37-39) Tsono Paulo, Barnaba na Marko adadzabverana pomwe ndipo adalatiza kuti kubverana ni cinthu cakufunika kwene-kwene. Pomwe padapita nthawe, Paulo adadzalewa makhalidwe yabwino yomwe Barnaba na Marko akhanayo. (1 Akolinto 9:6; Akolose 4:10) Mpsibodzi-bodzimbo na ifepano. Tikanesana na anzathu, tin’funika kucita ciri-centse kuti tibverane pomwe ndipo timbapitirize kumbawona makhalidwe yabwino yomwe abale na mpfumakazi zathu anayo. Tikacita bzimwebzi, tentse tin’dzakhala wakubverana.  —  Aefezo 4:3.

PAULO ADALIMBISA CIKHULUPIRO CA ABALE NA MPFUMAKAZI ZACE

12. Kodi ni mabvuto yaponi yomwe abale na mpfumakazi zathu ambagumana nayo?

¹² Cinthu cinango comwe tingacite kuti tilimbikise abale na mpfumakazi zathu ndico kulimbisa cikhulupiro cawo kwa Yahova. Bzimwebzi mpsakufunika thangwe rakuti pana bzinthu bzakusiyana-siyana bzomwe bzingawofokese cikhulupiro cawo. Abale wathu winango ambanyozedwa na adzinza wawo omwe ni Mboni lini, anzawo wa ku basa ayai wa ku xikola. Ndipo Akristau winango ambaduwala-duwala ayai ambawawidwa mu mtima thangwe ra bvuto linango lomwe lidawacitikira pa moyo wawo. Akristau winango omwe adabatizidwa kale-kale, amala magole mazinji akudikhirira kumala kwa dziko lakuipali koma bzikanati kucitika. Akristau wakuyambirira adagumanambo na mabvuto ninga yamweya. Kodi n’ciyani comwe Paulo adacita kuti alimbise cikhulupiro cawo?

13. Kodi Paulo adathandiza tani Akristau omwe akhanyozedwa thangwe ra cikhulupiro cawo?

¹³ Paulo akhaphatisa basa Fala la Mulungu kuti alimbise cikhulupiro ca abale na mpfumakazi zace. Pinango Akristau wa ku Djudeya akhasaya cakutawira pomwe Adjuda winango ayai adzinza wawo akhalewa kuti kunamata kwa Adjuda kukhali kwabwino kwene-kwene kuposa kwa Akristau. Ndipopa tsamba la Ahebereu, lomwe Paulo adawanembera, lidawalimbikisa kwene-kwene. (Ahebereu 1:5, 6; 2:2, 3; 9:24, 25) Pinango iwo adaphatisa basa nfundo zakubveka bwino zomwe ziri m’tsambali kuti akwanise kutawira wanthu omwe akhawagaza. Ntsiku zino, ifepano tingathandizembo Akristau anzathu omwe akunyozedwa kudziwa momwe angaphatisire basa mabukhu yakusiyana-siyana yakufotokoza bza m’Bibliya kuti afotokozere wanthu bzomwe iwo ambakhulupira. Alumbwana na atsikana wacikristau angasekedwe thangwe ra kukhulupira kuti bzinthu bzidacita kulengedwa. Bzimwebzi bzikacitika, mungaphatise basa mabroxura yakuti A Vida  —  Teve um Criador? na A Origem da Vida – Cinco Perguntas Que Merecem Resposta kuti muwathandize kudziwa bzomwe angalewe, pakufotokozera anzawo thangwe lomwe limbawacitisa kukhulupira kuti bzinthu bzidacita kulengedwa.

14. Kodi n’ciyani cinango comwe Paulo akhacita, napo kuti akhaphata basa lakupalizira na kupfunzisa mwanyongo?

¹⁴ Paulo adalimbikisa abale na mpfumakazi zace kuti ambacite “mabasa yabwino” pakulatiza lufoyi. (Ahebereu 10:24) Paulo akhambandothandiza lini abale wace mwa mafala basi, koma akhawathandizambo mwa bzicito. Bzimwebzi bzidawonekera padeca pomwe Akristau wa ku Djudeya adagwedwa na njala. Pa nthawe imweyi, Paulo adacitambo basa lakupereka thandizo kwa abalewo. (Mabasa 11:27-30) N’cadidi kuti Paulo akhacita nyongo kwene-kwene pa basa lakupalizira na kupfunzisa. Koma pa nthawe ibodzi-bodziyo iye akhathandizambo abale wace wacikristau pa bzomwe akhafunikira pa moyo wawo. (Agalatiya 2:10) Bzimwebzi bzidathandiza abale na mpfumakaziwo kuwona kuti Yahova akhawathandiza. Ntsiku zino, tikabziperekambo kuti tithandize abale na mpfumakazi zathu omwe agwedwa na malengwa ya pantsi timbalimbisa cikhulupiro cawo kwa Yahova. Ifepano tingalimbisembo cikhulupiro ca abale na mpfumakazi zathu tikambacita bzakupereka kuti bzithandizire basa la pa dziko lentse. Tikacita bzimwebzi, timbathandiza abale na mpfumakazi zathu kukhulupira na mtima wentse kuti Yahova an’dzawalekerera lini.

15-16. Kodi tingathandize tani m’bale ayai mpfumakazi omwe cikhulupiro cace cawofoka?

¹⁵ Paulo adapitiriza kuthandiza Akristau omwe cikhulupiro cawo cikhadawofoka. Iye akhawabvera ntsisi ndipo kalalewedwe kace kakhacitisa kuti iwo alimbikisidwe. (Ahebereu 6:9; 10:39) Kumbukirani momwe iye adanembera tsamba la Ahebereu. Kazinji-kazinji iye akhaphatisa basa fala lakuti ‘ifepano.’ Bzimwebzi bzikulatiza kuti iye akhadziwa kuti akhafunikambo kuphatisa basa malango yomwe akhapereka kwa Akristauyo. (Ahebereu 2:1, 3) Ifepano timbatewezerambo Paulo mwa kupitiriza kuthandiza anzathu omwe cikhulupiro cawo cawofoka. Ndipo timbawalimbikisa mwa kuwalatiza kuti iwo mbakufunika kwene-kwene kwa ifepano. Tikambacita bzimwebzi, timbalatiza kuti timbawafuna. Kumbukirani kuti kalalewedwe kathu kangalimbikise kwene-kwene omwe akutitetekera.

¹⁶ Mpostolo Paulo adatsimikizira abale wace wacikristau kuti Yahova akhawona bzinthu bzabwino bzomwe iwo akhacita. (Ahebereu 10:32-34) Ifepano tingacitembo bzibodzi-bodzibzi pomwe tikulimbikisa Mkristau mwanzathu omwe cikhulupiro cace cawofoka. Pinango tingamukumbuse bzinthu bzomwe bzidacitika pomwe akhapfunza Bibliya, ayai tingamukumbusembo bzinthu bzabwino bzomwe bzidacitika pa moyo wace, bzomwe bzikulatiza kuti Yahova akhamuthandiza. Ndipo tingamutsimikizirembo kuti Yahova alibe kuyebwa bzinthu bzabwino bzomwe iye adacita kale-kale nakuti Yahovayo an’dzamusiya lini yekha. (Ahebereu 6:10; 13:5, 6) Tikacita bzimwebzi, tingathandize abale na mpfumakazi zathu kukhala na mphanvu za kupitiriza kutumikira Yahova.

“PITIRIZANI KUMBALIMBIKISANA”

17. Kodi ni nyongo iponi yomwe ifepano tin’funika kucita?

¹⁷ Nyakumanga nyumba ambakhala na madu pa basa lace akambaphata basa lacero. Mpsibodzi-bodzimbo na ifepano. Tin’dzakwanisa kulimbikisa abale na mpfumakazi zathu tikambacita bzimwebzi nthawe zentse. Ifepano tingawathandize kupirira mabvuto tikawafotokozera nkhani za atumiki wa Yahova wakale-kale omwe adapirirambo mabvuto. Tingapitirize kumbabverana na abale wathu tikambawona bzinthu bzabwino bzomwe iwo ambacita, kucita nyongo kuti tileke kunesana na anzathu ndipo tikanesana, kucita nyongo kubverana nawo pomwe. Ndipo tingapitirizembo kulimbisa cikhulupiro ca abale na mpfumakazi zathu mwa kuwauza nfundo zakufunika za m’Bibliya, kuwapasa bzinthu bzakufunikira pa moyo wawo na kuwalimbikisa, cikhulupiro cawo cikawofoka.

18. Kodi tentse tin’funika kupitiriza kucita ciyani?

¹⁸ Abale na mpfumakazi omwe ambaphata basa lakumanga Nyumba za Umambo na nyumba zinango za gulu lathu ambakomedwa kwene-kwene akamaliza basa lawo. Mpsibodzi-bodzimbo na ifepano. Tingakomedwembo kwene-kwene tikambalimbikisa abale na mpfumakazi zathu m’gwere. Tsono Nyumba za Umambo na nyumba zinango zomwe zimbamangidwa, zimbadzagumuka na kupita kwa nthawe. Koma phindu lakulimbikisa anzathu lin’dzakhala liripo mpaka kale-kale! Ndipopa bwerani tentse ‘tipitirize kumbalimbikisana na kupasana mphanvu.’  —  1 Atesalonika 5:11.