Mibvunzo Yakucokera Kwa Anyakuwerenga

Pomwe Jezu adabadwa, thangwe ranyi Zuze na Mariya adapitiriza kukhala ku Betelehemu m’mbuto mwa kubwerera ku mui kwawo ku Nazareti?

Bibliya limbalewa lini. Koma limbafotokoza bzinthu bzakusiyana-siyana bzomwe pinango pentse bzidawacitisa iwo kuti acite cakusankhula cimweco.

Anjo munango adauza Mariya kuti angadadzakhala na pathupi acidzabereka mwana. Pomwe anjoyo adalewa mafala yamweya, Mariya na Zuze akhakhala ku Nazareti, komwe kukhali ku mui komwe Zuze adabadwira ku Galileya. (Luka 1:26-31; 2:4) Patsogolo pace, pomwe iwo adacoka ku Edjipito adabwerera ku Nazareti. Kumweko ndiko komwe Jezu adakulira ndipo adakhala Mnazareti. (Mateu 2:19-23) Ndipopa tikambaguma Jezu, Zuze na Mariya timbakumbukira ku Nazareti.

Mariya akhana wadzinza wace wakucemeredwa Elizabeti omwe akhakhala ku Djuda. Elizabeti akhali mkazi wa wantsembe Zakariya ndipo adadzakhala mai wace wa Juwau Batista. (Luka 1:5, 9, 13, 36) Mariya adakazungira Elizabeti ndipo adakhala kumweko minyezi mitatu. Patsogolo pace, iye adabwerera ku Nazareti. (Luka 1:39, 40, 56) Ndipopa, Mariya akhakudziwa bwino ku Djudako.

Na kupita kwa nthawe, Zuze adabvera lamulo la boma lakuti ‘akabzinembese.’ Na tenepo, iye adacoka ku Nazareti aciyenda ku Betelehemu omwe ukhali “mzinda wa Davide,” ndipo ku Betelehemuko ndiko komwe kungadabadwira Mesiya mwakubverana na mapolofesiya. (Luka 2:3, 4; 1 Samuyeli 17:15; 20:6; Mika 5:2) Pomwe Mariya adabereka Jezu, Zuze alibe kufuna kucita ulendo bwa kubwerera ku Nazareti na tcecero. Iwo adakhala ku Betelehemu, mzinda omwe ukhali pa mtantho wa makilometro 9 kucokera ku Jeruzalemu. Bzimwebzi bzikhacitisa kuti bzikhale bzakupusa kwa iwo kuti akapereke ntsembe ku templo mwakubverana na lamulo. — Levitiko 12:2, 6-8; Luka 2:22-24.

Anjo wa Mulungu akhadamuuza kale Mariya kuti mwana wace angadadzatambira “mpando wa umambo wa Davide” ndipo “[angadadzatonga] ninga Mambo.” Bzimwebzi bzidacitisa kuti Mariya na Zuze awone kuti bzikhali bzakufunika kwene-kwene kuti Jezu abadwire mu mzinda wa Davide. (Luka 1:32, 33; 2:11, 17) Iwo adawona kuti bzikhali bza nzeru kupitiriza kukhala kumweko acidikhirira kuti Mulungu awauze bzakucita.

Tikudziwa lini kuti adakhala ntsiku zingasi ku Betelehemuko mpaka anyakukhulupira nyenyezi kufika. Tsono, pomwe iwo adafika, banjalo likhakhala kumweko ndipo “mwanayo” akhali tcece. (Mateu 2:11) M’mbuto mwakubwerera ku Nazareti, iwo adakhala kwene-kwene ku Betelehemuko.

Herode adatonga kuti “wana wentse wa magole mawiri kubwerera m’mbuyo” wa ku Betelehemu aphedwe. (Mateu 2:16) Pomwe Mulungu adawacenjeza bza nkhani imweyi, Zuze na Mariya adathawira ku Edjipito ndipo adakhala kumweko mpaka kufa kwa Herode. Patsogolo pace, Zuze adatenga banja lace aciyenda kukakhala ku Nazareti. Thangwe ranyi iwo alibe kubwerera ku Betelehemu? Thangwe rakuti pa nthawe imweyire Arikelau mwana wa Herode akhatonga ndipo akhali munthu wakuipa kwene-kwene. Anjo wa Yahova adacenjeza Zuze bza nkhaniyi, ndipopa iye adayenda ku Nazareti. Kumweko Jezu angadakula bwino ndipo bzingadakhala bzakupusa kuti iye anamate Mulungu. — Mateu 2:19-22; 13:55; Luka 2:39, 52.

Zuze adafa pomwe Jezu akhanati kufa kuti afungule njira yakuti wanthu winango adzayende kudzulu. Ndipopa, Zuze an’dzalamusidwa kuti akhale pa dziko la pantsi. Iye akadzalamusidwa, azinji an’dzakhala na mwayi wakudziwa kuti thangwe ranyi iye na Mariya adapitiriza kukhala ku Betelehemu pomwe Jezu adabadwa.