Bzomwe Mungacite Kuti Mumbapfunze Sumana Zentse
KODI bzimbakunesani kucita pfunziro lanu la pamwekha sumana zentse, ndipo mumbatazirambo kucitisa kuti pfunzirolo likhale lakudekeza? Bzimwebzi bzimbaticitikirambo tentsenefe nthawe zinango. Tsono kumbukirani bzinthu bzinango bzomwe timbacita ntsiku zentse, ninga kusamba. Napo kuti timbakhala na bzinthu bzinango kuti ticite, ifepano timbapambula nthawe kuti tisambe ndipo tikamala kusamba, ifepano timbabva bwino! Pfunziro la Bibliya lingakhalembo lakudekeza ninga “[kusamba] na madzi yomwe ni Fala la Mulungu.” (Aefezo 5:26) Onani nfundo zinango zomwe zingakuthandizeni:
Mbakhalani na ndondomeko. Pfunziro la patekha limbacita mbali ya “bzinthu bzomwe mpsakufunika kwene-kwene” bzomwe Mkristau an’funika kubzicita. (Afilipi 1:10) Kuti imwepo mukwanise kutewera ndondomeko yanu, mun’funika kuiikha pa mbuto ya padeca pomwe mungakwanise kumbaiwona bwino-bwino. Ayai mungaikhe alarme mu telefoni yanu kuti mumbakwanise kukumbukira ikakwana nthawe yakuti mucite pfunziro lanu.
Sankhulani nthawe na njira yabwino yakucitira pfunziro lanu. Kodi mumbakwanisa kukhala tceru kwa nthawe ikulu ayai mumbandomala nthawe yakucepa? Imwepo mukudziwa bwino momwe mumbacitira bzinthu. Sankhulani nthawe mwakubverana na momwe bzinthu bziriri pa moyo wanu. Penu mumbakomedwa lini nthawe yakupfunza ikakwana, mungacite bwino kundopfunza mphindi 10 basi. Mukapfunza napo mphindi zing’ono-ng’ono mun’dzakhala mwacita bzizinji m’mbuto mwa kulekeratu. Pinango kupfunza mphindi 10 kungakucitiseni kukomedwa ndipo mungadzafune kuthumizira nthawe pa pfunziro lakutewera. — Afilipi 2:13.
Pomwe mukanati kupfunza, sankhulani nkhani yomwe mun’funa kupfunza. Mukakhala pantsi kuti mupfunze uko mun’dziwa lini bzomwe mun’funa kupfunzabzo ndipo muciyamba kukumbuka bzomwe mungapfunze pa nthawe imweyo, mungakhale ‘mukuphatisira lini bwino basa nthawe yanu.’ (Aefezo 5:16) Tani mucinemba nkhani ayai bzinthu bzomwe mukufuna kupfunza? Mukakhala na mbvunzo, munembeni. Kuphampha kwa pfunziro liri-lentse, imwepo munganembe nfundo zomwe mukufuna kuzipfunza.
Mbakhalani wakukonzeka kucinja. Mbayezerani kucinja ndondomeko yanu, nthawe yomwe mumbamala mukupfunza ayai nkhani zomwe mumbasankhula. Cakufunika kwene-kwene ni ntsiku lini yomwe imwepo mumbapfunza, nthawe yomwe mumbapfunza ayai bzomwe imwepo mumbapfunza, koma cakufunika kwene-kwene ni kumbapfunza nthawe zentse.
Timbagumana phindu likulu kwene-kwene tikambakhala na ndondomeko yabwino kuti timbapfunze. Timbakhala pa uxamwali bwakulimba na Yahova, timbacita bzinthu mwanzeru ndipo timbakhala wakukondwa. — Djoswa 1:8.