Kodi Nin’funika Kusiya Kufambisa Karo?

Kodi bzimwebzi ndibzo bzomwe bzikukucitikirani? Penu ndibzo, n’ciyani cingakuthandizeni kuwona penu mungapitirize kufambisa karo ayai kusiya?

M’madziko manango adakhazikisa magole yomwe munthu akapfitsa ambafunikira kucita kuuzidwa na dotolo penu angapitirize kufambisa karo. Abale omwe ambakhala m’madziko yamweya ambabvera lamulo limweri. (Aroma 13:1) Tsono napo kuti imwepo mumbakhala lini m’dziko lomwe lina malamulo yamweya, pana nfundo zomwe zingakuthandizeni kudziwa penu mungapitirize kufambisa karo mwakukhotcerereka.

MBAWONANI MOMWE MUMBAFAMBISIRA

Gulu linango lomwe limbawona bza wanthu wacikulire limbalewa kuti iwo an’funika kubzicita mibvunzo iyi:

• Kodi bzimbandinesa kuwerenga bzizindikiro bza mu mseu ayai kuwona bwino-bwino usiku?

• Kodi nimbakwanisa kuzungunusa msolo wangu kuti ndiwone supedyo yangu na bzinthu bzomwe bziri m’mphepete mwa karo yangu?

• Kodi bzimbandinesa kucosa mwendo wangu pa asereladori mwakamfulumize ndiciponda pa travau?

• Kodi nimbafambisa pang’ono-pang’ono mwakuti nimbacitisa karo zinango zicedwe?

• Kodi ndikhafuna kucita asidenti tsapanopali? Kodi karo yangu idakweceka-kweceka thangwe ra kumenya bzinthu bzomwe bzikhadandoima?

• Kodi ndidaimisidwa kale na mapolisiya thangwe ra momwe ndikhafambisira?

• Kodi ndidawodzira kale pomwe ndikhafambisa?

• Kodi nimbamwa mankhwala yanango yomwe yangacitise kuti ndileke kufambisa bwino?

• Kodi wanthu wa m’banja mwangu na azixamwali wangu adandiuza kale kuti akucita thupo na momwe nimbafambisira karo?

Penu imwepo mwatawira kuti inde pa mbvunzo ubodzi ayai miwiri, bzimwebzi bzikulatiza kuti mun’funika kucinja bzinthu bzinango. Mwa ciratizo, pinango imwepo mungasankhule kuleka kufambisa usiku. Pitirizani kumbawona momwe mumbafambisira. Imwepo mungabvunze munthu m’bodzi wa m’banja mwanu ayai xamwali wanu kuti akuuzeni momwe mumbafambisira. Pinango imwepo mungapfunze njira zinango za momwe mungafambisire mwakukhotcerereka. Tsono penu imwepo mwatawira kuti inde pa mibvunzo mizinji yomwe iri pa dzauluyi, pinango bzingakhale bwino imwepo kusiya kufambisa karo.a

TSOGOLEREDWANI NA MITEMO YA M’BIBLIYA

Pinango bzingakhale bzakunesa kubvuma kuti mumbafambisa lini bwino karo ninga momwe mukhacitira kale-kale. Ndipo pinango imwepo mukakumbukira kuti mun’funika kusiya kufambisa karo, imwepo mungakalipe. Tsono kodi Bibliya lingakuthandizeni tani kukumbuka bwino mucicita bzakusankhula bza nzeru? Mbatiwoneni mitemo miwiri ya m’Bibliya.

Pitirizani kukhala wakubzicepesa. (Mimwani 11:2) Pomwe tikukalamba, mphanvu zathu zimbacepekera, timbakwanisa lini kuwona bwino-bwino ayai kubva. Wanthu winango akakalamba ambasiya kucita masenzeka yanango thangwe ambazindikira kuti angabzikweteke. Bzimwebzi ndibzo bzomwe bzimbacitikambo pa nkhani ya kufambisa karo. Munthu wakubzicepesa ambasiya kufambisa karo akazindikira kuti kucita bzimwebzo kungakhale lini kwakukhotcerereka kwa iye. (Mimwani 22:3) Ndipo iye ambatetekerambo mwatceru wanthu winango akacita naye thupo. — Ndendemezerani na 2 Samuyeli 21:15-17.

Tcenkhani kukhala na mulandu wa mulopa. (Deuteronomiyo 22:8) Munthu akasaya kufambisa bwino karo angakweteke ayai kupha wanthu. Ndipo munthu yomwe ambafambisa lini bwino karo akapitiriza kufambisa karoyo, iye angaikhe moyo wace pangozi na wa wanthu winango. Ndipo iye akacita asidenti aciponda munthu angakhale na mulandu wa mulopa.

Lekani kukumbuka kuti wanthu winango an’dzasiya kukulemekezani thangwe rakuti mukufambisa lini karo. Yahova ambakufunani thangwe rakuti mumbazindikira kuti pana bzinthu bzomwe mungakwanise lini kubzicita, thangwe rakuti ndimwe wakubzicepesa na thangwe ra kukumbukira wanthu winango. Ndipo iye akupicira kuti an’dzakuthandizani na kukutsangalazani. (Zaiya 46:4) Yahova an’dzakusiyani lini. Ndipopa pembani kwa iye kuti akuthandizeni kukhala wanzeru muciphatisa basa mitemo ya m’Bibliya kuti muwone penu mungapitirize kufambisa karo ayai kusiya.