Nyimɛ I Kari Bu Tam Zue Ue—Lɛlɛɛbaloo Pya Enɔānu Baibol A Naa Kiisī Leere

NU ANUA ALU EBƐƐ̄: Pya nɛɛ ɛrɛ ekue bee Jɛhova lokwa ba ɛrɛ kpɔā. (Rom 10:13, 14) Kerewo, naale dɛ̄dɛɛ̄ nɛɛ a yiga enɔ Baibol na a gbī etɔɔ̄dum a gbaaloo daakuu Jɛhova a. I su i sɔ̄ daānu leere sɔ̄ i le uwe zue ue tɛ̄maloo eyerebah nɛ pya ba gbī enyaa sa doo nu a nia Jɛhova. Lo a le ziī nɛɛ i gaa nyɔɔnɛ nɔ Baibol naa kiisī dookɛ̄ a bɔloo doo sɔ̄ i enyɔɔnɛ ye nɔ nu bu pio sɔ̄, elee i ɔbɛ lo enɔānu sa i obia pii pya nɛɛ Jɛhova gaa zuura yaa loo ye le ye bɔŋanaloo. (Jɔn 6:44) Bu kaka, lo a le sɔ̄ a esaa lo nɛɛ sikɛ̄ tɔgɛ kɔ a lee yɛɛ pya a “bee lu esere     loo dum a naa tah,” i sikɛ̄ bɔātɛ̄ lo enɔānu.—Doonu 13:48.

KƐ̄ EDOO DOO:

• Ka nɛɛ o gaa nɔɛnu nyɔɔ kɛ̄ a gbī e’ɛrɛ kaka suānu doo.—1 Tim 2:4

• Kɔ ue siībah nyɔɔ kɛ̄ a lu ebɛɛ̄ lo esu nu enɔā yere bu dogo doo.—Luk 6:46-49

• Bu fɛgɛ, nyɔɔnɛ ye kɔnia kam Jizɔs akiiloo nɛɛ foh nu, sa o bip ye kɔ a kɔ nu a gaa ye aa.—Mat 13:18-23

• Doo kɔ a suā nu anua o gaa dasī biewo enyɔɔnɛ ye nɔ nu

• Doo kɔ a suā kɔ o wee ye inae loo ale o wee ye kuee aā ziī sɔ̄ yii ziī lo eyere ye mɛm loo le kɔ bui dabe sikɛ̄ nɔ nu lo a nyaa lo

SI EE LO VIDIO, LƐƐ BUI AGARA PYA EBIP A NYƆƆNƐ AMA:

• E na olo nɔ aāloo kɔnia ue ama lo a tɔgɛ kɔ lo nɛɛ a gaa bee nɔ nu a, naa gaa bee kiisī leere ani?

• Bu mɛ sīdee na lo nɛɛ wuga yerebah nɛ nɛɛ a gaa bee nɔɛ nu kɔ a muɛ̄ kɔ a lu ebɛɛ̄ kɔ a nyaa ani?

• Bu mɛ sīdee na lo nɛɛ zue ue bee kwa kɛ̄ sɛɛ sikɛ̄ bɔātɛ̄ enɔānu lo lo nɛɛ nyaa ani?