Sɛmdee

I gaa su i mɛm daānu leere sɔ̄ i su i ekɛɛrɛ sere nyɔɔ nyimɛ i esiatam nɛ Jɛhova yereloo. (1 Kɔr 9:26) Sɔ̄ i ɛrɛ pya nu i seeasī, a yerebah i nɛ kɔ i su kere sɔ̄ a bia loo lo sɔ̄ eku ama daānu leere lɛɛ kuma gae lu. (Ɛfɛs 5:15, 16) Sɔ̄ bui gaa ɛrɛ enɔānu butɔ, bui dap gbaa kɔnia nu bui seeasī lo edoo bu aā zua esiatam i yii li. Lo eyerebah a nɛ kɔ o dap doo lo ama, ekpo kpa enɔānu ama aara pya ekobee ue a kɔ nu akiiloo keekee nu seeasī o dap kɛɛrɛbu loo sa yere kara kumaloo.—Jem 1:5.

Bu edoba, bui dapge gbaa nɔɔ lo edoo kɔ ziī nɛɛ a le bu bui tɔ a yii bu tam sɛmdee ni? Lo o ɛrɛ baɛ baɛ ekɛɛrɛ kɔ oo le edabe zɔ̄ŋia dɛɛ̄ buā awa alu egbī a aābah, nyɔɔnɛ pio pya sɛmdee a bee kpenagesī dua kɛ̄tɔɔ̄ ama kɔnia ue. (Kam 15:22) O dapnage bip ue aānu ziī nɛɛ sɛmdee bui bee kue nua loo bui enɔānu butɔ. Lɛɛ o ɛm pya sɔ̄ o dap si uwe zue ue. Lo o ebee sɛmdee sɔ̄ akii adumɛ, kɛɛrɛ lo a le o kɛ̄tɔɔ̄ enɛge a dee kɔ o dap sikɛ̄ bɔātɛ̄ anyaawo.

Pio nɛɛ a le bu o tɔ edapge si tam sɛmdee bu nwī kere sɔ̄ ziī enɔɔ̄ ale eewo ni? Kere o ekpo ekiira kɛ̄, o dap sɛmdee bu nwī kere sɔ̄ tɛ̄maloo esu nwīgbagbara sɔ̄ zuema ue ziī ziī biradee. Lo ale oo wee aadee ɛrɛ sɔ̄ esu siā uwe zue ue taɛyɛɛ kaɛ, nyɔɔbee tam o waa si ale o lu nwiī tɔkpa, o dap su enɔɔ̄ bui wee seeā ale enɔɔ̄ a ɛrɛ o’oo tah kaɛ siātam sɛmdee. Gbaaraa loo doodoo ziī butɔ sa su sɔ̄ nɔma nu bui seeasī lo edoo bu zua esiatam i yii li. Yere nukuādɛɛ̄loo sɔ̄ o gbī esitam sɛmdee bu nwī kere sɔ̄ bu o kalɛnda, sa ɛm pya dee o siā uwe zue ue sere kɛ̄.—Kam 21:5.

SI EE VIDIO A KURA LU NƐƐ A ƐRƐ E’AGALOO . . . NƐƐ SƐMDEE, LƐƐ BUI AGARA EBIP AMA:

• Ena nu a bee siraloo i Wuga Aamand i tɔgɛ akiiloo kɛ̄ Jɛhova wereloo sa kuūdɛɛ̄loo pya nɛɛ a su loo nɛ lo esitam sɛmdee a?