Iyẹnrẹn Ọrẹ i Mak
3 Jesu nọ rharhumu ruẹ i sinagọg owu, o vwo ọhworhare owu rẹ obọ ye o tidan* uvuẹn avwaye. 2 Omarana, ihworho ne nie kiọkiọkiọ sẹ ono simi ọhworhare na uvuẹn Ẹdẹ Omeronmo na, neneyo aye i mẹrẹn ekete mọriẹn. 3 Jesu nọ ta rẹn ọhworhare rẹ obọ ye o tidan* na: “Vẹnrẹn, me mevi erhẹrhẹ aran.” 4 Ọke oru, Jesu nọ nọren aye: “O fori uvuẹn Ẹdẹ Omeronmo na re ne ruẹ orhorhomu yanghene obiobiomu? Re ne simi arhọ yanghene kpe yi hwu?” Ọrẹn, aye ni fọdu. 5 Ọke i Jesu o ni aye rhẹ ekwẹre hin ji mwuomarhọ fọkime aye e vwo aruẹdọ-ọn,* nọ ta rẹn ọhworhare na: “Rionbọ phia.” Omarana, ọhworhare na nọ rionbọ ye phia, obọ ye no serhọ. 6 Itu i Farisi na ni ruẹ otafe. Ogege, aye ọrhẹ ẹko ra hobọtua i Hẹrọd ni ya ruẹ ẹghware fọkiẹ i Jesu, neneyo aye i sabu kpe yi hwu.
7 Ọrẹn, Jesu ọrhẹ idibo yi ni nẹ avwaye riẹ obọrẹ urhie ọduado na, otu buebun ri nẹ i Galili ọrhẹ Judia rhe ni ji lelie. 8 Ihworho buebun ri tobọ nẹ i Jerusalẹm ọrhẹ Idumia rhe, kugbe obọreva Urhie i Jọdan ọrhẹ okogho ri kinhariẹ i Taya ọrhẹ i Saidọn, ni brurie rhe ọke aye e rhon kpahen ekwakwa buebun ro ruẹ. 9 Jesu nọ ta rẹn idibo yi nẹ aye i mwuegbe owọ ọkokamu rhotọre hariẹn, neneyo otu na i je rhe kenkien phan. 10 Fọkime Jesu o simi ihworho buebun, ọsoso ihworho ri vwo emiamo egbogbanhon, na ghwiẹ kinhariẹ ye nẹ aye i hobọte yi. 11 Kọke kọke ikpodje na i rha mẹriẹn, aye ne gburhomu rhotọre obaruiẹ ji kperẹ phia taghene: “Wẹwẹ yẹ Ọmọ Osolobrugwẹ.” 12 Ọrẹn ọgbọ buebun, nọ ha orhetio ọgbogbanhon rẹn ikpodje na taghene aye i vwa ta rẹn ihworho kpahen ọye-e.
13 No rhenren ugbenu owu ji se idibo yi ezẹko rọ gwọlọre, aye ni brurie nya. 14 Nọ ha ẹko awan 12 mwu, no seri aye inyikọ. Enana ihworho ri ne rhe lelie, ro no ji dje ye ghwoghwo. 15 Aye ine ji vwo omẹgbanhon rẹ aye ine le ikpodje nẹ ihworho oma.
16 Awan 12 rọ ha mwu na yẹ, Saimọn ro ji se i Pita. 17 Jems ro rhiẹ ọmọ i Zẹbẹdi ọrhẹ i Jọn ro rhiẹ omizu i Jems (no ji mwu Boanẹjis rẹn aye, ro mevirhọ “Emọ Agbranran”). 18 Andru, Filip, Batolomio, Matiu, Tọmọs, Jems ro rhiẹ ọmọ Afiọs, Tadiọs, Saimọn ro vwo oruru na* 19 ọrhẹ Judas Iskariọt rọ rhẹ i Jesu ọke oru.
Jesu nọ ruẹ uvuẹn oghwa owu, 20 otu na ni me brugba avwaye ọgbọrọrọ, te erhirhiẹ aye i vwa tobọ vwo uphẹn aye ina riẹ emaren. 21 Ọrẹn, ọke ihworho ekruien e rhon kpahen oborẹ ọ phia, aye ni nyarhẹn ye mwuien fọkime aye a ta taghene: “O kpomorhuẹ ne.” 22 Habaye, eyẹbe ri nẹ i Jerusalẹm rhe, na ji ta taghene: “Biẹlzibọb* ọ ha omayen, o ji le ikpodje na nyoma omẹgbanhon ọro suẹn ikpodje na.” 23 Omarana, ọke ro se aye kẹroma hin, nọ nyoma idje tẹmro rẹn aye taghene: “Marhẹ Echu ono ru le Echu nẹ ohworho oma? 24 Uvie ọrhọ kparehaso omayen, uvie ọrana ọ sabu meviẹ-ẹ. 25 Eri ha uvuẹn oghwa owu i rha ji kparehaso omoma aye, oghwa ọrana ọ sabu meviẹ-ẹ. 26 Habaye, orhianẹ Echu ọ kparehaso omayen ji vwo oghalẹ uvwre omayen, ọ sabu meviẹ-ẹ, ukpomaran ọnẹyen o hin ne. 27 Itiọrurhomẹmro, o vwo ohworho rọ nọ sabu ruẹ oghwa aduaran ye so enyerẹn oghwa ye-e, jokpanẹ ọnọ kiki gba aduaran na vwẹre. Ọke ọrana ọvo, yọ nọ ki sabu so enyerẹn oghwa ye. 28 Itiọrurhomẹmro, mia ta rẹn are taghene Osolobrugwẹ ọnọ harhomu ọsoso ekwakwa emọ ituakpọ i ruru, o toro aruẹ edandan aye i ruru yanghene aruẹ ẹmro aghwa aye i tare-e. 29 Ọrẹn, kohworho kohworho rọ tẹmro aghwa haso ẹhẹn ọfuanfon na, a harhomie bẹmẹdẹ-ẹ, ukpomaran ọ riẹ iborhin ọdandan i bẹmẹdẹ.” 30 Jesu ọ tẹmro ọnana fọkime aye a ta taghene: “Okpodje ọ ha omayen.”
31 Vwana, izu i Jesu ọrhẹ imizie ni rhere, aye ni mevi otafe, ji dje ohworho ye se yi rhe. 32 Fọkime ihworho buebun i siyẹ kinhariẹ i Jesu, aye ni ta riẹn: “Nughe! Izuo ọrhẹ imizuo i ha otafe ra nekpọn.” 33 Ọrẹn, nọ kpahenrhọ rẹn aye: “Ọrọmo yẹ izu mẹ, ayọmo yẹ imizu mẹ?” 34 Omarana, no ni ihworho ri siyẹ kinhariẹ ye na ji ta: “Nughe, izu mẹ ọrhẹ imizu mẹ na! 35 Kohworho kohworho ro ruẹ ọhọre Osolobrugwẹ, ọravwọ yẹ omizu mẹ ọhworhare, omizu mẹ ọgbọtọ ọrhẹ izu mẹ.”