Iyẹnrẹn Ọrẹ i Matiu
19 Ọke i Jesu ọ tẹmro enana hin, no nẹ i Galili riẹ ughwru eri Judia ri ha obọreva Urhie i Jọdan na. 2 Habaye, otu buebun ni lelirie, no ji simi aye ephian avwaye.
3 Itu i Farisi na ni brurie rhe rhẹ ẹhẹn aye ina damiẹ ni, aye ni nọriẹn: “O fori nẹ ọhworhare ọ fonrọnmo rhẹ aniẹ uvuẹn kerhirhiẹ kerhirhiẹ?” 4 Nọ kpahenrhọ rẹn aye: “Are e ji seyi taghene ohworho rọ ma ituakpọ nẹ ọtonrhọ rhe, ọ maren aye ọhworhare ọrhẹ ọmase? 5 Nọ ji ta taghene: ‘Fọkiẹ ọnana, ọhworhare nọ nọ nyaji ọsẹ ye ọrhẹ izie vwo ji tigban aniẹ, aye awanva ni ne rhiẹ ugboma owu.’ 6 Omarana, aye rhẹ awanva ghwomara-an, ukpomaran aye nẹ ugboma owu. Omarana, oborẹ Osolobrugwẹ ọ tan kugbe ne, e vwe jẹ ohworho owuorowu hẹriẹ ye-e.” 7 Aye ni nọriẹn: “Ni mesoriẹ i Mosis ọ ta taghene ọhworhare ọnọ sabu yẹ aniẹ ọbe ra fonrọnmo, ji le yi rie?” 8 Jesu nọ ta rẹn aye: “Mosis o kwerhọ ye taghene are i fonrọnmo rhẹ ane are fọkime are iludu, ọrẹn rhomaran yọ havwọ nẹ ọtonrhọ rhe-e. 9 Mia ta rẹn are taghene kohworho kohworho rọ fonrọnmo rhẹ aniẹ ji ya rọnmọ ọwọrọ, ọrẹn aniẹ o gbọfanrhiẹ-ẹn,* ọravwọ ọ ghwọwe ne.”
10 Idibo na ni ta riẹn: “Ọrhọ ghwai rhiomaran ọ havwọ uvwre ọhworhare ọrhẹ aniẹ, nọyẹ orho fo na rọnmọ-ọ.” 11 Nọ ta rẹn aye: “Rhẹ ihworho ephian yi na sabu ruomara-an, jokpanẹ eri vwo ẹghẹlẹ na ọvo. 12 Fọkime o vwo ikibẹ ezẹko re vwiẹre omaran, o vwo erọrọ rẹ ituakpọ i ru rhiẹ ikibẹ, o ji vwo erọrọ ri ruẹ omayen rhiẹ ikibẹ fọkiẹ Uvie idjuwu na. Orhianẹ ohworho ọ gwọlọ rọnmọ-ọ, o gbo ru te omaran.”
13 Ọke oru, ihworho ni kpare emọvwerhe bruie rhe, neneyo ọ ha abọ kpahen aye ji nẹrhomo rẹn aye, ọrẹn idibo na ni vanghwu aye. 14 Omarana, Jesu nọ tare: “Are i nyaji emọvwerhe na vwo nẹ aye i bru mẹ rhe, are i vwa da aye obọ ji-i, fọkime Uvie idjuwu na ọ havwiẹ rẹn aruẹ ihworho erana.” 15 Ọke i Jesu ọ ha abọ kpahen aye hin, no nẹ avwaye.
16 Vwana nughe! ohworho owu no brurie rhe mọ nọ yen: “Oyono, emru orhorhomu ọgo mi ne ruo ne mi sabu vwo arhọ i bẹmẹdẹ?” 17 Nọ ta riẹn: “Mesoriẹ wa nọ mẹ kpahen oborẹ orhomurun? Owuọwan ọvo yo rhomurun. Omarana, wu rha gwọlọ vwo arhọ, gba nyalele ekama na ọke ephian.” 18 Nọ nọriẹn: “Ego usuẹn aye?”Jesu nọ tare: “Wu vwe dozighẹ-ẹ,* wu vwa ghwọwe-e, wu vwe suhi-i, wu vwe se oseri efia-an. 19 Họghọ rẹn ọsọ ọrhẹ izuo, ne wu ji vwo ẹgwọlọ kpahen ọreva jerẹ oma ọnọ.” 20 Idama na nọ ta riẹn: “Mie ruẹ ọsoso ekwakwa enana, me yọ ji hẹrhẹ?” 21 Jesu nọ ta riẹn: “Wu rha gwọlọ rhiẹ ohworho rọ gbare,* gba nyarhẹn ya rhẹ ọsoso enyerẹn enọ ji ha igho na rẹn ivwiegbere, ne wu ne vwo efe rhẹ obẹ odjuwu. Orho ru, ne wu rhiẹ odibo mẹ.”* 22 Ọke idama na o rhon ọnana, nọ nya nẹ avwaye rhẹ omemwurhọ, fọkime o vwo enyerẹn buebun. 23 Omarana, Jesu nọ ta rẹn idibo yi: “Itiọrurhomẹmro mia ta rẹn are, ọnọ bẹn rẹ ọdafe ọnọ ruẹ Uvie idjuwu na. 24 Mia ji ta rẹn are taghene ọnọ phẹrẹ rẹ ijaki ọnọ nya ophiọ oghwede vrẹn, ghwẹ ọrẹ ọdafe ọnọ ruẹ Uvie Osolobrugwẹ.”
25 Ọke idibo na e rhon ọnana, no gberi aye unu omamọ, aye na ta: “Ọrọmo yọ nọ ghini sabu simirhọ?” 26 Ọke i Jesu ọ tẹnrovi aye, nọ tare: “Harẹn ituakpọ, ọnana ọ sabu phia-a, ọrẹn Osolobrugwẹ ọnọ sabu ruẹ i kemru kemru.”
27 Pita nọ kpahenrhọ riẹn: “Nughe! Ame i nyaji ekwakwa ephian vwo ji leluo ne, nẹ erere ego yi ne te ame?” 28 Jesu nọ ta rẹn aye: “Itiọrurhomẹmro mia ta rẹn are, uvuẹn ọke re ne ruẹ ekwakwa ephian kpokpọ, rẹ Ọmọ onyakpọ na ono siyẹ aga usun ọnẹyen na, are ri nyaleli mẹ ine siyẹ aga usun 12 ji ha ivwiẹ Izrẹl 12 na guẹnzọn. 29 Habaye, kohworho kohworho rọ nyaji eghwa vwo, imizu ehworhare yanghene imizu emẹse yanghene ọsẹ yanghene izu yanghene emọ yanghene etọre fọkiẹ odẹ mẹ, ono vwo aye akwa uzusionrin. Ọnọ ji ha arhọ i bẹmẹdẹ riuku.
30 “Ọrẹn ihworho buebun ri rhiẹ erukaro ni na kerhumu, eri kerhumu ni ne rhiẹ erukaro.