Iyẹnrẹn Ọrẹ i Matiu
1 Ọnana ọbe ikuegbe* akpenyerẹn i Jesu Kristi* ro rhiẹ ọmọ i Devid, ọmọ Ebraham:
2 Ebraham no vwiẹ Aizik,
Aizik no vwiẹ i Jekọb,
Jekọb no vwiẹ i Juda ọrhẹ imizie.
3 Tema no vwiẹ i Pirẹz ọrhẹ Zira rẹn i Juda,
Pirẹz no vwiẹ i Hẹzrọn,
Hẹzrọn no vwiẹ i Ram.
4 Ram no vwiẹ Aminadab,
Aminadab no vwiẹ i Nashọn,
Nashọn no vwiẹ i Salmọn.
5 Rehab no vwiẹ i Boaz rẹn i Salmọn,
Rut no vwiẹ Obẹd rẹn i Boaz,
Obẹd no vwiẹ i Jẹsi.
6 Jẹsi no vwiẹ i Devid ro rhiẹ orodje na.
Ane i Yuraya no vwiẹ i Solomọn rẹn i Devid.
7 Solomọn no vwiẹ i Rehoboam,
Rehoboam no vwiẹ Abaijah,
Abaijah no vwiẹ Esa.
8 Esa no vwiẹ i Jẹhọshafat,
Jẹhọshafat no vwiẹ i Jẹhoram,
Jẹhoram no vwiẹ Ọzaya.
9 Ọzaya no vwiẹ i Jotam,
Jotam no vwiẹ Ehaz,
Ehaz no vwiẹ Hẹzikaya.
10 Hẹzikaya no vwiẹ i Manasẹ,
Manasẹ no vwiẹ Emọn,
Emọn no vwiẹ i Josaya.
11 Josaya no vwiẹ i Jẹkonaya ọrhẹ imizie, uvwrọke e mwu itu i Ju na riẹ evrẹn obẹ i Babilọn.
12 Ọke re mwu itu i Ju na riẹ i Babilọn hin, Jẹkonaya no vwiẹ Shiatiẹl,
Shiatiẹl no vwiẹ i Zerubabẹl.
13 Zerubabẹl no vwiẹ Abayud,
Abayud no vwiẹ Ẹlayakim,
Ẹlayakim no vwiẹ Ezọ.
14 Ezọ no vwiẹ i Zedọk,
Zedọk no vwiẹ Ekim,
Ekim no vwiẹ Ẹlayud.
15 Ẹlayud no vwiẹ Ẹlieza,
Ẹlieza no vwiẹ i Matan,
Matan no vwiẹ i Jekọb.
16 Jekọb no vwiẹ i Josẹf ro rhiẹ esa i Meri, Meri no vwiẹ i Jesu re se i Kristi.
17 Omarana, ọsoso ivwiẹ na nẹ ọke Ebraham ye te ọke i Devid, ivwiẹ 14, nẹ ọke i Devid ye te ọke re mwu itu i Ju na riẹ evrẹn obẹ i Babilọn, ivwiẹ 14. Nẹ ọke re mwu itu i Ju na riẹ evrẹn uvuẹn i Babilọn ye te ọke i Kristi, ivwiẹ 14.
18 Ọrẹn, omana yẹ uvwiẹ i Jesu Kristi ọ phia lele. Uvwrọke i Josẹf ọ san i Meri rhotọre, na mẹrenriẹn vwrurhe taghene i Meri ọ mẹrenvwan nyoma ẹhẹn ọfuanfon na, bọmọke ọye rhẹ i Josẹf i ki rọnmọ. 19 Fọkime i Josẹf ro rhiẹ esa ye omamọ ohworho, nọ gwọlọ bẹbẹ fonrọnmo na, fọkime ọ gwọlọ phọphiẹ ọrẹ afiede-e. 20 Ọrẹn, ọke rọ dabu roro kpahen ekwakwa enana hin, nughe! ọmakashe i Jehova* nọ homaphia riẹn uvuẹn emena. Nọ ta riẹn: “Josẹf, ọmọ i Devid, wu vwa zofẹn wu na ha i Meri ro rhiẹ anuọ rie-e, fọkime nyoma ẹhẹn ọfuanfon na yọ mẹrenvwan. 21 Ọye ono vwiẹ ọmọ ọhworhare, ne wu ne se ọmọ na i Jesu,* fọkime ono simi ihworho yi nẹ edandan aye.” 22 Itiọrurhomẹmro, ọsoso ekwakwa enana i phiare neneyo oborẹ i Jehova ọ tare nyoma ọmẹraro ọnẹyen o te orugba, rọ tare: 23 “Nughe! Ọgbọtọ ro vwo ji chiọghọ ọnọ mẹrenvwan ji vwiẹ ọmọ ọhworhare. Ene se yi Imanuẹl,” ro mevirhọ “Osolobrugwẹ Rhẹ Ọwan i Gba Havwiẹ.”
24 Omarana, Josẹf nọ rhọmọ nẹ omerhẹn ji ruẹ oborẹ ọmakashe i Jehova ọ ta riẹn, nọ ha aniẹ rie. 25 Ọrẹn, o lelie bru ehware bọmọke o ki vwiẹ ọmọ na-a. Ọke oru, Josẹf no mwu i Jesu rẹn ọmọ na.