Iyẹnrẹn Ọrẹ i Matiu
16 Itu i Farisi ọrhẹ itu i Sadusi na ni bru i Jesu rhiẹ avwaye mọ damiẹ ni, aye ni ta riẹn no dje oka ro nẹ odjuwu rhe rẹn aye. 2 Nọ kpahenrhọ rẹn aye taghene: “Owuọwọn orho te, are na ta, ‘Aruọke na ono rhomu fọkime ivwrevwrede na ọ bara.’ 3 Urhiọke orho te, are na ta, ‘Aruọke na ọnọ fọ, oso ọnọ ji rhọ inyenana fọkime ivwrevwrede na ọ bara, ọrẹn aruọke na o birhọ.’ Are i rhe oborẹ e ni aruọke sua omamọ, ọrẹn are i vwa sabu rhian oborẹ oka ọke ọnana o mevirhọ-ọ. 4 Uvwiẹ ọkon ro ji rhiẹ igberadja* yọ gwọlọ oka, ọrẹn o vwo oka owuorowu re ne dje riẹ-ẹn, jokpanẹ oka i Jona.” Omarana, nọ nyaji aye vwo avwaye.
5 Vwana, idibo na ni danvrẹn riẹ obọreva urhie na, ọrẹn aye a karorhọ kpare ibrẹdi lele oma-a. 6 Jesu nọ ta rẹn aye: “Are i rhiẹ ikẹro are firhọ, ji ni oma so fọkiẹ iyisti itu i Farisi ọrhẹ itu i Sadusi na.” 7 Omarana, aye na ta rẹn omoma aye taghene: “Ọwan a kpare ibrẹdi owuorowu lele oma-a.” 8 Ọke i Jesu o rhe oborẹ aye a ta, nọ tare: “Are ri vwo esegburhomẹmro ọkokamu na, mesoriẹ are a ta uvwre oma are taghene are e vwo ibrẹdi-i? 9 Are e ji vwẹruọ oborẹ mia ta? Gbinẹ are a karorhọ ibrẹdi isionrin mi ha ghẹrẹ awan 5,000 ọrhẹ uchunu ekalokpọ are i koko eri hẹrhẹre rhọ? 10 Yanghene oborẹ mi ru ha ibrẹdi irhiruẹ ghẹrẹ awan 4,000 ọrhẹ uchunu ekalokpọ* eduado are i koko eri hẹrhẹre rhọ? 11 Mesoriẹ are i vwe vwẹruọ ye taghene mi vwa ta kpahen ibrẹdi-i? Ukpomaran, mia ta rẹn are taghene are i ni oma so fọkiẹ iyisti itu i Farisi ọrhẹ itu i Sadusi na.” 12 Omarana, aye ni me vwẹruọ ye taghene ọ vwọ ta rẹn aye nẹ aye i ni oma so fọkiẹ iyisti re ruẹ ibrẹdi-i, ukpomaran fọkiẹ uyono itu i Farisi ọrhẹ itu i Sadusi na.
13 Ọke i Jesu o te uvwrotọre i Sẹseria i Filipai, nọ nọ idibo yi: “Ọrọmo yẹ ihworho a ta taghene yẹ Ọmọ onyakpọ na?” 14 Aye ni tare: “Ihworho ezẹko aghene i Jọn ro Brawanrhame na, erọrọ aghene Ẹlaijah, awọrọ aghene i Jerimaya yanghene owuọwan usuẹn emẹraro na.” 15 Ọrẹn, nọ nọren aye: “Nẹ are vwo? Ọrọmo yẹ omẹmẹ?” 16 Saimọn Pita nọ kpahenrhọ ye: “Wẹwẹ yi Kristi na, Ọmọ Osolobrugwẹ ro nyerẹn na.” 17 Jesu nọ ta riẹn: “Omamerhomẹ o rhirhiẹ ye wẹn Saimọn ro rhiẹ ọmọ i Jona, fọkime rhẹ uhwen ọrhẹ ọbara* yi djerie wẹ-ẹn, ọrẹn Ọsẹ mẹ obẹ idjuwu yo djerie wẹn. 18 Habaye, mia ta wẹn: Wẹwẹ yi Pita, oberun atita ọnana yi mi na bọn ukoko mẹ rhọ, anurẹsẹ Usin* ọ sabu fiekparobọ-ọ. 19 Mi na yọ isaphẹ Uvie idjuwu na, kemru kemru wu gbare uvuẹn otọrakpọ na, a ghwanreriẹn gba ye obẹ idjuwu ne. Kemru kemru wu rhanren uvuẹn otọrakpọ na, a ghwanreriẹn rhan ye obẹ idjuwu ne.” 20 Omarana, nọ ha orhetio ọgbogbanhon rẹn idibo na taghene aye i vwa ta rẹn ohworho owuorowu taghene ọye yi Kristi na-a.
21 Nẹ ọke ọrana nyarhẹn, Jesu no dje yi fiotọre rẹn idibo yi taghene ono vi riẹ i Jerusalẹm ji rioja ekwakwa buebun nẹ abọ ekpako na, ilori irherẹn na ọrhẹ eyẹbe na, ne ne ji kpe yi hwu. Ọrẹn uvuẹn ẹdẹ ọresa ye, na na rhọmiẹ nuhwu. 22 Omarana, Pita nọ hariẹ riẹ okokọ ya ghwọghwie taghene: “Ọrovwori, wu vwa ta aruẹ ẹmro ọrana kpahen oma-a. Emru omaran ọ phia wẹn kakaka-a.” 23 Ọrẹn, ọke i Jesu ọ dẹrughwaroghwu i Pita, nọ ta riẹn: “Riẹ oberhumu mẹ, Echu! Wẹwẹ ukọ ha mẹ, fọkime iroro ituakpọ yu we roro, rhẹ iroro Osolobrugwẹ-ẹ.”
24 Omarana, Jesu nọ ta rẹn idibo yi: “Orhianẹ o vwo ohworho rọ gwọlọ leli mẹ, je nọ tiẹn omayen ji kpare orhan oja ọnẹyen, no rho leli mẹ. 25 Kohworho kohworho rọ gwọlọ simi arhọ ye, ọnọ va ye obọ. Ọrẹn kohworho kohworho rẹ arhọ ye ọ variẹ obọ fọkiẹ omẹmẹ, ọnọ rharhumu vwo yi. 26 Itiọrurhomẹmro, erere ọgo yo no te ohworho obọ, orhianẹ o vwo ọsoso akpọ na, ọrẹn arhọ ye nọ variẹ obọ? Yanghene me yẹ ohworho ọnọ sabu tiobọnu ha wene arhọ ye? 27 Fọkime Ọmọ onyakpọ na ọrhẹ emakashe enẹyen ina rhiọ uvuẹn odidi Ọsẹ ye, nọ nọ kwosa rẹn owuowọnwan lele uruemru ọravwọ. 28 Itiọrurhomẹmro mia ta rẹn are, o vwo ihworho ezẹko usuẹn eri meviẹ arana ri ne je hwuo kakaka, jokpanẹ aye i mẹrẹn Ọmọ onyakpọ na vwẹre rọ sa uvuẹn Uvie ọnẹyen.”