Iyẹnrẹn Ọrẹ i Matiu
21 Ọke aye a joma te i Jerusalẹm, aye ni domaji uvuẹn i Bẹtfeji rọ ha Ugbenu Oliv, Jesu no dje idibo yi awanva urhomu. 2 Nọ ta rẹn aye: “Are i ruẹ uvuẹn ọko ra kpararo mẹrẹn na. Ogege are i rhe te avwaye, are ina mẹrẹn ekẹrẹkẹtẹ ọrhẹ ọmọyen ra gba kẹriẹ. Are i rhan aye, nẹ are i ha aye vwe mẹ. 3 Ohworho ọrhọ nọ are onọ kpahiẹn, are i ta riẹn taghene, ‘Ọrovwori na ọ gwọlọ ha aye ruiruo.’ Ogege, ono tiobọnẹ aye rẹn are.”
4 Itiọrurhomẹmro, ọnana ọ phiare neneyo ọ ha oborẹ ọmẹraro na ọ tare te orugba taghene: 5 “Are i ta rẹn ọmọ ọgbọtọ i Zayọn: ‘Nughe! Orodje ọnọ o bruo sa, ọ havwọ dẹndẹn, o siyẹ oberun ekẹrẹkẹtẹ, ee, oberun ọmọ ekẹrẹkẹtẹ ra ha kpare ehwan.’ ”
6 Omarana, idibo na ni nyarhẹn ye ruẹ oborẹ i Jesu ọ ta rẹn aye. 7 Aye ni ha ekẹrẹkẹtẹ na ọrhẹ ọmọyen rhe, jeghwai ha ewun otafe aye kpa oberun aye, Jesu no siyẹ oberun ewẹn na. 8 Ihworho buebun uvuẹn otu na, na ha ewun otafe aye kpa izede na, ọrẹn awọrọ ne bru erhọre ephanren ji ha aye kpa izede na. 9 Habaye, otu ri kobaro riẹn ọrhẹ ere lelie oberhumu ne kperẹ phia: “Biko simi Ọmọ i Devid! Ebrurhọ o rhirhiẹ ye rẹn ohworho rọ rhere rhẹ odẹ i Jehova! Biko simie, wẹwẹ ri ha idjuwu na!”
10 Ọke i Jesu o te i Jerusalẹm, ọsoso amwa na nọ mọ vuọn rhẹ edon, ihworho na nọ: “Ọnana ọrọmo?” 11 Otu na na kpahanrhọ rẹn aye taghene: “Ọnana i Jesu ro rhiẹ ọmẹraro na, ro nẹ Nazarẹt ọrẹ i Galili rhe!”
12 Jesu nọ ruẹ oghwa ẹga na, no le ọsoso ihworho ra rhẹ ji dẹ uvuẹn oghwa ẹga na ruẹ otafe, nọ bọmọ imẹdjẹ ihworho re wene igho na rhotọre, omaran ji te ega ihworho ra rhẹ erurẹ na. 13 Jesu nọ ta rẹn aye: “A yariẹ rhotọre taghene, ‘Ene se oghwa mẹ, oghwa ẹrhomo,’ ọrẹn are i ghwẹrieriẹ rhiẹ unu ihi e tiomanuẹ ne.” 14 Habaye, ituẹro ọrhẹ ikpolo ni brurie rhiẹ oghwa ẹga na, no simirin aye.
15 Ọke ilori irherẹn na ọrhẹ eyẹbe na a mẹrẹn ekwakwa igbevwunu ri Jesu o ruru, ọrhẹ ibiẹ idama re kperẹ uvuẹn oghwa ẹga na taghene, “Biko, simi Ọmọ i Devid!” ephan ni biomirin aye omamọ. 16 Aye ni nọriẹn: “We rhon oborẹ aye a ta na?” Jesu nọ kpahenrhọ rẹn aye: “Ee. Are e ji se ọnana dẹ taghene, ‘Unu emọvwerhe ọrhẹ emeboban ye wu na ha ujiri nurhe’?” 17 Ọke rọ nyaji aye vwo, no nẹ amwa na riẹ i Bẹtani, ji merhẹn avwaye ason ọrana.
18 Ọke i Jesu ọ ghwẹrioma riẹ amwa na igidurhiọke, orhọmo no kpe yi. 19 Nọ kpararo mẹrẹn orhan ifigi owu uvuẹn okokọ izede, Jesu nọ vwẹriẹre. Ọrẹn ọ mẹrẹn omamọ owuorowu uvuẹn orhan na-a, jokpanẹ ẹbe ọvo. Omarana, nọ ta rẹn orhan na: “Wu rha mọ omamọ ghwomara-an.” Ogege, orhan ifigi na no hwuru. 20 Ọke idibo na a mẹrẹn ọnana, no gberẹ aye unu omamọ, aye ni nọriẹn: “Marhẹ orhan ifigi na o ru hwu ogege?” 21 Jesu nọ ta rẹn aye: “Itiọrurhomẹmro mia ta rẹn are, are i rhe vwo esegburhomẹmro vabọ ẹhẹn eveva, are i ghwai ruẹ oborẹ mi ruẹ orhan ifigi na ọvo-o, ọrẹn are i rha tobọ ta rẹn ugbenu ọnana taghene, ‘Ghwie nẹ aran ye se rhẹ urhie ọduado na,’ ọnọ phia. 22 Kemru kemru are i nekpẹn yen uvuẹn ẹrhomo, are ine vwo yi, are i rhe vwo esegburhomẹmro.”
23 Ọke rọ ruẹ oghwa ẹga na, ilori irherẹn na ọrhẹ ekpako ihworho na ni brurie rhe ọke ro yono ihworho, aye ni nọriẹn: “Omẹgbanhon ọgo wa ha ruẹ ekwakwa enana? Ọrọmo yọ yẹruọ omẹgbanhon ọnana?” 24 Jesu nọ kpahenrhọ rẹn aye: “Mi na ji nọ are onọ owu. Are i rha kpahenrhọ ye mẹ, ni mi na ta rẹn are kpahen omẹgbanhon mie ruẹ ekwakwa enana: 25 Bọgo yẹ omẹgbanhon ri Jọn o bru ihworho rhẹ ame o nurhe? Obẹ odjuwu gbinẹ obẹ ituakpọ?” Ọrẹn aye ne roro uvwre oma aye taghene: “Ọwan i rha taghene ‘obẹ odjuwu,’ ọnọ nọ ọwan, ‘Ni mesoriẹ are i vwe vwo imwẹro kpahiẹn’? 26 Ọrẹn, arha ta taghene ‘obẹ ituakpọ,’ ọwan e rhe oborẹ otu na ina sabu ru ọwa-an, fọkime aye ephian i vwo imwẹro taghene i Jọn ọmẹraro.” 27 Omarana, aye ni kpahenrhọ rẹn i Jesu: “Ame e rhe-e.” Jesu nọ ta rẹn aye: “Mi ji ta rẹn are kpahen omẹgbanhon mie ruẹ ekwakwa enana-a.
28 “Me yẹ are i rorori? Ọhworhare owu o vwo emọ awanva. No bru ọrẹ ọkpako nya ji ta riẹn, ‘Ọmọ mẹ, ya wian uvuẹn ogba ivaini na inyenana.’ 29 Ọmọkpako na nọ tare, ‘Mi nya-a.’ Ọrẹn ọke oru, no wene ẹhẹn ji nya. 30 Ọsẹ na no bru ọmọ ọreva ye, ji ta aruẹ ẹmro owu na riẹn. Ọmọ ọnana nọ kpahenrhọ riẹn, ‘Mi na nya Baba,’ ọrẹn orho kwe nya-a. 31 Ọgo usuẹn emọ awanva na yi ruẹ ọhọre ọsẹ ye?” Aye ni tare: “Ọmọkpako na.” Jesu nọ ta rẹn aye: “Itiọrurhomẹmro mia ta rẹn are, ere vwiosa urhomu ọrhẹ igberadja na ine kiki are ruẹ Uvie Osolobrugwẹ. 32 Fọkime i Jọn o dje izede ọvwata rẹn are, ọrẹn are e vwo esegburhomẹmro kpahiẹ-ẹn. Ọrẹn, ere vwiosa urhomu ọrhẹ igberadja na i vwo esegburhomẹmro kpahiẹn. Ọke are a tobọ mẹrẹn ọnana, are e wene ẹhẹn ji vwo esegburhomẹmro kpahiẹ-ẹn.
33 “Are i kerhọ udje ọrọrọ: O vwo ọhworhare owu ro vwo otọre, nọ wọ ivaini rhẹ otọre na ji gbogba kinhariẹ ye. No ruẹ ekete re mie enyo rhẹ uvuien ji bọn oghwa ro rierun rhọ ye. Ọke oru, no tiobọnie rẹn eghwẹrẹ ji riẹ ẹkwotọre ọrọrọ. 34 Ọke ra na kọrọ emamọ na o te, no dje evrẹn yen bru eghwẹrẹ na ya ha emamọ enẹyen rhe. 35 Ọrẹn, eghwẹrẹ na ni mwu evrẹn na, aye ni kpe owu omamọ ekpe, aye ni kpe ọreva ye hwu, ji ha ukpokpo fiẹ ọrọrọ. 36 Nọ rharhumu dje evrẹn erọrọ ri bun ghwẹ otu erukaro na nya. Ọrẹn eghwẹrẹ na ni ji ruẹ aye oborẹ aye i ruẹ evrẹn erukaro na. 37 Obẹtaye, no dje ọmọyen bru aye, nọ ta rẹn omayen, ‘Aye ine mwuọghọ rẹn ọmọ mẹ.’ 38 Ọke eghwẹrẹ na a mẹrẹn ọmọ na, aye na ta uvwre omoma aye, ‘Ọnana yọ nọ ha enyerẹn yen riuku. Are i mọ ne kpe yi hwu ji ha enyerẹn yen riuku!’ 39 Omarana, aye ni mwu ọmọ na ji lọriẹ ruẹ otafe ogba ivaini na, aye ni kperie hwu. 40 Omarana, ọro vwo ogba ivaini na ọrhọ rhe, me yo no ruẹ eghwẹrẹ erana?” 41 Aye ni kpahenrhọ riẹn: “Ono kpe aye hwu fọkime aye evwọkon. No no ji tiobọnu ogba ivaini na rẹn eghwẹrẹ erọrọ, ri na yẹ ye emamọ enẹyen ọke na orho te ne.”
42 Jesu nọ ta rẹn aye: “Are e ji seyi dẹ uvuẹn Eyaya Ọfuanfon na taghene, ‘Atita rẹ ihworho ra bọn ebanbọn i tenren, ọ ghwẹriẹ rhiẹ atita rọ mai ghanren ne?* Obẹ i Jehova yẹ ọnana o nurhe, jẹ emru igbevwunu uvuẹn ikẹro ame.’ 43 Ọnana yọ soriẹ mia ta rẹn are taghene, ana ha Uvie Osolobrugwẹ mie are, ji haye rẹn agbamwa rọ mọ emamọ yen. 44 Habaye, ohworho ro se bru atita ọnana, ọnọ ghwọghọ yẹghẹyẹghẹ. Kohworho kohworho rẹ atita ọnana o se bru, ọnọ pẹtiẹ mwuotọre.”
45 Ọke ilori irherẹn na ọrhẹ itu i Farisi na e rhon idje rọ haphia, aye ni mẹrẹnvwrurhe taghene aye yi Jesu ọ ta kpahan. 46 Dedevwo aye i gwọlọ mwu* i Jesu, aye na zofẹn otu na, fọkime otu na i vwo imwẹro taghene i Jesu ọmẹraro.