Iyẹnrẹn Ọrẹ i Mak
12 Ọke oru, nọ nyoma idje tẹmro rẹn aye taghene: “Ọhworhare owu nọ wọ ivaini rhẹ ogba ye, nọ gbogba kinhariẹ ye ji ruẹ ekete re mie enyo rhẹ uvuien jeghwai bọn oghwa ro rierun rhọye. Ọke oru, no tiobọnie rẹn eghwẹrẹ ji riẹ ẹkwotọre ọrọrọ. 2 Ọke ra na kọrọ emamọ na o te, no dje ọvrẹn owu bru eghwẹrẹ na ya ha emamọ ivaini ezẹko mie aye rhe. 3 Ọrẹn, aye ni mwu ọvrẹn na, kpe yi, ji dje yi ghwẹrioma rhẹ abọ ọkaka. 4 No dje ọvrẹn ọrọrọ bru aye nya, aye ni ha emru ghwiẹ ọrana urhomu ji phọphiẹ. 5 Nọ rharhumu dje ọvrẹn ọrọrọ, ọrẹn aye ni kpe ọrana hwu. O ji dje evrẹn erọrọ buebun bru aye, aye ni kpe ezẹko omamọ ekpe, ji tobọ kpe erọrọ hwu. 6 O ji vwo ohworho owu rọ hẹrhẹre, nọyẹ ọmọyen ro vwo ẹgwọlọ kpahen. Obẹtaye, no djerie bru aye nya. Nọ ta rẹn omayen, ‘Aye ine mwuọghọ rẹn ọmọ mẹ.’ 7 Ọrẹn eghwẹrẹ erana, na ta uvwre omoma aye, ‘Ọnana yọ nọ ha enyerẹn yen riuku. Are i mọ ne kpe yi hwu, enyerẹn yen no no rhiẹ ọrẹ ọwan.’ 8 Omarana, aye ni mwu ọmọ na ji kpe yi hwu, aye ni donrinrien rhẹ otafe ogba na. 9 Ni me yẹ ọro vwo ogba ivaini na ono ruo? Ono mo kpe eghwẹrẹ na hwu, ji ha ogba ivaini na rẹn awọrọ. 10 Are e ji seyi dẹ uvuẹn eyaya ọfuanfon na taghene: ‘Atita rẹ ihworho ra bọn ebanbọn na i tenren, ọ ghwẹriẹ rhiẹ atita rọ mai ghanren ne?* 11 Obẹ i Jehova* yẹ ọnana o nurhe, jẹ emru igbevwunu uvuẹn ikẹro ame.’”
12 Omarana, aye na gwọlọ mwu i Jesu. Ọrẹn ofẹn otu na no mwu aye, fọkime aye i rheri taghene fọkiẹ aye yi Jesu o dje udje na. Omarana, aye ni nyajevwo nyarhẹn.
13 Ọke oru, aye ni dje itu i Farisi ezẹko ọrhẹ ẹko ra hobọtua i Hẹrọd vwe i Jesu, nẹ aye i sabu mẹrẹn ekete mọriẹn fọkiẹ ẹmro enẹyen. 14 Ọke aye e te avwaye, aye ni ta riẹn: “Oyono, ame i rheri taghene wẹwẹ ohworho urhomẹmro, wu vwe ji ni ohworho ruẹ-ẹ. Fọkime rhẹ oborẹ ihworho i havwọ otafe yu we nẹ-ẹ, oborẹ we yono ihworho kpahen Osolobrugwẹ jẹ urhomẹmro. Ọrẹn, o fori* na kwosa urhomu rẹn i Siza, gbinẹ o fo-o? 15 O fori nẹ ame i kwa ye gbinẹ o fo-o?” Ọke i Jesu ọ mẹrẹn uruemru omeru aye vwrurhe, nọ ta rẹn aye: “Mesoriẹ are a dami mẹ nẹ? Are i ha i dinariọs* owu vwe mẹ mi nie.” 16 Aye ni ha i dinariọs owu rhe, nọ nọren aye: “Ughwaro ọrhẹ eyaya ọrọmo yọ ha uvuien?” Aye ni tare: “Ọrẹ i Siza.” 17 Jesu nọ ta rẹn aye: “Are i kwa ekwakwa i Siza rẹn i Siza, ọrẹn are i kwa ekwakwa Osolobrugwẹ rẹn Osolobrugwẹ.” Ẹmriẹn no gberẹ aye unu.
18 Vwana, itu i Sadusi ra ta taghene o vwo ẹrhọmọnuhwu-u, ni bru i Jesu rhe mọ nọ yen: 19 “Oyono, Mosis ọ yariẹ rhotọre rẹn ame taghene orhianẹ ohworho o hwu jẹ aniẹ vwo, ọrẹn o vwiẹ ọmọ-ọ, omizie ọgbọ rọnmọ aniẹ neneyo o vwiẹ ọmọ rẹn omizie ro hwuru na. 20 O vwo imizu awan irhiruẹ. Ọrukaro na nọ rọnmọren, ọke oru no hwuru, ọrẹn o vwiẹ ọmọ owuorowu-u. 21 Omizie ọreva nọ rọnmọ ọmase na, ọke oru no ji hwu, ọrẹn o vwiẹ ọmọ owuorowu-u. Omaran yọ ji phia rẹn omizie ọresa. 22 O vwo ọro vwiẹ ọmọ usuẹn aye awan irhiruẹ na-a. Obẹtaye, ọmase na no ji hwu. 23 Uvuẹn ẹrhọmọnuhwu na, ọrọmo yo no rhiẹ esa ye? Fọkime aye awan irhiruẹ na i rọnmọ ọmase na.” 24 Jesu nọ ta rẹn aye: “Rhẹ ọnana yọ soriẹ iroro are ọ sọ na? Fọkime are e rhe Eyaya Efuanfon na yanghene omẹgbanhon Osolobrugwẹ-ẹ. 25 Fọkime arha rhọmọ aye nuhwu, ehworhare i rọnmọ-ọ, emẹse i ji riẹ orọnmo-o. Ukpomaran, aye ina họhọ emakashe obẹ idjuwu. 26 Ọrẹn sekpahen ihworho ra na rhọmọ nuhwu na, are e se oborẹ i Mosis ọ ya kpahen ikuegbe orhan ivwẹn na taghene Osolobrugwẹ ọ ta riẹn: ‘Mẹmẹ yẹ Osolobrugwẹ Ebraham, Osolobrugwẹ Aizik ọrhẹ Osolobrugwẹ i Jekọb’? 27 Ọye rhẹ Osolobrugwẹ ihworho ri hwuru-u, ukpomaran ọye Osolobrugwẹ ihworho re nyerẹn. Iroro are ọ sọre omamọ.”
28 Ọyẹbe owu rọ rhere ọke aye a frẹfro, nọ kerhọ oborẹ aye a ta. Ọke o rhe taghene i Jesu ọ dabu kpahenrhọ rẹn aye, nọ nọriẹn: “Akama ọgo yẹ ọrukaro* usuẹn ekama na ephian?” 29 Jesu nọ kpahenrhọ riẹn: “Ọrukaro na yẹ, ‘Are i kerhọ, O Izrẹl, Jehova* Osolobrugwẹ ọwan, Jehova* owu ọvo. 30 Wu ne vi vwo ẹgwọlọ kpahen i Jehova* Osolobrugwẹ ọnọ rhẹ ọsoso ọmuduo ọrhẹ ọsoso arhọ ọnọ ọrhẹ ọsoso iroro ọnọ kugbe ọsoso omẹgbanhuọn.’ 31 Ọreva ye yẹ: ‘Wu ne vi vwo ẹgwọlọ kpahen ọreva jerẹ oma ọnọ.’ O vwo akama ọrọrọ rọ do ghwẹ enana-a.” 32 Ọyẹbe na nọ ta riẹn: “Oyono, wu dabu rhe ẹmro ta, ẹmro wu tare na urhomẹmro, ‘Osolobrugwẹ owu ọvo yọ havwiẹ, gbobọhiẹn yen o vwo ọrọrọ-ọ.’ 33 Habaye, ne vwo ẹgwọlọ kpahiẹn rhẹ ọsoso ọmudu ọwan ọrhẹ ọsoso iroro ọwan, ọrhẹ ọsoso omẹgbanhon ọwan, ne ji vwo ẹgwọlọ kpahen ereva ọwan jerẹ oma ọwan, ọ ghanren ghwẹ ọsoso izobo ẹtorhẹ ọrhẹ izobo erọrọ ephian.” 34 Ọke i Jesu ọ mẹrẹnvwrurhe taghene ẹghwanren ọ ha ẹkpahenrhọ ye na, nọ ta riẹn: “We serabọ rẹn Uvie Osolobrugwẹ-ẹ.” Omarana, o vwo ohworho owuorowu ro hinmi nọ yen enọ ghwomara-an.
35 Ọke i Jesu o yono ihworho uvuẹn oghwa ẹga na, nọ nọren: “Mesoriẹ eyẹbe na a ta taghene Kristi na ọmọ i Devid? 36 Nyoma ẹhẹn ọfuanfon na, Devid ọvo nọ tare taghene, ‘Jehova* ọ ta rẹn Ọrovwori mẹ: “Siyẹ obọrhen mẹ bọmọke mi ne fiẹ evwreghrẹn enọ rhẹ obotọre aghwọ.”’ 37 Ra mẹriẹn taghene i Devid o serie Ọrovwori na, ni marhẹ o ru rhiẹ ọmọyen?”
Otu buebun na kerhọ ye rhẹ omamerhomẹ. 38 Ọke rọ ha uyono phia, nọ tare: “Are i kẹnoma rẹn eyẹbe na ra nya sa nya rie rhẹ ewun iseseri, ra ji gwọlọ ẹmroma ihworho uvuẹn ekete eyi na. 39 Aye a ji gwọlọ ega ri karo* uvuẹn i sinagọg na, kugbe ekete ri mai titi uvuẹn akpẹriọ re ruẹ owuọwọn. 40 Aye e ken eghwa* emẹse uku ha, ji dje oma aye nyoma aye a nẹrhomo iseseri. Aye ine rhiẹromẹrẹn ẹzenguon ọgbogbanhon.”
41 Jesu no siyẹ ekete rọ nọ mẹrẹn ikpeti itetoro na, no ni ihworho re fiẹ igho rhẹ ikpeti na, edafe buebun ne fiẹ isele buebun rhọye. 42 Vwana, ọmase uku owu ro rhiẹ ovwiegbere, nọ rhere ji fiẹ isele ekokamu eva ri vwe te emru owuorowu rhọye.* 43 Omarana, no se idibo yi ji ta rẹn aye: “Itiọrurhomẹmro mia ta rẹn are taghene itetoro ọmase uku ọnana ro rhiẹ ovwiegbere na, o bun ghwẹ igho rẹ ihworho ri hẹrhẹre na i toro rhẹ ikpeti na. 44 Fọkime aye ephian i toro nẹ ekwakwa buebun aye i vwori, ọrẹn dedevwo ọmase na ọ ha ọkanronmẹ,* o toro i kemru kemru ro vwori, ọsoso oborẹ ọnọ ha nyerẹn akpọ.”