Iyẹnrẹn Ọrẹ i Mak
15 Ogege urhiọke o te, ilori irherẹn na ọrhẹ ekpako na kugbe eyẹbe na, nọyẹ ọsoso i Sanhẹdrin na ni koko djiroro kugbe. Aye ni gba i Jesu ji kpariẹ vwe i Pailet. 2 Omarana, Pailet nọ nọriẹn: “Wẹwẹ yẹ Orodje itu i Ju na?” Jesu nọ kpahenrhọ riẹn: “Wẹwẹ ọvo yi tariẹ.” 3 Ọrẹn, ilori irherẹn na ne guẹn ekwakwa buebun rhọye urhomu. 4 Pailet nọ rharhumu nọ i Jesu taghene: “O vwo oborẹ wu na kpahenrhọ ẹmro na? Gbe ni ekwakwa buebun re guẹn rhẹ urhomuo.” 5 Ọrẹn, Jesu ọ kpahẹnmro owuorowu hariẹ-ẹn, te erhirhiẹ o gbe i Pailet unu.
6 Kọke kọke ra riorẹ Ọnyavrẹn na, Pailet o tiobọnu ohworho owu nẹ ekanron rẹn otu na, kohworho kohworho aye i gwọlọre. 7 Uvwrọke ọrana, ọhworhare owu re se i Barabas ọ ha ekanron rhẹ ihworho re gbe kpahen usun, ri ji kpe ihworho ọke aye e gbe kpahen usun. 8 Omarana, otu na ni mọ nekpẹn ohworho aye i gwọlọre mie i Pailet, jerẹ oborẹ o ruẹ rẹn aye bi. 9 Nọ nọren aye taghene: “Are i gwọlọre ni mi tiobọnu Orodje itu i Ju na rẹn are?” 10 Fọkime Pailet o rheri taghene fọkiẹ omẹriọ yẹ ilori irherẹn na e mwu i Jesu bruie rhe. 11 Ọrẹn, ilori irherẹn na ni riẹriẹ otu na, nẹ aye i ta riẹn no tiobọnu i Barabas rẹn aye. 12 Pailet nọ rharhumu nọ aye: “Ni me mi ne ruẹ ohworho are e se Orodje itu i Ju na?” 13 Aye ni rharhumu korunu phia taghene: “E kpe yi mwu orhan!”* 14 Ọrẹn, Pailet nọ nọren aye: “Mesoriẹ? Emru obiobiomu ọgo yo ruru?” Ọrẹn, aye ne ji korunu gbangbanhon taghene: “E kpe yi mwu orhan!”* 15 Ọrẹn, fọkime Pailet ọ gwọlọre nẹ oma ọ merhen otu na, no tiobọnu i Barabas rẹn aye. Ọke rọ ta taghene a fa i Jesu hin, no tiobọnie rẹn aye ne ye kpe yi mwu orhan no hwu.
16 Isodja na ni ha i Jesu ruẹ egodo na, nọyẹ egodo igọvunọ na. Aye ni se ọsoso isodja ri ha avwaye koko. 17 Aye ni kuẹ ewun ọghoghanren* rhọ i Jesu, ji ha idjigbẹn rhuon erhu orodje, aye ni kurie rhọye urhomu. 18 Aye na ta riẹn taghene: “Orodje itu i Ju na, ame a mroma!”* 19 Habaye, aye na ha orhan fa ye urhomu ji djen erhẹnrhen ghwuie, aye ni sighwẹ ji gburhomu rhotọre riẹn. 20 Obẹtaye, ọke aye a haye djechẹẹ hin, aye ni rhan ewun ọghoghanren* na nẹ omayen, ji rharhumu kuẹ ewun otafiẹ rhọye. Aye ni kpareriẹ nyarhẹn ya kanriẹn mwu orhan. 21 Habaye, aye ni gba ọhworhare owu ro nẹ otafe amwa na sa nọ kpare orhan oja* i Jesu, odẹ ye i Saimọn ro rhiẹ onyẹ i Sairini ro rhiẹ ọsẹ Alẹzẹnda ọrhẹ i Rufọs.
22 Omarana, aye ni hariẹ riẹ ekete owu re se Gọgọta, ro mevirhọ “Ekete Okakurhomu.” 23 Aye ni damoma aye ina yẹ ye enyo re gbe kugbe rhẹ i mai uvuẹn avwaye, ọrẹn o kwe da ye-e. 24 Aye ni kanrenriẹn mwu orhan. Aye ni ji bọ itẹ ha ghalẹ ewun otafiẹ nẹ aye i sabu rhe ewun ro no te ohworho owuowu. 25 Emrẹ ughwọdjọ irhinrin urhiọke* ya kanriẹn mwu orhan. 26 Aye ni ya ẹmro ra ha mọriẹn na rhẹ ophanphan rọ tare: “Orodje itu i Ju na.” 27 Habaye, na kanren ihi awanva mwu erhan kẹriẹ, owu ọ ha obọrhiẹn, ọreva ye ọ ha obohwẹriẹ. 28* —— 29 Ihworho ra nyavrẹn na ta erharhere ẹmro riẹn ji kpogho urhomu aye, aye na ta: “Ebabo! Wẹwẹ ri tare taghene wu na ghwọghọ oghwa ẹga na ji rharhumu bọn yen hin ẹdọke esa, 30 gbe simi oma nyoma wu na ruotọre nẹ orhan oja na.”* 31 Omarana, ilori irherẹn na ọrhẹ eyẹbe na, na ji haye djechẹẹ uvwre omoma aye taghene: “O simi awọrọ, ọrẹn ọ sabu simi omaye-en! 32 Jenẹ i Kristi na ro rhiẹ Orodje Izrẹl, ọ ruotọre nẹ orhan oja na* neneyo ame i mẹriẹn ji vwo imwẹro kpahiẹn.” Ihworho ra kanren mwu erhan kẹriẹ na, ne ji hinmaro kpahiẹn.
33 Ọke emrẹ ughwọdjọ ikpereva erhẹrhuvo* o te, ekete ephian no mwuokuku ye te emrẹ ughwọdjọ esa erhẹrhuvo.* 34 Emrẹ ughwọdjọ esa erhẹrhuvo, Jesu no kperi phia rhẹ uvwele gorigori taghene: “Ẹli Ẹli lama sabaktani?” ro mevirhọ: “Osolobrugwẹ mẹ, Osolobrugwẹ mẹ, mesoriẹ wa sẹrerhumuji mẹ vwo?” 35 Ọke ihworho ezẹko ri mevi avwaye e rhon oborẹ ọ tare, aye na ta: “Nughe! O se Ẹlaijah.” 36 Owuọwan nọ zẹ ye dumu akworhẹ rhẹ enyo rọ fiunu, nọ ha orhan kpariẹ vwe yi nọ da, nọ ta: “Nyajevwo! Jene nie sẹ Ẹlaijah ọnọ mọ kpariẹ ruotọre.” 37 Ọrẹn, Jesu nọ kpare ugo oviẹ, no fuẹn ẹhẹn.* 38 Ikọtini ekete ọfuanfon na nọ bẹrẹre akwava nẹ oberun ye totọre. 39 Vwana, ọke olotu isodja ro mevi dẹrughwaroghwu i Jesu, ọ mẹrẹn ekwakwa ri phiare ọke o hwu, nọ tare: “Itiọrurhomẹmro, ọhworhare ọnana ghini Ọmọ Osolobrugwẹ.”
40 O ji vwo emẹse ezẹko ri ha ekete oseseri re ni oborẹ ọ phia, usuẹn aye yẹ Meri Magdalin, omaran ji te Meri ro rhiẹ izu i Jems Ọkokamu ọrhẹ Josis. Salomi ọ ji ha usuẹn aye. 41 Emẹse enana e leli Jesu ji gbodibo riẹn ọke rọ ha i Galili. Emẹse erọrọ buebun ri ji lelie nẹ i Jerusalẹm rhe, i ji ha avwaye.
42 Vwana, ọke owuọwọn ọ joma te ne uvuẹn Ẹdẹ Egbemwuo na, nọyẹ ẹdẹ owu bọmọke Ẹdẹ Omeronmo na ono ki te, 43 Josẹf onyẹ Arimatia nọ rhere. Ọye owuọwan usuẹn Idiẹnghware re mwuọghọ riẹn, ọye ọ ji hẹrhẹ Uvie Osolobrugwẹ. No fiudugbere bru i Pailet ya nekpẹn orinmi Jesu mie yi. 44 Ọrẹn, Pailet no roro sẹ i Jesu o ghini hwu ne, no se olotu isodja na ji nọ yen sẹ i Jesu o hwu ne. 45 Omarana, ọke olotu isodja na ọ yẹ ye imwẹro taghene i Jesu o hwu ne, no tiobọnu orinmi na rẹn i Josẹf. 46 Ọke rọ dẹ obọdẹn ewun ji kpare orinmi Jesu rhẹ otọre hin, nọ ha ewun na fariẹ ji kpariẹ rhẹ usin* ra tọn rhẹ uvuẹn atita. Ọke oru, no ghonrien atita rhurhu unu usin na. 47 Ọrẹn, Meri Magdalin ọrhẹ Meri ro rhiẹ izu i Josis, ne ji ni ekete ra kpare orinmi Jesu rhọ na.