Iyẹnrẹn Ọrẹ i Matiu
20 “Fọkime Uvie idjuwu na ọ họhọ onini oghwa owu rọ ruẹ otafe igidurhiọke ya gwọlọ ihworho ri na wian uvuẹn ogba ivaini ọnẹyen. 2 Ọke ro kwe taghene ọnọ kwa i dinariọs owu rẹn eri na wian owian na uvuẹn ehion ẹdẹ na, no djeri aye ya wian uvuẹn ogba ivaini ọnẹyen. 3 Ọke rọ ji ruẹ otafe emrẹ ughwọdjọ irhinrin urhiọke,* nọ mẹrẹn otu erọrọ ri mevi ekete eyi na ri vwe vwo owian. 4 Nọ ta rẹn aye, ‘Are i ji ya wian uvuẹn ogba ivaini mẹ, mi na kwosa ro serhọ rẹn are.’ 5 Omarana, aye ni nyarhẹn. Ọke oru, onini na nọ rharhumu ruẹ otafe emrẹ ughwọdjọ ikpereva* ọrhẹ ughwọdjọ esa erhẹrhuvo,* no ji ye se awọrọ ma wian. 6 Obẹtaye, emrẹ ughwọdjọ isionrin owuọwọn,* nọ ruẹ otafe ji mẹrẹn awọrọ ri mevi, nọ nọren aye, ‘Mesoriẹ are e mevi aran avwurhiọke rhe na, ọrẹn are e vwo owia-an?’ 7 Aye ni tare, ‘Fọkime o vwo ohworho rọ yẹrẹ ame owia-an.’ Nọ ta rẹn aye, ‘Are i ji ya wian uvuẹn ogba ivaini mẹ.’
8 “Ọke owuọwọn o te, onini na nọ ta rẹn ọrọ hẹrote ogba ivaini ọnẹyen taghene, ‘Se era wian owian na ne wu kwosa rẹn aye, tonrhọ rhẹ eri rhe kerhumu bọmọke ono ki te ihworho erukaro na.’ 9 Ọke ehworhare ra hare owian emrẹ ughwọdjọ isionrin owuọwọn na a rhe, na yẹrẹ aye owuowọnwan i dinariọs owu. 10 Omarana, ọke ihworho erukaro na a rhe, aye ne roro taghene ene fi ba osa aye, ọrẹn na ji kwa i dinariọs owu rẹn aye. 11 Ọke ra kwosa rẹn aye hin, aye ne brenu fọkiẹ oborẹ onini oghwa na o ruru. 12 Aye ni tare, ‘Unọke owu ọvo yẹ ehworhare enana ri rhe kerhumu na i wianren, ọrẹn uchunu osa wu kwa rẹn aye, ye wu ji kwa rẹn ame ri wian gbangbanhon ọsoso ẹdẹ na uvuẹn uvo ọgbogbanhon na!’ 13 Ọrẹn, nọ ta rẹn owuọwan usuẹn aye, ‘Ọse, mie ruo sọ-ọ. Dinariọs owu yẹ omẹmẹ ọrhẹ owẹwẹ i gbe kwerhọ, rhomaran? 14 Ha osa ne wu nyarhẹn. Oborẹ mi kwa rẹn ihworho enana ri rhe kerhumu na, ye mi na ji kwa wẹn. 15 Mie vwo omẹgbanhon mi ne ruẹ oborẹ o jeri mẹ rhẹ ekwakwa mẹ? Gbinẹ wa rioma* fọkime mẹmẹ omamọ ohworho?’* 16 Omaran ihworho erukaro na ine ru rhiẹ eri kerhumu, eri kerhumu ni ne rhiẹ erukaro.”
17 Ọke aye e riẹ i Jerusalẹm, Jesu no se idibo awan 12 na riẹ okokọ, nọ ta rẹn aye uvuẹn izede: 18 “Are i kerhọ, Jerusalẹm yẹ ọwan a nya na, ene fiẹ Ọmọ onyakpọ na rhẹ abọ ilori irherẹn ọrhẹ eyẹbe na. Aye ni ne brorhiẹn uhwu kpe yi. 19 Aye ni ne ji tiobọnie rẹn ihworho egbamwa na nẹ aye i haye djechẹẹ, fa ye, ji kpe yi mwu orhan no hwu. Ọrẹn uvuẹn ẹdẹ ọresa ye, na na rhọmiẹ nuhwu.”
20 Ọke oru, ane i Zẹbẹdi nọ ha emọyen ehworhare bru i Jesu ji gburhomu rhotọre riẹn, nọ nekpẹn emru owu mie yi. 21 Jesu nọ nọriẹn: “Me wu gwọlọre?” Nọ kpahenrhọ riẹn: “Vive mẹ taghene emọ mẹ ehworhare awanva enana, ine siyẹ kẹruọ uvuẹn Uvie ọnọ, owu obọrhen ọnọ, ọreva ye obohwẹre ọnọ.” 22 Jesu nọ ta rẹn aye: “Are e rhe oborẹ are a nekpẹn yen na-a. Are ina sabu da oborẹ ọ ha uvuẹn uko mia gwọlọ da na?” Aye ni kpahenrhọ riẹn: “Ame ina sabu da ye.” 23 Jesu nọ ta rẹn aye: “Itiọrurhomẹmro, are ina da nẹ uko mẹ, ọrẹn rhẹ omẹmẹ yi ne brorhiẹn ohworho ro no siyẹ obọrhen yanghene obohwẹre mẹ-ẹ, ukpomaran ihworho Ọsẹ mẹ o mwuegbe ekete erana riẹn ne, yi ne siyẹ avwaye.”
24 Ọke idibo awan ikpe ri hẹrhẹre na e rhon kpahen oborẹ ọ phiare na, ephan ni biomirin aye omamọ kpahen imizu awanva na. 25 Ọrẹn, Jesu no serẹ aye kẹroma ji ta rẹn aye: “Are i rheri taghene ere suẹn egbamwa na a ha oma aye ruẹ onini rẹn ihworho aye. Ihworho eduado na a ji ha omẹgbanhon aye sehiẹn ihworho. 26 E vwe je no rhiomaran uvwre are-e. Ọrẹn kohworho kohworho rọ gwọlọ rhiẹ ọrọ doro uvwre are, ono vi rhe gbodibo rẹn ihworho ephian. 27 Kohworho kohworho rọ gwọlọ rhiẹ ọrukaro uvwre are, ono vi rhiẹ ọvrẹn are. 28 Jerẹ oborẹ Ọmọ onyakpọ na ọ rhe me gbodibo ji ha arhọ ye ruẹ otan fọkiẹ ihworho buebun, ukperẹ ene gbodibo ha riẹn.”
29 Ọke aye e nẹ i Jẹriko, ihworho buebun ni lelirie. 30 Nughe! ọke ehworhare awanva ri tuẹro ri siyẹ okokọ izede e rhon taghene i Jesu ọ nyavrẹn, aye ni kperi phia: “Ọrovwori, gbe arodọmẹ rẹn ame, Ọmọ i Devid!” 31 Ọrẹn, otu na ni vanghwu aye taghene aye i kudu. Udabọ ọrana, aye ne ji kperẹ phia gbangbanhon taghene: “Ọrovwori, gbe arodọmẹ rẹn ame, Ọmọ i Devid!” 32 Omarana, Jesu nọ domaji. No serẹ aye ji nọ aye: “Me yẹ are i gwọlọre taghene mi ru rẹn are?” 33 Aye ni ta riẹn: “Ọrovwori, rhie ikẹro ame.” 34 Fọkiẹ aruẹdọn, Jesu nọ hobọte ikẹro aye. Ogege, aye ni mẹrude ji lelie.