Iyẹnrẹn Ọrẹ i Mak
2 Ọrẹn, ẹdẹ ezẹko a vrẹn, Jesu nọ rharhumu riẹ i Kapaniọm, iyẹnrẹn no kerabọ lele ekete ephian taghene ọ ha uvuẹn oghwa owu. 2 Ihworho buebun ni kokori avwaye, te erhirhiẹ ekete ephian o kenken, tobọ te anurẹsẹ na dede. Omarana, Jesu no ghwoghwo ẹmro Osolobrugwẹ rẹn aye. 3 Ehworhare awan ẹne ni kpare ọhworhare owu rẹ ugboma yen o hwuru vwe i Jesu. 4 Ọrẹn fọkiẹ otu na, aye arha sabu kpariẹ te ekete i Jesu ọ havwọ-ọ. Omarana, aye ni kpanren oberun oghwa i Jesu ọ havwọ na jeghwai bru ophiọ rhọ ye, aye ni nya ophiọ na kpare ekpa ọhworhare na ọ havwọ ruotọre. 5 Ọke i Jesu ọ mẹrẹn esegburhomẹmro aye, nọ ta rẹn ọhworhare ugboma yen o hwuru na: “Ọmọ mẹ, a ha edandan enọ harhomuo ne.” 6 Ọke ọrana, eyẹbe ezẹko i siyẹ avwaye, aye ne roro uvuẹn ẹhẹn aye taghene: 7 “Mesoriẹ ọhworhare ọnana ọ tẹmro omana? Ọ rhaphiẹ Osolobrugwẹ. Gbobọhiẹn Osolobrugwẹ, ọrọmo yọ nọ sabu harhomu edandan?” 8 Ọrẹn, ogege i Jesu ọ mẹrẹnvwrurhe uvuẹn ẹhẹn yen taghene aye i vwo aruẹ iroro ọnana, nọ ta rẹn aye: “Mesoriẹ are e roro aruẹ ekwakwa enana uvuẹn ọmudu are? 9 Ọgo yọ nọ phẹrẹ ẹta rẹn ọhworhare rẹ ugboma yen o hwuru na, ‘A ha edandan enọ rhomuo ne,’ gbinẹ ‘Vẹnrẹn, kpare ekpa ne wu nya’? 10 Ọrẹn, nẹ are i rhe taghene Ọmọ onyakpọ na o vwo omẹgbanhon rọ nọ harhomu edandan uvuẹn otọrakpọ na—” nọ ta rẹn ọhworhare ugboma yen o hwuru na: 11 “Mia ta wẹn, Vẹnrẹn, kpare ekpa ne wu riẹ oghwa ọnọ.” 12 Omarana, ọhworhare na no vẹnrẹnren. Ogege nọ kpare ekpa ye, ji nya ruẹ otafe udaro aye ephian. No gberi aye ephian unu omamọ, aye ne jiri Osolobrugwẹ taghene: “Ame a ji mẹrẹn aruẹ emru omana dẹ-ẹ.”
13 Jesu nọ rharhumu riẹ okokọ urhie ọduado na, ihworho na ephian na ghwiẹ bruie sa, no yono aye. 14 Ọke i Jesu ọ nyavrẹn, nọ mẹrẹn Livai ro rhiẹ ọmọ Afiọs ro siyẹ oghwa ra kwosa urhomu, nọ ta riẹn: “Rhiẹ odibo* mẹ.” Ogege no vẹnrẹnren ji nyalelie. 15 Ọke oru, Jesu nọ riẹ emaren* uvuẹn oghwa i Livai. Ere vwiosa urhomu ọrhẹ iruedandan buebun ne leli Jesu ọrhẹ idibo yi riẹ emaren* kugbe, fọkime otu aye buebun e lelie. 16 Ọrẹn, ọke eyẹbe ri rhiẹ itu i Farisi a mẹriẹn taghene i Jesu o lele iruedandan ọrhẹ ere vwiosa urhomu riẹ emaren, aye ni nọ idibo yi: “O lele ere vwiosa urhomu ọrhẹ iruedandan riẹ emaren kugbe?” 17 Ọke i Jesu o rhon ẹmro aye, nọ ta rẹn aye: “Ihworho ri vwo omọkpokpọ a gwọlọ idọkitọ-ọ, ọrẹn ere kpomẹ yi gwọleriẹ. Mi rhiẹ otọrakpọ na me se iruedandan, rhẹ evwata-a.”
18 Vwana, idibo i Jọn ọrhẹ itu i Farisi na i vwo uruemru rẹ aye e zinrin orhọmo. Omarana, aye ni rhe mọ nọ i Jesu: “Mesoriẹ idibo i Jọn ọrhẹ idibo itu i Farisi na e zinrin orhọmo, ọrẹn idibo enọ i vwe zinrin orhọmo-o?” 19 Jesu nọ ta rẹn aye: “Me yọ nọ lẹrhẹ aye zinrin orhọmo ra mẹriẹn taghene ọhworhare rọ rọnmọ na rhẹ aye i gba havwiẹ? Aye i sabu zinrin orhọmo-o, fọkime ọhworhare rọ rọnmọ na rhẹ aye i ji havwiẹ. 20 Ọrẹn, ọke ọ sa ra na ha ọhworhare rọ rọnmọ na nyaji aye vwo. Ọke ọrana, aye ni ne zinrin orhọmo. 21 O vwo ohworho ro ko evwẹrewẹn ọkpokpọ rhẹ oberun ewun ahwanre-en. Orho ruie omaran, ọrẹ ọkpokpọ na ọnọ fan nẹ ewun ahwanren na, ekete rọ bẹrẹre na nọ nọ dorhọ. 22 Habaye, o vwo ohworho ro rhie enyo ọkpokpọ rhẹ ẹkpa enyo ahwanre-en. Orho ruie omaran, ẹkpa enyo na ni na sa ji rhie enyo na fughwẹ, ẹkpa enyo na ni na ji ghwọghọ. Ọrẹn, e rhie enyo ọkpokpọ rhẹ uvuẹn ẹkpa enyo ọkpokpọ.”
23 Uvuẹn Ẹdẹ Omeronmo owu, Jesu nọ nyavrẹn ikebi owu ra wọ iwiti rhọ. Idibo yi na kọrọ ikeri iwiti na ọke aye a nyavrẹn. 24 Omarana, itu i Farisi na ni ta riẹn: “Nughe! Mesoriẹ aye e ruẹ oborẹ ọ haso urhi uvuẹn Ẹdẹ Omeronmo na?” 25 Ọrẹn, Jesu nọ ta rẹn aye: “Are e ji se oborẹ i Devid o ruru ọke emaren ọ kanriẹn, kugbe ọke orhọmo o kpe yi ọrhẹ ehworhare ri lelirie? 26 Uvuẹn iyẹnrẹn ro sekpahen Abayata ro rhiẹ olori irherẹn na, are e se oborẹ i Devid o ruru ọke rọ ruẹ oghwa Osolobrugwẹ ji riẹ ibrẹdi ra ha ze izobo rẹn Osolobrugwẹ,* jeghwai ha ezẹko rẹn ehworhare ri lelirie? Ọnana oborẹ o vwo fo nẹ ohworho owuorowu ọ re, jokpanẹ irherẹn na ọvo.” 27 Omarana, nọ ta rẹn aye: “A ha Ẹdẹ Omeronmo na mwu fọkiẹ ituakpọ, a ma ituakpọ fọkiẹ Ẹdẹ Omeronmo na-a. 28 Omarana, Ọmọ onyakpọ na yẹ Ọrovwori Ẹdẹ Omeronmo na.”