Iyẹnrẹn Ọrẹ i Mak

16 Ọke Ẹdẹ Omeronmo na ọ vrẹn hin, Meri Magdalin, Meri ro rhiẹ izu i Jems, ọrhẹ Salomi ni dẹ ekwakwa ri vwo omamọ ọrhen neneyo aye i ha aye lerhe orinmi Jesu. 2 Igidurhiọke ẹdẹ ọrukaro uvuẹn ọkprughwre na, ọke ọren na ọ homaphia ne, aye ni riẹ ekete usin* na. 3 Aye na nọ omoma aye: “Ọrọmo yo no lele ọwan ghonrien atita na nẹ unu usin na?” 4 Ọrẹn, ọke aye a kparughwaro, aye ni mẹrenriẹn taghene a ghwanreriẹn ghonrien atita na nie ne, dedevwo ọ doro omamọ. 5 Ọke aye a ruẹ uvuẹn usin na, aye ni mẹrẹn idama owu ro siyẹ obọrhen usin na, o kuẹ ewun ọfuanfon rhọ, omarana no gberẹ aye unu. 6 Nọ ta rẹn aye: “Are i vwe je no gbe are unu-u. Are a gwọlọ i Jesu ro rhiẹ onyẹ i Nazarẹt na, re kpe mwu orhan no hwu. A rhọmeriẹn nuhwu ne. Ọ ha aran ghwomara-an. Nughe, aran ya kpareriẹ rhọ bi. 7 Ọrẹn, are i nyarhẹn ya ta rẹn idibo yi ọrhẹ i Pita taghene, ‘Ọ kobaro rẹn are riẹ i Galili ne. Are ina mẹriẹn oboran, jerẹ oborẹ ọ ta rẹn are bi.’” 8 Omarana, ọke aye a ruẹ otafe, aye ni zẹ nẹ ekete usin na, no gberẹ aye unu omamọ, aye na phariẹ. Aye arha tẹmro rẹn ohworho owuorowu-u, fọkime ofẹn o mwu aye.*