Iyẹnrẹn Ọrẹ i Matiu
2 Ọke re vwiẹ i Jesu hin uvuẹn i Bẹtlẹhẹm ọrẹ i Judia uvuẹn ẹdẹ Orodje Hẹrọd, ihworho ezẹko ra ha ikereti bepha,* ni nẹ obọrẹ ọren na ọ va nẹ sa rhiẹ i Jerusalẹm. 2 Aye na nọ: “Bọgo yẹ orodje itu i Ju re vwiẹre na ọ havwọ? Fọkime ame i mẹrẹn ukereti ọnẹyen ọke ame a ha obọrẹ ọren ọ va nẹ sa na, ọ yọ soriẹ ame a rhe me gburhomu rhotọre riẹn.” 3 Ọke orodje Hẹrọd ọrhẹ ọsoso ihworho i Jerusalẹm e rhon kpahen ọnana, udu no bruru aye omamọ. 4 Hẹrọd no se ọsoso ilori irherẹn na ọrhẹ eyẹbe na koko, nọ nọren aye kpahen ekete re ne vwiẹ i Kristi* na. 5 Aye ni ta riẹn: “Uvuẹn i Bẹtlẹhẹm ọrẹ i Judia, fọkime ọnana yẹ oborẹ ọmẹraro na ọ ya rhotọre: 6 ‘Harẹn owẹwẹ, O Bẹtlẹhẹm rọ ha otọre i Juda, rhẹ owẹwẹ yi mai kamu usuẹn emwa rẹ igọvunọ i Juda e suẹ-ẹn. Fọkime ọro no suẹn ihworho na ono nẹ oma rhe, nọ nọ hẹrote Izrẹl ri rhiẹ ihworho mẹ.’ ”
7 Ọke oru, Hẹrọd nọ bẹbẹ se era ha ikereti bepha na, nọ dabu nọ aye kpahen ọke ukereti na ọ homaphia. 8 Ọke ro dje aye riẹ i Bẹtlẹhẹm, nọ ta rẹn aye: “Are i dabu ya gwọlọ ekete ọmọ na ọ havwọ, are i rha mẹriẹn ne, are i mọ nẹ iyẹnrẹn mẹ neneyo mi ji ye gburhomu rhotọre riẹn.” 9 Ọke aye e rhon ẹmro orodje na hin, aye ni nyarhẹn. Nughe! ukereti rẹ aye i mẹrẹnren ọke aye a ha obọrẹ ọren ọ va nẹ sa na, nọ kobaro rẹn aye, bọmọke ọ ki domaji oberun ekete ọmọ na ọ havwọ. 10 Ọke aye a mẹrẹn ukereti na, oma nọ merhenren aye omamọ. 11 Ọke aye a ruẹ uvuẹn oghwa na, aye ni mẹrẹn ọmọ na ọrhẹ i Meri ro rhiẹ izie. Aye ni sighwẹ ji gburhomu rhotọre riẹn. Aye ni rhie ekpeti aye ji yẹ ọmọ na ẹghẹlẹ sansan, nọyẹ oro, frankisẹnsi ọrhẹ mai. 12 Ọrẹn, fọkime Osolobrugwẹ ọ ha orhetio rẹn ehworhare na uvuẹn emena taghene aye i vwa ghwẹrioma bru i Hẹrọdu-u, aye ni nya izede ọrọrọ riẹ ẹkwotọre aye.
13 Ọke ehworhare na a nyarhẹn hin, nughe! ọmakashe i Jehova nọ homaphia rẹn i Josẹf uvuẹn emena, nọ ta riẹn: “Vẹnrẹn ne wu ha ọmọ na ọrhẹ izie, nẹ are i zẹ riẹ Ijipt. Are i daji oboran bọmọke wu ne ki rhon mie mẹ, fọkime Hẹrọd o mwuegbe rọ nọ gwọlọ ọmọ na ji kpe yi hwu.” 14 Omarana, Josẹf no vẹnrẹnren, nọ ha ọmọ na ọrhẹ izu ọmọ na uvuẹn ason ji riẹ Ijipt. 15 Nọ daji avwaye bọmọke i Hẹrọd o ki hwu. Ọnana nọ ha ẹmro i Jehova ọ tare nyoma ọmẹraro ọnẹyen te orugba, rọ tare: “Mi se ọmọ mẹ nẹ uvuẹn Ijipt rhe.”
16 Ọke i Hẹrọd o rhe taghene era ha ikereti bepha na i phiẹriẹ rhọ, ephan ni biomirien gbangbanhon. Omarana, no dje ihworho ye kpe emọ ehworhare ri ha ẹgbukpe eva riotọre uvuẹn i Bẹtlẹhẹm ọrhẹ ọsoso uvwrotọre ri kẹreriẹ. O ruẹ ọnana lele iyẹnrẹn rọ dabu nọ mie era ha ikereti bepha na kpahen ọke re vwiẹ ọmọ na. 17 Ọnana nọ ha oborẹ ọmẹraro Jerimaya ọ tare te orugba taghene: 18 “E rhon uvwele owu rọ viẹ ji beloma gbangbanhon uvuẹn i Rema. Reshẹl yọ viẹ fọkiẹ emọyen, o kwe ne bruie urhe-e, fọkime emọyen a havwiẹ ghwomara-an.”
19 Ọke i Hẹrọd o hwu hin, ọmakashe i Jehova nọ homaphia rẹn i Josẹf uvuẹn emena obẹ Ijipt. 20 Nọ ta riẹn: “Vẹnrẹn, ha ọmọ na ọrhẹ izie nẹ are i ghwẹrioma riẹ otọre Izrẹl, fọkime ihworho ra gwọlọ ọmọ na kpe bi, i hwu ne.” 21 Omarana, Josẹf no vẹnrẹnren ji ha ọmọ na ọrhẹ izu ọmọ na, aye ni ghwẹrioma riẹ otọre Izrẹl. 22 Ọrẹn, ọke ro rhon taghene Akẹleyọs yo suẹn i Judia ukperẹ ono rhiẹ Hẹrọd ro rhiẹ ọsẹ ye, ofẹn no mwu i Josẹf ro no riẹ oboran. Habaye, fọkime a ha orhetio riẹn uvuẹn emena, no riẹ otọre i Galili. 23 Josẹf no rhirhiẹ amwa owu re se i Nazarẹt, neneyo oborẹ emẹraro na i tare o te orugba taghene: “Ene seyi onyẹ i Nazarẹt.”*