Marhẹ Ekpako Na A Yẹ Ukoko Na Userhumu Lele?

Ame e vwo olori ẹga rẹ ame a kwosa riẹn uvuẹn ukoko ame-e. Ukpe ọrana, jerẹ oborẹ e rurie lele ọke rẹ ukoko Ilelikristi ukukaro ọ tonrhọ, a ha ehworhare ri mwuovwan mwu rhẹ ekpako ‘ne hẹrote ukoko Osolobrugwẹ na.’ (Acts 20:28) Ekpako enana i vwo omamọ onyerẹnkugbe rhẹ i Jehova, aye a kobaro owian uvuẹn ukoko na jeghwai hẹrote, ‘rhọ rẹ a gba ohworho ruẹ-ẹ, ọrẹn ọrẹ e ru nẹ ẹhẹn rhe harẹn Osolobrugwẹ, rhi fọkiẹ erere ọghware-e, jọrẹn ọrẹ e ruẹ sasasa.’ (1 Peter 5:1-3) Owian ọgo yẹ aye a wian fọkiẹ ọwan?

Aye a hẹrote ọwan jeghwai sẹrorẹ ọwan. Ekpako na a ha ọkpọvi ro nẹ i Baibol na ha phia, jeghwai yẹ ukoko na userhumu sẹrorẹ onyerẹnkugbe kpẹnkpẹnkpẹn ọrẹ aye rhẹ i Jehova. Rẹ aye e rhe taghene Osolobrugwẹ ọ yẹ rẹ aye ẹrhẹ ọghoghanren ọnana, ekpako na i vwe rhe sehiẹn ihworho yi-i, ukpe ọrana, aye ne toro ba omamọ erhirhiẹ rhẹ aghọghọ ọrẹ ọwan. (2 Corinthians 1:24) Jerẹ oborẹ osun-igegede ọ dabu hẹrote igegede yi owuowu, omaran ekpako na a je damoma neneyo aye rhe owuowọnwan uvuẹn ukoko na.—Proverbs 27:23.

Aye e yono ame oborẹ ame ene sabu ru ọhọre Osolobrugwẹ. Kọkprughwre kọkprughwre, ekpako na a ha uyono phia uvuẹn ukoko na neneyo esegburhomẹmro ọwan ọ gbanhonrhọ. (Acts 15:32) Ekpako enana re homakpanhotọre na a je kobaro uvuẹn owian aghwoghwo na, lele ame wian, jeghwai yono ame kpahen eghọn owian aghwoghwo na ephian.

Aye a ha urhebro harẹn imizu ukoko na owuowu. Nẹ aye sabu yẹ owuowọnwan uvuẹn ukoko na urhebro bọn omamọ onyerẹnkugbe rhẹ i Jehova, ekpako ukoko na a kọn bru owuowọnwan te oghwa yanghene uvuẹn Kingdom Hall, nẹ aye tiobọ nẹ urhebro rhẹ userhumu ro nẹ i Baibol rhe harẹn aye.—James 5:14, 15.

Ha ba owian ọrẹ aye uvuẹn ukoko na, ekpako buebun i ji vwo owian omobọ ọrẹ aye, ọrhẹ ekrun, rọ guọlọ ọke rhẹ ẹro-ete ọrẹ aye. Ofori taghene a ha ọghọ harẹn imizu enana rẹ a wian gbangbanhon na.—1 Thessalonians 5:12, 13.

• Me yẹ owian ekpako ukoko na?

• Izede ego yẹ ekpako na e dje ọdamẹ aye kpahen ame owuowọnwan?