Me Yẹ E Ruẹ Uvuẹn Oghọn Ukoko?

Ekrun i Bethel buebun a wian uvuẹn eghọn sansan, a hẹrote owian aghwoghwo na uvuẹn ẹkwotọre owu yanghene ghwẹ omaran. Aye ena sabu ga uvuẹn umẹ erhianrhian, ekete re fomu imagazini rhẹ ẹbe, ekete arha sẹrorẹ ẹbe, ekete e ru ikpekporo/ividio, yanghene hẹrote owian erọrọ uvuẹn ẹkwotọre na.

Branch Committee yẹ ọ hẹrote owian na. Ugboma Usuon na o tiobọ nẹ owian ọrẹ ana hẹrote oghọn ukoko harẹn Branch Committee, ro vwo ekpako ri mwuovwan awan esa yanghene ghwẹ omaran. Ọke ephian yẹ i committee na ọ nẹ iyẹnrẹn vwẹ Ugboma Usuon na kpahen ẹnyariobaro owian na uvuẹn ẹkwotọre owuowu rẹ i committee na ọ hẹrote rhẹ ebẹnbẹn rẹ a sabu homaphia. Iyẹnrẹn enana na ọ yẹ Ugboma Usuon na userhumu brorhiẹn kpahen urhomẹmro ene yono obaro na nyoma ẹbe ene fomu phia, ọrhẹ uvuẹn iyono rhẹ emẹvwa. Ugboma Usuon na e dje eri mevi harẹn aye riẹ eghọn ukoko na ọke ephian, neneyo aye ha ọkpọvi harẹn Branch Committee kpahen oborẹ aye ena wian owian a harẹn aye lele. (Proverbs 11:14) Ẹkwaphiẹrhotọre oghẹnrensan ọ haphiẹ, nẹ ọrẹ o mevi harẹn Ugboma Usuon na nẹ ọ ha ẹmro urhebro harẹn ere rhirhiẹ ẹkwotọre oghọn ukoko na.

Ọ hobọtua ikoko re ha ẹkwotọre na. Imizu ehworhare ri mwuovwan uvuẹn oghọn ukoko, ye kwerhọ ẹ ha mwu ikoko ekpokpọ. Imizu ehworhare a je hẹrote owian ekobaro, imishọnari rhẹ iniruo okinhariẹ rẹ a ga uvuẹn ẹkwotọre oghọn ukoko na. Aye a hẹrote ẹkwaphiẹrhọ emẹvwa sansan, hẹrote ẹ bọn i Kingdom Hall ekpokpọ, jeghwai niesua taghene ẹbe ikoko eguọlọre o te rẹ aye obọ. Kemrun kemrun re ruẹ uvuẹn oghọn ukoko otoro ba omamọ ẹnyariobaro dẹndẹn ọrẹ owian aghwoghwo na.—1 Corinthians 14:33, 40.

• Marhẹ Branch Committee a ha userhumu harẹn Ugboma Usuon na lele?

• Ewian ego yẹ a hẹrote uvuẹn oghọn ukoko?