Ọdamuni re Ruru Uvuẹn Oberun Ugbenu i Carmel

Uvie ọrẹ Israel o vwo irodje buebun ri biomurun omamọ, ọrẹn, Ahab owuọwan usuẹn eri mai biomu na. Ọye ọ rọnmọ ọmase ro rhiẹ ọvwọkon, rọ ji ha ẹga rẹn i Baal. Odẹ ye i Jezebel. Ahab ọrhẹ Jezebel ni lẹrhẹ ogame i Baal vuọn agbamwa Israel, aye na jeghwai kpe emẹraro i Jehova. Me yi Jehova o ruru? Jehova no dje urhomu vwe Ahab nyoma ọmẹraro Elijah.

Elijah nọ ta rẹn Orodje Ahab taghene fọkiẹ uruemru obiobiomu ọnẹyen, oso ọ vwọ samọ rhọ uvuẹn ẹkwotọre na-a. Ewawọ e rhe kwe họ ọsoso ẹgbukpe esa-a, orhọmo no kpe emọ Israel. Ọke oru, Jehova nọ rharhumu dje ọmẹraro Elijah bru Ahab. Orodje Ahab nọ tare: ‘Wẹwẹ ọguọlẹmro! Wẹwẹ yi suẹ ukpokpogho ọnana.’ Elijah nọ kpahenrhọ: ‘Orhiẹ omẹmẹ yi suẹ okaka na-a. Wẹwẹ yi soriẹ, nime wa ha ẹga rẹn i Baal. Jenẹ e ru ọdamuni ro no dje Osolobrugwẹ urhomẹmro na phia. Koko agbamwa Israel ephian ọrhẹ emẹraro i Baal rhẹ oberun Ugbenu i Carmel.’

Ihworho na ephian ni kokori uvuẹn oberun ugbenu na. Elijah nọ tare: ‘Are i brorhiẹn harẹn omobọ are. Orhianẹ i Jehova yẹ Osolobrugwẹ urhomẹmro na, are i nyalelie. Ọrẹn, orhianẹ i Baal yẹ osolobrugwẹ urhomẹmro na, are i nyalelie. Jene ru ọdamuni ọnana. Jenẹ emẹraro i Baal ri te 450 na, i mwuegbe izobo harẹn osolobrugwẹ aye jeghwai se yi, mẹmẹ ni ne ze izobo rẹn i Jehova jeghwai se yi. Osolobrugwẹ rọ kpahenrhọ use na nyoma erhanren, yẹ Osolobrugwẹ urhomẹmro na.’ Ihworho na ni kwerhọ ye.

Emẹraro i Baal ni ghini mwuegbe izobo rẹn osolobrugwẹ aye. Aye ni se osolobrugwẹ aye ọsoso ẹdẹ ọrana, aye na ta: ‘O Baal, kpahenrhọ rẹn ame!’ Nime i Baal o kwe kpahenrhọ rẹn aye-e, Elijah nọ ha aye djechẹẹ. Elijah nọ ta: ‘Are i dabu se yi gbangbanhon. Ọkezẹko ọ merhẹn, o fori nẹ ohworho ọ rhọmiẹ.’ Owuọwọn no teri, ọrẹn, emẹraro i Baal, e ji se osolobrugwẹ aye. Ọrẹn, ọ kpahenrhọ rẹn aye-e.

Elijah no fi izobo ọnẹyen rhẹ oberun agbarha na, no rhie ame rhọ ye. Nọ nẹrhomo vwe i Jehova: ‘O Jehovah, biko jenẹ ihworho enana i rhe taghene wẹwẹ yẹ Osolobrugwẹ urhomẹmro na.’ Ogege, Jehova no dje erhanren nẹ odjuwu rhe, erhanren na nọ torhẹ izobo na. Ihworho na ne bunu: ‘Jehova yẹ Osolobrugwẹ urhomẹmro na!’ Elijah nọ tare: ‘Are i vwe jenẹ emẹraro i Baal owuorowu zẹ vabọ-ọ!’ Ne kpe emeraro i Baal ri te 450, ẹdẹ ọrana.

Ọke avwre ọkokamu ọ homaphia oberun urhie na, Elijah nọ ta rẹn Ahab: ‘Ogiribo ọ sa. Mwuegbe okalokpọ owọnren ọnọ, ne wu riẹ oghwa ọnọ.’ Aruọke na no birhọ, aphẹrẹ no zuẹ, oso ọduado nọ rhọre. Okaka na ọ vabu dobọji ne. Ahab nọ ghwa okalokpọ owọnren ọnẹyen phẹphẹrẹ. Ọrẹn, Elijah nọ ha oghwẹ zẹ vrẹn okalokpọ owọnren Ahab nyoma userhumu i Jehova! Ọrẹn, wu rorori taghene ikpokpogho Elijah i te oba ne? Jene yono kpahiẹn.